Marko 1 - Tennet

Adiman Jon Ba̱ti̱ti̱mo̱ gool oowa kubunna

¹ Een necu kananet kaviyak cik abunna obod ki Ye̱su̱ Ki̱ri̱sto̱, Ngerrti Ta̱mu̱ta̱dde̱no̱.

² E̱he̱rye̱ buwe ci a̱ri̱to̱i̱t ci een zara Isaya, azi Ta̱mu̱ta̱dde̱n ne, “Ki̱tto̱nni̱ atin anna to̱na̱i̱t cinanni ki̱ki̱ya̱ o̱o̱we̱ cunne, nonno ci okko atin adiman gool o̱o̱we̱ cunne.”

³ “Egereny mului ci e̱e̱to̱ balale ci gi̱da̱ngi̱, azi ne, ‘Idimantek Manyi gool, idimantek nonno gool ci abile ṯop.’”

⁴ I̱ki̱ya̱ zin Joni, a̱gga̱me̱k ol ba̱ti̱ti̱mo̱ balala, uwahek ol zoz ci ba̱ti̱ti̱mo̱ kar nege kutungttek ba̱ci̱nno̱k cigge̱k lo̱o̱c, kar Ta̱mu̱ta̱dde̱n kalalek nogo ba̱ci̱nno̱k wagge̱k.

⁵ I̱vi̱tta̱k zin ol cik lo̱o̱c ci een Ju̱de̱ya̱ ki Jerusalem do̱o̱k nonno. A̱jji̱n Ta̱mu̱ta̱dde̱n kalalek nogo ba̱ci̱nno̱k wagge̱k, kar zin Joni ka̱gga̱me̱k nogo ba̱ti̱ti̱mo̱ moro ci Jordani.

⁶ Amaluk Joni ru̱u̱m ci adimanai imane cik naganagawak, kar zin bo̱do̱k ki̱ti̱m nyakadingo ci een ru̱ce̱ni̱t aruta. Adak enne giroc ki lete.

⁷ Icu zin zoz cinne: “A̱kku̱ atin e̱e̱ti̱ imma vu̱rrte̱ cinanni ci ommogja annita, iróng bu̱k anna kuuli ngati kaburcane caava waginnek zone.

⁸ I̱yo̱ko̱ ka̱gga̱me̱kku̱ng ba̱ti̱ti̱mo̱ maame, imma enne a̱gga̱me̱kku̱ng atin ba̱ti̱ti̱mo̱ Vongize ci A̱li̱le̱.”

Ba̱ti̱ti̱mo̱ ki timaninet ci atimane lo̱rye̱nti̱ Ye̱su̱

⁹ Imma i̱i̱nya̱we̱ ne̱ke̱ i̱ki̱ya̱ Ye̱su̱ o̱rge̱ wa een Nazeret wa aave Ga̱li̱li̱kte̱, a̱gga̱me̱k bali Joni nonno ba̱ti̱ti̱mo̱ moro ci Jordani.

¹⁰ Baling okko Ye̱su̱ iyowa maame, edenya ta̱mu̱-keng ming o̱o̱ye̱, kar zin Vongizi ci A̱li̱le̱ kulucak nonno kiwagon lu̱be̱.

¹¹ I̱ki̱ya̱ zin mului ci a̱kku̱ ta̱mu̱-kenga, azi ne, “E̱e̱ni̱ i̱nna̱ Ngeranni wa kirezi, katalne anna zo̱ze̱ cinne.”

Ye̱su̱ ki Sitan

¹² Ataman niko i̱tto̱ne̱k Vongizi ci Ta̱mu̱ta̱dde̱no̱ Ye̱su̱ balal.

¹³ A̱vvu̱ zin enne balala i̱i̱nya̱ moten we̱c, atiman nonno Sitani. Aave enne ki elegje, kar anjilonya cik Ta̱mu̱ta̱dde̱no̱ ki̱ti̱ri̱ze̱t nonno.

Awa Ye̱su̱ nuyak wak een o̱o̱tti̱

¹⁴ Ma baling e̱ce̱bje̱ Joni Ba̱ti̱ti̱mo̱ lagama, uk Ye̱su̱ lo̱o̱ce̱ ci Ga̱li̱li̱, uwahek ol kaviyak cik abunna Ta̱mu̱ta̱dde̱no̱.

