Roma 14 - Tennet

E̱e̱t cidici tu̱we̱ne̱t ki e̱e̱t ci a̱ppwe̱ tu̱we̱ne̱t

¹ Elemtta e̱e̱t ci anyak tu̱we̱ne̱t ci dici, ma adangnyu nonno eci enne i̱no̱n kaal cik aavtte do̱ ngati kaal cik i̱no̱nnu̱ niga.

² Anyak ol u̱gge̱ cik a̱tu̱we̱ aanyik tu̱we̱ne̱t cinne̱ng kadait kaal do̱o̱k, imma ol uggak wak anyak tu̱we̱ne̱t ci dici, adak zin nege jati do̱.

³ Imma e̱e̱ti̱ ci adak kaal do̱o̱k, gerza ming ibbez enne ol wak iróng adak kaal u̱gge̱ ko̱. Imma e̱e̱ti̱ ci abure kaal u̱gge̱ ko̱, gerza ming apahek enne gerziten ol wak adak kaal do̱o̱k ko̱, eci Ta̱mu̱ta̱dde̱n elema nogo do̱o̱k.

⁴ E̱e̱ni̱ i̱nna̱ ngene kar pahek du̱ca̱i̱t ci e̱e̱t imma zoz ko̱? Manyi du̱cca̱k do̱ niko ci odola zoz ci du̱cca̱k ciginnek, kar atin Ta̱mu̱ta̱dde̱n keela nogo ku̱tu̱gu̱zzo̱ ju̱rru̱m.

⁵ Azi gon ol uggak ne, riil i̱i̱te̱ni̱ imma kommog i̱i̱te̱n co̱de̱ ke̱. Ovvo ol uggak azi ne, atubo i̱i̱te̱ni̱ do̱o̱k. Abarik abunna e̱e̱ti̱ ming a̱gga̱ zoz necu zinine cinne ju̱rru̱m, i̱i̱te̱n jang ci riili, icima jang ci labak.

⁶ Imma e̱e̱ti̱ ci a̱tu̱we̱ ci aanyik i̱i̱te̱n co̱de̱ kize ci riili, ogon Manyi bu̱k niko. Imma e̱e̱ti̱ ci adak i̱di̱ng, adahek enne Manyi, eci enne adahek Ta̱mu̱ta̱dde̱n go̱o̱le̱ necu. Imma e̱e̱ti̱ ci iróng adak i̱di̱ng, ogonik enne Manyi kar kaanyik Ta̱mu̱ta̱dde̱n zany kaale cik aanyik nonno kadak ko̱.

⁷ I̱llo̱i̱ e̱e̱t ci aruge zo̱ze̱ ci ele cinne do̱, i̱llo̱i̱ bo̱do̱k e̱e̱t ci a̱da̱i̱ zo̱ze̱ ci ele cinne do̱.

⁸ Ming karuge, karuge naga zo̱ze̱ Manyi; ming ka̱da̱i̱ naga, ka̱da̱i̱ naga zo̱ze̱ ci Manyi. I̱yo̱ko̱ zin, ming karuge, icima ka̱da̱i̱, ke̱e̱ggi̱n naga olli Manyi.

⁹ Eci zin zo̱ze̱ necu, a̱da̱k Ki̱ri̱sto̱ kar kitinga daiza kurug, kar enne kize Manyi ci olli daizo ki ci olli rugeto.

¹⁰ I̱nne̱t ele, nya ming apahek i̱nna̱ gonoggu wak a̱tu̱we̱ ki i̱nna̱ zoz ko̱? Icima nya ming ibbezi i̱nna̱ goonu? A̱kku̱ atin i̱i̱te̱ni̱ ci kovvo naga do̱o̱k kabile ngu̱me̱ ci Ta̱mu̱ta̱dde̱no̱, kar kapahekket agit do̱o̱k lo̱ki̱ko̱.

¹¹ E̱he̱rye̱ Warage ci Ta̱mu̱ta̱dde̱no̱ zoz ci azi Manyi ne, “‘Ki̱tto̱ni̱k ele cinanni, akanneka atin ol do̱o̱k u̱zu̱ngti̱nne̱; innat atin ol do̱o̱k Ta̱mu̱ta̱dde̱n.’”

