Roma 2 - Tennet

Lo̱ki̱ko̱ ci Ta̱mu̱ta̱dde̱no̱

¹ I̱yo̱ko̱ zin, iróng i̱nna̱ anyai gool ci a̱vi̱re̱, i̱nna̱ e̱e̱ti̱ ci ettedik e̱e̱t imma lo̱ki̱ko̱ ko̱, eci go̱o̱le̱ ci ettede i̱nna̱ lo̱ki̱ko̱ ko̱, edezi i̱nna̱ ele cunne, eci i̱nna̱ ogoni kaal ne̱ke̱ ele.

² Ka̱gga̱ naga ilem Ta̱mu̱ta̱dde̱n oroot ngati apahek ol wak ogon mu̱nye̱n do̱o̱k lo̱ki̱ko̱.

³ Ming ettedik i̱nna̱ e̱e̱t ci diiri lo̱ki̱ko̱, imma ngatu ogoni kaal ne̱k gerzek ke̱, i̱no̱ni̱ i̱nna̱ de̱de̱ iróng atin Ta̱mu̱ta̱dde̱n ettedeki lo̱ki̱ko̱ ki ol ne̱ke̱ do̱o̱k nga̱to̱de̱?

⁴ I̱no̱ni̱ i̱nna̱ bunnat ci Ta̱mu̱ta̱dde̱no̱ a̱ppwe̱, icima ki zinin cinne alali ci iróng atin enne aburneki nong? Iróng i̱nna̱ a̱gga̱ zoz ci orong Ta̱mu̱ta̱dde̱n ngatunne abunna ming ungnek mu̱nye̱n lo̱o̱c kar bodak nonno?

⁵ Abarik odoi i̱nne̱t oo kak, iróng orongi bodak Ta̱mu̱ta̱dde̱n. U̱tu̱gu̱ zin i̱nna̱ zoz ci gerze, i̱ta̱k zin mozinet ci Ta̱mu̱ta̱dde̱no̱ oo cunne, okko atin enne ettedeki lo̱ki̱ko̱ ming uk looci uṯurehe.

⁶ Okko atin Ta̱mu̱ta̱dde̱n, “Aanyik ngenngene kaal go̱o̱le̱ ci u̱tu̱gu̱ enne.”

⁷ Aanyik atin enne baiz ci aave udut e̱e̱t wa anime no̱ngi̱tto̱n, ogon kaal cik abunna, kar atin enne ki̱tto̱ di̱ngdi̱ngo̱n ci Ta̱mu̱ta̱dde̱no̱, ki baiz ci aave udut.

⁸ Imma ngati ol wak a̱ppi̱nte̱k zi̱nze̱tti̱, ogon kaal cik gerzek, i̱ye̱la̱ atin enne mozinet cinne ngati e̱e̱t ci abure zoz ci een de̱de̱.

⁹ Edez atin Ta̱mu̱ta̱dde̱n ol wak abak mu̱nye̱ne̱ kipirta oroot. Iróng enne ahal ol wak een Ya̱u̱d icima ol wak iróng een Ya̱u̱d, edez do̱o̱k.

¹⁰ Ma̱i̱je̱ ol wak ogon kaal cik abunna, amuc atin Ta̱mu̱ta̱dde̱n nogo, aanyik di̱ngdi̱ngo̱n, ki gano, ming e̱e̱ggi̱n nege Ya̱u̱d icima ol cik iróng een Ya̱u̱d.

¹¹ Iróng Ta̱mu̱ta̱dde̱n irez ol u̱gge̱ do̱.

¹² Imma ol wak abaccit iróng e̱e̱ggi̱n Ya̱u̱d eci nege iróng a̱gga̱ lo̱ti̱nno̱k wak Musesi, ngen Ta̱mu̱ta̱dde̱n ettedik nogo lo̱ki̱ko̱ dee iróng een go̱o̱le̱ ci lo̱ti̱nno̱u̱. Ma̱i̱je̱ ol wak ogon mu̱nye̱n ngati a̱gga̱we̱ lo̱ti̱nno̱k, okko enne ettedik nogo lo̱ki̱ko̱ go̱o̱le̱ ci lo̱ti̱nno̱u̱.

¹³ Elemi Ta̱mu̱ta̱dde̱n ol wak o̱ngo̱o̱le̱ lo̱ti̱nno̱k ciginnek, iróng enne elemi ol wak aziye gaganiko.

¹⁴ Anyak ol u̱gge̱ cik iróng een Ya̱u̱d, ol cik iróng anyak lo̱ti̱nno̱k wak Musesi, ma̱i̱je̱ ngatu o̱ngo̱o̱le̱ lo̱ti̱nno̱k cik Ta̱mu̱ta̱dde̱no̱ ming ngen kicinnet, anyak nege zi̱nze̱tti̱nne̱.

¹⁵ Imma kaala cik ogon nege niko, i̱ye̱la̱ ming a̱gga̱ nege lo̱ti̱nno̱k cik Ta̱mu̱ta̱dde̱no̱, eci ming ogon nege kaal cik gerzek icima cik abunna, i̱ye̱la̱ zoz ci aave zi̱nze̱tti̱nne̱ cigge̱k zoz neci ming abunna icima gerza.

