Marko 4 - Tennet

Yabzinet ci e̱e̱t ci arir ma̱na̱

¹ Akate bo̱do̱k Ye̱su̱ kar kedemezo nyatapara ti̱ti̱ma̱. Ize koole neci alutai kuburuk nonno ke̱ a̱ppwa̱ oroot kar zin kaanyik nonno ki̱tto̱ i̱bo̱ ci abile nyatapar utuga, kar zin ka̱vvu̱ i̱ba̱, ma̱i̱je̱ koole do̱o̱k aavtte ti̱ti̱ma̱.

² Kar zin enne kedemez nogo kaal cik meelek yabzinta, kar zin kizek nogo de̱mzi̱nte̱ cinne ne,

³ “Izikto da̱! Uk e̱e̱ti̱ ci ma̱nu̱ okko arir i̱nyo̱mo̱.

⁴ Ma baling azzac enne i̱nyo̱mo̱, i̱i̱na̱k i̱nyo̱mo̱na̱ uggak gool, i̱vi̱ta̱ iballi ebertta ne̱ke̱.

⁵ Ovvo i̱nyo̱mo̱na̱ uggak i̱i̱na̱k nginti een biyen, nginti iróng anyak todowa cik meelek. Alize ataman, ma̱rri̱t ngin neci iróng anyak todowac ci a̱ppwe̱.

⁶ Imma ming i̱ki̱ya̱ koor, ayukyuwan kaal ne̱ke̱ ka̱da̱i̱to̱ eci iróng anyak egero cik i̱i̱zo̱ lo̱o̱c ju̱rru̱m.

⁷ I̱i̱na̱k i̱nyo̱mo̱na̱ uggak biila orgen, i̱ti̱li̱za̱ biila kar kumunyet nogo, iróng zin i̱nyo̱mo̱na̱ ne̱ke̱ a̱bbi̱re̱.

⁸ I̱i̱na̱k i̱nyo̱mo̱na̱ uggak nginti een lobonok. I̱ti̱li̱za̱ ta̱dde̱n ki̱bbi̱re̱to̱, otorye kizeto moten i̱i̱yo̱, moten torkonom icima kizeto obet cik meelek.”

⁹ Kar zin Ye̱su̱ kize ne, “Anyik e̱e̱t imma ci anyak iin cik aziknene, anyik kiziyo.”

Nya Ye̱su̱ ming ozoz yabzinta ko̱?

¹⁰ Baling a̱vvu̱ enne do̱, i̱jji̱nne̱t zin to̱ni̱a̱ha̱ wak een omoto ki rama ki bo̱do̱k ol u̱gge̱ cik aburuk nonno ungec ci yabzinet necu.

¹¹ U̱du̱wa̱k zin enne nogo, “Anyoziung i̱ge̱t zoz ci ba̱a̱li̱ne̱t ci Ta̱mu̱ta̱dde̱no̱ a̱lu̱gnye̱ ko̱. Ma̱i̱je̱ ngati ol ne̱k aavtte reena ke̱, a̱du̱ya̱i̱ zoz do̱o̱k i̱ya̱bzi̱nta̱.

¹² Kar zin “‘Acin wo̱ye̱ nege, ma̱i̱je̱ ngatu iróng zin acin de̱de̱, kar zin bo̱do̱k azikne abarik iróng zin a̱gga̱; uhu wo̱ye̱ zi̱nze̱tti̱ cigge̱k, kar Ta̱mu̱ta̱dde̱n kalalek nogo!’”

Oob Ye̱su̱ zoz ci e̱e̱t ci e̱e̱vi̱ye̱

¹³ Izek zin Ye̱su̱ nogo ne, “Iróng niga a̱gga̱yyu̱ ungec ci yabzinet cu? A̱gga̱yyu̱ wo̱ye̱ atin niga yabzinet imma ku̱?

¹⁴ Ogon e̱e̱ti̱ ci ma̱nu̱ ki e̱e̱ti̱ ci okkoye zoz ci Ta̱mu̱ta̱dde̱no̱ olle.

¹⁵ Ogon ol uggak ki i̱yo̱ko̱ i̱nyo̱mo̱na̱ cik i̱i̱na̱k gool ko̱, nginti arirene zoz. Ming aziye nege ataman niko, a̱kku̱ Sitani okko irana zoz ci arire zi̱nze̱tti̱nne̱ cigge̱k ko̱.

¹⁶ Ogon ol uggak ki i̱nyo̱mo̱na̱ wak i̱i̱na̱k nginti een biyen, aziye zoz ci Ta̱mu̱ta̱dde̱no̱ ataman, kar kelema talninta.

¹⁷ Ma̱i̱je̱ zin ngatu iróng arike zi̱nze̱tti̱ ju̱rru̱m (anyak egero ju̱rru̱m), a̱tu̱we̱ arrak do̱yo̱i̱t. Ming okko piryanzet a̱kku̱ icima gi̱de̱ne̱t zo̱ze̱ ci zoz necu, odotek zoz necu lo̱o̱c ataman.

¹⁸ Ogon bo̱do̱k uggak ki i̱nyo̱mo̱na̱ cik arironik nginti een biila ko̱, aziye zoz ju̱rru̱m;

¹⁹ ma̱i̱je̱ ming i̱no̱n nege kaal wak baizak, ki lu̱te̱ne̱t wa oronge e̱e̱ti̱ kize jaitot, okko zoz necu adudut zoz bali izik e̱e̱ti̱ ke̱, kar zoz neci iróng ngen anyaha zoz ci abunna.

