O̱no̱zzo̱k 7 - Tennet

Izeto ol cik een 144,000 ko̱ cik Ta̱mu̱ta̱dde̱no̱

¹ Imma bali vu̱rrta̱ kicina anna Joni anjilonya we̱c cik abile o̱to̱ cik lo̱o̱tu̱ e̱e̱ggi̱n we̱c ko̱, alam ngoot ci lo̱o̱tu̱ kar iróng ngooti a̱ti̱k lo̱o̱c, icima nyatapar ci a̱ddi̱ki̱re̱ icima keet imma.

² Kar anna kicin anjilo imma ci a̱kku̱ o̱to̱ne̱ ci je̱e̱ni̱, anyak baayenit ci Ta̱mu̱ta̱dde̱n wagon aruge ko̱ a̱tta̱. Utu zin enne anjilonya cik e̱e̱ggi̱n we̱c ko̱ muluwe ci a̱ppwe̱, e̱e̱ggi̱n nege anjilonya cik anyonike nogo doizi ci kar kegerezanit lo̱o̱c ki nyatapar ci a̱ddi̱ki̱re̱:

³ “Ma egerzannu lo̱o̱c icima nyatapar ci a̱ddi̱ki̱re̱, icima keen, zee kartiya naga a̱bi̱ce̱c o̱o̱tti̱ cik du̱cca̱k cik Ta̱mu̱ta̱dde̱n cinna.”

⁴ Kar zin anna kizik nimira ci du̱cca̱k wak u̱ru̱kto̱zi̱k nogo a̱bi̱ce̱c o̱o̱tti̱, e̱e̱ggi̱n nege i̱bbo̱nge̱t o̱bo̱n co̱de̱ ki i̱bbo̱nge̱t moten we̱c ki i̱bbo̱nge̱t we̱c (144,000) booryowe cik olli Israilo do̱o̱k.

⁵ E̱e̱ggi̱n ol boore ci Ju̱da̱ i̱bbo̱nge̱t omoto ki i̱bbo̱nge̱t rama (12,000), ovvo boore ci Rubeni e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), ovvo boore ci Gadi e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000),

⁶ ovvo boore ci Asheri e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), ovvo boore ci Naphtali e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), ovvo boore ci Manassehi e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000),

⁷ ovvo boore ci Si̱mo̱ne̱ e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), ovvo boore ci Le̱vi̱ e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), ovvo boore ci Issachari e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000),

⁸ ovvo boore ci Zebuluni e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), ovvo boore ci Yosevo e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000), kar boore ci Benjamini e̱e̱ggi̱n ol i̱bbo̱nge̱t omoto ki i̱bbo̱nge̱t rama (12,000).

Koole ci a̱ppwe̱ aim ru̱u̱ma̱ni̱ cik voorik

⁹ Imma baling edeccai zoz necu, kicina ngu̱me̱ cinanni koole ci a̱ppwe̱ oroot iróng wo̱ye̱ e̱e̱ti̱ imma a̱gi̱li̱, a̱vvu̱ lo̱o̱co̱we̱ do̱o̱k, booryyok do̱o̱k, ki ol cik ozoz u̱tu̱ge̱tti̱ cik aavtte do̱ do̱, abile nege lecera ojonun ngu̱me̱ ci Nyoono. Aim nege do̱o̱k ru̱u̱ma̱ni̱ cik voorik, a̱gga̱m eetele azzine cigge̱k.

¹⁰ Kar zin kegerenyit mulukwane cik a̱ppi̱nte̱k, azi ne, “A̱kku̱ ti̱ri̱ze̱ne̱t ngati Ta̱mu̱ta̱dde̱n wanna, nonno ci aave lecere ci alaanzetu ta̱mu̱-kenga, kar zin bo̱do̱k ngati Nyoono.”

¹¹ Ovvo anjilonya do̱o̱k abile aburuk lecer wa alaanzetu ki lo̱ddi̱ki̱re̱ ki kaal cik aruge e̱e̱ggi̱n we̱c. A̱ka̱tte̱k zin nege u̱zu̱ngti̱nne̱ lecera kar zin ki̱di̱ngdi̱nga̱ni̱t Ta̱mu̱ta̱dde̱n,

¹² izeto ne, “Een enne de̱de̱! Kinnatit Manyi kar bo̱do̱k ki̱di̱ngdi̱nga̱ni̱t nonno anyak enne genyiz ki zany ki ngo̱li̱ne̱t ki doiz, eci enne ize Ta̱mu̱ta̱dde̱n cinna udut. Een enne de̱de̱!”

¹³ I̱jji̱nna̱ zin e̱e̱ti̱ co̱de̱ lo̱ddi̱ki̱re̱i̱ ne̱ke̱, a̱nne̱ka̱ ne, “Iko ngene cik anyak ru̱u̱ma̱ni̱ cik voorik ko̱, a̱vvu̱ nege nga?”

¹⁴ Kabariza zin anna, “Ddi̱ki̱ryo̱i̱t, a̱gga̱ i̱nna̱.” Kar enne kize ne, “E̱e̱ggi̱n zin nege ol balik a̱vvu̱ piryanzete ci a̱ppwe̱ oroot; utunyyet nege ru̱u̱ma̱ni̱ cigge̱k kar kizeto voore bi̱ye̱te̱ cik Nyoono.

¹⁵ I̱yo̱ko̱ zin, “Aavtte nege oowa lecere ci Ta̱mu̱ta̱dde̱no̱ a̱li̱ngli̱nge̱k nege nonno tu̱p kaal Ce̱e̱ze̱ cinne; kar enne ka̱vvu̱ lecere cinne kar kaarik nogo Ce̱e̱z cinne bu̱k.

¹⁶ Iróng atin nogo adak magiz udut; iróng atin koor a̱ru̱k nogo udut. Iróng atin koor ngen atuz nogo, icima tabbal ci atuz nogo.

¹⁷ Okko Nyoon ci aave lecera orgena ko̱ een atin tuwayoit cinne̱ng; okkoye atin enne nogo rok e̱be̱re̱c ci maam cik rugetak. Kar atin Ta̱mu̱ta̱dde̱n ki̱ti̱vi̱l ti̱la̱lo̱ eberene cigge̱k do̱o̱k ne lai.”