O̱no̱zzo̱k 14 - Tennet

Nyoon ci ta̱mu̱-kengo ki ol cik e̱e̱ggi̱n 144,000

¹ Kicina zin anna bo̱do̱k Nyoon ci abile biye ci een zara Zion, ki ol cik e̱e̱ggi̱n i̱bbo̱nge̱t o̱bo̱n co̱de̱ ki i̱bbo̱nge̱t moten we̱c ki i̱bbo̱nge̱t we̱c (144,000) wak e̱he̱rye̱ zara cik Nyoono ki cik Baatinne ngu̱mtti̱nne̱ cigge̱k.

² Kiziya zin anna muluk ci a̱kku̱ ta̱mu̱-kenga oroi kiwagon maama cik a̱ri̱i̱, a̱ju̱l bo̱do̱k ki borowoci. Kiziya anna bo̱do̱k muluk ci oroi ki ci a̱ru̱k ol lokombet.

³ E̱be̱nte̱k nege lo̱ng ci een jor lecer ci alaano ki kaal we̱c wak aruge ko̱ ki lo̱ddi̱ki̱re̱. I̱llo̱i̱ rok e̱e̱t imma ci edemez lo̱ng neci kize ol cik e̱e̱ggi̱n i̱bbo̱nge̱t o̱bo̱n co̱de̱ ki i̱bbo̱nge̱t moten we̱c ki i̱bbo̱nge̱t we̱c (144,000) do̱ niko cik a̱gga̱ lo̱ng neci, ol balik a̱ti̱ri̱z Ta̱mu̱ta̱dde̱n nogo lo̱o̱ta̱ ngatu.

⁴ E̱e̱ggi̱n ne̱ko̱ ol cik iróng a̱wu̱l e̱le̱tti̱ ngaane, eci azunne e̱le̱tti̱ cigge̱k kizeto caale ne paz. Annu nege Nyoon rok nginti okkoye enne. Ataltai nege arrak oowa orgene ci ol cik diirik kar kanycozik nogo kizeto cik Ta̱mu̱ta̱dde̱no̱ ki ci Nyoono, kar nege kizeto ol cik riilik lo̱o̱ta̱ ngatu.

⁵ I̱llo̱i̱ volong imma ci iyowa u̱tu̱ge̱tti̱ne̱ cigge̱k; e̱e̱ggi̱n nege ol cik abunna.

Acin Joni o̱no̱zo̱we̱ anjilonya i̱i̱yo̱ cik Ta̱mu̱ta̱dde̱no̱

⁶ Kicina zin anna anjilo imma. A̱ku̱l anjilo neci ta̱mu̱-kenga. Anyak kaviyak cik abunna abak udut kar kuwahek ol wak lo̱o̱tu̱ ki ol wak aavtte u̱tu̱ge̱tti̱ do̱ do̱ ki booryyok ki ol do̱o̱k lo̱o̱co̱we̱.

⁷ Egereny zin enne muluwe ci a̱ppwe̱ azi ne, “O̱to̱ngo̱o̱ltte̱ Ta̱mu̱ta̱dde̱n kar i̱di̱ngdi̱nga̱nni̱t nonno, eci i̱ki̱ya̱ i̱i̱te̱ni̱ ci okko enne ettedik ol lo̱ki̱ko̱. I̱di̱ngdi̱nga̱nni̱t nonno wa eenyca ta̱mu̱-keng ki lo̱o̱c, ki nyatapar ci a̱ddi̱ki̱re̱ ki moren wak erenane.”

⁸ I̱ki̱ya̱ zin anjilo ci een ram ko̱ kar kize ne, “I̱li̱btte̱, I̱li̱btte̱ olli orog ci a̱ddi̱ki̱re̱ een Babilon, orog ci aanyik ol do̱o̱k lo̱o̱ta̱ kuudet merte ci aanyik nogo a̱li̱ya̱kze̱t oroot.”

⁹ Unuwa zin bo̱do̱k anjilo wa een i̱i̱yo̱ ko̱ nogo, kar kegereny muluwe ci a̱ppwe̱, azi ne, “Ming a̱di̱ngdi̱nga̱n e̱e̱ti̱ imma e̱le̱gi̱t ci mooti ko̱ ki ri̱ri̱to̱n cinne bu̱k, kar kuruba baayenit ki zoz ci e̱he̱rye̱ ngu̱ma̱ icima a̱tta̱,

¹⁰ okko atin enne bu̱k aud merte ci atin aanyik Ta̱mu̱ta̱dde̱n komoze. A̱ddu̱to̱ni̱k merte neci uduc cinne mozinto kibbit ṯoc. Apirna atin enne oroot gwo̱o̱ya̱ kicinnet anjilonya cik a̱li̱le̱ ki Nyoon.

