Marko 6 - Tennet

Iróng ol o̱ngo̱o̱le̱ a̱ri̱to̱i̱t ci zoz ci Ta̱mu̱ta̱dde̱no̱

¹ I̱mi̱re̱ zin Ye̱su̱ nginati uk o̱rge̱ cinne̱ng, Nazereta, orkor ki nuyak waginnek.

² Baling ize I̱i̱te̱n wa Yu̱bze̱nto̱, uk Ye̱su̱ akate de̱mzi̱ne̱t Ce̱e̱ze̱ wa Lawinto. A̱ma̱li̱ltte̱ ol cik meelek o̱o̱tti̱ ming aziye de̱mzi̱ne̱t cinne. I̱jji̱nto̱ zin nege, “Amuda e̱e̱ti̱ cu zoz necu nga? Genyiz ci ogon ku̱ ci anyonik nonno ko̱, ogon abarik kaal cik a̱vu̱la̱!

³ Iróng dim enne een e̱e̱t wagon adiman lecerit keene ko̱? Iróng dim enne een ngerrti Ma̱ri̱ya̱, wa een gotoni Je̱mi̱s, ki Yosevo, ki Ju̱da̱ ki Si̱mo̱ne̱? Iróng dim ngonoggja abak ki agit ngatu bu̱k?” Utuburet zin ol nong ngatinne oroot.

⁴ Izek zin Ye̱su̱ nogo ne, “Iróng ol o̱ngo̱o̱le̱ a̱ri̱to̱i̱t ci Ta̱mu̱ta̱dde̱no̱ boore cinne ki olli orog cinne do̱o̱k.”

⁵ Iróng zin Ye̱su̱ ngen ogon kaal cik a̱vu̱la̱ nginati, atadek ol cik omori azzin alawek Ta̱mu̱ta̱dde̱n kar enne kangaru nogo mo̱ri̱zo̱we̱.

⁶ A̱ku̱le̱k enne nogo zo̱ze̱ ci iróng nege anyak tu̱we̱ne̱t. Oto zin Ye̱su̱ u̱lu̱c o̱ro̱gjo̱k edemez ol o̱ro̱gjo̱we̱.

I̱tto̱n Ye̱su̱ demezyak waginnek omoto ki ram

⁷ Utu zin enne demezyak waginnek kar ki̱tto̱n nogo kotozzo rama rama, kaanyik komiz ci ommoge kuulo cik lo̱rye̱nta̱k.

⁸ Icu zoz ci i̱lo̱ti̱k enne nogo: “Ma ovvoyyu da̱i̱ne̱t icima mu̱ge̱ ki o̱ro̱bi̱ya̱, o̱o̱tte̱ keen cik omtinu do̱ niko.

⁹ I̱ti̱me̱t caava ki ru̱u̱ma̱ni̱ cik anyakku e̱le̱tti̱ne̱, ma a̱ra̱bu̱ku̱ ru̱u̱ma̱ni̱.

¹⁰ Ming i̱zzo̱yu̱ ce̱e̱z ci e̱e̱to̱, a̱vvu̱t ce̱e̱ze̱ neci rok i̱i̱te̱n ci ovvo niga ovvoyyu o̱rge̱ emani.

¹¹ Ming iróng orogi a̱gga̱ma̱nu̱ng icima aziye zoz cunno̱ng, u̱tu̱ru̱rta̱ todowa zone kar kize neci gi̱i̱ ci i̱ye̱la̱ ming aburnnu niga nong ngatinne̱ng.”

¹² Oot nege kar kuwaktek ol zoz ci ungneke nege mu̱nye̱n lo̱o̱c.

¹³ Ottoit kuulo cik lo̱rye̱nta̱k meelek olle kar ku̱vu̱de̱t ol cik omori o̱o̱tti̱ maala kubunnta.

