Ma̱te̱yo̱ 12 - Tennet

Adango olli Varacisi ki Ye̱su̱ I̱i̱te̱ne̱ wa Yu̱bze̱nto̱

¹ Owo da̱ Ye̱su̱ ki nuyak I̱i̱te̱ne̱ wa Yu̱bze̱nto̱ manatoto, adak da̱ nuyak ciginnek magiz, u̱du̱lta̱ zin labi u̱gge̱, kar zin kurumet.

² Baling icinnet olli Varacisi zoz necu, izektek nonno ne, “Cinno, ogon nuyaha cigunnek kaal cik akaka I̱i̱te̱ne̱ wa Yu̱bze̱nto̱.”

³ O̱bo̱de̱k zin Ye̱su̱ nogo, a̱nne̱k ne, “Ngen niga ikebit gi̱i̱ ci ogon Da̱vi̱de̱ ki gonoggi baling adak nogo magiz Warage ci Ta̱mu̱ta̱dde̱no̱ ke̱?

⁴ I̱tto̱ enne Ce̱e̱z wa Ta̱mu̱ta̱dde̱no̱ kar kadak da̱i̱ne̱t cik a̱li̱le̱, iróng een cik ollu do̱o̱k, een cik ol wak wawaco do̱.

⁵ Ngen niga ikebit lo̱ti̱nno̱we̱ balik eher Musesi ke̱, azi ne ol wak wawaco do̱ cik a̱li̱ngli̱ng Ce̱e̱ze̱ wa Ta̱mu̱ta̱dde̱no̱ I̱i̱te̱ne̱ wa Yu̱bze̱nto̱? Iróng e̱e̱ti̱ imma azi ne abaci nege.

⁶ Ka̱nne̱kku̱ng ne e̱e̱t co̱de̱ ci a̱ddi̱ki̱re̱ ommog Ce̱e̱z wa Ta̱mu̱ta̱dde̱no̱, aave enne ngatu.

⁷ Ming a̱gga̱c u̱nge̱tti̱ cik zo̱zzo̱k ciko, azi ne, ‘Korongi anna deten, iróng een wawac.’ Iróng wo̱ye̱ niga ettedekku lo̱ki̱ko̱ ol wak iróng anyak mu̱nye̱n.

⁸ Eci Ngerrti E̱e̱to̱ ci een Manyi I̱i̱te̱n wa Yu̱bze̱nto̱.”

E̱e̱t ci anyak a̱zzi̱t ci ngooli

⁹ Imma baling utungek Ye̱su̱ ngineci lo̱o̱c, kar zin enne kuk ki̱tto̱ Ce̱e̱z wa Lawinto.

¹⁰ Ma̱i̱je̱ da̱ nginati anyak e̱e̱t ci ngooli a̱zzi̱ti̱ ci a̱zzo̱. Orong olli Varacisi gool ci kar kecebte Ye̱su̱, i̱jji̱nne̱t zin nege nonno, “Iróng akaka ming angaru i̱nna̱ e̱e̱t I̱i̱te̱ne̱ wa Yu̱bze̱nto̱?”

¹¹ Izek zin nogo ne, “Ming anyak e̱e̱ti̱ a̱zze̱t ci i̱i̱na̱k lo̱o̱k I̱i̱te̱ne̱ wa Yu̱bze̱nto̱, iróng wo̱ye̱ enne odongak bbu̱u̱r?

¹² Nya ci riili oroot, e̱e̱t ci diiri yo a̱zze̱t da̱? Abunna zin ming kogon kaal cik abunna I̱i̱te̱ne̱ wa Yu̱bze̱nto̱.”

¹³ U̱du̱wa̱k zin Ye̱su̱ e̱e̱t ci ngooli a̱zzi̱ti̱ ko̱ ne, “Zolan da̱ a̱zzi̱t cunne ka̱vvu̱ ṯop.” Ozolan zin e̱e̱ti̱ neci a̱zzi̱t ka̱vvu̱ ṯop, kar zin kubunna ki a̱zzi̱ti̱ co̱de̱ ci abunna ko̱ niko.

