Ma̱te̱yo̱ 8 - Tennet

Angaru Ye̱su̱ e̱e̱t ci adak dhovo

¹ Baling ulucai Ye̱su̱ zi̱i̱ra̱, unuwet zin koole ci a̱ppwe̱ nonno.

² Imma ngati dicilim niko, i̱ki̱ya̱k nonno e̱e̱ti̱ ci adak dhovo a̱ka̱tte̱k zin u̱zu̱ngtti̱ lo̱o̱c ngati Ye̱su̱, kar kize ne, “Manyi, ming orongi ngaruwan, angaruya wo̱ye̱ labak kubunna.”

³ Atadek zin Ye̱su̱ e̱e̱t neci a̱zzi̱t, kar kize ne, “Korongi anna kar abunna ming kangaruyin.” Angaru zin enne e̱e̱t neci kubunna e̱e̱ti̱ necu ki̱zzi̱ dhovo dakdak.

⁴ U̱du̱wa̱k zin Ye̱su̱ nonno, a̱nne̱k ne, “Ma okko a̱du̱wa̱k e̱e̱t imma. Abarik bit ye̱le̱k ele e̱e̱t ci wawaco Ce̱e̱ze̱ wa Ta̱mu̱ta̱dde̱no̱, kar anyik muci cunne ki bali ming a̱du̱wa̱ ti̱lo̱wi̱ne̱t wa Musesi ke̱, kar ol kicinnet ka̱gga̱c zoz cunne.”

Tu̱we̱ne̱t ci ddi̱ki̱ryo̱i̱t wa aciiru

⁵ Baling okko Ye̱su̱ o̱rge̱ ci een Kapernaum ke̱, i̱ki̱ya̱k nonno ddi̱ki̱ryo̱i̱ti̱ ci aciiru, a̱nne̱k ne, eelawan.

⁶ Kar kizek Ye̱su̱ ne, “Manyi, kanyai du̱ca̱i̱t cinanni ezecane lo̱o̱ta̱, iróng ngen owo, apirna oroot.”

⁷ A̱nne̱k Ye̱su̱ nonno ne, “Abunna ngen atidic kokko kangaru nonno.”

⁸ Abarik ddi̱ki̱ryo̱i̱ti̱ ci aciiru ko̱ o̱bo̱de̱k nonno, a̱nne̱k ne, “Manyi, iróng agano kar i̱nna̱ i̱jja̱ rok ce̱e̱z cinanni. Abarik i̱tto̱n utug cunne, du̱wa̱ zoz, kar du̱ca̱i̱ti̱ cinanni kubunna.

⁹ Kanyai anna aciir cik a̱ddi̱ki̱re̱ ngatinanni, anyak bo̱do̱k aciir cik ka̱ddi̱ki̱rne̱ anna nogo. Ming ka̱nne̱k co̱de̱ ne, ‘Bito,’ okko enne de̱de̱. Ka̱nne̱k bo̱do̱k co̱de̱ ne, ‘I̱jja̱,’ a̱kku̱ zin. Ka̱nne̱i̱ du̱ca̱i̱t cinanni ‘Tu̱gu̱ gi̱i̱ cu,’ ogon enne de̱de̱.”

¹⁰ Baling izik Ye̱su̱ zoz neci niko, u̱ku̱le̱k je̱e̱n kar kizek koole cik annu nonno ko̱ ne, “Ka̱du̱wa̱kku̱ng zoz ci een de̱de̱, ngen kumuda e̱e̱t imma ci anyak tu̱we̱ne̱t ci okkomi lo̱o̱ce̱ ci Israilo ki e̱e̱ti̱ cu.

¹¹ Ka̱nne̱kku̱ng ne, a̱vvu̱ atin ol cik meelek o̱to̱ne̱ ci je̱e̱ni̱ ki nyigja, ovvo atin nege adak kwo̱o̱r ozol ki ciko Aburaham ki I̱sa̱ko̱ ki Ya̱ko̱bo̱ ba̱a̱li̱nte̱ ci ta̱mu̱-kengo.

¹² Imma ol wak ovvo atin aavtte ba̱a̱li̱nte̱ ci ta̱mu̱-kengo ko̱, otowonik re̱e̱nu̱n ngati mu̱hu̱ri̱. A̱lu̱ atin nege nyigite cik lo̱o̱tu̱.”

¹³ Kar Ye̱su̱ kizek ddi̱ki̱ryo̱i̱t ne, “Bit ce̱e̱za̱, ogone atin zoz necu ki ming elemi i̱nna̱ ko̱.” Angaruwe zin du̱ca̱i̱ti̱ cinne i̱i̱ neci ele.

Angaru Ye̱su̱ ol cik meelek

¹⁴ Baling okko Ye̱su̱ ce̱e̱ze̱ ci Peturu, uk umuda i̱nyi̱k ci Peturu nga̱a̱ye̱ omori, a̱bu̱re̱ ele, oong lo̱o̱ta̱.

¹⁵ Atadek Ye̱su̱ ngaa necu a̱zzi̱t, i̱zzi̱ a̱bu̱re̱zi̱ wanai niko. Itinga ngaa necu je̱e̱na̱ uk ere nonno.

¹⁶ Baling ize yo̱mo̱n, anyakttak ol Ye̱su̱ ol cik meelek anyak kuulo cik lo̱rye̱nta̱k e̱le̱tti̱ne̱, kar enne kangaru nogo do̱o̱k kubunnta.

