Marko 14 - Tennet

Orong alaata ku̱ru̱we̱t Ye̱su̱

¹ I̱yo̱ko̱ ize i̱i̱nya̱ cik anyigzai oowa ram kar ol kadakte I̱i̱te̱n wa Va̱rda̱ngi̱nto̱, ki Kwo̱o̱r wa Umunet wak iróng Amukcari. Orongit zin alaata cik olli wawaco Ce̱e̱ze̱ wa Ta̱mu̱ta̱dde̱no̱ ki de̱me̱zzo̱k wak lo̱ti̱nno̱u̱ gool ci kar kecebte Ye̱su̱ lo̱mu̱k kar ku̱ru̱we̱t nonno ka̱da̱k.

² Izeto zin nege ne, “Iróng kogon i̱i̱te̱ne̱ ci kwo̱o̱ro̱, ovvo atin ol avaraci.”

Avud ngaa Ye̱su̱ maala o̱rge̱ ci een Bethany

³ Baling ngen Ye̱su̱ aave o̱rge̱ ci een Bethany adakce ce̱e̱ze̱ ci Si̱mo̱ne̱ wa adak morizi wa een dhovo ko̱, anyaha zin ngaa imma gi̱i̱ ci ogon ki de̱e̱re̱ ci abbize maali ci ongooli laala adak o̱ro̱bi̱ya̱ cik meelek, amacai keete ci een nard. I̱li̱b zin enne de̱e̱re̱ kar ku̱du̱te̱k maal oo ci Ye̱su̱.

⁴ Utuburet zin ol ne̱ke̱ uggak nong nginati kar zin kizeto ne, “Nya ming aminye ngaa necu maal ci okkomi tuwenta ko̱?

⁵ Uutai i̱yo̱ko̱ o̱ro̱bi̱ya̱i̱ cik e̱e̱ggi̱n ziik obet i̱i̱yo̱ (300), kanyike weda o̱ro̱bi̱ya̱ ne̱ko̱ ol cik amati.” Itiziyet zin nege ngaa necu oroot.

⁶ Ize Ye̱su̱ ne, “Utungtek ngaa necu do̱, nya ming acunanu nonno ko̱? U̱tu̱gu̱we̱ya̱ enne annit gi̱i̱ ci a̱zi̱ze̱.

⁷ Arumenu gon niga ki ol wak amati odohize, eelannu atin niga nogo i̱i̱te̱n ci orongnyu niga. Ma̱i̱je̱ anna iróng kaavtte ki i̱ge̱t odohize.

⁸ U̱tu̱gu̱ ngaa necu gi̱i̱ ci ogon enne. U̱ddu̱te̱ya̱ enne annit maal ci ongooli laala, adimana annit kar atin kuk kadawe iloma.

⁹ Ka̱du̱wa̱kku̱ng zin zoz ci een de̱de̱, ming uwahe kaviyaha cik abunna lo̱o̱cco̱k do̱o̱k, okko gi̱i̱ ci u̱tu̱gu̱ ngaa necu ikeb kize zoz ci aadane ol nonno.”

Ovolonge Judasi Ye̱su̱ alaate

¹⁰ Imma zin Judasi Iskariyoti wa een demezeyait co̱de̱ ci Ye̱su̱ demezeyahe wak een omoto ki ram, uk enne ngati alaat cik olli wawaco Ce̱e̱ze̱ wa Ta̱mu̱ta̱dde̱no̱ kar kuk kimitanek nogo gool ci a̱gga̱me̱ nege Ye̱su̱.

¹¹ Atalne nege oroot baling ovvo aziye zoz necu niko, kar zin ku̱du̱kta̱k nonno o̱ro̱bi̱ya̱ cik ovvo nege anyike nonno. Oronga zin Judasi gool ci kar ka̱gga̱me̱k nogo Ye̱su̱ kecebe.

Adakce Ye̱su̱ ki demezyak waginnek

¹² Imma i̱i̱te̱ne̱ wa akanane Kwo̱o̱r wa Umunet wak iróng Amukcari, baling ize keer ci otongde ol nyoon ci a̱zze̱to̱ Va̱rda̱ngi̱nto̱, i̱jji̱nne̱t zin nuyaha cik Ye̱su̱ nonno, izektek ne, “Orongnyet i̱nna̱ agit koot kidimanta da̱i̱ne̱t cik I̱i̱te̱n wa Va̱rda̱ngi̱nto̱ nga?”

