O̱no̱zzo̱k 6 - Tennet

Du̱le̱ne̱t mutula turgerem wak a̱gga̱m waraga

¹ Kicina anna Joni ming a̱du̱l Nyoon mutulac ci een oo mutulai wak e̱e̱ggi̱n turgerem a̱gga̱m waraga ko̱. Kar kizik kaal cik aruge e̱e̱ggi̱n we̱c ko̱ co̱de̱ ngatinne̱ng ming ozoz muluwanine cik a̱ppi̱nte̱k a̱ju̱l kiwagon borowoci, azi ne, “I̱jja̱!”

² Baling kokko anna ke̱de̱vi̱ ngu̱me̱ cinanni kacinni vartangec ci voori! Okko E̱e̱ti̱ ci ottod ko̱ anyak i̱ri̱ye̱, anyozik nonno luluk ci alaanzetu, owoye enne vartangec kize E̱e̱t ci ommog mo̱ddo̱ illawa udut.

³ Baling okko Nyoon a̱du̱l mutulac ci een rama ko̱, kiziya gi̱i̱ ci aruge ko̱ ci een rama bo̱do̱k ming azi ne, “I̱jja̱!”

⁴ I̱ki̱ya̱ zin bo̱do̱k vartangeci imma ci anyak guul ci ma̱ri̱ ogon kiwagon gwa̱a̱. Imma e̱e̱ti̱ ci ottod vartangec ko̱, anyozik nonno doizi ci aarane enne gano lo̱o̱ta̱ ngatu, kar kaanyik ol ku̱ru̱we̱t e̱le̱tti̱ cigge̱k ka̱da̱i̱to̱. Anyonik nonno nya̱tu̱ba̱ti̱ ci a̱ddi̱ki̱re̱ oroot.

⁵ Baling okko Nyoon a̱du̱l mutulac ci een i̱i̱yo̱ ko̱, kiziya gi̱i̱ ci aruge een i̱i̱yo̱ ko̱ azi ne, “I̱jja̱!” Kicina zin ngu̱me̱ cinanni vartangec ci gi̱da̱ngi̱! Okko e̱e̱ti̱ ci ottod vartangec neci anyak gi̱i̱ ci i̱ya̱bi̱nto̱ azzine.

⁶ Kar zin anna kizik gi̱i̱ ci oroi kiwagon mului ci kaal cik e̱e̱ggi̱n we̱c aruge orgene cinne̱ng, azi ne, “Anyik uduc ci labinu kize ci a̱li̱ngli̱nge̱ e̱e̱ti̱ i̱i̱te̱n co̱de̱, kar uduce i̱i̱yo̱ cik laziyenu kizeto cik a̱li̱ngli̱nge̱ e̱e̱ti̱ i̱i̱te̱n co̱de̱, kar zin, ma egerzannu maal ki merte!”

⁷ Baling u̱du̱l Nyoon mutulac ci een we̱c ko̱, kiziya zin muluk ci gi̱i̱ ci aruge ko̱ ci een we̱c ko̱, azi ne, “I̱jja̱!”

⁸ Kicina zin anna o̱o̱we̱ cinanni vartangec ci culai ming a̱kku̱! Okko e̱e̱ti̱ ci ottod een zara Daiz ki nginti daizo ming annu nonno. Anyak nege doiz ci a̱ru̱we̱ ol lo̱lo̱i̱t co̱de̱ ngati e̱e̱ggi̱nne̱ we̱c cikidik illawa lo̱o̱ta̱ ngatu, ovvo a̱ru̱k u̱gge̱ go̱o̱le̱ ci anyahe nege magiz ki zeret, ki go̱o̱le̱ ci elegje cik zarak mootik lo̱o̱ta̱ ngatu.

⁹ Baling u̱du̱l enne mutulac ci een tu̱r ko̱, kicina i̱te̱le̱ lo̱o̱ta̱ vongizzok cik ol balik u̱ru̱kte̱ ke̱, eci a̱ru̱we̱ zo̱ze̱ ci Ta̱mu̱ta̱dde̱no̱ ki zoz ci ibbac nege.

¹⁰ U̱tu̱ye̱ zin nege muluwe ci a̱ppwe̱, azi ne, “Manyi ci a̱li̱le̱ de̱de̱, rok atinga ci okko i̱nna̱ edezi olli lo̱o̱tu̱ kar caca bi̱ye̱ cigga̱k?”

¹¹ Kar kanyozik nogo do̱o̱k e̱co̱de̱ e̱co̱de̱ ru̱u̱ma̱ni̱ cik voorik, kar kaanyik kereyo arrak do̱yo̱i̱t baling u̱ru̱kte̱ nege, zee ku̱ru̱kte̱ du̱cca̱ha̱ ngonoggi ki gotonoggi do̱o̱k.

¹² Kicina anna ming u̱du̱l enne mutulac ci een torkonom. Anyak zin ki̱rki̱ri̱k ci a̱ppwe̱ oroot. Utuhuwe i̱i̱ ize gi̱da̱ng u̱tu̱gu̱ kiwagon zolomonti, utuhuwe zin nyelowi kize ma̱ri̱k kiwagon bi̱ye̱ta̱,

¹³ kar munyunya ta̱mu̱-kenga ki̱ta̱za̱k lo̱o̱c, kiwagon ming i̱i̱na̱k i̱ngi̱ro̱na̱ lo̱o̱c keeta ming omone ngooti ci a̱ppwe̱ keet neci.

¹⁴ Okko ta̱mu̱-kengi anyume kiwagon waraga ming anyume, kar biyena cik a̱ddi̱ki̱re̱ ki ngintik aburuk maama aartai ngatik aavtte ke̱.

¹⁵ Kar zin alaata cik lo̱o̱tu̱, ki dooli cigge̱k, ki lo̱ddi̱ki̱re̱ cik aciiru do̱o̱k, ki jain, ki ol wak okkomi, ki du̱cca̱k ki ol wak iróng e̱e̱ggi̱n du̱cca̱k do̱o̱k ku̱lu̱gu̱nycce̱ jo̱o̱re̱te̱.

¹⁶ A̱nne̱k zin nege biyen cik a̱ddi̱ki̱re̱ ki jo̱o̱re̱t ne, “Itazak e̱le̱tti̱ cigga̱k kar u̱lu̱gu̱nyce̱tu̱ ngati E̱e̱t wa aave lecera ko̱ kar bo̱do̱k ngati mozinet ci Nyoono!

¹⁷ Eci i̱ki̱ya̱ i̱i̱te̱ni̱ ci a̱ddi̱ki̱re̱ omozine nege (omozine Ta̱mu̱ta̱dde̱n ki Nyoon), ngene wo̱ye̱ ci abile ngu̱me̱ cinne̱ng?”