O̱no̱zzo̱k 13 - Tennet

Elegje cik iyowa nyatapara

¹ Kicina zin anna e̱le̱gi̱t ci a̱ddi̱ki̱re̱ mooti ci iyowa nyatapare ci a̱ddi̱ki̱re̱. Anyak o̱to̱ omoto, ki o̱o̱tti̱ turgerem ki lulukwa omoto o̱to̱ne̱, kar o̱o̱tti̱ne̱ anyak zar cik eheronik nogo do̱o̱k odome nege Ta̱mu̱ta̱dde̱n.

² Okko e̱le̱gi̱ti̱ ci kicina anna ko̱ atubo ki keelang, ma̱i̱je̱ ngatu anyak zo̱o̱ ki e̱le̱gi̱ti̱ ci ogon ki nyaangu, imma utugi cinne ogon ki ci maawo. Aanyik zin e̱le̱gi̱ti̱ ci ogon ki u̱ggu̱li̱ ci a̱ddi̱ki̱re̱ ko̱ e̱le̱gi̱t neci doiz cinne ki lecer cinne ki alaanzet ci a̱ddi̱ki̱re̱.

³ Anyak oo co̱de̱ o̱o̱tti̱ne̱ cik e̱le̱gi̱t ci a̱ddi̱ki̱re̱ mooti ko̱ ngo̱do̱co̱ ci gerze oroot, alal zin da̱ ngo̱do̱co̱ neci. U̱ku̱lte̱k zin olli lo̱o̱tu̱ do̱o̱k kar zin kunuwet zoz ci e̱le̱gto̱.

⁴ I̱di̱ngdi̱nga̱nni̱t zin ol cik diirik u̱ggu̱l ci a̱ddi̱ki̱re̱ ma̱rri̱t ming aanyik enne e̱le̱gi̱t kabal ol, kar nege bu̱k kalac e̱le̱gi̱t neci kar zin ki̱jji̱nto̱ kizeto ne, “Ngene ci atubo ki e̱le̱gi̱t necu? Ngene wo̱ye̱ ci uule kar koor nonno?”

⁵ Anyozik e̱le̱gi̱ti̱ gool ci kar kodonge ele kozoz kar kodom zar cik Ta̱mu̱ta̱dde̱no̱, kar kabal lo̱o̱c nyelowi moten we̱c ki rama.

⁶ Odom zin enne Ta̱mu̱ta̱dde̱n kar bo̱do̱k kodom zar ciginnek ki nginti abahe enne ki ol wak abak ta̱mu̱-kenga ko̱.

⁷ Anyozik nonno doizi ci kar koore ol cik Ta̱mu̱ta̱dde̱no̱ a̱li̱le̱, kar ka̱gga̱m nogo. Anyozik nonno komizi ci abale ol cik lo̱o̱tu̱ do̱o̱k ki wak anyak u̱tu̱ge̱tti̱ cik aavtte do̱ do̱.

⁸ Ovvo atin olli lo̱o̱tu̱ do̱o̱k a̱di̱ngdi̱nga̱n e̱le̱gi̱t, ol wak iróng zara cigge̱k e̱he̱rye̱ buwe ci rugeto baling ngen looci keteehenye, een bui necu ci Nyoon wa bali a̱ru̱we̱ ke̱.

⁹ Ming anyak e̱e̱ti̱ imma iin ko̱, anyik nonno kiziyo.

¹⁰ Ming anyozik e̱e̱ti̱ imma kar atin ka̱gga̱me̱ illawa, okko atin enne a̱gga̱mnye̱ de̱de̱. Ming u̱du̱ya̱i̱ zoz ci e̱e̱to̱ okko enne a̱ru̱we̱ nya̱tu̱ba̱ta̱ ka̱da̱k, a̱ru̱we̱ atin enne nya̱tu̱ba̱ta̱ de̱de̱. Azi zoz necu ne, anyik ol wak Ta̱mu̱ta̱dde̱no̱ a̱li̱le̱ kinimet zo̱zzo̱k kanyait zi̱nze̱tti̱ cik alali.

E̱le̱gi̱t ci iyowa lo̱o̱ta̱ todowai

¹¹ Kicina bo̱do̱k anna e̱le̱gi̱t imma ci iyowa lo̱o̱ta̱ todowai. Anyak enne o̱to̱ ram ki i̱yo̱ko̱ mirkic ci ngen ingazi, abarik zin ozoz kiwagon u̱ggu̱li̱ ci a̱ddi̱ki̱re̱.

¹² A̱li̱ngli̱ng enne doize ci e̱le̱gi̱t bali a̱ddi̱ki̱re̱ mooti o̱o̱wu̱ ke̱, kar kaanyik olli lo̱o̱tu̱ ki̱di̱ngdi̱nga̱ni̱t e̱le̱gi̱t bali o̱o̱wu̱ ke̱, alal ngo̱do̱co̱ cinne bali gerze oroot ke̱.

¹³ Kar gon e̱le̱gi̱ti̱ neci ku̱tu̱gu̱ kaal cik a̱vu̱la̱ etted ol bi̱ye̱, awa gon gwo̱o̱ ki̱ki̱ya̱ ta̱mu̱-kenga rok lo̱o̱c kicinnet ol do̱o̱k.

¹⁴ Ma̱rri̱t enne ogon kaal cik a̱vu̱la̱, anyozik zin nonno komizi ci ogone kaal zare cik e̱le̱gi̱t bali o̱o̱wu̱ ke̱, u̱lu̱t zin enne olli lo̱o̱tu̱. Kar ku̱du̱wa̱k ol kokovanta ngu̱m ci e̱le̱gto̱ biya kize gool ci o̱ngo̱o̱li̱nne̱ nege nonno, e̱le̱gi̱t bali abucane nyazuwata ke̱, imma ngatu ngen aruge dee.

¹⁵ Anyozik ba̱li̱ye̱ nonno komizi ci kar enne kutubuwek ngoot ri̱ri̱to̱n ci e̱le̱gi̱t bali een oo ke̱ bak ovongi, abunna ming ozozi kar kaanyik ol wak iróng orong ki̱di̱ngdi̱nga̱ni̱t e̱le̱gi̱t ko̱ ku̱ru̱kte̱ ka̱da̱i̱to̱.

¹⁶ Adangek zin enne bo̱do̱k ol do̱o̱k, cik kidik ki cik a̱ddi̱ki̱re̱, i̱to̱i̱t ki ngaalamit, du̱cca̱k ki cik iróng een du̱cca̱k abunna ming anyak baayenit a̱tte̱ ci a̱zzo̱ icima ngu̱ma̱,

¹⁷ kar iróng e̱e̱ti̱ imma utene icima uuta kaal ming iróng enne anyak baayenit ci een zar cik e̱le̱gto̱ icima nimira ci zar ciginnek.

¹⁸ Orong zoz necu genyiz. Ming anyak e̱e̱ti̱ imma ci a̱gga̱, anyik nonno kikeb nimira ci zar cik e̱le̱gi̱t neci, een nimira neci ci e̱e̱t ci diiri, e̱he̱rye̱ baayenti neci ke̱te̱ obet torkonom ki moten torkonom ki torkonom (666).