Marko 10 - Tennet

Edemez Ye̱su̱ ol zoz ci engerone e̱e̱ti̱ ki ngaa

¹ Imma vu̱rrta̱, utungek Ye̱su̱ orog ci een zara Kapernaum lo̱o̱c. Uk zin enne o̱to̱ne̱ ci je̱e̱ni̱ rok lo̱o̱c ci ol cik een zara Ju̱de̱ya̱, kar zin kuzuca orog ci aave moro ci Jordani o̱to̱ne̱ ci je̱e̱ni̱. Eci wagon a̱vvu̱na̱k ol cik meelek nonno, edemez zin enne nogo.

² I̱vi̱ta̱ zin ol uggak cik een Varacis, u̱cu̱be̱t Ye̱su̱ ngati a̱jji̱nne̱ zoz cu: A̱nne̱k ne, “Abunna ming oog e̱e̱ti̱ ngaa cinne?”

³ O̱bo̱de̱k zin enne nogo, “Azi lo̱ti̱nno̱wa̱ cik eher Musesi ko̱ ne zo̱ze̱ ci engerone e̱e̱ti̱ ki ngaa cinne?”

⁴ Izeto zin nege ne, “Azi Musesi ne, ming orong e̱e̱ti̱ kengerto ki ngaa cinne, anyik e̱e̱t keteherek ngaa cinne waraga ci ooginto kar zin koog.”

⁵ Kar zin Ye̱su̱ kizek nogo ne, “Eher Musesi zoz neci niko eci niga e̱e̱ggi̱nnu̱ ol cik okkomi o̱o̱tti̱.

⁶ Imma kanante ci lo̱o̱tu̱ eenyce Ta̱mu̱ta̱dde̱n lo̱o̱c, ‘eenyca nogo kizeto e̱e̱t ci maci ki ci nga̱a̱ye̱.’

⁷ ‘Eci zo̱ze̱ necu, ungnek atin e̱e̱ti̱ ci maci baatinne ki yaatinne lo̱o̱c kar koot kurumet baiz ki ngaa cinne,

⁸ kar ol ne̱k een ram ko̱ kizeto ele co̱de̱.’ Iróng nege ngen e̱e̱ggi̱n ol rama, odowe baizi cinne̱ng.

⁹ Iróng e̱e̱ti̱ imma anyak doiz ci engere nogo, eci Ta̱mu̱ta̱dde̱n urum nogo nga̱to̱de̱.”

¹⁰ Baling a̱vvu̱to̱ nege bo̱do̱k ce̱e̱za̱, i̱jji̱nne̱t zin nuyaha Ye̱su̱ zoz necu dee.

¹¹ O̱bo̱de̱k zin Ye̱su̱ nogo, a̱nne̱k ne, “Ming anyak e̱e̱t ci abure ngaa kar kuk kabaito ki ngaa ci e̱e̱t imma, aaz enne ngaa cinne.

¹² Kar ming een ngaa ci engero ki e̱e̱t cinne kar bo̱do̱k kuk kabaito ki e̱e̱t imma, aaz enne e̱e̱t cinne.”

A̱mu̱yu̱k Ye̱su̱ dooli cik kidik

¹³ Anyakttak ol uggak Ye̱su̱ dooli cigge̱k abunna a̱mu̱yu̱k nogo. Ma̱i̱je̱ zin nuyaha itiziyet nogo.

¹⁴ Baling icin Ye̱su̱ zoz neci niko, utubur zin nong. Kar kizek nogo ne, “Aanycik dooli ne̱ko̱ ki̱vi̱ta̱n, ma alamnyu nogo! Eci ba̱a̱li̱ne̱t ci Ta̱mu̱ta̱dde̱n abale ol een ci dooli cik ogon ki ne̱ko̱.

¹⁵ Ka̱du̱wa̱kku̱ng zoz ci een de̱de̱, ming iróng e̱e̱ti̱ imma elemi ba̱a̱li̱ne̱t ci Ta̱mu̱ta̱dde̱no̱ ki i̱yo̱ko̱ dooli cik kidik ko̱, iróng atin enne i̱i̱zo̱ ba̱a̱li̱ne̱t neci.”

¹⁶ A̱gga̱m zin enne dooli azzine, kar katadek nogo azzin a̱mu̱yu̱k nogo do̱o̱k.