¹³ I̱tto̱n zin Ye̱su̱ nuyak ciginnek rama, a̱nne̱k ne, “Oot orgato, Bethanya, ming u̱ru̱mto̱u̱ ki e̱e̱t ci a̱ti̱k maam i̱jja̱, unuwet nonno.

¹⁴ U̱du̱kta̱k manyi ce̱e̱z neci i̱zo̱we̱ enne ke̱ ne, ‘A̱jji̱nne̱ de̱me̱zo̱i̱ti̱: Aave ce̱e̱z ci e̱re̱nno̱u̱ nga ci atin kovvo kadak ki nuyak wagannik I̱i̱te̱n wa Va̱rda̱ngi̱nto̱ nginati?’

¹⁵ I̱ye̱le̱kku̱ng atin enne i̱ge̱t ce̱e̱z ci atadonik imma ta̱dde̱na̱, etevete kwaana ju̱rru̱m. Idimanit zin niga kaal do̱o̱k nginati.”

¹⁶ Oot nuyaha orgato, urubta kaal do̱o̱k ki bali ming u̱du̱wa̱k Ye̱su̱ nogo ke̱. Idimanit zin da̱i̱ne̱t cik I̱i̱te̱n wa Va̱rda̱ngi̱nto̱.

¹⁷ Ma baling ize looci yo̱mo̱n, i̱vi̱ta̱ Ye̱su̱ ki demezyak omoto ki ram.

¹⁸ Baling ngen nege adakce buurato, ize zin Ye̱su̱ ne, “Ka̱du̱wa̱kku̱ng anna zoz ci een de̱de̱, adawana atin e̱e̱ti̱ co̱de̱ ngatinno̱ng annita, e̱e̱t ci kadayina bu̱k.”

¹⁹ Omozte demezyaha oroot, u̱du̱kta̱k zin nonno ngene e̱co̱de̱ e̱co̱de̱, “Iróng een annita Manyi?”

²⁰ O̱bo̱de̱k zin Ye̱su̱ nogo a̱nne̱k ne, “E̱e̱t co̱de̱ ngatinno̱ng cik e̱e̱ggi̱nnu̱ omoto ki ram ko̱, e̱e̱t ci arumo azzina ki nonno ming kadutana balang tobowe co̱de̱.

²¹ A̱da̱i̱ atin enne Ngerrti E̱e̱to̱ ki bali ming e̱he̱rye̱ Warage ci Ta̱mu̱ta̱dde̱no̱ ke̱. O̱lle̱ abarik ci e̱e̱t ci adawa Ngerrti E̱e̱to̱! Abunna weda ming iróng enne a̱rri̱ta̱i̱.”

I̱i̱te̱n ci adahe Manyi a̱ha̱t ci ba̱a̱li̱no̱

²² Baling ngen nege adakce, idima Ye̱su̱ umune, kar kanyik Ta̱mu̱ta̱dde̱n zany, kar kubunyan, kar zin kanyik nuyak waginnek, azi ne, “Adait, een necu ele cinanni.”

²³ Idima zin bo̱do̱k Ye̱su̱ uduc ci vi̱no̱, kar kanyik Ta̱mu̱ta̱dde̱n zany, kar zin kanyik demezyak, kar zin nege do̱o̱k kuudet.

²⁴ A̱nne̱k enne nogo ne, “E̱e̱ggi̱n ne̱ko̱ bi̱ye̱ ciginnek olomo, kar ol cik meelek kurumtozik Ta̱mu̱ta̱dde̱n.

²⁵ Ka̱du̱wa̱kku̱ng zin zoz ci een de̱de̱, iróng atin anna bo̱do̱k kaudi merte cu udut zee kuk kuud merte ci een jor ba̱a̱li̱nte̱ ci Ta̱mu̱ta̱dde̱no̱.”

²⁶ Baling e̱be̱nni̱t nege lo̱ng, oot zin rok Bee ci I̱ngi̱ro̱u̱.

A̱du̱wa̱ Ye̱su̱ zoz ci etezine Peturu nonno

²⁷ Izek Ye̱su̱ nogo ne, “A̱vi̱ryu̱ atin niga do̱o̱k, ungnekang lo̱o̱c.” Izek bo̱do̱k nogo ne, “E̱he̱rye̱ Warage ci Ta̱mu̱ta̱dde̱no̱, azi Ta̱mu̱ta̱dde̱n ne, “‘Ka̱ru̱i̱ atin anna tuwayoit, kar atin a̱zza̱ kazante.’

