Marko 7 - Tennet

Keerani cik olli Varaciso

¹ I̱i̱te̱n imma, a̱vvu̱ olli Varacisi ki de̱me̱zzo̱k wak lo̱ti̱nno̱u̱ Jerusalema, u̱lu̱tte̱ uburuktek Ye̱su̱ orgen,

² kar nege kicinnet nuyak cik Ye̱su̱ u̱gge̱ ming adakce ngati ngoronye nogo azzina kiwagon olli Varacisi.

³ Iróng gon Varacisi ki olli Ya̱u̱do̱ do̱o̱k adakce runyak ming ngen kutunyet azzin ju̱rru̱m ngati kanuwe keer wanne̱ng ol cik a̱ddi̱ki̱re̱.

⁴ Ming a̱vvu̱ gon nege cuwa, uuny nege arrak kaal ne̱ke̱ ming ngen nege kadait. Azunne nege keerani u̱gge̱ cik meelek, tunyenet uduce cik maamu, ki kaal cik aintak.

⁵ I̱jji̱nne̱t zin Varacisi ki de̱me̱zzo̱k wak lo̱ti̱nno̱u̱ Ye̱su̱, izektek ne, “Nya ming iróng nuyaha cigunnek azunne keer ci ol cik a̱ddi̱ki̱re̱, ngati adaine nege á̱há̱t runyak ko̱?”

⁶ O̱bo̱de̱k zin Ye̱su̱ nogo, “Ilem bali a̱ri̱to̱i̱ti̱ ci zoz ci Ta̱mu̱ta̱dde̱no̱ een Isaya baling a̱du̱wa̱ zoz ci obod ki i̱ge̱t ol wak a̱ru̱kku̱ talaben zo̱ze̱ ci a̱gga̱yyu̱ Ta̱mu̱ta̱dde̱n; e̱he̱rye̱ buwe ci Ta̱mu̱ta̱dde̱no̱, azi ne, “‘Ireza ol ne̱ke̱ annit u̱tu̱ge̱tti̱ne̱, ma̱i̱je̱ zi̱nze̱tti̱nne̱ cigge̱k aavtte reena ngatinanni.

⁷ Iróng nege alaya annit de̱de̱; Een de̱mzi̱ne̱t cinne̱ng, ti̱lo̱wi̱ne̱t ci a̱kku̱ ngati ol cik diirik.’

⁸ Utunget nege ti̱lo̱wi̱ne̱t ci Ta̱mu̱ta̱dde̱no̱, u̱zu̱tte̱ abarik keerani cik ol cik diirik.”

⁹ Emena Ye̱su̱ zoza, izek nogo ne: “Ogonnu niga e̱le̱tti̱ izet ol cik egenyyu ngati odotiku ti̱lo̱wi̱ne̱t ci Ta̱mu̱ta̱dde̱no̱ lo̱o̱c kar u̱zu̱tte̱ keerani cuggo̱k.

¹⁰ Eci Musesi ba̱li̱ye̱ azi ne, ‘To̱ngo̱o̱lle̱ baatunne ki yaatunne, ming anyak e̱e̱t imma ci ozoz gerzet ngati baatinne icima yaatinne, anyik ol ku̱ru̱we̱t nonno ka̱da̱k.’

¹¹ Ma̱i̱je̱ niga a̱nnu̱ ne ming a̱nne̱k e̱e̱ti̱ imma baatinne icima yaatinne ne, ‘Ming een gi̱i̱ ci keelani anna i̱nne̱t een neci muci ci anyonik Ta̱mu̱ta̱dde̱n.’

¹² Iróng zin niga ngen anyikku nonno keela baatinne icima yaatinne.

¹³ Egerzantu niga zoz ci Ta̱mu̱ta̱dde̱no̱ keere cunno̱ng i̱lo̱ti̱kku̱ dooli ko̱. Ogonnu zin niga kaal cik meelek giir ki i̱yo̱ko̱.”

Nya ci aanyik ol kizeto ngoronye

¹⁴ Utu zin bo̱do̱k Ye̱su̱ koole ki̱vi̱ta̱k nonno kar kizek ne, “Izikttang, a̱gga̱c zoz ci kozozi anna ko̱ niga do̱o̱k.

^15-16 I̱llo̱i̱ gi̱i̱ imma ci adak e̱e̱ti̱ ci diiri kar kongoronyan nonno. Abarik gi̱i̱ ci iyowa e̱e̱te̱ ci diiri ci anyike nonno kize ngoronya.”

¹⁷ Baling utungek enne koole lo̱o̱c uk i̱tto̱ ce̱e̱z, i̱jji̱nne̱t zin nuyaha ciginnek u̱nge̱tti̱ cik zoz necu.

¹⁸ I̱jji̱n zin Ye̱su̱ nogo a̱nne̱k ne, “Aavtte o̱o̱tti̱ cuggo̱k pad? Iróng niga acinnu i̱llo̱i̱ gi̱i̱ imma ci i̱i̱zo̱ e̱e̱t ci diiri kar kongoronyan nonno?