¹⁷ Akat zoz bali u̱du̱wa̱ Ta̱mu̱ta̱dde̱n ke̱ mo̱o̱le̱t, ki bali ming u̱du̱wa̱ a̱ri̱to̱i̱ti̱ wa een Isaya ke̱, azi ne, “Angaru enne mo̱ri̱zzo̱k cigga̱c kar naga kubunnta.”

Gool ci kanuwe Ye̱su̱

¹⁸ Baling icin Ye̱su̱ koole ci a̱ppwe̱ ming aburuk nonno, u̱du̱wa̱k zin enne nogo anyik kettedit nyatapar ci a̱ddi̱ki̱re̱ koot ti̱ti̱me̱ ci golla ke̱.

¹⁹ I̱ki̱ya̱k zin de̱me̱zo̱i̱ti̱ wa lo̱ti̱nno̱k wak Musesi, kar kize ne, “De̱me̱zo̱i̱t, kanuyi zee rok nginti okkoye i̱nna̱.”

²⁰ O̱bo̱de̱k zin Ye̱su̱ nonno, a̱nne̱k ne, “Anyak i̱re̱e̱rwa̱na̱ lo̱o̱knya̱ cik aavtte, ovvo iballi anyak ce̱e̱zi̱ cik aavtte bu̱k. Ma̱i̱je̱ Ngerrti E̱e̱to̱ a̱kku̱ ta̱mu̱-kenga, iróng anyak nginti aave enne lo̱o̱ta̱ ngatu.”

²¹ A̱nne̱k bo̱do̱k nuyaiti imma nonno ne, “Manyi, inya arrak kuk ka̱da̱ baatanni ci ize daizoit.”

²² U̱du̱wa̱k zin Ye̱su̱ nonno a̱nne̱k ne, “I̱jja̱ nuwan, anyik ol wak a̱da̱i̱to̱ ka̱da̱c gonoggi cik a̱da̱i̱to̱.”

Ibiliz Ye̱su̱ ngoot

²³ Baling i̱tto̱ Ye̱su̱ i̱bo̱ kar zin nuyaha waginnek kunuwet nonno.

²⁴ I̱ki̱ya̱ zin ngooti ci a̱ppwe̱ kotomo i̱bo̱, keelozik tawani i̱bo̱. Ma̱i̱je̱ Ye̱su̱ adunge.

²⁵ Oot zin nuyaha i̱ti̱ngka̱c nonno, a̱nne̱k ne, “Manyi, eelaweta adudutet atidic maama i̱yo̱ko̱ niko!”

²⁶ O̱bo̱de̱k zin Ye̱su̱ nogo: “Niga ol cik anyakku tu̱we̱ne̱t cidici ko̱, o̱ngo̱o̱li̱nnu̱ niga nya?” Itinga zin enne je̱e̱na̱ kar kegerenyek ngoot ki maam cik apalpalane ko̱. Ibil zin ngooti neci kize nyatapari do̱o̱k lai.

²⁷ A̱ma̱li̱ltte̱ ol ne̱ke̱ do̱o̱k o̱o̱tti̱, kar ki̱jji̱nto̱, anno ne, “E̱e̱t ci ogon ku̱ necu? O̱ngo̱o̱le̱ kaala nonno rok ngoot bu̱k!”

Angaru Ye̱su̱ ol rama wak anyak kuulo

²⁸ Baling arawa Ye̱su̱ ti̱ti̱m ci golla lo̱o̱ce̱ ci een Gadarenes, i̱vi̱tta̱k zin nonno ol cik een rama anyak kuulo cik lo̱rye̱nta̱k a̱vvu̱ ilomete. E̱e̱ggi̱n nege ol cik mootik, iróng e̱e̱ti̱ imma etted gool neci.

²⁹ Ataman niko, egerenycek nege do̱o̱k Ye̱su̱, “Orongi i̱nna̱ nya ngatinna̱ng, Ngerrti Ta̱mu̱ta̱dde̱no̱? A̱kku̱nni̱ i̱nna̱ okko a̱gi̱dde̱t ming ngen i̱i̱te̱ni̱ cinna̱ng ki̱ki̱ya̱?”

³⁰ Anyak da̱ baataknya cik meelek giir ege ojonun ki nogo.

³¹ Ilalttek zin kuulo cik lo̱rye̱nta̱k ko̱ Ye̱su̱, a̱nne̱k ne, “Ming otowikket tu̱, towikket ki̱tto̱za̱ baataknya.”

³² A̱nne̱k Ye̱su̱ nogo ne, “Oto!” Iyokta zin nege re̱e̱nu̱n kar koot ki̱tto̱zzo̱ baataknya. I̱vi̱re̱t zin baataknya ne̱ko̱ do̱o̱k oot zi̱i̱la̱ kar ki̱ta̱za̱k nyatapar, utuddudde kar ka̱da̱i̱to̱ veelek.

³³ Imma ol balik uuwa baataknya ke̱ i̱vi̱re̱ta̱, oot ikebit zoz necu o̱ro̱gjo̱we̱, ki zoz ci ol balik een ram anyak kuulo cik lo̱rye̱nta̱k ke̱.

³⁴ Itingazzo ol do̱o̱k orgato ovvo acin Ye̱su̱. Baling icinnet nege nonno, ilalttek zin nonno abunna ming ungnek orog cinne̱ng lo̱o̱c.