²⁰ Ogon uggak ki i̱nyo̱mo̱na̱ wak arire lobonowa, aziye zoz, elemi zoz neci, kar ki̱bbi̱re̱to̱ labina lak moten i̱i̱yo̱, icima moten torkonom icima obet cik meelek kommogit i̱nyo̱mo̱ balik arire ke̱.”

Yabzinet ci urezo

²¹ Izek zin enne nogo ne, “Anyaha wo̱ye̱ i̱nna̱ urez kar bo̱do̱k bung uduca icima arike kwe̱e̱n ecito? Abarik iróng gon i̱nna̱ arike kibil ju̱rru̱m ngati derenyi.

²² Eci gi̱i̱ ci a̱lu̱gnye̱, orong ki̱ye̱la̱i̱, eci gi̱i̱ ci a̱lu̱gnye̱ orong kanyayai nginti voori.

²³ Ming anyak e̱e̱ti̱ imma iin, anyik kiziyo.”

²⁴ Emena Ye̱su̱ zoza dee, “I̱no̱n ju̱rru̱m zoz ci aziyi i̱nna̱, gool ci i̱ya̱be̱ i̱nna̱, i̱ya̱bzo̱ni̱ki̱ atin i̱nne̱t bu̱k, icima kize a̱ppwa̱ kommog necu.

²⁵ Ming a̱gga̱ e̱e̱ti̱ zoz cinanni imma, anyonik atin nonno cik meelek; ma̱i̱je̱ ming a̱gga̱ e̱e̱ti̱ zoz cinanni cidici nu̱nu̱n, a̱gga̱mnya̱i̱ atin zoz ci a̱gga̱ enne ko̱.”

Tubzenet ci inyemenit ci alize

²⁶ Izek bo̱do̱k enne nogo ne, “Ogon zin ba̱a̱li̱ne̱t ci Ta̱mu̱ta̱dde̱no̱ ke̱te̱. Azacek e̱e̱ti̱ imma i̱nyo̱mo̱ lo̱o̱c.

²⁷ Imma ba̱a̱li̱n kaal ki wazin tu̱p, ming okko adunge icima ingazi unyahe, alize i̱nyo̱mo̱na̱ kiyokta, ming nu̱nu̱n iróng enne a̱gga̱ alize ku̱.

²⁸ Anyike todowa labi kiyokta, arrak alize kizeto angaya, kar kartik viyong, kar zin vu̱rrta̱ kartik labi.

²⁹ Baling ovvo labina a̱bbi̱re̱, etted zin enne abaza, eci i̱ki̱ya̱ i̱i̱te̱ni̱ ci ettede labi.”

Tubzenet ci bu̱ra̱co̱c ci bolbolento

³⁰ Izek zin bo̱do̱k Ye̱su̱ nogo ne, “Kazi wo̱ye̱ ne ogon ba̱a̱li̱ne̱t ci Ta̱mu̱ta̱dde̱no̱ ki ni̱i̱, icima yabzinet jang ci wo̱ye̱ ka̱du̱wa̱ne̱ ba̱a̱li̱ne̱t necu?

³¹ Ogon ki bu̱ra̱co̱c ci bolbolento, wa zin idicilim gon arirek i̱nna̱ lo̱o̱c ko̱.

³² Ming okko i̱nna̱ ariri, alize ki̱ddi̱ki̱r kommog keen cik ma̱nu̱ do̱o̱k, anyak alawo cik a̱ddi̱ki̱re̱ eenycine iballi wak a̱ku̱l ta̱dde̱na̱ aavtte alawo ne̱ke̱.”

Zoz ci edemeze Ye̱su̱ ol yabzinta

³³ A̱du̱wa̱k Ye̱su̱ nogo zoz ngati ikebe yabzinet cik meelek giir kar nege ka̱gga̱c.

³⁴ Ngen enne kozozik ol ollin, ozoz yabzinta. Ma̱i̱je̱ ming a̱vvu̱to̱ enne ki nuyak ciginnek, oobek u̱nge̱tti̱ cik yabzinto.

Abiliz Ye̱su̱ ngoot

³⁵ Imma i̱i̱te̱n neci baling ize looci yo̱mo̱n, izek enne nuyak ciginnek ne, “Ize we̱t kettedit koo o̱to̱ne̱ ci golla.”

³⁶ Utungtek koole vu̱rru̱t, kar zin demezyaha ciginnek koot i̱bo̱wa̱. Orkorrit zin nege ki Ye̱su̱, anyak i̱be̱t u̱gge̱ bu̱k cik orkor ki nonno.

³⁷ I̱ki̱ya̱ ngooti ci apalpalan maam ki̱tto̱zo̱ i̱bo̱, ize ojon ngati u̱be̱ne̱ i̱bo̱.

³⁸ Adunge da̱ Ye̱su̱ i̱bo̱wa̱ o̱to̱ne̱ immane atada oo ṯaabawa. I̱ti̱ngka̱c zin nuyaha nonno kar kizettek ne, “De̱me̱zo̱i̱t, iróng i̱nna̱ edeconiket ming kutududewa ko̱?”

³⁹ Itinga enne je̱e̱na̱, egerenyek ngoot kar kizek tawan ne, “A̱vvu̱ dee! Bil dee!”

⁴⁰ Izek zin enne nuyak ciginnek ne, “Nya ming o̱ngo̱o̱li̱nnu̱ niga oroot ko̱? Iróng niga ngen anyakku tu̱we̱ne̱t?”

⁴¹ O̱to̱ngo̱o̱ltte̱ nege oroot kar ki̱jji̱nne̱t e̱le̱tti̱, “Ngene necu? Aziye rok ngoot ki tawan bu̱k nonno ko̱!”