E̱e̱t ci een jaitot ki Ye̱su̱

¹⁷ Baling akate Ye̱su̱ we̱t, i̱vi̱ra̱k e̱e̱ti̱ imma nonno kar kakatek u̱zu̱ngti̱nne̱, kar zin ki̱jji̱no̱, ize ne, “De̱me̱zo̱i̱t ci abunna, ku̱tu̱gu̱ nya kar kumuda baiz ci aave udut?”

¹⁸ O̱bo̱de̱k zin Ye̱su̱ nonno, a̱nne̱k ne, “Nya ming awuya a̱nne̱ka̱ ne de̱me̱zo̱i̱t ci abunna ko̱? I̱llo̱i̱ e̱e̱t imma ci abunna, Ta̱mu̱ta̱dde̱n do̱ niko.

¹⁹ A̱gga̱ i̱nna̱ lo̱ti̱nno̱k ciko: ‘Ma amunyi e̱e̱t ci diiri, ma orootonu ki ngaai cik ollu, ma ogorze, ma a̱du̱wa̱ zoz ngati ovolonge e̱e̱t imma, ma alaba ol kaal, to̱ngo̱o̱lle̱ baatunne ki yaatunne.’”

²⁰ O̱bo̱de̱k zin e̱e̱ti̱ neci Ye̱su̱, a̱nne̱k ne, “De̱me̱zo̱i̱t kuzute anna lo̱ti̱nno̱k ne̱ko̱ do̱o̱k baling ngen ke̱e̱ni̱ do̱le̱c rok i̱yo̱ko̱.”

²¹ Egelem zin Ye̱su̱ nonno talninta, kar kize ne, “Anyak gi̱i̱ co̱de̱ ci a̱zze̱ni̱ki̱n, bit tuwoyi kaal cigunnek do̱o̱k kar zin anyik o̱ro̱bi̱ya̱ ol cik amati, kar zin nyak jainzet cunne ta̱mu̱-kenga. Kar zin i̱jja̱ nuwan kar ize nuyait cinanni.”

²² Baling izik e̱e̱ti̱ neci zoz necu, angarunyan ngu̱m. Uk zin etteda gool cinne, eci enne anyak kaal cik meelek.

²³ Edev zin Ye̱su̱ lo̱o̱c kar zin kizek nuyak waginnek ko̱ ne, “Okkomi kak ngati e̱e̱t ci een jaitot kar ki̱tto̱ ba̱a̱li̱ne̱t ci Ta̱mu̱ta̱dde̱no̱!”

²⁴ U̱ku̱lte̱k nuyaha zoz ci a̱du̱wa̱ enne ko̱. Ma̱i̱je̱ Ye̱su̱ u̱du̱wa̱ zoz neci bo̱do̱k, ize ne, “Niga dooli, okkomi kak ngati i̱zo̱we̱ e̱e̱ti̱ ba̱a̱li̱ne̱t ci Ta̱mu̱ta̱dde̱no̱.

²⁵ Obokce abarik ngati naganagawo kar ki̱tto̱ orotenit wa een volongnyoit ko̱ labak, imma e̱e̱ti̱ ci een jaitot okkomi ngati i̱zo̱we̱ ba̱a̱li̱ne̱t ci Ta̱mu̱ta̱dde̱no̱.”

²⁶ A̱ma̱li̱ltte̱ zin o̱o̱tti̱ cik nuyak waginnek oroot, kar kozozit nege do̱, izeto ne, “Ngene ci wo̱ye̱ amuda ti̱ri̱ze̱ne̱t ci Ta̱mu̱ta̱dde̱no̱?”

²⁷ Egelem zin Ye̱su̱ nogo, kar kize ne, “Okkomi zoz necu kak ngati e̱e̱t ci diiri; imma ngati Ta̱mu̱ta̱dde̱no̱, i̱llo̱i̱ gi̱i̱ imma ci ommog nonno.”

²⁸ Itinga zin Peturu kar kizek Ye̱su̱ ne, “Kutungteya kaal do̱o̱k lo̱o̱c abunna kanuyi i̱nne̱ta̱!”