¹⁵ Ize enne ne, “Ize ojon ba̱a̱li̱ne̱t ci Ta̱mu̱ta̱dde̱no̱ abale ol. Utungtek mu̱nye̱n lo̱o̱c kar elemtta kaviyak cik abunna.”

Atahala Ye̱su̱ ol we̱c wak a̱gga̱m u̱lu̱g

¹⁶ Imma i̱i̱te̱n imma baling okko Ye̱su̱ owo ti̱ti̱me̱ ci nyatapare ci een Ga̱li̱li̱, edenya Si̱mo̱ne̱ ki gotoni ci een Andereya ming a̱ju̱ke̱k imutuk liil, eci nege e̱e̱ggi̱n ol wak a̱gga̱m u̱lu̱g.

¹⁷ A̱nne̱k zin Ye̱su̱ nogo ne, “I̱vi̱ta̱, unuyang, ka̱a̱nyu̱ng atin izet ol cik anyahannu ol ki̱vi̱ta̱k Ta̱mu̱ta̱dde̱n.”

¹⁸ Ataman niko utungtek umutukwa wagge̱k ke̱ lo̱o̱c kar zin kunuwet nonno.

¹⁹ Baling okko enne okko reena idic, edenya enne dooli cik Zebedee, Je̱mi̱s ki gotoni wa een Jon ming aavtte i̱ba̱, adiman imutukwa cigge̱k.

²⁰ Iróng Ye̱su̱ ngen ijakce, utu zin nogo, utungtek zin be̱e̱ti̱nne̱ng Zebedee i̱bo̱ ki ol wak a̱li̱ngli̱ng ki nogo kar nege kunuwet Ye̱su̱.

Ottok Ye̱su̱ kuulo cik lo̱rye̱nta̱k

²¹ Oot zin nege rok orog ci een zara Kapernaum, ma baling i̱ki̱ya̱ I̱i̱te̱ne̱ wa Yu̱bze̱nto̱, uk Ye̱su̱ Ce̱e̱ze̱ wa Lawinto kar zin kedemez ol.

²² U̱ku̱lte̱k ol de̱mzi̱ne̱t cinne, eci enne edemez nogo kize e̱e̱t ci anyak doiz, iróng ogon ki de̱me̱zzo̱wa̱ wak lo̱ti̱nno̱u̱.

²³ Ma ngentidici niko, egereny e̱e̱ti̱ ci anyak kuuloc ci lo̱rye̱nto̱ Ce̱e̱ze̱ wa Lawinto ko̱:

²⁴ “Orongi i̱nna̱ nya ngatinna̱ng, Ye̱su̱ wa Nazereti? A̱kku̱nni̱ i̱nna̱ kar i̱jja̱ ditaweta? Ka̱gga̱yi̱n, e̱e̱ni̱ ngene. E̱e̱ni̱ i̱nna̱ Ye̱su̱ wa A̱li̱le̱ O̱de̱ Ṯok, wa Ta̱mu̱ta̱dde̱n wa a̱li̱le̱.”

²⁵ U̱du̱wa̱k zin Ye̱su̱ kuuloc, “Jahe li̱i̱m, iyowa re̱e̱nu̱n ngatinne!”

²⁶ Otomowe kuuloci e̱e̱t neci oroot kar kiyowa ngati e̱e̱t neci.

²⁷ A̱ma̱li̱ltte̱ ol ne̱ke̱ do̱o̱k o̱o̱tti̱, kar ki̱jji̱nto̱: “Nya necu? De̱mzi̱ne̱t ci een jor ki doiz! Egerenyek abarik kuulo cik lo̱rye̱nta̱k bak o̱ngo̱o̱le̱ nonno.”

²⁸ Ataman niko iziyyet ol kaviyak cik kaal ne̱k ogon Ye̱su̱ lo̱o̱ce̱ ci Ga̱li̱li̱ ko̱ do̱o̱k.

Angaru Ye̱su̱ ol cik meelek

²⁹ Baling utungtek nege Ce̱e̱z wa Lawinto lo̱o̱c, oot zin Ye̱su̱ ki ciko Je̱mi̱s ki Jon ce̱e̱ze̱ co Si̱mo̱ne̱ ki Andereya.