Daiz ci Jon Ba̱ti̱ti̱mo̱

¹⁴ Ma baling izik alaani He̱ro̱di̱ zoz necu, u̱bu̱lte̱ zara cik Ye̱su̱ oroot. Azi ol uggak ne, “Oboda Jon Ba̱ti̱ti̱mo̱ daiza, zoz ci anyak enne komiz ci ogone kaal cik a̱vu̱la̱.”

¹⁵ Ovvo ol uggak azi ne, “Een enne E̱li̱ja̱.” Ngen bo̱do̱k uggak ommog zoz ci azi ne, “Een enne a̱ri̱to̱i̱t ci zoz ci Ta̱mu̱ta̱dde̱no̱, atubo ki a̱ri̱tto̱k balik reentik.”

¹⁶ Imma baling izik He̱ro̱di̱ zoz necu, ize enne ne, “Jon i̱yo̱ko̱, e̱e̱t bali ketteda anna oo ke̱ ci bo̱do̱k itinga daiza ko̱!”

¹⁷ Ngibali He̱ro̱di̱ enne eliya aanyik aciir zoz ci a̱gga̱me̱ Jon kecebit, kar zin kartik lagam. Ogon He̱ro̱di̱ zoz necu eci bali enne aama ngaa ci gotononi Vilip, een zara cik ngaa neci Herodias.

¹⁸ Eci Joni a̱nne̱k alaan He̱ro̱d ne, “Iróng een keer ci abunna ming aama i̱nna̱ ngaa ci gotononnu.”

¹⁹ Aarik zin ngaa ci een Herodias Jon zinin kar korong abunna ming a̱ru̱we̱ Jon ka̱da̱k. Iróng zin enne amuda gool ci a̱ru̱we̱,

²⁰ ma̱rri̱t He̱ro̱di̱ o̱ngo̱o̱le̱ Jon kar kuzute nonno. A̱gga̱ ming een enne e̱e̱t ci abunna a̱li̱le̱ Ta̱mu̱ta̱dde̱no̱, ming aziye He̱ro̱di̱ Jon ming ozoz, a̱ku̱le̱k je̱e̱n, abarik ngen orong kizik zoz cinne eci enne ozoz zoz ci een de̱de̱.

²¹ Ma̱i̱je̱ bali vu̱rrta̱ umuda Herodiasi gool ci kar ku̱ru̱we̱ Jon. U̱tu̱gu̱ alaani He̱ro̱di̱ kwo̱o̱r ci adahe ol da̱i̱ne̱t cik aadane nege i̱i̱te̱n bali a̱rri̱ta̱ne̱ enne kar kutu ddi̱ki̱ryyo̱k waginnek ki ddi̱ki̱ryyo̱k wak a̱ddi̱ki̱re̱ aciire ki ol wak a̱ddi̱ki̱re̱ Ga̱li̱li̱ya̱ do̱o̱k.

²² Baling okko buweenyi Herodiasi uudut rugumonta, ataltto zin He̱ro̱di̱ ki e̱re̱nno̱k do̱o̱k. Izek zin alaani He̱ro̱di̱ do̱le̱c ne, “Ji̱na̱ da̱ gi̱i̱ ci wo̱ye̱ orongi, kanyi anna niko.”

²³ U̱du̱wa̱k enne do̱le̱c olom ngati a̱du̱le̱ keet aziwe ne, “Ming nu̱nu̱n a̱jji̱nni̱ i̱nna̱ gi̱i̱ imma, kaanyi atin, kengeraki rok alaanzet cinanni gegera.”

²⁴ Iyok zin do̱le̱c uk reena ngati yaatinne, kar kizek ne, “Ka̱jji̱nni̱ wo̱ye̱ anna nya?” O̱bo̱de̱k yaatinne, “Ji̱n baatunne kettedai oo ci Jon Ba̱ti̱ti̱mo̱.”

²⁵ Ataman niko i̱vi̱r do̱le̱c uk ngati alaan He̱ro̱d izek ne, “Korongi anna inya oo ci Jon Ba̱ti̱ti̱mo̱ uduca.”

