Lu̱ka̱ 9 - Tennet

I̱tto̱n Ye̱su̱ to̱ni̱a̱k omoto ki ram

¹ Baling utu Ye̱su̱ to̱ni̱a̱k omoto ki rama ka̱vvu̱to̱ nga̱to̱de̱, aanyik zin enne nogo doiz ki katkaton kar kottoit kuulo cik lo̱rye̱nta̱k do̱o̱k kar kangaruwet ol mo̱ri̱zo̱we̱,

² kar enne ki̱tto̱n nogo koot kuwaktek ol ba̱a̱li̱ne̱t ci Ta̱mu̱ta̱dde̱no̱ kar kangaruwet ol cik omori.

³ A̱nne̱k zin enne nogo ne, “Ma ovvoyyu gi̱i̱ imma ming ovvo eronu, ma anyakku keen cik omtinu, ki lodet, ki da̱i̱ne̱t ki o̱ro̱bi̱ya̱ ki ru̱u̱ma̱ni̱ u̱gge̱.

⁴ Ming i̱zzo̱yu̱ ce̱e̱z imma, a̱vvu̱t nginati zee nginti ungneku orog neci lo̱o̱c.

⁵ Ming iróng ol cik o̱rgu̱ a̱gga̱ma̱nu̱ng i̱ge̱ta̱, u̱tu̱ru̱rta̱ tu̱du̱wa̱c zoone ciggo̱k ming ovvo niga ungneku orog cinne̱ng lo̱o̱c, kize zoz ci aburnnu niga nong.”

⁶ A̱ka̱tte̱ zin to̱ni̱a̱ha̱ otozo o̱ro̱gjo̱we̱, uwahek ol kaviyak cik abunna Ta̱mu̱ta̱dde̱no̱, kar bo̱do̱k kangaruwet ol mo̱ri̱zo̱we̱ lo̱o̱cco̱k do̱o̱k.

Meder ci He̱ro̱di̱

⁷ Baling izik alaani ci een He̱ro̱d kaal cik ogon Ye̱su̱ do̱o̱k. Kar zin enne ko̱to̱ngo̱o̱le̱, eci ol uggak azi ne, itinga Joni daiza,

⁸ ovvo uggak azi ne i̱ye̱la̱i̱ E̱li̱ja̱, ovvo uggak azi ne, i̱ki̱ya̱ a̱ri̱to̱i̱ti̱ bali reeni imma co̱de̱ obodak ruget.

⁹ Ma̱i̱je̱ He̱ro̱di̱ ize ne, “Ketteda anna ba̱li̱ye̱ oo ci Joni. Ngene zin ci kazii anna ogon kaal ne̱ko̱ ko̱?” Kar enne orong kicin nonno.

Adaiz Ye̱su̱ ol i̱bbo̱nge̱t tu̱r (5,000)

¹⁰ Baling i̱mi̱rrte̱ to̱ni̱a̱ha̱, u̱du̱kta̱k zin Ye̱su̱ kaal cik u̱tu̱gu̱zzo̱ nege do̱o̱k. Uwe zin Ye̱su̱ nogo kar koot nege do̱ rok orog ci een zara Betsaida,

¹¹ ma̱i̱je̱ koole a̱gga̱c nginti ovvoye nege kar kunuwet nonno. A̱gga̱ma̱ zin enne nogo kar kozozik zoz ci obod ki ba̱a̱li̱ne̱t ci Ta̱mu̱ta̱dde̱no̱, kar kangaru ol cik orong kubunnta.

¹² Imma bali yo̱mo̱na̱, i̱vi̱tta̱k to̱ni̱a̱ha̱ omoto ki ram Ye̱su̱ kar kizettek ne, “Azan kollen ne̱ko̱, anyik nogo koot o̱ro̱gjo̱we̱ cik aavtte ojonun ko̱, abunna ming ovvo amuda da̱i̱ne̱t ki ngintik oonge nege, eci kaavtte naga ngati i̱llo̱i̱ ce̱e̱zi̱.”

¹³ Abarizek zin enne, “Aanycik nogo da̱i̱ne̱t u̱gge̱ kadait.” O̱bo̱dde̱k zin nege nonno, “Kanyaka naga umunet tu̱r ki u̱lu̱g ram niko. Maya ming kovvo katalak da̱i̱ne̱t u̱gge̱ koole cu do̱o̱k.”

¹⁴ Aavtte da̱ ol cik i̱yo̱ko̱ azuca i̱bbo̱nge̱t tu̱r bu̱k (5,000) nginati. Ma̱i̱je̱ enne a̱nne̱k to̱ni̱a̱k ciginnek ne, “Aanycik nogo ka̱vvu̱to̱ lo̱o̱ta̱ koole ci een moten tu̱r nga̱to̱de̱ do̱o̱k.”

¹⁵ U̱tu̱gu̱zzo̱ zin nege niko, kar ol do̱o̱k ka̱vvu̱to̱ lo̱o̱ta̱.

¹⁶ Idima zin Ye̱su̱ umunet tu̱r ki u̱lu̱g ram kar zin kicin ta̱mu̱-keng, aanyik zany kar ku̱du̱l. Kar zin kaanyik to̱ni̱a̱k ciginnek kengertek ol.

¹⁷ Adakto zin nege do̱o̱k katanyarit, kar to̱ni̱a̱ha̱ kuluta da̱i̱ne̱t ne̱k inyigtai ke̱ dho̱ngkwe̱t omoto ki rama.

A̱jji̱n Ye̱su̱ nuyak zo̱ze̱ ci obod ki nonno

¹⁸ Okko i̱i̱te̱n imma Ye̱su̱ alaye ngati aave enne do̱ kar nuyaha ciginnek ka̱vvu̱to̱ ki nonno, i̱jji̱n zin enne nogo, “Ma dim i̱yo̱ko̱ koole azi ne ke̱e̱ni̱ anna ngene?”