¹⁶ Ming okko atin Ta̱mu̱ta̱dde̱n ettedik ol lo̱ki̱ko̱, i̱tto̱na̱ atin enne Ye̱su̱ Ki̱ri̱sto̱ kettedik ol lo̱ki̱ko̱ kaale cik ogon nege lo̱mu̱k ki i̱yo̱ko̱ ming e̱he̱rye̱ warage cu ko̱.

Ya̱u̱d ki Lo̱ti̱nno̱k

¹⁷ Ming anyak ol u̱gge̱ ngatinno̱ng, niga Ya̱u̱di̱ cik a̱nnu̱ ne ka̱gga̱yya̱ Ta̱mu̱ta̱dde̱n, ming arikku zi̱nze̱tti̱ lo̱ti̱nno̱k kar ngatu odongnyu e̱le̱tti̱;

¹⁸ ming a̱gga̱yyu̱ niga zoz cinne kar u̱tu̱gu̱z gi̱i̱ ci een de̱de̱ eci lo̱ti̱nno̱k cik i̱ye̱le̱kku̱ng;

¹⁹ ming a̱gga̱yyu̱ e̱e̱ggi̱nnu̱ niga ol cik i̱ye̱le̱kku̱ ol wak iróng a̱gga̱ zoz ci Ta̱mu̱ta̱dde̱no̱ gool, izet urez ci ol wak abak mu̱hu̱ra̱.

²⁰ Annu niga ne, a̱gga̱yyu̱ lo̱ti̱nno̱k cik Ta̱mu̱ta̱dde̱no̱ wak anyak genyiz ki zoz ci een de̱de̱, i̱lo̱ti̱kku̱ wo̱ye̱ ol cik adite iina kar edemezit dooli cikidik.

²¹ Abarik edemezu niga ol u̱gge̱ ming ngen edemezit e̱le̱tti̱ cuggo̱k? Uwahekku ol a̱nnu̱ ne, ma ogorzinnu. Ma̱i̱je̱ ngatu e̱e̱ggi̱nnu̱ niga ogoryak.

²² A̱du̱wa̱kku̱ ol a̱nnu̱ ne, abunna iróng ol orooto ki ngaai. Ma i̱yo̱ko̱ niga iróng a̱wu̱lu̱ e̱le̱tti̱? Amarinnu niga ol wak ala to̱do̱yyo̱k wak oova ol kizeto ta̱mu̱ta̱dde̱ne̱t cigge̱k, imma ngatu niga ogorozzu Ce̱e̱z wa Ta̱mu̱ta̱dde̱no̱.

²³ Odongnyu niga e̱le̱tti̱ zo̱ze̱ ci lo̱ti̱nno̱u̱, imma ngatu iróng o̱ngo̱o̱li̱nnu̱ lo̱ti̱nno̱k, abarik anyakttau Ta̱mu̱ta̱dde̱n a̱li̱ya̱n.

²⁴ E̱he̱rye̱ Warage ci Ta̱mu̱ta̱dde̱no̱ azi ne, “Anyikku niga ol wak iróng een Ya̱u̱d kodomit zar cik Ta̱mu̱ta̱dde̱no̱ zo̱ze̱ ci u̱tu̱gu̱zzu̱ niga.”

²⁵ Abunna keer cunno̱ng ci ettede ol vi̱ca̱vi̱cce̱t ko̱, ming azunnu niga lo̱ti̱nno̱k cik Ta̱mu̱ta̱dde̱no̱. Ming iróng niga o̱ngo̱o̱li̱nnu̱ lo̱ti̱nno̱k, ogonnu ki ol cik iróng a̱gga̱ lo̱ti̱nno̱k.

²⁶ Ming azunne ol wak iróng etted vi̱ca̱vi̱cce̱t ko̱ lo̱ti̱nno̱k de̱de̱, ubunntta nege ogon ki ol wak etteddit vi̱ca̱vi̱cce̱t.

²⁷ Imma e̱e̱ti̱ ci iróng een Ya̱u̱d kar ku̱tu̱gu̱ kaal cik orong Ta̱mu̱ta̱dde̱n, ettedekkung atin enne lo̱ki̱ko̱ ol balik etteddit vi̱ca̱vi̱cce̱t ko̱. Ming etteddu niga vi̱ca̱vi̱cce̱t nu̱nu̱n, kar bo̱do̱k kanyait zoz ci Ta̱mu̱ta̱dde̱no̱ e̱he̱rye̱, iróng niga o̱ngo̱o̱li̱nnu̱ de̱mzi̱ne̱t neci.

²⁸ Ki i̱yo̱ko̱ ming abak e̱e̱ti̱ ki olli Ya̱u̱do̱ kar etteddit vi̱ca̱vi̱cce̱t ko̱, iróng zoz necu aanyik nonno kize Ya̱u̱do̱c de̱de̱.

²⁹ Abunna e̱e̱ti̱ ming een Ya̱u̱do̱c de̱de̱, etted wucic vi̱ca̱vi̱ca̱, o̱ngo̱o̱le̱ lo̱ti̱nno̱k cik Ta̱mu̱ta̱dde̱no̱. Amuda e̱e̱ti̱ rezinet ci Ta̱mu̱ta̱dde̱no̱ de̱de̱ go̱o̱le̱ ci aanyik enne Manyi zinin cinne, iróng een go̱o̱le̱ ci ettede ol vi̱ca̱vi̱cce̱t, een abarik Vongiza. Anyik Ta̱mu̱ta̱dde̱n ka̱ma̱yu̱k e̱e̱t, iróng een ol cik diirik.