Ma̱te̱yo̱ 10 - Tennet

I̱tto̱n Ye̱su̱ nuyak omoto ki rama

¹ Uluta Ye̱su̱ nuyak waginnek een omoto ki rama kar kaanyik doiz ci otowe nege kuulo cik lo̱rye̱nta̱k kar bo̱do̱k kangaruwet ol cik anyak mo̱ri̱zzo̱k cik aavtte do̱ do̱ do̱o̱k.

² E̱e̱ggi̱n ciko zar cik to̱ni̱a̱k wak Ye̱su̱ een omoto ki rama: Si̱mo̱ne̱ wa een zara Peturu ki gotoni ci een Andereya kar bo̱do̱k Je̱mi̱s ki Jon wak e̱e̱ggi̱n dooli cik Zebedee,

³ ki Vilip, ki Bartolomeyo, ki Tomas, ki Ma̱te̱yo̱ wa aluta mucuru olle, ki Je̱mi̱s ngerrti Alipeyo ki Taudesio,

⁴ ki Si̱mo̱ne̱ wa amarine gaala wak Romi ki bo̱do̱k Judas Iskariyot wa bali adawa Ye̱su̱ ko̱. E̱e̱ggi̱n ne̱ko̱ to̱ni̱a̱k cik Ye̱su̱.

I̱lo̱t Ye̱su̱ to̱ni̱a̱k waginnek een omoto ki ram

⁵ I̱tto̱n Ye̱su̱ to̱ni̱a̱k waginnek een omoto ki rama ngati i̱lo̱te̱ arrak a̱nne̱k ne, “A̱vvu̱t reena olle cik iróng e̱e̱ggi̱n Ya̱u̱d. Ma ojongozu o̱ro̱gjo̱k cik olli Samariyo bu̱k.

⁶ Oot olle cik een Israil do̱ eci nege u̱tu̱gu̱zzo̱ ki a̱zza̱ cik a̱zze̱ iróng anyak tuwayoit.

⁷ Ma ngati ovvoyyu, uwaktek ol zoz ci Ta̱mu̱ta̱dde̱no̱, izektek ne, ‘Ize ojon ba̱a̱li̱ne̱t ci ta̱mu̱-kengo.’

⁸ Angaruwet ol cik omori, uruguzet daizzok, angaruwet bo̱do̱k ol cik adak dhovo, aarta ol kuulo cik lo̱rye̱nta̱k bu̱k. Ma a̱gga̱ma̱nnu̱ ol o̱ro̱bi̱ya̱ ming a̱ti̱ri̱zu̱ nogo, eci bali Ta̱mu̱ta̱dde̱n ming eelanung ke̱ iróng adima o̱ro̱bi̱ya̱ u̱gge̱ ngatinno̱ng.

⁹ Ming ovvoyyu o̱ro̱gjo̱we̱, ma anyakku ki o̱ro̱bi̱ya̱ bu̱k;

¹⁰ ma anyakku ki lodet icima ru̱u̱ma̱ni̱, icima caava rok ki̱ri̱ bu̱k. Abarik zin ol wak uwahekku niga zoz ci Ta̱mu̱ta̱dde̱no̱ ce̱e̱zi̱nne̱ cigge̱k ko̱, cik atin a̱a̱nyu̱ng da̱i̱ne̱t.

¹¹ “Ming i̱zzo̱yu̱ orog imma, icinnet e̱e̱t ci abunna o̱rge̱ neci kar a̱vvu̱t ce̱e̱ze̱ cinne nginti ingannu.

¹² Ming i̱zzo̱yu̱ ce̱e̱z, izzac ol cik ce̱e̱zu̱, anycik ma̱yu̱we̱ne̱t ci Ta̱mu̱ta̱dde̱no̱ ka̱vvu̱ ce̱e̱ze̱ neci.

¹³ Ming abunna manyi ce̱e̱z neci ngati a̱a̱nyu̱ng a̱vvu̱t labak, utungtek ma̱yu̱we̱ne̱t ce̱e̱z neci; ming iróng manyi ce̱e̱z a̱gga̱mnyu̱ng go̱o̱le̱ ci abunna, ma a̱ma̱yu̱kku̱ ce̱e̱z neci, abarik anycik ma̱yu̱we̱ne̱t ci Ta̱mu̱ta̱dde̱n kobodaung.

¹⁴ Ming iróng e̱e̱ti̱ imma a̱gga̱mnyu̱ng go̱o̱le̱ ci abunna, icima iróng aziye zoz cunno̱ng, utungtek orog neci lo̱o̱c, i̱ti̱vi̱lta̱ tu̱du̱wa̱c ci orog neci zoone cuggo̱k ngati aburnnu nong.