¹⁴ Oot zin olli Varacisi reena, orongit gool ci adawe nege Ye̱su̱ kar ku̱ru̱we̱t ka̱da̱k.

Atahala Ta̱mu̱ta̱dde̱n du̱ca̱i̱t

¹⁵ Baling okko Ye̱su̱ a̱gga̱ zoz ci orong ol kar ku̱ru̱we̱t nonno ko̱, utungek zin enne ngin neci lo̱o̱c. Unuwet zin ol cik meelek omori nonno, kar enne kangaru nogo mo̱ri̱zo̱we̱.

¹⁶ I̱lo̱te̱k Ye̱su̱ ol zoz ci azi ne, “Ma a̱du̱wa̱kku̱ ol, ming ke̱e̱ni̱ anna ngene.”

¹⁷ Ogon enne niko ko̱, kar zoz necu kakat mo̱o̱le̱t zo̱ze̱ bali u̱du̱wa̱ a̱ri̱to̱i̱ti̱ ci een Isaya:

¹⁸ “Icu du̱ca̱i̱t cinanni wa bali katahala anna ke̱, wa o̱de̱ ṯok kirezi anna, katalne zo̱ze̱ cinne, karike atin anna Vongiz cinanni nonno, kar atin enne keela ol lo̱o̱co̱we̱ do̱o̱k kurubta lo̱ki̱ko̱ ci een de̱de̱.

¹⁹ Iróng atin enne adang ol icima awalwali; iróng atin e̱e̱ti̱ imma aziye muluk cinne go̱o̱lo̱we̱.

²⁰ Eela atin enne ol wak ogon ki yaya cik u̱mu̱rgu̱lte̱, iróng atin enne egerzan e̱e̱t ci u̱tu̱gu̱ ki gwa̱a̱ ci okko adite, abarik eela atin ol kar ku̱tu̱gu̱we̱ zoz ci een de̱de̱.

²¹ Ovvo atin ol lo̱o̱co̱we̱ do̱o̱k arike zar ciginnek zi̱nze̱tti̱ cigge̱k.”

Ye̱su̱ ki ddi̱ki̱ryo̱i̱t ci een Beelzebub

²² Imma i̱i̱te̱n imma anyakttak ol Ye̱su̱ e̱e̱t ci anyak kuulo cik lo̱rye̱nta̱k kar bo̱do̱k kize ru̱be̱n, adite iina, angaru zin Ye̱su̱ nonno, kar enne kicine bak ozozi.

²³ U̱ku̱lte̱k zin ol do̱o̱k je̱e̱n, kar kizeto ne, “Een necu de̱de̱ Ngerrti Da̱vi̱de̱?”

²⁴ Ma̱i̱je̱ baling ovvo olli Varacisi aziye zoz necu, izeto ne, “Ottok e̱e̱ti̱ necu kuulo katkatone ci Beelzebub alaan ci kuulou.”

²⁵ A̱gga̱ Ye̱su̱ kaal cik i̱no̱n nege ko̱ veelek, kar zin kize ne, “Ming oorto ol cik alaan co̱de̱, a̱li̱be̱ alaanzet cinne̱ng, kar zin bo̱do̱k ce̱e̱z ci engerone ol, iróng ce̱e̱z neci angida.

²⁶ Ming ottok Sitani Sitan, engero baizi cinne. Abile wo̱ye̱ alaanzet cinne ku̱?

²⁷ I̱yo̱ko̱ zin, ming kottoi anna kuulo cik lo̱rye̱nta̱k katkatonte ci Beelzebub, ottok zin ol cuggo̱k kuulo ku̱? I̱yo̱ko̱ zin nogo cik atin ettedekkung zoz.

²⁸ Imma, ming kottoi anna kuulo cik lo̱rye̱nta̱k Vongize ci Ta̱mu̱ta̱dde̱no̱, i̱ki̱ya̱u̱ng zin ba̱a̱li̱ne̱t ci Ta̱mu̱ta̱dde̱no̱ i̱ge̱ta̱.