²⁸ Ming kitinga anna daiza, kokko atin anna o̱o̱we̱ cunno̱ng Ga̱li̱li̱ya̱.”

²⁹ Izek zin Peturu nonno ne, “Ming nu̱nu̱n i̱vi̱re̱t ol do̱o̱k zo̱ze̱ cunne, iróng atin anna ka̱vi̱ri̱.”

³⁰ O̱bo̱de̱k zin Ye̱su̱ nogo, izek ne, “Ka̱du̱wa̱kku̱ng zoz ci een de̱de̱, wazin necu eliya, amikzena atin i̱nna̱ annit lak i̱i̱yo̱, ming ngen tuulici korok lak rama.”

³¹ Ma̱i̱je̱ abarik Peturu a̱du̱ve̱ oroot, ize ne, “Ming ka̱da̱i̱ anna nu̱nu̱n, ka̱da̱i̱ ki i̱nne̱ta̱, iróng atin anna keteze.” Izeto zin gonoggja do̱o̱k ki i̱yo̱ko̱ ming a̱du̱wa̱ Peturu ko̱.

Ala Ye̱su̱ Ta̱mu̱ta̱dde̱n

³² Baling oot nege o̱to̱ne̱ ci Gethsemane, izek zin Ye̱su̱ nuyak waginnek ne, “A̱vvu̱t lo̱o̱ta̱ ngatu ming ngen anna kokko lawinet Ta̱mu̱ta̱dde̱n.”

³³ Uwe zin enne Peturu ki Je̱mi̱s ki Jon korkorrit bu̱k ki nonno. Akate zin enne omoze ibil zinin cinne je̱e̱na̱,

³⁴ kar enne kizek nogo ne, “A̱u̱ce̱ annit zinin, abile zinin je̱e̱na̱, u̱tu̱gu̱ ki ci ize ojon daizi ngatinanni. A̱vvu̱t ngatu, ma adungnu abarik alayo.”

³⁵ Baling oto do̱yo̱i̱t niko, u̱yu̱we̱ Ye̱su̱ kar kala Ta̱mu̱ta̱dde̱n abunna iróng i̱i̱te̱ni̱ ci daiz cinne iróng a̱kku̱nna̱k nonno.

³⁶ Ize ne, “Baba, obokce kaala do̱o̱k ngatunne, madan zin abarik pirnanet cu ngatinanni. Tu̱gu̱ zoz cunne, amire ki zoz cinanni.”

³⁷ I̱mi̱re̱ zin enne uk ngati nuyak ciginnek, amuda ming adunge. A̱nne̱k zin Ye̱su̱ Peturu ne, “Si̱mo̱ne̱, een ebere cigunnek ungnyak? Iróng wo̱ye̱ i̱nna̱ acine do̱yo̱i̱t?

³⁸ Icinte kar alayo abunna iróng atimannung lo̱rye̱n. Orong vongizi, ma̱i̱je̱ ele iróng okkomi.”

³⁹ I̱mi̱re̱ bo̱do̱k Ye̱su̱ uk lawinet, a̱du̱wa̱ zoz wanai dee.

⁴⁰ Baling obodak enne demezyak, amuda nogo dee ming adunge, eci i̱di̱ngdi̱nge̱t ebere cigge̱k ungnyak. Iróng nege a̱gga̱ gi̱i̱ ci kar ku̱du̱kta̱k nonno.

⁴¹ Oboda enne bo̱do̱k lawinta, ize lak i̱i̱yo̱, amuda demezyak ming adunge, a̱nne̱k nogo ne, “Ngen dim niga adungnu niko? E̱le̱zzo̱! I̱ki̱ya̱ i̱i̱te̱ni̱. Icinnet ming adawa ol Ngerrti E̱e̱to̱ azzine cik olli mu̱nye̱nu̱.

⁴² Itingaz je̱e̱na̱! Kotozzo! A̱vvu̱ e̱e̱ti̱ ci adawana annit ngatu!”

Ce̱bi̱ne̱t ci Ye̱su̱

⁴³ Baling ngen Ye̱su̱ ozozi, iyowa zin Judasi wa een demezeyait cinne co̱de̱ demezeyahe cik e̱e̱ggi̱n omoto ki rama ko̱. Orkora enne ki koole, anyak ki ilanya ki u̱lu̱kwa̱, i̱tto̱na̱ nogo alaata cik olli wawaco Ce̱e̱ze̱ wa Ta̱mu̱ta̱dde̱no̱, ki de̱me̱zzo̱k wak lo̱ti̱nno̱u̱ ki lo̱ddi̱ki̱re̱ cik o̱rgu̱.

