O̱no̱zzo̱k 8 - Tennet

U̱du̱lta̱i̱ mutula turgerem waraga

¹ Baling u̱du̱l Nyoon mutulac wa een turgerem ko̱ waraga, azi ne, ijakce da̱ looci lai ta̱mu̱-kenga kuwe degiganya moten i̱i̱yo̱.

² Kar anna kicin anjilonya turgerem cik abile ngu̱me̱ ci Ta̱mu̱ta̱dde̱no̱, kar kanycozik nogo tureta turgerem cik abu nege.

³ I̱ki̱ya̱ zin anjilo imma ci anyak gi̱i̱ ci a̱bbu̱ru̱ta̱ne̱ nege mutula i̱te̱la̱, kar ki̱ki̱ya̱ kibil i̱te̱la̱ oowa. Anyozik nonno mutula cik meelek ki̱ki̱ya̱ kumuce i̱te̱le̱, ki lawinet ci alawe olli Ta̱mu̱ta̱dde̱no̱ a̱li̱le̱, aave i̱te̱le̱ ci een dhahab ngati aave leceri.

⁴ Uk zin bbu̱rre̱ti̱ ci mutulau a̱tte̱ ci anjilo ki lawinet ci ol wak Ta̱mu̱ta̱dde̱no̱ a̱li̱le̱ rok nginti aave Ta̱mu̱ta̱dde̱n.

⁵ Idima zin anjilo neci gi̱i̱ ci anyak mutula ko̱, kar zin kibbizitan gwo̱o̱ye̱ ci aave i̱te̱la̱, kar zin ku̱ju̱ke̱k lo̱o̱c; kar nginati kabad kiwagon borowoci, katalany kar looci kotomo kize ki̱ri̱ki̱ri̱k.

Tubuwenet turet

⁶ Kar zin anjilonya wak e̱e̱ggi̱n turgerem anyak turet turgerem ko̱ kidimanit kar atidic kutubuwet turet ne̱ke̱.

⁷ Utubu zin anjilo ci een oo ture cinne, kar zin teltelena ki̱ta̱zzo̱ ta̱mu̱-kenga ki gwo̱o̱, ongotane ki bi̱ye̱. Utuze zin looci lo̱lo̱i̱t co̱de̱ cidici ngati e̱e̱ggi̱nne̱ i̱i̱yo̱, u̱tu̱zze̱ zin keena ki arte lo̱lo̱i̱t cikidik bu̱k.

⁸ Utubu zin anjilo wa een rama ko̱ ture cinne, kar zin anyak gi̱i̱ ci a̱ppwe̱ ogon kiwagon be ci atuze ele do̱o̱k, ku̱ju̱ko̱zi̱k nyatapar ci a̱ddi̱ki̱re̱. Utuhuye zin maama lo̱lo̱i̱t cidici kize bi̱ye̱,

⁹ a̱da̱i̱to̱ zin kaala lo̱lo̱i̱t cikidik cik abak nyatapare ci a̱ddi̱ki̱re̱ ko̱, kar i̱be̱tta̱ uggak cikidik ki̱li̱bte̱.

¹⁰ Utubu zin anjilo wa een i̱i̱yo̱ ko̱ ture cinne, kar zin munyunyoci ci a̱ddi̱ki̱re̱ alanyit kiwagon urezi ki̱tta̱ mer ta̱mu̱-kenga, ki̱ta̱k moren lo̱lo̱i̱t cikidik ki ngintik anyak ebere cik maamu.

¹¹ Azi zar cik munyunyoc necu ne, Akaka. Utuhuye zin maama cikidik akatkatit oroot, kar zin ol cik meelek ka̱da̱i̱to̱ ngati aude maam ne̱ke̱.

¹² Utubu zin bo̱do̱k anjilo wa een we̱c ko̱ ture cinne. Ovoce zin i̱i̱ abanyit cidici, okko bo̱do̱k abanyit cidici nye̱lo̱wo̱ ovoce ki munyuny bu̱k, utuhuye zin abanyo cikidik ngatinne̱ng do̱o̱k izeto gi̱da̱nge̱. A̱vvu̱ zin lo̱lo̱i̱ti̱ cidici kize mu̱hu̱r ki̱zzi̱ tukuleci, okko zin bo̱do̱k ba̱a̱li̱ni̱ anyak lo̱lo̱i̱t cidici ci a̱zze̱ne̱ tukuleci.

¹³ Kicina zin anna o̱no̱zo̱we̱, kiziya zin anna u̱du̱va̱ni̱t ci a̱ku̱l ta̱dde̱na̱ awe muluwe ci a̱ppwe̱, ize ne, “Izeto nonga o̱lle̱, izeto nonga o̱lle̱! Izeto nonga o̱lle̱ ngati olli lo̱o̱tu̱, eci ovvo anjilonya cik e̱e̱ggi̱n i̱i̱yo̱ ko̱ ovvo abu turet cigge̱k.”