O̱no̱zzo̱k 22 - Tennet

Liil ci rugeto

¹ I̱ye̱le̱ya̱ zin anjilo liil wa a̱ri̱k maama cik rugeto cik caalek paz, a̱ri̱ya̱ lecere ci Ta̱mu̱ta̱dde̱no̱ ki ci Nyoono,

² okko orgene ci gool ci o̱rgu̱ a̱ddi̱ki̱re̱. Imma ti̱ti̱mo̱i̱ cik liil neci, anyak keet ci rugeto, a̱bbi̱rna̱ keet neci o̱ya̱u̱ lak omoto ki rama e̱rki̱ta̱, a̱a̱ri̱ nyelowi do̱o̱k. Ovvo varanya cik keet neci e̱e̱ggi̱n cik angaru ol lo̱o̱ta̱ do̱o̱k.

³ I̱zzi̱ atin to̱ri̱ne̱t imma to o̱rge̱ neci udut. Aave leceri ci Ta̱mu̱ta̱dde̱no̱ ki ci Nyoono o̱rge̱ neci, kar du̱cca̱ha̱ ciginnek kalac nonno.

⁴ Acin atin nege ngu̱m cinne ele, kar zin atin zara ciginnek keteherte ngu̱mtti̱nne̱ cigge̱k.

⁵ I̱zzi̱ atin rok ba̱a̱li̱n to, iróng atin nege bo̱do̱k orong urez ci atukule icima koor, eci Manyi Ta̱mu̱ta̱dde̱n ci een tukulec. Abal atin nege lo̱o̱c udut.

⁶ A̱nne̱ka̱ zin anjilo ne, “E̱e̱ggi̱n zo̱zzo̱wa̱ ne̱ke̱ de̱de̱. Okko Manyi Ta̱mu̱ta̱dde̱n wa a̱gga̱m vongizzok cik a̱ri̱tto̱u̱ ko̱ i̱tto̱na̱ anjilo cinne ki̱ye̱le̱k du̱cca̱k ciginnek kaal cik ovvo atin i̱i̱na̱ ataman.”

Oboda atin Ye̱su̱ ataman

⁷ Azi Ye̱su̱ ne, “Aarta iin! Kokko anna ka̱kku̱ni̱ ataman! A̱ma̱yu̱we̱ e̱e̱ti̱ ci azunne zo̱zzo̱k cik i̱ye̱ltta̱i̱ buwe cu.”

⁸ Imma anna Joni, kiziya kar bo̱do̱k kicin kaal ne̱ke̱ do̱o̱k. Kar zin bali kaala cik kiziya anna kar bo̱do̱k kicina ko̱, kakateya u̱zu̱ngtti̱ lo̱o̱c zone cik anjilo bali i̱ye̱le̱ka̱ kaal ne̱ke̱ ke̱, ngati ka̱di̱ngdi̱nga̱ni̱ nonno.

⁹ Ma̱i̱je̱ enne a̱nne̱ka̱ ne, “Ma ogoni zoz necu! Ke̱e̱ni̱ anna du̱ca̱i̱t ci Ta̱mu̱ta̱dde̱no̱ ki i̱nne̱ta̱ bu̱k, ki gotonogget wak e̱e̱ggi̱n a̱ri̱tto̱k cik zoz ci Ta̱mu̱ta̱dde̱no̱ ki ol wak azunne zoz ci e̱he̱rye̱ buwe cu. Di̱ngdi̱nga̱n Ta̱mu̱ta̱dde̱n do̱ niko!”

¹⁰ A̱nne̱ka̱ zin enne annit ne, “Ma orodi zo̱zzo̱k cik i̱ye̱le̱ki̱ Vongizi ci Ta̱mu̱ta̱dde̱no̱ buwe cu, eci ize ojon i̱i̱te̱ni̱ kar kaala ne̱ko̱ ku̱tu̱gu̱zze̱.