²⁹ Kar zin Ye̱su̱ kobodek nogo, azi ne, “Ka̱du̱wa̱kku̱ng zoz ci een de̱de̱, ming anyak e̱e̱t co̱de̱ ci ungnek ce̱e̱z cinne icima gotonoggi icima ngonoggi icima yaatinne icima baatinne icima dooli ciginnek icima i̱jjo̱, eci enne azunne zoz cinanni ki kaviyak cik abunna Ta̱mu̱ta̱dde̱no̱,

³⁰ amuda atin enne bu̱k kaal o̱bo̱n co̱de̱ lak o̱bo̱n co̱de̱, amuda enne baize cu (ce̱e̱zi̱ ki gotonoggi ki ngonoggi ki e̱e̱ti̱nne̱ng ki dooli, ki kaal cik meelek giir kar bo̱do̱k ol ki̱gi̱de̱t nonno) Imma baize ci atin a̱kku̱ ko̱ anyak baiz ci aave udut.

³¹ Ma̱i̱je̱ ol wak aavtte oowa kaale do̱o̱k ovvo atin e̱e̱ggi̱n vu̱rru̱t kaale do̱o̱k. Imma ol wak e̱e̱ggi̱n vu̱rru̱ti̱ ovvo atin nege e̱e̱ggi̱n o̱o̱tti̱.”

A̱du̱wa̱ Ye̱su̱ dee zoz ci daiz cinne

³² Baling ovvo Ye̱su̱ ki nuyak ciginnek ovvo Jerusalema, owo Ye̱su̱ o̱o̱we̱ cinne̱ng. A̱bba̱ri̱te̱t zi̱nze̱tti̱ cik demezyak ciginnek ko̱, imma ol balik annu nogo ke̱ o̱to̱ngo̱o̱ltte̱ nege bu̱k. Utu zin Ye̱su̱ demezyak omoto ki rama abanyca kar ku̱du̱wa̱k nogo zoz ci atin ogononik ol nonno Jerusalema.

³³ Ize zin enne ne, “Kovvo naga rok Jerusalem, kar atin ol uggak kadaya annit Ngerrti E̱e̱to̱ ngati alaat cik olli wawaco Ce̱e̱ze̱ wa Ta̱mu̱ta̱dde̱no̱ ki de̱me̱zzo̱k wak lo̱ti̱nno̱u̱. Etteddek atin nege nonno daiz kar bo̱do̱k kanycik gaala cik iróng een Ya̱u̱d.

³⁴ Aranne atin ol ne̱ke̱ nonno, uurtek amut, a̱bbi̱c a̱lle̱ne̱, kar ku̱ru̱we̱t ka̱da̱k. Imma i̱i̱nya̱we̱ cik een i̱i̱yo̱ ingazi atin enne daiza.”

A̱jji̱n Je̱mi̱si̱ ki Jon Ye̱su̱

³⁵ I̱vi̱tta̱k zin logoz cik Zebedee, Je̱mi̱s ki Jon, Ye̱su̱. Izektek zin nonno ne, “De̱me̱zo̱i̱t, korongnya abunna ming ogonoket gi̱i̱ ci ka̱jji̱na̱ naga ko̱.”

³⁶ O̱bo̱de̱k zin enne nogo, ize ne, “Nya ci orongnyu niga ku̱tu̱gu̱we̱u̱ng anna i̱ge̱ta̱?”

³⁷ O̱bo̱dde̱k nege nonno, “Anyik e̱e̱t co̱de̱ ngatinna̱ng ka̱vvu̱ a̱tte̱ cunne a̱zzo̱, okko co̱de̱ a̱tte̱ ci angeto, ming okko i̱nna̱ aave lecere ci alaanzetu.”

³⁸ O̱bo̱de̱k zin Ye̱su̱ nogo, ize ne, “Iróng niga a̱gga̱yyu̱ gi̱i̱ ci a̱jji̱nnu̱ ko̱! Audenu wo̱ye̱ uduce ci kaudene anna kapirnane ko̱, icima a̱gga̱mnyu̱ ba̱ti̱ti̱mo̱ ci ka̱gga̱ma̱ anna ko̱?” Animnyu wo̱ye̱ niga piryanzet ci kokko anna kamuda ke̱? Animnyu atin niga daiz ci atin kokko anna ka̱da̱kne̱ ke̱?

