O̱no̱zzo̱k 12 - Tennet

Acin Joni ngaa ki u̱ggu̱l ci a̱ddi̱ki̱re̱ o̱no̱zo̱we̱

¹ I̱ye̱la̱i̱ zin baayenti ci a̱ddi̱ki̱re̱ ta̱mu̱-kenga: Aim ngaa i̱i̱ kize ru̱u̱m cinne, okko nyelowi aave zoone ciginnek, kar munyunya omoto ki rama ka̱vvu̱to̱ o̱o̱we̱ cinne u̱tu̱gu̱ ki luluk ci alaano.

² Anyakce da̱ ngaa neci orong kutuyai, abalac zin oroot wu̱ce̱z ci do̱le̱co̱.

³ I̱ye̱la̱i̱ zin baayenti imma ta̱mu̱-kenga: E̱le̱gi̱t ci ma̱ri̱ ogon ki u̱ggu̱li̱ ci a̱ddi̱ki̱re̱, anyak o̱o̱tti̱ turgerem ki o̱to̱ omoto, ki lulukwa turgerem o̱o̱tti̱ne̱ ciginnek.

⁴ Okko ku̱u̱l cinne a̱vi̱la̱ munyuny lo̱lo̱i̱t cidici ta̱mu̱-kenga ku̱ju̱ke̱k lo̱o̱c. Ibil zin u̱ggu̱li̱ ngu̱me̱ ci ngaa ci orong kutuyai ko̱, kar atin enne kadak do̱le̱c ci ngaa neci ming okko a̱rri̱ta̱i̱.

⁵ I̱ti̱rra̱ zin ngaa neci do̱le̱c ci maci, okko atin enne abal lo̱o̱cco̱k do̱o̱k kokkom kak kiwagon zi̱i̱ti̱ ci een cool ci alaano. I̱ra̱na̱i̱ zin do̱le̱c neci ngatinne kar kuk ngati Ta̱mu̱ta̱dde̱no̱ lecere cinne.

⁶ I̱vi̱r zin ngaa neci uk balala nginti adimanek nonno Ta̱mu̱ta̱dde̱n, kar atin kuzute nonno nginati gwo̱o̱nya̱ i̱bbo̱ng co̱de̱ ki obet rama ki moten torkonom (1,260).

⁷ Anyak ba̱li̱ye̱ illa ci oorye ta̱mu̱-kenga. Oor zin anjilo wa a̱ddi̱ki̱re̱ een Maikol ki anjilonya ciginnek e̱le̱gi̱t ci ogon ki u̱ggu̱li̱ ci a̱ddi̱ki̱re̱ ko̱, kar u̱ggu̱li̱ ki anjilonya ciginnek koorit nogo bu̱k.

⁸ Abarik iróng zin da̱ e̱le̱gi̱ti̱ neci okkomi, kar zin enne ki anjilonya ciginnek iróng ngen anyak ngin imma ta̱mu̱-kenga.

⁹ U̱ju̱ko̱zi̱k u̱ggu̱li̱ ci a̱ddi̱ki̱re̱ lo̱o̱c, awu ol nonno bu̱k azi ne uwat wa reeni icima lo̱rye̱n, icima Sitan, nonno ci a̱ti̱ye̱ lo̱o̱c do̱o̱k tu̱. U̱ju̱ke̱k Ta̱mu̱ta̱dde̱n nonno lo̱o̱c, ki anjilonya ciginnek bu̱k.

¹⁰ Kar zin anna kizik muluk ci a̱ppwe̱ ta̱mu̱-kenga, azi ne, “I̱yo̱ko̱ i̱ki̱ya̱ ti̱ri̱ze̱ne̱t ki doiz ki ba̱a̱li̱ne̱t ci Ta̱mu̱ta̱dde̱no̱, ki alaanzet ci Ki̱ri̱sto̱ cinne. Eci e̱e̱ti̱ ci ovolonge ol wak a̱tu̱we̱, ci gon ovolonge nogo ngati Ta̱mu̱ta̱dde̱no̱ ba̱a̱li̱n ki wazin ko̱, u̱ju̱ko̱zi̱k lo̱o̱c.

¹¹ Ommogit nege lo̱rye̱ni̱t bi̱ye̱te̱ cik Nyoono ki zo̱ze̱ ci a̱du̱wa̱ nege; iróng nege irez e̱le̱tti̱ cigge̱k oroot abarik iróng ngen o̱ngo̱o̱le̱ daiz.

¹² Ataltto zin niga ol cik abakku ta̱mu̱-kenga ko̱! Abarik o̱lle̱ nonga ngati nyatapar ci a̱ddi̱ki̱re̱ ki lo̱o̱c, eci u̱ju̱ko̱zi̱u̱ng lo̱rye̱nti̱ i̱ge̱t lo̱o̱ta̱! Omoze enne oroot, eci enne a̱gga̱ izeto idice nonno i̱i̱nya̱.”

¹³ Baling icin e̱le̱gi̱ti̱ ci ogon ki u̱ggu̱li̱ ci a̱ddi̱ki̱re̱ u̱ju̱ko̱zi̱k enne lo̱o̱c, i̱vi̱r zin vu̱rrte̱ ci ngaa bali ukca do̱le̱c ci maci ke̱.

¹⁴ Anyozik ngaa neci ṯaabana rama cik u̱du̱va̱ni̱t wa a̱ddi̱ki̱re̱ ko̱, kar atin enne ku̱ku̱l kuk balala ngati idimane kize cinne, ngati azunne Ta̱mu̱ta̱dde̱n nonno e̱rki̱nya̱ i̱i̱yo̱ ki cikidik, kar ka̱vvu̱ reena ngati iróng u̱ggu̱li̱ ci a̱ddi̱ki̱re̱ ko̱ azuca.

¹⁵ Kar u̱ggu̱li̱ ci a̱ddi̱ki̱re̱ kutura utuge cinne maam cik ogon kiwagon moro, kar koot o̱o̱we̱ ci ngaa neci kar atin ki̱ti̱k nonno kutudude.

¹⁶ Abarik zin looci eela ngaa neci ngati oowe lo̱o̱c kar ku̱ku̱k moro bali urta u̱ggu̱li̱ ci a̱ddi̱ki̱re̱ utuge cinne ke̱.

¹⁷ Omoze zin u̱ggu̱li̱ ci a̱ddi̱ki̱re̱ oroot ngati ngaawo, kar zin kuk akate illa ci oore dooli cik dooli cik ngaa neci, eci nege e̱e̱ggi̱n ol cik o̱ngo̱o̱le̱ lo̱ti̱nno̱k cik Ta̱mu̱ta̱dde̱no̱, kar zin bo̱do̱k ku̱tu̱we̱t zoz ci u̱tu̱gu̱ Ye̱su̱ ki de̱mzi̱ne̱t cinne.

¹⁸ Ibil zin u̱ggu̱li̱ ci a̱ddi̱ki̱re̱ ti̱ti̱me̱ ci liil ci a̱ddi̱ki̱re̱.