¹⁹ Eci iróng gi̱i̱ neci okko zinine cinne, abarik okko kenga kar kiyowa eliye cinne.” Ma baling u̱du̱wa̱ zoz necu, ozorowozik Ye̱su̱ zoz ize ne, “Caale da̱i̱ne̱t do̱o̱k.”

²⁰ Ozoz zin Ye̱su̱ dee, “Gi̱i̱ ci iyowa ngati e̱e̱t ci diiri ci ongoronyan nonno.

²¹ Eci ecito zinina, iyowa i̱no̱ni̱ ci gerze, a̱li̱ya̱kze̱t, ogor, munyenet ol, rotonet ki ngaai cik ollu,

²² elem ci a̱ppwe̱, marnonet ol, lu̱te̱ne̱t ol, dominet, ṯeel, ruwenet ki donginet ele ki tarbalzet.

²³ Iyowa kaala ne̱k gerzek ko̱ do̱o̱k ecito kar kongoronyan e̱e̱t ci diiri.”

Tu̱we̱ne̱t ci ngaa ci a̱kku̱ o̱rge̱ ci een Syrophoenician

²⁴ Utungek Ye̱su̱ ngin neci lo̱o̱c kar kuk o̱rge̱ ci een Tyre. I̱tto̱ zin enne ce̱e̱z iróng orong e̱e̱t imma ka̱gga̱; i̱vi̱ta̱ ol a̱gga̱c ming aave enne orgato.

²⁵ Anyak ngaa imma ci omori buweenyinne anyak kuulo cik lo̱rye̱nta̱k, baling izik enne zoz ci Ye̱su̱, i̱vi̱ra̱ kar ku̱lu̱le̱ ngatinne.

²⁶ Een ngaa necu ci Gi̱ri̱yo̱, a̱rri̱ta̱i̱ o̱rge̱ ci een Syria Phoenicia. Ilalek zin Ye̱su̱ kar kottok kuuloc ci lo̱rye̱nto̱ ngati buweenyinne.

²⁷ U̱du̱wa̱k zin Ye̱su̱ nonno, izek ne, “Arrak oowa, anyik dooli kadakto, eci iróng abunna ming ka̱gga̱ma̱ á̱há̱t doolinne kar kanycik urzi.”

²⁸ O̱bo̱de̱k zin ngaa neci nonno, “De̱de̱, Manyi, abarik zin gon urzi adak da̱i̱ne̱t wak i̱i̱na̱k lo̱o̱c ngati adaine dooli.”

²⁹ U̱du̱wa̱k zin enne ngaa neci izek ne, “Eci zo̱ze̱ ci abarizi i̱nna̱ ko̱, okko wo̱ye̱ i̱nna̱ labak; iyowa kuuloci ci lo̱rye̱nto̱ ngati buweenyunne.”

³⁰ Uk zin ngaa neci ce̱e̱za̱ uk urubak buweenyinne ming adunge kwe̱e̱na̱, iyowa kuuloci ci lo̱rye̱nto̱ ngatinne.

Angaru Ye̱su̱ e̱e̱t ci adite iina ki e̱le̱me̱tti̱

³¹ Utungek Ye̱su̱ orog ci een Tyre kar kuk kiyok o̱rge̱ ci een Sidon, kozoro kuk nyatapare ci een Ga̱li̱li̱, kuluce rok o̱ro̱gjo̱k cik een omoto azi zara Dikapolis.

³² Imma nginati, anyakttak ol uggak nonno e̱e̱t ci adite iina kar bo̱do̱k iróng ozozi, kar kilaltek nonno abunna atadek a̱zzi̱t cinne e̱e̱t necu.

³³ Baling amadan Ye̱su̱ e̱e̱t neci orgene ci ollu, uwe abanyca, aarik zin enne vallak iin cik e̱e̱t neci. Kar zin enne bo̱do̱k kuturek amut kar ku̱u̱m a̱ha̱t ci e̱e̱t neci.

³⁴ Egelem zin enne ta̱mu̱-keng ngati i̱no̱ne̱ oroot, kar kizek nonno ne, “Ephphatha!” (Azi ungec ci zoz necu ne, “OO”).

³⁵ Kar zin ngatu, o̱o̱ye̱ iina cik e̱e̱t neci, umuc zin a̱ha̱tti̱ cinne kar zin kakate kozoz labak.

³⁶ Erecanek zin Ye̱su̱ nogo zoz izek ne ma a̱du̱wa̱kku̱ e̱e̱t imma zoz necu udut. Abarik ming erecanek enne nogo ki i̱yo̱ko̱, abarik ozozit zin oroot.

³⁷ U̱ku̱lte̱k ol je̱e̱n oroot zo̱ze̱ necu, kar kizeto ne, “U̱tu̱gu̱ enne kaal do̱o̱k ju̱rru̱m. Idiman e̱e̱t ci adite iina kiziyo, angaru e̱e̱t ci aavtte e̱le̱me̱tti̱ pad kozoz.”