¹⁵ Ka̱du̱wa̱kku̱ng zoz ci een de̱de̱, obokce atin abarik ngati o̱ro̱gjo̱k cik een Sodom ki Gomorrah i̱i̱te̱ne̱ ci okko Ta̱mu̱ta̱dde̱n ettede lo̱ki̱ko̱ cinne, gerza atin ngati orog neci oroot.

U̱zu̱tte̱ no̱ngi̱tto̱n

¹⁶ “Ki̱tto̱nnu̱ng anna i̱ge̱t kiwagon a̱zza̱ cik ajalik ol zari orgene ci u̱du̱ma̱nnu̱. Abunna ming egenyyu kiwagon uwat, abunna bo̱do̱k ming e̱e̱ggi̱nnu̱ gunune kiwagon lu̱be̱nya̱.

¹⁷ Igenyit zin olle wak ovvoyyung atin lo̱ki̱ka̱ kar kecebtung lagama kar ki̱bi̱ccu̱ng Ce̱e̱zi̱nne̱ wak Lawinto alutene nege.

¹⁸ Ovvo atin nege a̱gi̱ddu̱ng ovvoyyung alaate ki ol wak iróng een Ya̱u̱d zo̱ze̱ cinanni, kar u̱du̱kta̱k nogo zoz ci tu̱we̱ne̱t cunno̱ng.

¹⁹ Abarik ming arikkung e̱e̱ti̱ imma lagam, ma o̱ngo̱o̱li̱nnu̱ gi̱i̱ imma, icima anyakku i̱no̱ni̱ zo̱ze̱ ci ovvo atin a̱du̱wa̱nnu̱. Imma i̱i̱te̱ne̱ neci, anyonikkung zoz ci ovvo atin niga a̱du̱wa̱nnu̱.

²⁰ Iróng zin atin een i̱ge̱t cik ozozu. Ozoz atin Vongizi wa Be̱e̱ti̱nno̱ng ci okko atin a̱du̱wa̱kku̱ng zoz ci atin ovvo a̱du̱wa̱nnu̱.

²¹ “Ovvo atin ol ogon kaal ciko: Adawa atin e̱e̱ti̱ gotoni, okko be̱e̱ti̱ do̱le̱co̱ adawa do̱le̱c cinne; ovvo dooli abure ti̱lo̱wi̱ne̱t ci be̱e̱ti̱nne̱ng ki e̱e̱ti̱nne̱ng, kar ku̱ru̱we̱t nogo ka̱da̱i̱to̱.

²² Amarinnung atin ol veelek zo̱ze̱ cinanni. Imma e̱e̱ti̱ ci anime niko, amuda atin ti̱ri̱ze̱ne̱t ci Ta̱mu̱ta̱dde̱no̱ ci okko udut.

²³ Ming a̱gi̱ddu̱ng ol o̱rge̱ emani, u̱lu̱ge̱t oot o̱rge̱ emani. Ka̱du̱wa̱kku̱ng zoz ci een de̱de̱, iróng atin azucannu o̱ro̱gjo̱k cik Israilo veelek ming ngen Ngerrti E̱e̱to̱ kobodak lo̱o̱c.

²⁴ “Iróng nuyaiti ommog de̱me̱zo̱i̱t cinne oroot. Iróng bo̱do̱k du̱cca̱ha̱ ommog ddi̱ki̱ryo̱i̱t cinne̱ng.

²⁵ Ovvo zin atin demezyaha icima nuyaha wak edemez ol ko̱ ogon ki de̱me̱zo̱i̱ti̱. Ovvo bo̱do̱k du̱cca̱ha̱ ogon ki ddi̱ki̱ryo̱i̱ti̱. Ming a̱nne̱k ol manyi ce̱e̱z ne Beelzebub, a̱nne̱k wo̱ye̱ olli ce̱e̱z cinne do̱o̱k ne?

O̱to̱ngo̱o̱ltte̱ Ta̱mu̱ta̱dde̱n do̱ niko

²⁶ “Ma o̱ngo̱o̱li̱nnu̱ e̱e̱t imma. I̱llo̱i̱ gi̱i̱ imma ci a̱lu̱gnye̱ ci iróng atin i̱ye̱la̱i̱, icima a̱da̱ye̱ ci iróng atin amudai.

²⁷ Ma̱i̱je̱ kaala wak ka̱du̱wa̱kku̱ng anna mu̱hu̱ra̱, u̱du̱kta̱k ol ngati voori. Imma zoz ci komomoti iziyyet iina cuggo̱k ju̱rru̱m, u̱du̱kta̱k ol do̱o̱k muluwe ci oroi.