²⁶ Baling aziye alaan He̱ro̱di̱ zoz necu niko, u̱u̱c zinin oroot, ma̱i̱je̱ eci enne u̱du̱l keet ki bo̱do̱k zo̱ze̱ ci e̱re̱nno̱k waginnek ko̱, iróng zin enne ngen abure zoz cinne.

²⁷ Ataman niko, i̱tto̱n alaani aciirenit kuk ketteda oo ci Joni kar kanyaha. Uk zin aciirenti neci lagama kar ketteda oo ci Joni,

²⁸ kar kanyaha oo cinne uduca. Aanyik zin alaani oo ci Joni do̱le̱c, kar do̱le̱c kaanyik yaatinne.

²⁹ Baling iziyyet nuyaha wak Joni zoz necu, i̱vi̱ta̱ odongit ele cinne kar kadayek lo̱o̱k.

Adaiz Ye̱su̱ ol i̱bbo̱nge̱t tu̱r (5,000)

³⁰ Ulutai zin to̱ni̱a̱ha̱ baling o̱bo̱dda̱ li̱ngli̱ngo̱na̱ kar uburuwet Ye̱su̱ kar ku̱du̱kta̱k nonno kaal balik u̱tu̱gu̱zzo̱ nege ki de̱mzi̱ne̱t cinne̱ng.

³¹ Eci anyak zin ol cik meelek a̱vvu̱ ovvo uggak ovvo, iróng zin ol anyak gool ci adahe da̱i̱ne̱t. Izek zin Ye̱su̱ nogo ne, “I̱vi̱ta̱ korkorrit ki i̱ge̱t koo ngati aave ollin kar ki̱ye̱be̱zi̱t nginati.”

³² Oot zin nege do̱ i̱ba̱ ngati i̱llo̱i̱ ol.

³³ Imma ol balik a̱vvu̱ o̱ro̱gjo̱we̱ ke̱ icinnet nogo ngati ovvoye a̱gga̱c nogo, kar ki̱vi̱re̱t kuzuca ngineci oowa ngatinne̱ng.

³⁴ Baling okko Ye̱su̱ aluccai i̱bo̱wa̱, icin koole ci a̱ppwe̱, kar zin enne katamatek nogo, eci ogon nege kiwagon eezena cik iróng anyak tuwayoit. Kar zin enne kakate kedemez nogo kaal cik meelek.

³⁵ Ize bali looci yo̱mo̱n, i̱vi̱tta̱k zin nuyaha ciginnek nonno, a̱nne̱k ne, “Een ngintu nginti apirna, ize looci ba̱a̱li̱n.

³⁶ I̱tto̱n ol ne̱ko̱ koot o̱ro̱gjo̱we̱ kar ku̱tu̱yya̱ da̱i̱ne̱t u̱gge̱ kar kadait.”

³⁷ O̱bo̱de̱k zin Ye̱su̱, “Aanycik nogo da̱i̱ne̱t u̱gge̱ kadait.” Izektek zin nege nonno ne, “Orong e̱e̱ti̱ o̱ro̱bi̱ya̱ obet rama (200) cik e̱e̱ggi̱n ziik! I̱yo̱ko̱ abunna kovvo kutana da̱i̱ne̱t o̱ro̱bi̱ya̱i̱ ne̱ko̱ kar kanycik ol ne̱ko̱ kadait?”

³⁸ I̱jji̱n zin Ye̱su̱ nogo izek ne, “Anyakku i̱yo̱ko̱ niga umunet izong? Oot da̱ icinnet.” Baling u̱mu̱dda̱ nege zoz neci, izeto ne, “Kanyaka umunet tu̱r ki u̱lu̱g rama.”

³⁹ U̱du̱wa̱k zin Ye̱su̱ nogo aanycik ol do̱o̱k ka̱vvu̱to̱ lo̱o̱ta̱ koola.