²⁹ “I̱i̱zo̱ wo̱ye̱ e̱e̱ti̱ ce̱e̱z ci e̱e̱t ci anyak doiz kar kogoroz kaal ciginnek ku̱? Eceb wo̱ye̱ enne e̱e̱t neci izong, kar zin kogoroz kaal cik e̱e̱t neci.

³⁰ “Ma̱i̱je̱ ming iróng e̱e̱ti̱ arume ki annita, een enne mo̱dde̱ni̱t cinanni. Ming iróng e̱e̱ti̱ a̱li̱ngli̱ng ki annita, azan abarik ol cik ka̱li̱ngli̱ngnya̱ bu̱k ko̱ koot reena ngatinanni.

³¹ Ka̱du̱wa̱kku̱ng zin, alalnek atin Ta̱mu̱ta̱dde̱n ol wak ogonik kaal cik gerzek ol icima Ta̱mu̱ta̱dde̱n, ma̱i̱je̱ ol wak ogon mu̱nye̱n zare cik Vongiz ci A̱li̱le̱, iróng atin Ta̱mu̱ta̱dde̱n alalnek nogo.

³² Ming ozoz e̱e̱ti̱ imma gerzet zare cik Ngerrti E̱e̱to̱, alalnek atin Ta̱mu̱ta̱dde̱n nonno, ma̱i̱je̱ e̱e̱ti̱ ci ozoz gerzet zare cik Vongiz ci A̱li̱le̱, iróng atin Ta̱mu̱ta̱dde̱n alalnek nonno, bu̱u̱le̱ cu icima bu̱u̱le̱ ci a̱kku̱ ke̱.”

Keet ki o̱ya̱u̱ ciginnek

³³ U̱du̱wa̱ bo̱do̱k Ye̱su̱ tubzenet ci azi ne, “Iróng keet ci abunna a̱bbi̱rna̱ o̱ya̱u̱ cik gerzek. Iróng zin bo̱do̱k keet ci gerze a̱bbi̱rna̱ o̱ya̱u̱ cik een da̱i̱ne̱t, a̱gga̱ ol keet ci emede o̱ya̱u̱ ciginnek.

³⁴ Niga ol cik ogonnu ki jooro cik uwanyau ko̱, a̱du̱wa̱nnu̱ wo̱ye̱ niga olli mu̱nye̱nu̱ zoz ci abunna? A̱du̱wa̱ utugi zoz ci a̱kku̱ zinina.

³⁵ A̱du̱wa̱ e̱e̱ti̱ ci abunna zoz ci abunna anyak enne zinine ci voori, imma e̱e̱ti̱ ci gerze, a̱du̱wa̱ zoz ci gerze anyak zinine ci a̱mu̱we̱.

³⁶ Ka̱du̱wa̱kku̱ng, okko atin Ta̱mu̱ta̱dde̱n ettedik ol do̱o̱k lo̱ki̱ko̱ i̱i̱te̱ne̱ emani zo̱ze̱ ci u̱du̱wa̱ e̱e̱ti̱ gerzet ngati iróng a̱gga̱we̱.

³⁷ Eci zo̱ze̱ cunne okko Ta̱mu̱ta̱dde̱n a̱gga̱ ming ilemi i̱nna̱, kar bo̱do̱k zo̱ze̱ cunne okko enne ettedeki zoz ci gerze.”

Atubuz Ye̱su̱ ele cinne ki Jonah

³⁸ Imma ol uggak cik Varacisi ki de̱me̱zzo̱k wak lo̱ti̱nno̱k wak Musesi ke̱, a̱nne̱k Ye̱su̱ ne, “De̱me̱zo̱i̱t, korongnya kicinnta ming ogoni i̱nna̱ kaal cik a̱vu̱la̱.”