²⁸ Ma o̱ngo̱o̱li̱nnu̱ ol wak a̱ru̱k ele ci e̱e̱t ci diiri, iróng nege a̱ru̱k vongiz ci e̱e̱t ci diiri. Abarik o̱to̱ngo̱o̱ltte̱ Ta̱mu̱ta̱dde̱n wa uule kar ku̱ru̱k ele ki vongiz ci e̱e̱t ci diiri gwo̱o̱ye̱ ci apadpadi udut.

²⁹ Uuta ol iballi cikidik rama giricoca. Abarik Be̱e̱ti̱nno̱ng a̱gga̱ ming i̱i̱na̱k wo̱ye̱ co̱de̱ lo̱o̱c.

³⁰ I̱ti̱gi̱l Ta̱mu̱ta̱dde̱n ima cik o̱o̱tti̱ cuggo̱k do̱o̱k.

³¹ I̱yo̱ko̱ zin, ma o̱ngo̱o̱li̱nnu̱, e̱e̱ggi̱nnu̱ niga ol cik riilik ommogju niga iballi cikidik meelek ko̱.”

Uwaktek ol zoz ci Ki̱ri̱sto̱

³² “Ming u̱du̱wa̱ e̱e̱ti̱ azi ne ke̱e̱ni̱ enne e̱e̱t cinanni, ka̱du̱wa̱k atin anna Baba ta̱mu̱-kenga bu̱k zoz ci azi ne een e̱e̱ti̱ necu cinanni.

³³ Abarik ming aburna e̱e̱ti̱ orgene ci ollu, kokko atin anna ka̱bu̱ri̱ nonno bu̱k ngu̱me̱ ci Baba ta̱mu̱-kenga.

Iróng Ta̱mu̱ta̱dde̱n anyaha gano abarik anyaha illa

³⁴ “Ma i̱no̱nnu̱ a̱nnu̱ ne ka̱kku̱ni̱ anna ko̱ kanyahak gano lo̱o̱c. Iróng anna kanyaha gano, abarik kanyaha illa.

³⁵ Ka̱kku̱ni̱ anna kar ki̱ki̱ya̱ kanyik, “‘kamaroi e̱e̱ti̱ baatinne, bo̱do̱k kanyike do̱le̱c ci nga̱a̱ye̱ kamaroi yaatinne, kar bo̱do̱k alawani kamaroi i̱nyi̱g ci nga̱a̱ye̱.

³⁶ E̱e̱ggi̱n atin moddena cik e̱e̱ta̱k ol cik ce̱e̱z cinne ele.’

³⁷ “Ming irez e̱e̱ti̱ imma baatinne icima yaatinne oroot kommoga annita, iróng enne agano kize nuyait cinanni; kar bo̱do̱k ming irez e̱e̱ti̱ ngerinne icima buweenyinne oroot kommoga annita, iróng enne agano kize nuyait cinanni;

³⁸ ming iróng e̱e̱ti̱ odong keet ci een ta̱la̱ke̱c cinne kar kunuwan, iróng enne agano kize nuyait cinanni.

³⁹ Ming orong e̱e̱ti̱ kuzute ruget cinne do̱ ki̱zzi̱ Ta̱mu̱ta̱dde̱n to, iróng enne azunne de̱de̱, ming okoloz baiz zo̱ze̱ cinanni, amuda atin.

Gi̱i̱ ci a̱a̱nyu̱ng Ta̱mu̱ta̱dde̱n

⁴⁰ “Abarik ming awekung e̱e̱ti̱ imma da̱i̱ne̱t, aweka annit bu̱k. Ma e̱e̱ti̱ ci ivatana annita, ivata enne e̱e̱t ci bali i̱tto̱na̱na̱ annit ke̱ bu̱k.

⁴¹ Ma e̱e̱ti̱ ci ivata a̱ri̱to̱i̱t ci zoz ci Ta̱mu̱ta̱dde̱no̱ eci enne een a̱ri̱to̱i̱t, amuda atin enne gi̱i̱ ci anyike Ta̱mu̱ta̱dde̱n a̱ri̱to̱i̱t, ma e̱e̱ti̱ ci ivata e̱e̱t ci abunna eci e̱e̱ti̱ neci abunna, amuda atin enne gi̱i̱ ci anyike Ta̱mu̱ta̱dde̱n e̱e̱t neci.

⁴² Ma e̱e̱ti̱ ci anyike maam cik alali kidik nuyait cinanni co̱de̱ wa anyak zinin ci alali ko̱, eci enne een nuyait cinanni, ka̱du̱wa̱kku̱ng zoz ci een de̱de̱, amuc atin Ta̱mu̱ta̱dde̱n nonno bu̱k.”