O̱no̱zzo̱k 19 - Tennet

Innat ol Ta̱mu̱ta̱dde̱n ta̱mu̱-kenga

¹ Ma bali vu̱rrta̱ kiziya muluk ci oroi oroot ta̱mu̱-kenga kiwagon koole ming awalwali: “Kinnatit Ta̱mu̱ta̱dde̱n! A̱kku̱ ti̱ri̱ze̱ne̱t ki di̱ngdi̱ngo̱n ki doiz ngati Ta̱mu̱ta̱dde̱n cinna,

² eci te̱di̱ne̱t lo̱ki̱ko̱ cinne een zoz ci abunna kar bo̱do̱k kize de̱de̱. Edez enne ngaa ci een a̱li̱ya̱i̱t wa a̱ddi̱ki̱re̱ bali egerzan lo̱o̱c a̱li̱ya̱kze̱te̱ cinne. Acaca zin Ta̱mu̱ta̱dde̱n ngatinne bi̱ye̱ cik du̱cca̱k ciginnek balik a̱ru̱we̱ ke̱.”

³ Kar bo̱do̱k ol ne̱ke̱ kegerenyit kizeto ne: “Kinnatit Ta̱mu̱ta̱dde̱n yaa! Okko bbu̱rre̱ti̱ ci iyowa ngati ngaa ci een a̱li̱ya̱i̱t ko̱ okko udut.”

⁴ Imma bali vu̱rrta̱, a̱ka̱tte̱k zin lo̱ddi̱ki̱re̱ cik e̱e̱ggi̱n moten rama ki we̱c ki kaal cik aruge e̱e̱ggi̱n we̱c u̱zu̱ngti̱nne̱ kar ki̱di̱ngdi̱nga̱ni̱t Ta̱mu̱ta̱dde̱n ngati aave enne lecera. Kar nege kizeto ne, “Een de̱de̱, kinnatit Ta̱mu̱ta̱dde̱n!”

⁵ I̱ki̱ya̱ zin mului lecere ci alaano, azi ne: “Kinnatit Ta̱mu̱ta̱dde̱n wanna, niga du̱cca̱ha̱ ciginnek do̱o̱k, niga ol wak o̱ngo̱o̱li̱nnu̱ nonno, ol cikidik ki ol wak a̱ddi̱ki̱re̱!”

⁶ Kar zin anna kizik mulukwa cik ogon ki ol cik meelek giir, oroi kiwagon maama cik a̱ri̱i̱, a̱ju̱l kiwagon borowoci: “Kinnatit Ta̱mu̱ta̱dde̱n! Eci Manyitinna Ta̱mu̱ta̱dde̱n wa anyak Komiz do̱o̱k ci abal lo̱o̱c.

⁷ Katalto zin naga kar kanycik Ta̱mu̱ta̱dde̱n zany kar kanycik nonno ki̱di̱ngdi̱ng! Eci i̱ki̱ya̱ i̱i̱te̱ni̱ ci okko Nyoon arucene, kar nyatirani cinne kidiman ele ju̱rru̱m.

⁸ Anyozik nonno ru̱u̱m ci voori een waruc, alanyit ki̱zi̱zi̱, anyozik nonno kitimanek ele.” (I̱ye̱la̱ ru̱u̱m neci voori aburuc nyatirani ko̱ kaal wak abunna ogon ol wak Ta̱mu̱ta̱dde̱no̱ a̱li̱le̱.)

⁹ A̱nne̱ka̱ zin anjilo ci Ta̱mu̱ta̱dde̱no̱ annit ne: “Teher zoz cu: ‘A̱mu̱yu̱k Ta̱mu̱ta̱dde̱n ol ne̱k aawak enne rucenet ci a̱ddi̱ki̱re̱ Nyoono!’” Kar bo̱do̱k enne kotorek, “E̱e̱ggi̱n ne̱ko̱ zo̱zzo̱k cik Ta̱mu̱ta̱dde̱no̱ de̱de̱.”

¹⁰ Imma ngatu kakateya anna nonno u̱zu̱ngti̱nne̱ zoone ciginnek kar ki̱di̱ngdi̱nga̱n nonno. Ma̱i̱je̱ enne a̱nne̱ka̱ ne, “Ma ogoni niko! Ke̱e̱ni̱ anna du̱ca̱i̱t ki i̱nne̱t ki gonoggu wak a̱gga̱m zoz ci Ye̱su̱. Di̱ngdi̱nga̱n Ta̱mu̱ta̱dde̱n do̱ niko! Eci zoz ci obod ki Ye̱su̱ ko̱ ci ozoz a̱ri̱tto̱wa̱ ko̱.”