³⁹ O̱bo̱de̱k zin Ye̱su̱ nogo, a̱nne̱k ne, “A̱jji̱n ol wak mu̱nye̱nu̱ ming kogonni anna kaal cik a̱vu̱la̱! I̱llo̱i̱ atin gi̱i̱ imma ci ki̱ye̱le̱ke̱ nogo kize gi̱i̱ ci ogon a̱ri̱to̱i̱ti̱ ci een Jonah do̱ niko.

⁴⁰ Aave bali Jonah kenge ci u̱lu̱gto̱ wazinnok i̱i̱yo̱ ki ba̱a̱li̱nno̱k i̱i̱yo̱. Ogon zin atin Ngerrti E̱e̱to̱ bu̱k niko, aave atin lo̱o̱ta̱ ecito wazinnok i̱i̱yo̱ ki ba̱a̱li̱nno̱k i̱i̱yo̱.

⁴¹ Ma zin atin i̱i̱te̱ne̱ ci okko Ta̱mu̱ta̱dde̱n ettedik ol lo̱ki̱ko̱ ke̱, ovvo zin atin ol cik een Nineveh abile lo̱ki̱ka̱ ki bu̱u̱l necu, eci ol wak Nineveh utungtek ba̱ci̱nno̱k lo̱o̱c zo̱ze̱ bali uwahek Jonah nogo ke̱. Een zin bali Jonah e̱e̱t ci riili, aave zin e̱e̱ti̱ ci riili oroot kommog Jonah ngatu.

⁴² Okko atin alaani ci nga̱a̱ye̱ ci a̱kku̱ lo̱o̱ce̱ ci een Seba o̱to̱ne̱ ci i̱do̱li̱ya̱ Israilo, ovvo atin abillu bu̱k kar kettedeung lo̱ki̱ko̱, eci enne een ngaa ci a̱kku̱ ngati reeni kar ki̱ki̱ya̱ kizik genyiz ci Solomoni, aave zin e̱e̱ti̱ ci ommog nonno to genyiza ngatu.

Bodanet ci kuulo cik lo̱rye̱nta̱k

⁴³ “Imma gon ming iyowa kuuloci ngati e̱e̱to̱, a̱vi̱r okko balala, orong nginti aave labak, iróng amuda.

⁴⁴ Azi ne, ‘Ka̱mi̱re̱ kokko atidic ngati e̱e̱t wanai ka̱kku̱ne̱ ke̱.’ Baling okko a̱mi̱re̱, amuda i̱llo̱i̱ e̱e̱t imma nginati, i̱ti̱vi̱le̱ e̱e̱ti̱ neci ki̱zi̱zi̱,

⁴⁵ Imma zin ming uk i̱mi̱re̱, anyaha ki kuulo gonoggi cik een turgerem cik gerzek ommog nonno kar kanyahak e̱e̱t bali ninne ke̱, kar zin ki̱tto̱zo̱ nege do̱o̱k e̱e̱t kar kabaito nga̱to̱de̱. Imma e̱e̱ti̱ neci odoyai zin abarik oroot, kaal cik atin ogone ngati ol cik mu̱nye̱nu̱ bu̱u̱le̱ cu ko̱ ne̱ko̱.”

Gotonoggi Ye̱su̱ ki yaatinne

⁴⁶ Baling ngen Ye̱su̱ ozozek koole ci a̱ppwe̱ ke̱, ibilet ciko yaatinne ki gotonoggi reena, orong kozozek nonno.

⁴⁷ A̱nne̱k e̱e̱ti̱ imma nonno ne, “Aavtte ciko yaatunne ki gotonoggu reena, orong kicintin.”

⁴⁸ O̱bo̱de̱k zin Ye̱su̱ nonno, a̱nne̱k ne, “Ngene ci een yaatanni, ciko ngene cik e̱e̱ggi̱n gotonogga?”

⁴⁹ Kar enne kuuv nuyak ciginnek kar kize ne, “Een ciko yaatanni ki gotonogga do̱o̱k.

⁵⁰ Ming ogon e̱e̱ti̱ imma li̱ngli̱ngo̱n ci Baba wa aave ta̱mu̱-kenga ko̱, een enne gotona ki ngoona ki yaatanni.”