¹² Kabile atin naga e̱co̱de̱ e̱co̱de̱ i̱i̱te̱ne̱ neci ngu̱me̱ ci Ta̱mu̱ta̱dde̱no̱, bak koobek nonno kaal cik abunna ki kaal cik gerzek kogon ba̱li̱ye̱ naga lo̱o̱ta̱ ngatu.

¹³ Orong ibilizet zoz ci apahekku ol u̱gge̱ lo̱ki̱ko̱ ko̱. Abarik, odolta zi̱nze̱tti̱nne̱ cuggo̱k, ma e̱e̱ggi̱nnu̱ ol cik adiryu gotonogget ki ngonogget cik a̱tu̱we̱ no̱ngi̱tto̱ne̱ baize cinne̱ng.

¹⁴ Ka̱gga̱ anna ju̱rru̱m, eci ka̱vvu̱ta̱ ki Manyi Ye̱su̱, i̱llo̱i̱ da̱i̱ne̱t cik ngoronyik, nege do̱ e̱le̱tti̱ne̱. Ma̱i̱je̱ ming ize e̱e̱ti̱ ne, ngoronye da̱i̱ne̱t ne̱ko̱, ngoronye zin de̱de̱ ngatinne.

¹⁵ Ming iróng zinin ci gotonogget icima ngonogget tu̱we̱nta̱ orong da̱i̱ne̱t cik adai i̱nna̱ ko̱, iróng i̱nna̱ anyai rezinet zinine cunne. Ma egerzanni goonu da̱i̱nte̱ cik adai i̱nna̱ ko̱, eci Ki̱ri̱sto̱ u̱ru̱we̱ ka̱da̱k zo̱ze̱ cinne.

¹⁶ Ma anyike ol kozozit da̱i̱nte̱ cik adai i̱nna̱ a̱gga̱ ming abunna ko̱, kizeto ne kaal cik mu̱nye̱nu̱.

¹⁷ Eci ba̱a̱li̱ne̱t ci abale Ta̱mu̱ta̱dde̱n ol ko̱, iróng een da̱i̱ne̱t ki kaal cik kaudi. Abarik obod ki bunnat ci kabunanne naga ngu̱me̱ ci Ta̱mu̱ta̱dde̱no̱ ki gano ki talninet ci a̱kku̱ Vongize ci A̱li̱le̱.

¹⁸ Eci ming a̱li̱ngli̱nge̱k e̱e̱ti̱ Ki̱ri̱sto̱ go̱o̱le̱ necu, atalne atin Ta̱mu̱ta̱dde̱n kar ol bu̱k kelemtain.

¹⁹ Abunna zin gon odohize kogon kaal cik abunna kar kabait yahe ki ol wak a̱tu̱we̱ do̱o̱k, kar tu̱we̱ne̱t cinna̱ng kuk oowa.

²⁰ Ma egerzannu zoz ci Ta̱mu̱ta̱dde̱no̱ zo̱ze̱ ci da̱i̱nto̱. Abunna da̱i̱ne̱t do̱o̱k ngu̱me̱ ci Ta̱mu̱ta̱dde̱no̱, gerza zin ming adak e̱e̱ti̱ da̱i̱ne̱t cik anyike gotonogget ki ngonogget tu̱we̱nta̱ kurubta no̱ngi̱tto̱n.

²¹ Abunna zin ming iróng adai i̱di̱ng icima audi merte icima ogoni gi̱i̱ imma ci anyike gotonogget ki ngonogget tu̱we̱nta̱ ki̱tto̱zo̱ mu̱nye̱n.

²² Ming anyai i̱nna̱ kaal cik a̱tu̱ i̱nna̱, anyike kaal cigunnek ki Ta̱mu̱ta̱dde̱n. U̱mu̱yu̱k Ta̱mu̱ta̱dde̱n e̱e̱t ci ogon gi̱i̱ ci a̱gga̱ enne een gi̱i̱ ci abunna.

²³ Imma e̱e̱ti̱ ci a̱ti̱ko̱ ki zinin kaale cik adak enne, edez atin Ta̱mu̱ta̱dde̱n nonno, eci enne adakce ci iróng a̱tu̱ Ta̱mu̱ta̱dde̱n, eci kaala cik ogon e̱e̱ti̱ ongorko ki tu̱we̱ne̱t cinne, anyaha mu̱nye̱n.