O̱no̱zzo̱k 9 - Tennet

Utubuwet zin anjilonya uggak turet

¹ Utubu zin anjilo wa een tu̱r ko̱ ture cinne. Kedenya anna munyunyoc ming i̱i̱na̱ ta̱mu̱-kenga i̱i̱na̱k lo̱o̱c. Anyozik zin ba̱li̱ye̱ munyunyoc neci joroni ci oowe lo̱o̱k ci wu̱u̱ni̱ oroot ko̱.

² Baling okko enne oo lo̱o̱k neci, iyowa bbu̱rre̱ti̱ ci ogon ki bbu̱rre̱ti̱ ci a̱ppwe̱ atuz nginti a̱ddi̱ki̱re̱. Izeto i̱i̱ ki ta̱mu̱-keng do̱o̱k gi̱da̱nge̱ ne ter zo̱ze̱ ci bbu̱rre̱t neci iyowa lo̱o̱we̱ neci wu̱u̱ni̱ ke̱.

³ Iyokta zin giroc bbu̱rre̱te̱ necu, kar zin ki̱vi̱ta̱k lo̱o̱c kar kanyait komiz ki i̱yo̱ko̱ itena lo̱o̱ta̱ ngatu ko̱.

⁴ U̱du̱kta̱k zin giroc ne̱ke̱ gerza ming adak arte cik lo̱o̱tu̱, icima keen u̱gge̱ icima arte, abarik nege adak ol cik iróng anyak baayenit ci Ta̱mu̱ta̱dde̱no̱ ngu̱mtti̱nne̱ cigge̱k.

⁵ Iróng anyonik nogo doizi ci kar ku̱ru̱kte̱ nogo ka̱da̱i̱to̱, abarik a̱gi̱d nogo nyelowi cik een tu̱r. Okko ciritoni ci anyak nege ogon ki ciritoni ci itowo ming ovoc e̱e̱t.

⁶ Imma i̱i̱nya̱we̱ ne̱ke̱, ovvo ol cik diirik orong daiz, abarik iróng nege amuda; orongit ka̱da̱i̱to̱, ma̱i̱je̱ daizi atin abure nogo.

⁷ Ogon giroc kiwagon vartange cik a̱vvu̱to̱ kizeto cik ere illa. Aim o̱o̱tti̱ne̱ kaal cik ogon ki lulukwana cik e̱e̱ggi̱n dhahab, ovvo ngu̱mti̱ cigge̱k a̱du̱wo̱ ki ngu̱mti̱ cik ol cik diirik.

⁸ Ovvo imana cigge̱k ogon ki imana cik ngaanu, ovvo nyigita ogon ki nyigita cik maattu.

⁹ Anyak nege zi̱nze̱tti̱nne̱ gi̱i̱ ci adimanai ziiye. Ma̱i̱je̱ ṯaabana cigge̱k abadi kiwagon vartange cik meelek a̱gu̱ru̱t toromilet ovvo illa.

¹⁰ Anyak nege ku̱u̱li̱ cik ogon u̱u̱ce̱zi̱ cinne̱ng ki ci itowo, kar ku̱u̱li̱ cigge̱k kanyait doiz ci a̱gi̱dde̱ nege ol nyelowi tu̱r.

¹¹ Anyak nege alaan ci abal nogo een anjilo ci a̱kku̱ lo̱o̱we̱ neci wu̱u̱ni̱ ke̱, een zara ciginnek utuge ci olli I̱bu̱ru̱ ko̱ ne Abaddon, kar utuge ci Gi̱ri̱yo̱ een zara Apollyon.

¹² Ozoroc zin nonga cik o̱o̱tti̱nu̱; ovvo zin nonga cik e̱e̱ggi̱n rama ko̱ ovvo a̱vvu̱ atin vu̱rrta̱.

¹³ Utubu zin bo̱do̱k anjilo wa een torkonom ko̱ ture cinne, kiziya zin anna muluk ci a̱kku̱ o̱to̱ne̱ cik e̱e̱ggi̱n we̱c i̱te̱le̱ ci een dhahab ngati Ta̱mu̱ta̱dde̱no̱.

¹⁴ A̱nne̱k zin mului anjilo ci een torkonom ci abu ture ko̱ ne, “I̱nna̱, ooga anjilonya cik e̱e̱ggi̱n we̱c ecebonik liil ci Yuvurataz a̱ddi̱ki̱re̱ ko̱.”

¹⁵ Kar anjilonya balik e̱e̱ggi̱n we̱c aavtte nginati ke̱, kereyo ju̱rru̱m kerec i̱i̱ cu ki i̱i̱te̱n ki nye̱lo̱k ki e̱rki̱t cu, koogtai abunna ming ovvo a̱ru̱k ol cik diirik lo̱lo̱i̱t cidici ka̱da̱i̱to̱.

¹⁶ Kiziya anna anyak nege aciir cik e̱e̱ggi̱n vucak obet rama (200,000,000) cik meelek giir.

¹⁷ Kicina o̱no̱zo̱we̱ vartange ki ol cik ottod nogo ko̱ ming anyak kaal ciko: Anyak gi̱i̱ ci aim nege zi̱nze̱tti̱nne̱ ko̱ guulnya ciko, ma̱ri̱k kiwagon gwa̱a̱, culak ki ci gi̱da̱ng kar bo̱do̱k kize maan kiwagon bu̱rru̱co̱c ecito. Ovvo o̱o̱tti̱ cik vartangenu atubo ki o̱o̱tti̱ cik maattu, ovvo u̱tu̱ge̱tti̱ne̱ cigge̱k iyowa gwa̱a̱ ki bbu̱rre̱t ki bbu̱u̱r.

¹⁸ Ovvo ol lo̱lo̱i̱t cidici lo̱o̱ta̱ ngatu a̱ru̱we̱ ka̱da̱i̱to̱ zerenine cik e̱e̱ggi̱n i̱i̱yo̱ gwo̱o̱yo̱, bbu̱rre̱t ki bbu̱u̱r ci iyowa u̱tu̱ge̱tti̱ne̱ cigge̱k.

¹⁹ Anyak vartange komiz cinne̱ng u̱tu̱ge̱tti̱ne̱ ki ku̱u̱li̱; ogon ku̱u̱li̱ cigge̱k kiwagon uwanya, anyak u̱tu̱ge̱tti̱ cik engede ol kipirta oroot.

²⁰ Imma ol balik ngen ku̱ru̱kte̱ zerenine ke̱, iróng ungnek kaal cik adiman nege azzine cigge̱k; iróng ngen abilne gool ci a̱di̱ngdi̱nga̱ne̱ nege kuulo cik lo̱rye̱nta̱k, ki to̱do̱yyo̱k cik adimanai zu̱rte̱ne̱ne̱ cik een dhahab, ki ziik cik ataltali, ki biyen ki keen, to̱do̱yyo̱k cik iróng acine icima aziye icima owo.

²¹ Iróng zin nege aara mu̱nye̱n cik amunye nege ol, ki cik adimane nege kaal cik ngaretu, a̱li̱ya̱kze̱ti̱nu̱ ki cik ogorak.