¹¹ Kar bbu̱rre̱ti̱ ci a̱gi̱dde̱ ol nogo ko̱ ottod udut. I̱llo̱i̱ i̱i̱te̱n imma ci i̱ye̱be̱ze̱ nege waz icima ba̱a̱l ngati ol wak a̱di̱ngdi̱nga̱n e̱le̱gi̱t ki ri̱ri̱to̱n cinne, icima e̱e̱t imma ci anyak baayenit ci zar ciginnek.”

¹² Azi zoz necu ne, anyik ol wak Ta̱mu̱ta̱dde̱no̱ a̱li̱le̱ kanyait zi̱nze̱tti̱ cik alali, anime no̱ngi̱tto̱n kar ko̱to̱ngo̱o̱ltte̱ lo̱ti̱nno̱k cik Ta̱mu̱ta̱dde̱no̱ kar ke̱me̱dda̱ odohize ngati a̱tu̱we̱ zoz ci Ye̱su̱.

¹³ Kiziya zin anna muluk ci a̱kku̱ ta̱mu̱-kenga azi ne, “Teher zoz necu: A̱ma̱yu̱kte̱ ol balik a̱da̱i̱to̱ zo̱ze̱ ci anuwe nege Manyi, akane i̱yo̱ko̱ kuk.” Azi Vongizi ci Ta̱mu̱ta̱dde̱no̱ ne, “I̱i̱ny, i̱ye̱be̱z atin nege li̱ngli̱ngo̱ne̱ bali abunna u̱tu̱gu̱zzo̱ nege ke̱, annu atin nogo kaala cik u̱tu̱gu̱zzo̱ nege baize cinne̱ng.”

Acin Joni ciriyaininet ci lo̱o̱tu̱ o̱no̱zo̱we̱

¹⁴ Baling koowa ebere kacinni di̱i̱zo̱c ci voori kar E̱e̱ti̱ ci aave di̱i̱zo̱ca̱ ko̱ “Ogon ki Ngerrti E̱e̱to̱” Aim luluk ci ataltali een dhahab o̱o̱we̱ cinne, anyak ki cerecere ci lehedi a̱tta̱.

¹⁵ I̱ki̱ya̱ zin anjilo imma iyowa Ce̱e̱ze̱ wa Ta̱mu̱ta̱dde̱no̱ kar kutu E̱e̱t ci aave di̱i̱zo̱ca̱ ko̱ muluwe ci a̱ppwe̱, “Dima cerecere cunne ciriyaininto, eci i̱ki̱ya̱ i̱i̱te̱ni̱ ci ciriyaininto, eci ubunna ciriyaininet ci lo̱o̱tu̱.”

¹⁶ Kar zin E̱e̱ti̱ ci aave di̱i̱zo̱ca̱ ko̱ kotomowe cerecere cinne lo̱o̱ta̱, kar zin kiciriyan kaal cik lo̱o̱tu̱ do̱o̱k.

¹⁷ I̱ki̱ya̱ zin anjilo imma iyowa Ce̱e̱ze̱ wa Ta̱mu̱ta̱dde̱no̱ ta̱mu̱-kenga, anyak enne bu̱k cerecere ci lehedi.

¹⁸ Iyowa anjilo imma ci anyak doiz ci gwo̱o̱yo̱ a̱kku̱ i̱te̱la̱ kar kegerenyek anjilo ci anyak cerecere ci lehedi ko̱ muluwe ci a̱ppwe̱, a̱nne̱k ne, “Dima cerecere cunne lehedi ko̱, kar luta o̱ya̱u̱ cik een vi̱no̱ alute keete ci atanak ma̱ne̱ ci lo̱o̱tu̱ ko̱, eci i̱bbi̱re̱to̱ o̱ya̱u̱ ne̱ke̱.”

¹⁹ Ettede zin anjilo cerecere cinne lo̱o̱c, uluta o̱ya̱u̱ cik vi̱no̱ neci kar ku̱ju̱ke̱k nginti amacane merte ci aanyik Ta̱mu̱ta̱dde̱n kutubur nong.

²⁰ Amacuye o̱ya̱u̱ ne̱ke̱ kize merte orog abanyca, kar zin bi̱ye̱ta̱ ki̱ri̱kta̱ kiwagon maama cik tawano ovvo ngati reeni mailnya obet rama (200) kar kize wu̱u̱n a̱ku̱k wo̱ye̱ vartangec.