⁴⁴ U̱du̱wa̱k Judasi nogo gool ci ovvo nege a̱gga̱me̱ nonno icu: “E̱e̱t ci kokko anna kacucu ko̱ nonno ele neci; e̱ce̱bi̱t nonno kar o̱o̱tte̱ ngati ebekku nonno.”

⁴⁵ Ozorowak zin Judasi Ye̱su̱, kar kizek ne, “De̱me̱zo̱i̱t!” Kar kucucu nonno.

⁴⁶ A̱gga̱mi̱t zin ol ne̱ke̱ Ye̱su̱ kar kecebit.

⁴⁷ Uvuca zin e̱e̱ti̱ imma olle ne̱k wanai abile ki Ye̱su̱ ko̱ nya̱tu̱ba̱t, kar zin ketteda du̱ca̱i̱t ci alaan ci a̱ddi̱ki̱re̱ wawaco itat ne, pur.

⁴⁸ A̱nne̱k zin Ye̱su̱ nogo ne, “A̱vvu̱nnu̱ niga ilanyai ki u̱lu̱kwa̱ ovvo a̱gga̱mnya̱ng kiwagon e̱e̱ti̱ ci egerzan lo̱o̱c?

⁴⁹ Kaavtte anna ki i̱ge̱t odohize, kedemze reena Ce̱e̱ze̱ wa Ta̱mu̱ta̱dde̱no̱, iróng da̱ niga ecebjang nya? Abunna Waraga ci Ta̱mu̱ta̱dde̱no̱ ming akati mo̱o̱le̱t.”

⁵⁰ I̱vi̱re̱t zin demezyaha cik Ye̱su̱, utungtek nonno lo̱o̱c do̱.

⁵¹ Baling a̱gga̱mi̱t ol ne̱ke̱ Ye̱su̱, unu zin lo̱gu̱t imma co̱de̱ ci aim ru̱u̱ma̱ni̱ cik adimanai waruca,

⁵² baling orong nege ka̱gga̱mi̱t nonno, i̱vi̱r zin enne nga̱dhi̱ri̱r utungek ru̱u̱m wanai amalkine ke̱ lo̱o̱c.

Ozoz Ye̱su̱ zoz cinne lo̱ki̱ka̱

⁵³ O̱o̱tte̱ zin ol Ye̱su̱ rok alaan ci a̱ddi̱ki̱re̱ wawaco, kar alaani ci tuwayau ki lo̱ddi̱ki̱re̱ ki de̱me̱zzo̱k wak lo̱ti̱nno̱u̱ kulutai nga̱to̱de̱.

⁵⁴ Unu zin Peturu Ye̱su̱ arrak do̱yo̱i̱t, rok a̱lu̱wa̱ ci alaan ci a̱ddi̱ki̱re̱ wawaco. Kar ka̱vvu̱ lo̱o̱ta̱ ki ol cik ebekce arana, kar kavvik gwo̱o̱.

⁵⁵ Orong zin alaata cik olli wawaco Ce̱e̱ze̱ wa Ta̱mu̱ta̱dde̱no̱ ki lo̱ddi̱ki̱re̱ cik lo̱ki̱ka̱ ba̱ci̱ ci u̱tu̱gu̱ Ye̱su̱ kar nege ku̱ru̱we̱t nonno ka̱da̱k.

⁵⁶ U̱du̱kta̱ zin bbacaha cik meelek zoz ci een volong ngatinne. Ongorko zin zoz cinne̱ng do̱.

⁵⁷ Itingta zin ol uggak je̱e̱na̱ kar ku̱du̱kta̱ zoz ci een volong ngati Ye̱su̱ azi ne,

⁵⁸ “Kizikta naga nonno ming azi ne, ‘Kegerezani atin anna Ce̱e̱z wa Ta̱mu̱ta̱dde̱no̱ eenyet e̱e̱ti̱ azzine ko̱ kar i̱i̱nya̱we̱ cik een i̱i̱yo̱ keenyeti Ce̱e̱z wa Ta̱mu̱ta̱dde̱no̱ imma, iróng eenyet e̱e̱ti̱ ci diiri.’”

⁵⁹ Ngen zoz ci a̱du̱wa̱ nege ko̱ ongorko dee.