³⁹ Kar zin nege ko̱bo̱dde̱k kizeto ne, “Kuula naga,” Izek zin Ye̱su̱ nogo ne, “Audenu atin niga uduce ci kaudene anna, ovvo bo̱do̱k a̱gga̱mnyu̱ ba̱ti̱ti̱mo̱ bali ka̱gga̱ma̱ anna ke̱,

⁴⁰ ma̱i̱je̱ zoz ci okko e̱e̱ti̱ co̱de̱ aave a̱tte̱ ci a̱zzo̱ cinanni icima angeta, iróng anna ka̱du̱wa̱ necu. Een ngin ne̱ko̱ cik idimanek Ta̱mu̱ta̱dde̱n ol cik atahala enne.”

⁴¹ Baling a̱gga̱c demezyaha wak e̱e̱ggi̱n omoto ko̱ zoz ci a̱jji̱nne̱ gonoggja Je̱mi̱si̱ ki Jon, Ye̱su̱, utubortek nogo nong.

⁴² Utuwa zin Ye̱su̱ nogo do̱o̱k ka̱vvu̱to̱ nga̱to̱de̱ kar kize ne, “A̱gga̱yyu̱ niga alaat cik ol wak iróng een Ya̱u̱d ko̱ a̱gi̱d ol cigge̱k, kar lo̱ddi̱ki̱re̱ cigge̱k ki̱ye̱lta̱ komiz cinne̱ng ngatinne̱ng.

⁴³ Ma ogonnu ki nege. Abarik, ming orong e̱e̱ti̱ imma kize alaan orgene cunno̱ng, abunna ming een du̱ca̱i̱t ci ollu,

⁴⁴ kar bo̱do̱k ming orong e̱e̱ti̱ imma kize oo, abunna ming een du̱ca̱i̱t ci ollu do̱o̱k.

⁴⁵ Eci Ngerrti E̱e̱to̱ iróng a̱kku̱ kar ol ki̱li̱ngli̱ngte̱k nonno, abarik a̱li̱ngli̱nge̱k enne ol, kar kaanyik ele cinne kize wawac ci ol cik meelek.”

Angaru Ye̱su̱ e̱e̱t ci ru̱be̱ni̱ een zara Bartolomeyo

⁴⁶ I̱vi̱tta̱k zin nege orog ci een zara Je̱ri̱ko̱. Baling ovvo ciko Ye̱su̱ ki nuyak ciginnek ungnek orog neci lo̱o̱c, aave da̱ e̱e̱ti̱ ci ru̱be̱ni̱ een zara Bartimaeus ngerrti Timeyos lo̱o̱ta̱ goola abanyca alaye.

⁴⁷ Baling izik enne zoz ci azi ne, aave Ye̱su̱ wa Nazereti ojonun, akate zin egerenya, “Ye̱su̱ Ngerrti Da̱vi̱de̱, eelawan!”

⁴⁸ Egerenycek zin ol cik meelek nonno kar ku̱du̱kta̱k abunna ming aave li̱i̱m, abarik zin egereny muluwe ci a̱ppwe̱, “Ngerrti Da̱vi̱de̱ bai, eelawa annita bai!”

⁴⁹ Ibil zin Ye̱su̱ kar kize ne, “Du̱wa̱k nonno anyik ki̱ki̱ya̱ ngintu.” U̱tu̱ya̱ zin ol e̱e̱t neci ru̱be̱ni̱ ke̱, a̱nne̱k ne, “Eeh nimo, tinga je̱e̱na̱, i̱jja̱ awuyi Ye̱su̱.”

⁵⁰ U̱ju̱ke̱k zin ru̱u̱m cinne lo̱o̱c, itinga je̱e̱na̱ kar ki̱ki̱ya̱k Ye̱su̱.

⁵¹ I̱jji̱n zin Ye̱su̱ nonno, a̱nne̱k ne, “Orongi ku̱tu̱gu̱we̱i̱ nya?” Ize zin e̱e̱ti̱ ci ru̱be̱ni̱ ko̱ ne, “De̱me̱zo̱i̱t, korongi kicine.”

⁵² Izek zin Ye̱su̱ nonno ne, “Bito, angaruwi tu̱we̱ne̱t cunne.” Kar zin ataman niko icino e̱e̱ti̱ wa ru̱be̱ni̱ ko̱, unu zin Ye̱su̱.