Acin Joni o̱no̱zo̱we̱ e̱e̱t ci ottod vartangec ci voori

¹¹ Kedenya anna ta̱mu̱-keng ming o̱o̱ye̱, kar zin anna kicin vartangec ci voori, imma E̱e̱ti̱ ci ottod vartangec ko̱ een e̱e̱t ci abunna kar kize de̱de̱. Etted enne lo̱ki̱ko̱ cinne ju̱rru̱m kar kuk illa.

¹² Ogon ebere ciginnek kiwagon gwa̱a̱ ci alanyiti, kar oo cinne kanyak lulukwa cik alaatu meelek giir. Anyak enne zar cik e̱he̱rye̱ eliye cinne, iróng e̱e̱ti̱ imma a̱gga̱ ke̱bi̱nta̱, a̱gga̱ enne do̱.

¹³ Aim enne ru̱u̱m ci a̱du̱nyo̱ni̱k bi̱ye̱, kar zara ciginnek kizeto Zoz ci Ta̱mu̱ta̱dde̱no̱.

¹⁴ Annu aciiri cik ta̱mu̱-kengo nonno, ottod nege vartange cik voorik kar ki̱ti̱me̱t ru̱u̱ma̱ni̱ cik anyankute kar kizeto voore ki̱zi̱ze̱c.

¹⁵ Iyowa utuge cinne nya̱tu̱ba̱t ci lehedi kar ku̱ru̱we̱ enne ol cik lo̱o̱tu̱ veelek. “Abal atin enne nogo coole ci alaanzetu ci een zi̱i̱t.” Kar enne koroc ngin wagon amacane merte kar ki̱ye̱la̱ mozinet ci Ta̱mu̱ta̱dde̱no̱ wa A̱ddi̱ki̱re̱ anyak Komiz do̱o̱k.

¹⁶ Imma ru̱u̱me̱ cinne ki azana e̱he̱rye̱ zara ciginnek ke̱te̱: ALAAN CI ALAATU KI MANYI CI MA̱CI̱GI̱NNU̱.

¹⁷ Kar zin anna kedenya anjilo ci ta̱mu̱-kengo ming abile koora, kar zin kegerenyek iballi cik a̱ku̱l ta̱dde̱na̱ do̱o̱k muluwe ci a̱bu̱le̱, a̱nne̱k ne, “I̱vi̱ta̱, idongte do̱o̱k nga̱to̱de̱ ngati adahe da̱i̱ne̱t cik ja̱ti̱nu̱ Ta̱mu̱ta̱dde̱no̱,

¹⁸ kar atin adait e̱le̱tti̱ cik alaatu, lo̱ddi̱ki̱re̱ cik aciiru ki ol cik okkomi, ki vartange ki ol wak ottod nogo ko̱, ki e̱le̱tti̱ cik ollu do̱o̱k, ma̱ci̱gi̱ ce̱e̱zi̱ ki du̱cca̱k, cikidik ki cik a̱ddi̱ki̱re̱.”

¹⁹ Kedenya zin anna e̱le̱gi̱t ki alaat wak lo̱o̱tu̱ ki aciir cigge̱k alute kar koorit E̱e̱t ci ottod vartangec ko̱ ki aciir waginnek.

²⁰ Ma̱i̱je̱ zin da̱ e̱le̱gi̱ti̱ a̱gga̱me̱, nonno ki a̱ri̱to̱i̱t ci volongo, ogonek nege kaal cik a̱vu̱la̱ ko̱ e̱le̱gi̱t. Imma zo̱ze̱ ci a̱vu̱la̱ u̱tu̱gu̱ enne ke̱, alaba enne ol wak anyak baayenit ci e̱le̱gto̱ kar ki̱di̱ngdi̱nga̱ni̱t ri̱ri̱to̱n cinne. Kar rama ngatinne̱ng ku̱ju̱kto̱zi̱k rugetet gwo̱o̱ ci apadpadi oroot.

²¹ Kar zin gonoggja ku̱ru̱kte̱ nya̱tu̱ba̱te̱ ci iyowa utuge ci E̱e̱t wa ottod vartangec ko̱, kar iballi do̱o̱k kadait e̱le̱tti̱ ne̱ke̱.