⁶⁰ Itinga zin alaani ci a̱ddi̱ki̱re̱ wawaco je̱e̱na̱, kar zin ki̱jji̱n Ye̱su̱ kizek ne, “Iróng i̱nna̱ okko abarizi zoz necu?”

⁶¹ Abarik Ye̱su̱ ijahe li̱i̱m, i̱llo̱i̱ rok gi̱i̱ ci abarizi. I̱jji̱n zin bo̱do̱k alaani ci a̱ddi̱ki̱re̱ wawaco nonno, a̱nne̱k ne, “E̱e̱ni̱ i̱nna̱ Ki̱ri̱sto̱, Ngerrti Ta̱mu̱ta̱dde̱no̱ wa U̱mu̱yu̱we̱?”

⁶² O̱bo̱de̱k zin Ye̱su̱ nonno, a̱nne̱k ne, “I̱i̱ny, Ke̱e̱ni̱, acinni atin Ngerrti E̱e̱to̱ ming aave a̱tte̱ ci a̱zzo̱ Ta̱mu̱ta̱dde̱no̱, kar atin ki̱ki̱ya̱ di̱i̱zo̱ca̱ ta̱mu̱-kenga.”

⁶³ Erec zin alaani ci a̱ddi̱ki̱re̱ wawaco ru̱u̱m cinne ngati omozine. Kar zin enne ki̱jji̱no̱, “Nya ming korong naga bbacak u̱gge̱ ko̱?

⁶⁴ Iziktu niga zoz ci a̱wu̱le̱ Ye̱su̱ Ta̱mu̱ta̱dde̱n. I̱no̱nnu̱ niga nya?” Etteddek zin nege nonno do̱o̱k lo̱ki̱ko̱ azi ne agano enne ki daiz.

⁶⁵ Kar zin ol uggak ka̱ka̱te̱ kuturtek nonno amut, e̱ce̱bi̱t ebere ciginnek kar ku̱ru̱we̱t co̱o̱li̱te̱, kar kizettek ne, “Du̱wa̱ da̱ ngene ci a̱ru̱ki̱n!” Kar ol cik ebekce ko̱o̱tte̱ nonno kar ku̱ru̱we̱t.

Etezine Peturu Ye̱su̱

⁶⁶ Baling ngen Peturu aave reena, i̱ki̱ya̱ zin du̱ca̱i̱ti̱ imma ci nga̱a̱ye̱ ci alaan ci a̱ddi̱ki̱re̱ wawaco.

⁶⁷ Baling icin enne Peturu ming aavik gwo̱o̱ niko, Atangamek enne nonno oroot. Kar zin kizek nonno ne, “Orkoryyu gon i̱nna̱ bu̱k ki Ye̱su̱ e̱e̱t ci Nazereti ko̱.”

⁶⁸ Ma̱i̱je̱ Peturu etezo. Kar kize ne, “Iróng anna ka̱gga̱ zoz ci ozozi i̱nna̱ ko̱ keng ki bo̱i̱c.” A̱du̱wa̱ Peturu zoz necu kar zin kiyok kuk reena, ogok zin tuulici.

⁶⁹ Baling icin du̱ca̱i̱ti̱ ci nga̱a̱ye̱ nonno bo̱do̱k nginati, izek bo̱do̱k ol ne̱k abile abanyca ke̱ ne, “Een e̱e̱ti̱ neci demezeyait ci Ye̱su̱ bu̱k.”

⁷⁰ Etezine Peturu ele dee. Ma̱i̱je̱ ngintidici niko, izektek ol ne̱k abile ki Peturu ko̱ ne, “De̱de̱, e̱e̱ni̱ i̱nna̱ demezeyait ci Ye̱su̱, e̱e̱ni̱ i̱nna̱ e̱e̱t ci Ga̱li̱li̱.”

⁷¹ Akate zin Peturu to̱ri̱ne̱t ele cinne, kar ki̱tto̱ni̱k ele cinne nogo, ize ne, “Iróng anna ka̱gga̱ e̱e̱t ci a̱du̱wa̱nnu̱ niga zoz cinne ko̱.”

⁷² Ataman niko ogok bo̱do̱k tuulici lak rama. A̱a̱da̱ zin Peturu zoz bali u̱du̱wa̱k Ye̱su̱ nonno ke̱, a̱nne̱k ne, “Ming ngen tuulici kogok lak rama, amikzena atin i̱nna̱ annit lak i̱i̱yo̱.” Kar zin enne ka̱vvu̱ lo̱o̱ta̱ ku̱tu̱lu̱.