³⁰ Omori da̱ i̱nyi̱k ci Si̱mo̱ne̱ wa nga̱a̱ye̱, adunge, a̱bu̱re̱ ele, u̱du̱kta̱k zin da̱ nege Ye̱su̱ zoz ci moriz neci.

³¹ Uk zin enne ngati ngaa neci, a̱gga̱m zin nonno a̱zzi̱t kar keela nonno kitinga je̱e̱na̱. Utunga zin a̱bu̱re̱zi̱ nonno kar zin enne ki̱ti̱ri̱z nogo.

³² Imma yo̱mo̱n neci ngati i̱to̱we̱ i̱i̱, anyakttak ol Ye̱su̱ ol cik omori mo̱ri̱zzo̱k cik aavtte do̱ do̱ ki wak anyak kuulo cik lo̱rye̱nta̱k.

³³ U̱lu̱tte̱ ol cik o̱rgu̱ do̱o̱k tatuga,

³⁴ angaru zin Ye̱su̱ ol cik meelek anyak mo̱ri̱zzo̱k cik aavtte do̱ do̱. Ottok enne kuulo cik lo̱rye̱nta̱k, ma̱i̱je̱ ngatu iróng enne anyik kuulo kozozit ma̱rri̱t kuulo a̱gga̱ een enne ngene.

Alaye Ye̱su̱ ngati aave enne do̱

³⁵ Imma nge̱rre̱t ingani, baling ngen a̱rri̱re̱, itinga Ye̱su̱ je̱e̱na̱. Utungek ce̱e̱z lo̱o̱c kar zin kuk ngati aave do̱, kar zin kala Ta̱mu̱ta̱dde̱n.

³⁶ Oot ciko Si̱mo̱ne̱ ki gonoggi u̱gge̱ orongit nonno.

³⁷ Imma baling u̱mu̱dda̱ nege nonno, izektek ne, “Orongnyi ol do̱o̱k i̱nne̱ta̱.”

³⁸ O̱bo̱de̱k zin Ye̱su̱ nogo, a̱nne̱k ne, “Koo rok o̱ro̱gjo̱k u̱gge̱ ojonun ngatu kar anna kuwahek ol zoz ci Ta̱mu̱ta̱dde̱no̱ nginati bu̱k. Zoz ci ka̱kku̱ne̱ anna ko̱ nenen necu.”

³⁹ Oto zin enne o̱ro̱gjo̱we̱ cik Ga̱li̱li̱ veelek. Uwak Ce̱e̱zi̱nne̱ wak Lawinto, kar kottok kuulo cik lo̱rye̱nta̱k olle.

Angaru Ye̱su̱ e̱e̱t ci adak dhovo

⁴⁰ I̱ki̱ya̱k e̱e̱ti̱ ci adak dhovo Ye̱su̱ kar zin kakatek u̱zu̱ngti̱nne̱ kala nonno kizek ne, “Ming orongi i̱nna̱ de̱de̱, angaruya wo̱ye̱ i̱nna̱ annit kubunna.”

⁴¹ Anyak Ye̱su̱ bunnat, i̱tto̱n zin enne a̱zzi̱t kar ku̱u̱m e̱e̱t neci. Kar kize ne, “Korongi anna, anyik ele cunne kubunna!”

⁴² Ataman niko i̱zzi̱ dhovo eliye ci e̱e̱t neci dakdak.

⁴³ I̱tto̱n zin Ye̱su̱ nonno kuk reena ki ti̱lo̱wi̱ne̱t cu:

⁴⁴ “Abunna ming a̱gga̱, ma a̱du̱wa̱k zoz necu e̱e̱t imma. Abarik, bit ye̱le̱k ele cunne e̱e̱t ci wawaco Ce̱e̱ze̱ wa Ta̱mu̱ta̱dde̱no̱ kar pahek wawa ki bali ming a̱du̱wa̱ Musesi ke̱, kar morizi cunne ki̱ti̱vi̱la̱i̱, kar ol do̱o̱k ka̱gga̱c.”

⁴⁵ Abarik enne uk reena kar kakate kozoz cabak, azan kaviyak ne̱ke̱. Imma zin zo̱ze̱ neci, iróng Ye̱su̱ ngen i̱i̱zo̱ orog ngati acine ol, abarik a̱vvu̱ orog abanyca ngati a̱zze̱ne̱ ol to. Ngen zin ol a̱vvu̱na̱k nonno dee o̱ro̱gjo̱we̱.