¹¹ Anyik e̱e̱t ci gon ogon kaal cik gerzek kemedak ku̱tu̱gu̱ kaal cik gerzek; ma e̱e̱ti̱ ci mu̱nye̱nu̱, anyik nonno kemedak mu̱nye̱n; anyik e̱e̱t ci ogon kaal cik abunna kemeda ku̱tu̱gu̱ kaal cik abunna; imma e̱e̱ti̱ ci a̱li̱le̱, anyik nonno kemeda kabak baiz ci a̱li̱le̱.”

¹² A̱nne̱ka̱ zin bo̱do̱k Ye̱su̱ ne, “Aarta da̱ iin ju̱rru̱m, kokko anna ka̱kku̱ni̱ ataman! Kanyai anna muci cinanni, kanyike atin anna e̱e̱t imma go̱o̱le̱ ci u̱tu̱gu̱we̱ enne kaal baize cinne.

¹³ Ke̱e̱ni̱ anna Kananet ki Ṯurnenet, oo ki vu̱rru̱t, kakane kar kedecak.

¹⁴ “A̱ma̱yu̱kte̱ ol wak uuny ru̱u̱ma̱ni̱ cigge̱k, agano atin nege ki keet ci rugeto kar ki̱tto̱zzo̱ arana koot o̱rge̱ ci a̱ddi̱ki̱re̱ ecito.

¹⁵ Imma ol cik ogon kiwagon urzi aavtte reene ci orog ci a̱ddi̱ki̱re̱ ko̱, a̱ru̱k agura, e̱e̱ggi̱n a̱li̱ya̱k, amuny ol, ala to̱do̱yyo̱k kize ta̱mu̱ta̱dde̱ne̱t cigge̱k, kar kabaito volonga.

¹⁶ “Anna Ye̱su̱, ki̱tto̱na̱kku̱ng anna anjilo cinanni kar ku̱du̱wa̱u̱ng i̱ge̱t ol wak a̱tu̱we̱ ke̱le̱ci̱a̱nya̱i̱ do̱o̱k kaal ne̱ko̱. Ke̱e̱ni̱ anna lolac kar kize do̱le̱c ci doolik Da̱vi̱de̱, kar bo̱do̱k kize dhu̱mo̱c ci nge̱rre̱ti̱nu̱ ko̱.”

¹⁷ Ize Vongizi ci Ta̱mu̱ta̱dde̱no̱ ki nyatiran ci Nyoono ne, “I̱jja̱!” Anyik e̱e̱t ci aziye kize ne “I̱jja̱.” Ming anyak e̱e̱t ci a̱ru̱k koor, anyik nonno ki̱ki̱ya̱; kar ming orong e̱e̱ti̱ imma maam, anyik nonno kidima muci ci maam cik rugeto ollin.

¹⁸ Ka̱du̱wa̱kku̱ng zin anna Joni i̱ge̱ta̱ do̱o̱k ol wak aziye zoz ci i̱ye̱la̱ Vongizi ci Ta̱mu̱ta̱dde̱no̱ buwe cu: Ming otornik e̱e̱ti̱ imma gi̱i̱ imma buk ci Ta̱mu̱ta̱dde̱no̱ ko̱, otornik atin Ta̱mu̱ta̱dde̱n nonno zerenin cik e̱he̱rye̱ buwe cu ko̱.

¹⁹ Ming aara e̱e̱ti̱ imma zoz imma buwe ci i̱ye̱le̱ka̱ Vongizi ci Ta̱mu̱ta̱dde̱no̱ ko̱, engera atin Ta̱mu̱ta̱dde̱n taban cinne keete ci rugeto ki o̱rge̱ ci a̱ddi̱ki̱re̱ a̱li̱le̱, cik e̱he̱rye̱ buwe cu ko̱.

²⁰ Okko e̱e̱ti̱ ci ibbac kaal ne̱ko̱, azi ne, “I̱i̱ny, ka̱kku̱ni̱ anna ataman.” Nonno nenen, i̱jja̱, Manyi Ye̱su̱.

²¹ Anyik bai deten ci Manyi Ye̱su̱ ka̱vvu̱ ngati olli Ta̱mu̱ta̱dde̱no̱ do̱o̱k. “Nonno nenen.”