⁴⁰ A̱vvu̱to̱ zin nege kollen cik e̱e̱ggi̱n o̱bo̱n co̱de̱ ki bo̱do̱k kollen cik e̱e̱ggi̱n moten tu̱r.

⁴¹ Idima Ye̱su̱ umunet ne̱k een tu̱r ko̱ ki u̱lu̱g ne̱k een rama ko̱, kar zin kicin ta̱mu̱-keng, anyik Ta̱mu̱ta̱dde̱n zany kar zin kubunyan umunet ne̱ko̱. Anyik zin enne nuyak waginnek kezedantek ol orgena. Kar bo̱do̱k enne kengerek nogo u̱lu̱g do̱o̱k.

⁴² Adakto nege do̱o̱k katanyarit,

⁴³ u̱lu̱tta̱ nuyaha da̱i̱ne̱t wak anyigzai aartik dho̱ngkwe̱t omoto ki rama.

⁴⁴ Een ol cik adakto i̱bbo̱nge̱t tu̱r (5,000).

Owo Ye̱su̱ maame

⁴⁵ Ataman niko anyik Ye̱su̱ nuyak waginnek koot i̱ba̱ kar koot o̱o̱we̱ cinne o̱rge̱ ci een Betsaida ngati ngen enne azan koole balik a̱vvu̱na̱k nogo ke̱.

⁴⁶ Ma baling i̱tto̱n enne nogo, uk enne biya ta̱dde̱na̱ okko ala Ta̱mu̱ta̱dde̱n.

⁴⁷ Baling ize looci yo̱mo̱n, uzuca i̱bo̱ nyatapar orgen, aave enne do̱ ti̱ti̱ma̱.

⁴⁸ Edenya enne nuyak ming a̱pi̱yo̱ ki i̱bo̱, eci ngooti a̱vu̱wa̱n oroot. Imma bali munyata, uk Ye̱su̱ ngatinne̱ng, owo maame ta̱dde̱na̱, orong kozoro nogo,

⁴⁹ edenyca zin abarik nege Ye̱su̱ ming owo maame ta̱dde̱na̱, i̱no̱n nege azi een necu miningit. U̱tu̱lu̱zzo̱ zin oroot,

⁵⁰ eci icinte nege do̱o̱k, a̱bba̱ri̱te̱t zin oroot. Ataman niko, ozozik Ye̱su̱ nogo, izek ne, “Aanycik zi̱nze̱tti̱ kokkomit, annita icu, ma o̱ngo̱o̱li̱nnu̱ lo̱o̱c gaganiko.”

⁵¹ Ottod zin enne i̱bo̱ ki nogo, kar zin ngooti kibil. A̱ma̱li̱ltte̱ nogo o̱o̱tti̱ oroot zo̱ze̱ neci.

⁵² Eci iróng nege a̱gga̱ zoz ci umunet ne̱ke̱ ju̱rru̱m, odoi nogo zi̱nze̱tti̱ niko.

Aruguz Ye̱su̱ mo̱ri̱zzo̱k

⁵³ Baling etteddit nege nyatapar oot ti̱ti̱ma̱, ibilet o̱rge̱ ci een Gennesaret ecebtek zin i̱bo̱ ti̱ti̱m.

⁵⁴ Ma baling iyokta nege i̱bo̱wa̱, i̱ye̱zta̱ zin ol Ye̱su̱.

⁵⁵ Azantozik ol o̱ro̱gjo̱k kar zin kodongta ol mo̱ri̱zzo̱k nginti azikne nege aave Ye̱su̱.

⁵⁶ Ming okko enne o̱rge̱ emani, odonga ol mo̱ri̱zzo̱k nginti utane ol kaal. Ilalek ol nonno orong ku̱u̱me̱t ru̱u̱m cinne, imma ol cik u̱u̱me̱t ru̱u̱m cinne, angaruyye. Ki̱zze̱c mo̱ri̱zo̱wa̱ e̱le̱tti̱ne̱ cigge̱k.