O̱no̱zzo̱k 4 - Tennet

Acin Joni ta̱mu̱-keng o̱no̱zo̱we̱

¹ Kicina anna o̱no̱zo̱we̱ tatug ta̱mu̱-kenga ming o̱o̱ye̱. Kar mului ci kazi anna arrak oowa ozozikan oroi kiwagon ture ci abuwe, a̱nne̱ka̱ ne, “I̱jja̱ ta̱dde̱na̱ ngatu, kar anna ki̱ye̱le̱i̱ kaal cik atin ogone vu̱rrta̱.”

² Ataman niko i̱ki̱ya̱ Vongizi ci Ta̱mu̱ta̱dde̱no̱ kar kuwuya o̱no̱zo̱we̱, bak kacinni ngu̱me̱ cinanni ta̱mu̱-kenga lecer ci alaano kar E̱e̱ti̱ ka̱vvu̱ lecere neci.

³ Kar E̱e̱ti̱ ci aave lecere neci ogon ele cinne kiwagon biyena cik culaik ki cik ma̱ri̱k teed. Ogon kiwagon mauli ci anyak guulnya cik aavtte do̱ do̱, aburuk lecer neci ne riu.

⁴ Anyak bo̱do̱k lecere cik e̱e̱ggi̱n moten rama ki we̱c cik aburuk lecer ci alaano, aavtte lo̱ddi̱ki̱re̱ cik e̱e̱ggi̱n moten rama ki we̱c. Aim nege ru̱u̱ma̱ni̱ cik voorik ki lulukwa cik alaatu adimanai zu̱rte̱nte̱ ci een dhahab o̱o̱tti̱ne̱.

⁵ Iyowa a̱ha̱tti̱ ci gwo̱o̱yo̱ lecere ci alaanzetu ko̱, abadi kiwagon borowoci. Imma ngati aave leceri ko̱, anyak tukulen cik e̱e̱ggi̱n turgerem alanyiti. E̱e̱ggi̱n ne̱ke̱ vongizzok turgerem cik Ta̱mu̱ta̱dde̱no̱.

⁶ Okko bo̱do̱k lecer oowa, anyak gilac ci ataltali ogon ki nyatapari ci a̱ddi̱ki̱re̱. Imma orgene ci lecero, anyak kaal cik aruge e̱e̱ggi̱n we̱c aburuk lecer ne riu, anyak ebere cik meelek giir ele do̱o̱k, ngu̱ma̱ ki bo̱i̱ca̱.

⁷ Okko gi̱i̱ ci een oo ko̱ aruge, ogon ki maa, okko ci een ram ko̱ ogon ki ariz, okko ci een i̱i̱yo̱ ko̱ anyak ngu̱m ki e̱e̱ti̱ ci diiri, okko ci een we̱c ko̱ ogon ki i̱yo̱ko̱ u̱du̱va̱nti̱ ngati a̱ku̱li̱.

⁸ Ovvo kaala ne̱k e̱e̱ggi̱n we̱c aruge ko̱, anyak ngenngene ṯaabani torkonom, anyak bo̱do̱k ebere ṯaabete do̱o̱k rok ecito. E̱be̱ne̱ nege wazin ki ba̱a̱li̱n kaal azi ne: “A̱li̱le̱, a̱li̱le̱, a̱li̱le̱ nonno ci een Manyi Ta̱mu̱ta̱dde̱n ci anyak Komiz do̱o̱k, wa bali aave, kar i̱yo̱ko̱, kar atin okko a̱kku̱.”

⁹ Gon ming ovvo kaala ne̱k aruge e̱e̱ggi̱n we̱c ko̱ ovvo aanyik di̱ngdi̱ngo̱n, bak o̱ngo̱o̱le̱ kar kanycik zany E̱e̱t ci aave lecere ci alaanzetinu ko̱, nonno ci abak udut,

¹⁰ ovvo lo̱ddi̱ki̱re̱ cik e̱e̱ggi̱n moten rama ki we̱c ko̱ akannek u̱zu̱ngti̱nne̱ ngati E̱e̱t ci aave lecera ko̱, kar ki̱di̱ngdi̱nga̱ni̱t nonno wa aruge udut ko̱. Arike nege lulukwa cigge̱k lecer ci alaanzetinu lo̱o̱ta̱ kar kizeto ne,

¹¹ “Elenonu i̱nna̱ ki di̱ngdi̱nga̱ni̱ne̱t Manyitinna Ta̱mu̱ta̱dde̱n, kar ruba di̱ngdi̱ngo̱n ki inatinet ki doiz, eci i̱nna̱ eteehenya kaal do̱o̱k, kar zin zo̱ze̱ cunne keteehenycai kaala do̱o̱k kar zin ka̱vvu̱to̱ to do̱o̱k.”