O̱no̱zzo̱k 20 - Tennet

Acin Joni o̱no̱zo̱we̱ lo̱rye̱ni̱t ming e̱ce̱bje̱ e̱rki̱to̱k i̱bbo̱ng co̱de̱ (1,000)

¹ Kicina anjilo ci Ta̱mu̱ta̱dde̱no̱ ming aluccai ta̱mu̱-kenga. Anyak jooro cik oowe enne lo̱o̱k neci wu̱u̱ni̱ ke̱ kar zin kanyak a̱tta̱ diditac ci a̱ddi̱ki̱re̱.

² A̱gga̱m enne u̱ggu̱l ci a̱ddi̱ki̱re̱, een enne bo̱do̱k uwat ci a̱ddi̱ki̱re̱ unuk da̱, een enne lo̱rye̱ni̱t ci een zara Sitan, kar zin enne keceb nonno e̱rki̱to̱k i̱bbo̱ng co̱de̱ (1,000).

³ U̱ju̱ke̱k zin anjilo nonno lo̱o̱k neci wu̱u̱ni̱ ke̱, kar zin kunyug utug ci lo̱o̱k neci joorone, kar zin iróng Sitani bo̱do̱k a̱lu̱t olli lo̱o̱tu̱ zee kedeccai e̱rki̱to̱wa̱ i̱bbo̱ng co̱de̱. Baling utubte e̱rki̱to̱wa̱ ne̱ke̱, kar zin atin koogjai koto arrak do̱yo̱i̱t.

⁴ Kedenya anna leceret cik aavtte ol cik anyonik komizi kar kettedit lo̱ki̱ko̱. Kar anna kicin vongizzok cik ol balik u̱ru̱kte̱ zo̱ze̱ ci edemze nege zoz ci Ye̱su̱ kar bo̱do̱k uwahek ol zoz ci Ta̱mu̱ta̱dde̱no̱. Iróng nege ba̱li̱ye̱ a̱di̱ngdi̱nga̱n e̱le̱gi̱t icima ri̱ri̱to̱n cinne, iróng bo̱do̱k nege anyak baayenit ci aave ngu̱mtti̱nne̱ icima azzine. I̱vi̱tta̱k nege ruget kar kabalit lo̱o̱c ki Ki̱ri̱sto̱ e̱rki̱nya̱ i̱bbo̱ng co̱de̱ (1,000).

⁵ Ovvo ol balik abal lo̱o̱c ki Ye̱su̱ ke̱ ingazi daize ci o̱o̱wu̱. Ma̱i̱je̱ ol uggak balik a̱da̱i̱to̱ ke̱ iróng ngen bo̱do̱k obodak ruget zee kutubte e̱rki̱to̱wa̱ cik e̱e̱ggi̱n i̱bbo̱ng co̱de̱ (1,000).

⁶ A̱mu̱yu̱k atin Ta̱mu̱ta̱dde̱n ol ciginnek a̱li̱le̱, ingazi daize ci o̱o̱wu̱. Okko daizi ci een vu̱rru̱t ko̱ iróng anyak komiz ngatinne̱ng, abarik ovvo atin nege e̱e̱ggi̱n olli wawaco Ta̱mu̱ta̱dde̱no̱ ki Ki̱ri̱sto̱ kar atin kabalit ki nonno lo̱o̱c e̱rki̱nya̱ i̱bbo̱ng co̱de̱ (1,000).

Ommog Ta̱mu̱ta̱dde̱n Sitan

⁷ Ming utubte e̱rki̱to̱wa̱ ne̱k e̱e̱ggi̱n i̱bbo̱ng co̱de̱ (1,000) ko̱, oogjai atin Sitani lo̱o̱we̱ ci wu̱u̱ni̱ kal ngati e̱ce̱bji̱ne̱ enne.

⁸ Kar atin enne kuk ku̱lu̱t olli lo̱o̱tu̱, vatanine: i̱do̱, i̱do̱li̱ya̱, je̱e̱n, ki nyege cik lo̱o̱tu̱ e̱e̱ggi̱n we̱c. Okko alaba ciko Gog ki Magog kar kuwe illawa. E̱e̱ggi̱n nege koole ci atubo ki azac ti̱ti̱me̱ ci liil ci a̱ddi̱ki̱re̱.

⁹ A̱vvu̱ atin nege lo̱o̱co̱we̱ do̱o̱k kar ki̱vi̱ta̱ kuburuwet nyaperit ci olli Ta̱mu̱ta̱dde̱no̱, orog ci irez enne Ta̱mu̱ta̱dde̱n oroot. Ma̱i̱je̱ gwa̱a̱ i̱ki̱ya̱ ta̱mu̱-kenga rok lo̱o̱c idita nogo ne lai.

¹⁰ Imma lo̱rye̱nti̱ bali a̱lu̱t nogo ke̱, u̱ju̱ko̱zi̱k gwo̱o̱ ci apadpadi oroot, nginti a̱ju̱ko̱ni̱k e̱le̱gi̱ti̱ ki a̱ri̱to̱i̱t ci volongo. Apirna atin nege nginati tu̱p kaal udut.

Apak Ta̱mu̱ta̱dde̱n lo̱ki̱ko̱ ci ol wak ingazi daiza

¹¹ Kedenya zin anna lecer ci voori a̱ddi̱ki̱re̱ ki E̱e̱t ci aave lecere neci. Kar looci ki ta̱mu̱-keng ki̱vi̱re̱t ngati aave enne, i̱llo̱i̱ zin ngin imma cinne̱ng ci ovvoye nege.

¹² Kar zin anna kicin ol wak a̱da̱i̱to̱, cik a̱ddi̱ki̱re̱ ki cik kidik bu̱k, abile nege o̱o̱we̱ ci lecero, o̱o̱ye̱ zin buwani. Oowe zin bui imma, een neci buk ci rugeto. Ettedozik lo̱ki̱ko̱ ol wak a̱da̱i̱to̱ go̱o̱le̱ bali ogone nege kaal ki ming e̱he̱rye̱ buwanine.

¹³ U̱ju̱ka̱ zin nyatapar ci a̱ddi̱ki̱re̱ ta̱dde̱n ol balik a̱da̱i̱to̱ ke̱, aanyik zin daizi ol balik a̱da̱i̱to̱ ke̱ ki ngati daizo ko̱ do̱o̱k ki̱ye̱lta̱i̱, kar ngenngene kettedozik lo̱ki̱ko̱ go̱o̱le̱ bali ogone enne kaal.

¹⁴ Kar zin daizi ki nginti daizo ku̱ju̱kto̱zi̱k koot gwo̱o̱ye̱ ci apadpadi oroot. Een gwa̱a̱ neci ci apadpadi udut ke̱, daiz ci vu̱rrto̱.

¹⁵ Ming iróng zara cik e̱e̱t imma e̱he̱rye̱ buwe ci rugeto, u̱ju̱ko̱zi̱k enne kuk gwo̱o̱ye̱ ci apadpadi oroot ke̱.