O̱no̱zzo̱k 10 - Tennet

Anjilo ki waraga cidici

¹ Kicina zin bo̱do̱k anjilo imma ci okkomi a̱kku̱ ta̱mu̱-kenga a̱kku̱nna̱k lo̱o̱c. A̱bu̱ng di̱i̱z ele cinne do̱o̱k ki mauli ci aave oowe cinne ta̱dde̱na̱, ogon ngu̱m cinne kiwagon i̱i̱, ovvo zoona alanyit kiwagon a̱ha̱tti̱ cik gwo̱o̱ya̱k.

² Anyak enne a̱tta̱ waraga cidici ci o̱o̱ye̱. Aarik zin enne zoc cinne a̱zzo̱ nyatapar ci a̱ddi̱ki̱re̱, kar kaarik zoc ci angeto lo̱o̱c,

³ kar zin kegereny muluwe ci a̱ppwe̱ kiwagon maa. Baling egereny enne, oroi muluwani cik e̱e̱ggi̱n turgerem a̱ju̱l kiwagon borowoci.

⁴ Baling ovvo boroweta cik e̱e̱ggi̱n turgerem ko̱ ozoz, korongi zin anna kar keteher zoz cinne̱ng; abarik kiziya muluk ci a̱kku̱ ta̱mu̱-kenga ci a̱nne̱ka̱ ne, “Ma eheri zoz ci a̱du̱wa̱ boroweta cik e̱e̱ggi̱n turgerem ko̱, abarik lu̱gu̱ny zoz neci.”

⁵ Kar anjilo bali kicina abile nyatapare ci a̱ddi̱ki̱re̱ ki lo̱o̱ta̱ ke̱ odong a̱zzi̱t ci a̱zzo̱ odongek ta̱mu̱-keng.

⁶ Kar zin ki̱tto̱n zar cik Ta̱mu̱ta̱dde̱n wa aruge udut, wa bali eteehenya ta̱mu̱-keng ki kaal wak aavtte nginati do̱o̱k, eenyca lo̱o̱c ki kaal ne̱k aavtte nginati ke̱ do̱o̱k, eenyca nyatapar ci a̱ddi̱ki̱re̱ ki kaal ne̱k abak nginati ke̱ do̱o̱k. Ize zin ne, “Iróng atin ngen erewinnu u̱u̱mu̱c!

⁷ Ma̱i̱je̱ i̱i̱te̱n ci okko anjilo ci een turgerem ko̱ abu ture cinne, okko atin Ta̱mu̱ta̱dde̱n a̱du̱wa̱k zoz cinne a̱lu̱gnye̱ ko̱ du̱cca̱k waginnek een a̱ri̱tto̱k.”

⁸ Kar zin mului ci kiziya ozozikan ta̱mu̱-kenga ko̱ kozoziyan bo̱do̱k, a̱nne̱ka̱ ne, “Bito, dima waraga ci o̱o̱ye̱ a̱tte̱ ci anjilo ci abile zoci co̱de̱ nyatapare ci a̱ddi̱ki̱re̱ kar co̱de̱ lo̱o̱ta̱.”

⁹ Kuwa zin anna ngati anjilo neci kar ki̱jji̱n nonno kaanya waraga cidici. A̱nne̱ka̱ enne ne, “Dima, kar dau. Okko atin uhu keng cunne kakatkat, imma utuge cunne emede kiwagon le̱te̱ci̱.”

¹⁰ Kidima zin anna waraga cidici ko̱ a̱tte̱ ci anjilo neci, kar zin kadau. Emede de̱de̱ ogon kiwagon le̱te̱ci̱ utuga, ma̱i̱je̱ baling kadaha anna do̱o̱k, uk zin akaka kenga.

¹¹ U̱du̱wa̱ zin enne annit zoz cu: “Abunna ming uwahek ol bo̱do̱k dee zoz ci a̱lu̱ngnye̱ ko̱, ol cik meelek ki i̱do̱ngi̱ lo̱o̱co̱we̱, ki u̱tu̱ge̱tti̱ cik aavtte do̱ do̱ ki alaat.”