O̱no̱zzo̱k 17 - Tennet

Acin Joni o̱no̱zo̱we̱ ngaa ci een a̱li̱ya̱i̱t ki e̱le̱gi̱t

¹ I̱ki̱ya̱ zin annit anjilo co̱de̱ anjilonyai ne̱k e̱e̱ggi̱n turgerem anyak uduce turgerem ke̱, kar zin kize ne, “I̱jja̱ kar ki̱ye̱le̱i̱ de̱zi̱ne̱t ci okko Ta̱mu̱ta̱dde̱n edeze ngaa ci een a̱li̱ya̱i̱t ommog veelek, nonno ci aave maame cik meelek.

² A̱ta̱gu̱zzo̱ alaata cik lo̱o̱tu̱ ko̱ do̱o̱k ki ngaa neci, ovvo olli lo̱o̱tu̱ do̱o̱k ibbakce zo̱ze̱ ci a̱li̱ya̱kze̱t cinne ko̱.”

³ Kar zin anjilo kodonga annit Vongize ci Ta̱mu̱ta̱dde̱no̱ rok balal. Imma nginati kicina ngaa neci aave e̱le̱gte̱ ci ma̱ri̱ tet, a̱di̱le̱ ele do̱o̱k zare cik odome enne Ta̱mu̱ta̱dde̱n, kar kanyak o̱o̱tti̱ turgerem ki o̱to̱ omoto.

⁴ Aim ngaa neci ru̱u̱m ci anyak guul ci een lo̱ddi̱ng kar bo̱do̱k ci ma̱ri̱, ataltali ru̱u̱m cinne ogon kiwagon zu̱rte̱nti̱ ci een dhahab, ogon bo̱do̱k ki biyena cik e̱e̱ggi̱n le̱de̱re̱t ki bo̱do̱k teltelen cik ataltali. Anyak enne bu̱k uduc ci een dhahab a̱tte̱ cinne, abbize kaala cik gerzek a̱li̱ya̱kze̱ti̱nu̱.

⁵ E̱he̱rye̱ zoz cu ngu̱me̱ cinne: Zar cik a̱lu̱gnye̱ Babilon ci a̱ddi̱ki̱re̱ E̱e̱ti̱ a̱li̱ya̱k do̱o̱k Ki kaal cik a̱li̱ya̱kze̱ti̱nu̱ lo̱o̱ta̱ ngatu do̱o̱k.

⁶ Kicina anna ngaa neci ming ibbak bi̱ye̱ta̱ cik ol cik a̱li̱le̱ Ta̱mu̱ta̱dde̱no̱, ol wak ozoz zoz ci Ye̱su̱. Baling kicina anna nonno, ku̱ku̱le̱ya̱ anna je̱e̱n oroot.

⁷ A̱nne̱ka̱ zin anjilo annit ne, “Nya ming a̱ku̱le̱k i̱nna̱ je̱e̱n ko̱? Kokko atin anna koobeki zoz ci a̱lu̱gnye̱ zo̱ze̱ ci ngaa necu ki e̱le̱gi̱t ci ottod enne ko̱, anyak o̱o̱tti̱ turgerem ki o̱to̱ omoto ko̱.

⁸ Imma e̱le̱gi̱ti̱ bali icinnu i̱nna̱ ke̱ aave ba̱li̱ye̱, i̱yo̱ko̱ iróng ngen aave to, okko atin iyowa lo̱o̱we̱ neci wu̱u̱ni̱ ke̱ ki̱ki̱ya̱ kiditai. Imma olli lo̱o̱tu̱ cik ngen zara cigge̱k keteherte buwe ci rugeto kanante ci lo̱o̱tu̱, ovvo atin a̱ku̱le̱k je̱e̱n ming ovvo acin e̱le̱gi̱t, eci aave arrak ba̱li̱ye̱, kar i̱yo̱ko̱ ki̱zzi̱ to, kar atin okko a̱kku̱.

⁹ “Orong zin zoz necu e̱e̱t ci aziye zoz kar bo̱do̱k kanyak ki genyiz. E̱e̱ggi̱n o̱o̱tti̱ wak e̱e̱ggi̱n turgerem ko̱ zi̱i̱ryo̱k cik e̱e̱ggi̱n turgerem aave ngaa necu ko̱.

¹⁰ E̱e̱ggi̱n nege bo̱do̱k alaat turgerem. U̱yu̱kte̱ alaata cik e̱e̱ggi̱n tu̱r, okko co̱de̱ abal lo̱o̱c, ngen zin uggak ki̱vi̱ta̱; ma̱i̱je̱ ming okko enne abal lo̱o̱c, okko atin arrak aave do̱yo̱i̱t.

¹¹ Imma e̱le̱gi̱ti̱ bali arrak aave ke̱, kar i̱yo̱ko̱ iróng ngen aave, een enne alaan wa een tu̱rge̱. A̱kku̱ enne alaate wak e̱e̱ggi̱n turgerem ke̱, okko enne bu̱k aditai.

¹² “E̱e̱ggi̱n o̱to̱ cik icinnu i̱nna̱ een omoto ko̱ alaat wak ngen ka̱gga̱mta̱ alaanzet, abarik ming utube i̱i̱ co̱de̱, amuda atin nege alaanzet ki e̱le̱gi̱t bu̱k nga̱to̱de̱.

¹³ Anyak nege i̱no̱ni̱ co̱de̱ kar kanycik komiz cinne̱ng ki alaanzet bu̱k e̱le̱gi̱t.

¹⁴ Anyaha atin nege illa ci oore Nyoon, ma̱i̱je̱ atin Nyoon ommog nogo ma̱rri̱t enne een Manyi ci ma̱ci̱gi̱nnu̱ ki Alaan ci alaatu veelek. Ovvo ol wak annu nonno ko̱ atahaltai kar ku̱zu̱tte̱ zoz cinne.”

¹⁵ A̱nne̱ka̱ zin annit anjilo ne, “Ovvo maama cik meelek icinnu i̱nna̱ ko̱, nginti aave ngaa ci een a̱li̱ya̱i̱t ko̱, e̱e̱ggi̱n nege ol cik meelek giir, ki lo̱o̱cco̱k ki u̱tu̱ge̱tti̱ cik ozoz nege aavtte do̱ do̱.

¹⁶ Okko atin e̱le̱gi̱ti̱ ki o̱to̱ omoto cik icinnu i̱nna̱ ko̱, amarine atin nege ngaa ci een a̱li̱ya̱i̱t ko̱. Egerzan atin nege nonno, aara ru̱u̱ma̱ni̱ ka̱vvu̱ enne nga̱dhi̱ri̱r; adak atin nege ele cinne kar kutuzet nonno gwo̱o̱ya̱.

¹⁷ Eci Ta̱mu̱ta̱dde̱n aarik zi̱nze̱tti̱ cigge̱k abunna edecak li̱ngli̱ngo̱n cinne ngati anyike e̱le̱gi̱t komiz kar kabal lo̱o̱c, zee kakat zoz ci Ta̱mu̱ta̱dde̱no̱ mo̱o̱le̱t.

¹⁸ Imma ngaa ci icinnu i̱nna̱ ko̱ i̱ya̱bzo̱ni̱k orog ci a̱ddi̱ki̱re̱ een Babilon abal alaat cik lo̱o̱tu̱ do̱o̱k.”