O̱no̱zzo̱k 5 - Tennet

Nyoon ki Waraga ci Ta̱mu̱ta̱dde̱no̱

¹ Kicina a̱tte̱ ci a̱zzo̱ ngati E̱e̱t ci aave lecere ci alaano ko̱ waraga ci e̱he̱rye̱ abanyo do̱o̱k, anyume amadonik mutulaci lak turgerem.

² Kar kicin anjilo ci a̱ddi̱ki̱re̱ Ta̱mu̱ta̱dde̱no̱ uwak muluwe ci a̱ppwe̱ azi ne, “Ngene ci wo̱ye̱ abunna kar ku̱du̱l mutulac kar koo waraga?”

³ I̱llo̱i̱ zin e̱e̱t imma ci aave ta̱mu̱-kenga icima todowai icima lo̱o̱ta̱ ecito kar ku̱pu̱k waraga kar kicin ecito.

⁴ Ku̱tu̱lu̱ zin anna oroot ma̱rri̱t ming a̱zze̱ e̱e̱ti̱ imma ci a̱pu̱k waraga icima kar kicin ecito.

⁵ A̱nne̱ka̱ zin lo̱ddi̱ki̱ro̱ci̱ co̱de̱ lo̱ddi̱ki̱re̱i̱ ne̱ke̱ ne, “Jahe, ma a̱lu̱! Cin E̱e̱t ci akanonik zara cik een Maa ci Boor ci Ju̱da̱, biilet wa Da̱vi̱de̱ ming ommog kaal do̱o̱k. Uule enne kar ku̱du̱l mutula turgerem kar ku̱pu̱k waraga.”

⁶ Kicina zin anna Nyoon ci abile lecera orgena, aburuk kaala cik aruge e̱e̱ggi̱n we̱c ki lo̱ddi̱ki̱re̱. Anyak enne o̱to̱ turgerem ki ebere turgerem, e̱e̱ggi̱n ne̱ko̱ vongizzok cik Ta̱mu̱ta̱dde̱no̱ e̱e̱ggi̱n turgerem i̱tto̱na̱k enne lo̱o̱c.

⁷ I̱ki̱ya̱ zin Nyoon idima waraga ci aave a̱tte̱ ci a̱zzo̱ ngati E̱e̱t ci aave lecera ko̱.

⁸ Kar baling a̱gga̱ma̱ enne waraga neci, a̱ka̱tte̱k zin kaala cik aruge e̱e̱ggi̱n we̱c ko̱ ki lo̱ddi̱ki̱re̱ moten rama ki we̱c do̱o̱k nonno u̱zu̱ngti̱nne̱. Anyak ngenngene gitar kar ka̱gga̱mi̱t bo̱do̱k uduce cik e̱e̱ggi̱n dhahab abbize lotagongi, e̱e̱ggi̱n ne̱ko̱ kaal cik alawe ol cik a̱li̱le̱ Ta̱mu̱ta̱dde̱n.

⁹ Kar zin ke̱be̱ni̱t lo̱ng ci een jor, azi ne, “Aganonu i̱nna̱ ming adima waraga kar du̱l mutula ne̱ke̱, eci i̱nna̱ u̱ru̱we̱ ba̱li̱ye̱, kar bi̱ye̱te̱ cigunnek, atalau i̱nna̱ ol Ta̱mu̱ta̱dde̱n olle cik lo̱o̱tu̱ ki u̱tu̱ge̱tti̱ cik ozoz ol do̱o̱k lo̱o̱ta̱ ngatu do̱ do̱.

¹⁰ Idimanu i̱nna̱ nogo kanyait alaanzet ki olli wawaco cik a̱li̱ngli̱nge̱k Ta̱mu̱ta̱dde̱n, kar zin kabalit ol lo̱o̱ta̱ ngatu.”

¹¹ Imma o̱no̱zo̱we̱ kiziya mulukwa cik anjilonya cik meelek ming e̱be̱ne̱, e̱e̱ggi̱n i̱bbo̱nge̱t (1,000) cik meelek giir, i̱bbo̱nge̱t omoto (10,000) lak i̱bbo̱nge̱t omoto. Uburuwet nege lecer ci alaano ki kaal cik aruge e̱e̱ggi̱n we̱c ki lo̱ddi̱ki̱re̱.

¹² Ebento zin nege mulukwane cik a̱bu̱le̱, azi lo̱ng ne, “Agano Nyoon bali otongde ke̱, abunna kar enne kumuda komiz ki kaal kize jaitot ki genyiz ki doiz ki ngo̱li̱ne̱t ci o̱ngo̱o̱li̱nne̱ ol nonno ki di̱ngdi̱ngo̱n ki inatinet!”

¹³ Kiziya zin kaal wak aruge e̱e̱ggi̱n we̱c do̱o̱k ta̱mu̱-kenga, lo̱o̱ta̱ ki lo̱o̱c todowai ecito nyatapare ci a̱ddi̱ki̱re̱, ki kaal cik aruge lo̱o̱ta̱ do̱o̱k ming e̱be̱ne̱: “Kanyikka inatinet ki ngo̱li̱ne̱t, ki di̱ngdi̱ngo̱n e̱e̱t ci aave lecera ko̱ ki Nyoon kinnatit nonno kar ko̱to̱ngo̱o̱ltte̱ nonno kar i̱di̱ngdi̱nga̱nni̱t nonno wa anyak komiz ci abale enne ol udut!”

¹⁴ Izeto zin kaala cik aruge e̱e̱ggi̱n we̱c ko̱ ne, “Yo, anyik ku̱tu̱gu̱ niko.” Kar zin lo̱ddi̱ki̱re̱ kakatek u̱zu̱ngti̱nne̱ ki̱di̱ngdi̱nga̱ni̱t Ta̱mu̱ta̱dde̱n.