¹⁹ O̱bo̱dde̱k zin nege, “Azi ol uggak ne Jon Ba̱ti̱ti̱mo̱; ovvo uggak azi ne E̱li̱ja̱; kar uggak kizeto ne a̱ri̱to̱i̱t co̱de̱ bali reeni ci i̱ki̱ya̱ obodak ruget.”

²⁰ I̱jji̱n zin bo̱do̱k enne nuyak ciginnek a̱nne̱k ne, “Ma̱i̱je̱ ngatinno̱ng, ke̱e̱ni̱ anna ngene?” O̱bo̱de̱k zin Peturu nonno, “E̱e̱ni̱ i̱nna̱ Ki̱ri̱sto̱ bali i̱tto̱na̱ Ta̱mu̱ta̱dde̱n.”

²¹ I̱lo̱t zin Ye̱su̱ nogo, ma a̱du̱wa̱kku̱ zoz necu e̱e̱t imma.

A̱du̱wa̱ Ye̱su̱ daiz ki ngazi cinne

²² Izek Ye̱su̱ nuyak waginnek ne, “Apirna atin la̱du̱n Ngerrti E̱e̱to̱ kaale cik meelek, kar kutubure ngati lo̱ddi̱ki̱re̱ ki alaat cik olli wawaco ki bo̱do̱k de̱me̱zzo̱k wak lo̱ti̱nno̱u̱, okko atin enne a̱ru̱we̱ la̱du̱n ka̱da̱k, kar i̱i̱te̱ne̱ ci een i̱i̱yo̱, okko atin enne ingazi daiza kurug.”

²³ Izek zin enne nogo do̱o̱k ne: “Ming orong e̱e̱ti̱ imma kunuwan, anyik kimigzoi ele cinne kar kodong ta̱la̱ke̱c cinne odohize kar kunuwan.

²⁴ Ming orong e̱e̱ti̱ imma ki̱ti̱ri̱z ruget cinne okoloz atin, ma̱i̱je̱ e̱e̱ti̱ ci okoloz ruget cinne zo̱ze̱ cinanni, a̱ti̱ri̱z atin.

²⁵ Nya ci abunna ming anyak e̱e̱ti̱ kaal cik lo̱o̱c cu do̱o̱k, imma ngatu i̱zzi̱ baizi cinne to?

²⁶ Ming adak a̱li̱ya̱ni̱ e̱e̱t zo̱ze̱ cinanni, okko atin Ngerrti E̱e̱to̱ bu̱k adak a̱li̱ya̱ni̱ zo̱ze̱ cinne ming i̱ki̱ya̱k enne di̱ngdi̱ngo̱n cinne ki di̱ngdi̱ngo̱n ci Baatinne ki anjilonya cik a̱li̱le̱.

²⁷ Ka̱du̱wa̱kku̱ng zoz ci een de̱de̱, ovvo ol uggak cik abile ngatu ko̱, iróng atin nege atari daiz ming ngen nege kicinnet ba̱a̱li̱ne̱t ci Ta̱mu̱ta̱dde̱no̱.”

Utuhuwe ele ci Ye̱su̱

²⁸ Baling edeca Ye̱su̱ gwo̱o̱nya̱ tu̱rge̱ ngati u̱du̱wa̱i̱ enne zoz cu, uwe enne Peturu, ki Jon ki Je̱mi̱s ki nonno rok bee ovvo alaye.

²⁹ Baling alaye enne, utuhuwe ngu̱m cinne ki ru̱u̱ma̱ni̱ izeto voore per ki i̱yo̱ko̱ borowoci ko̱.

^30-31 Iyokta zin di̱ngdi̱ngo̱nta̱, ol cik e̱e̱ggi̱n rama, Muses ki E̱li̱ja̱, kar kozozzo ki Ye̱su̱. Ozozit nege zoz ci obod ki daiz ki ngazi cinne, ci ize ojon kar ku̱tu̱gu̱we̱ kar ki̱ki̱ya̱ kakat mo̱o̱le̱t Jerusalema.

³² Imma Peturu ki gonoggi adak da̱ ungnyaha oroot, ma̱i̱je̱ baling itingazzo nege ungnyahe, icinnet nege di̱ngdi̱ngo̱n cinne ki ol cik e̱e̱ggi̱n rama abile ki nonno.

³³ Baling utungtek ol ne̱ke̱ Ye̱su̱ lo̱o̱c, izek zin Peturu nonno ne, “Manyi, abunna ming kaavtte naga ngatu. Inyet kidimanta ti̱te̱t i̱i̱yo̱ ngatu, co̱de̱ cunne, co̱de̱ ci Musesi kar co̱de̱ ci E̱li̱ja̱.” Abarik zin enne iróng a̱gga̱ zoz ci a̱du̱wa̱ enne ko̱.

³⁴ Baling ngen enne ozozi, i̱ki̱ya̱ di̱i̱z u̱bu̱ng nogo, o̱to̱ngo̱o̱ltte̱ zin nege lo̱o̱c.

³⁵ Iyowa zin mului di̱i̱za̱ ci azi ne, “Een necu Ngeranni, nonno ci katahala anna; iziyyet zoz cinne.”

³⁶ Baling ozoz mului neci, u̱mu̱dda̱ zin nege Ye̱su̱ ming aave do̱. Ijaktoi zin nuyaha zoz necu nege e̱le̱tti̱ne̱ cigge̱k, iróng ngen a̱du̱wa̱k e̱e̱t co̱de̱ i̱i̱ neci gi̱i̱ ci icinnet nege.

Eela Ye̱su̱ logozit ci anyak kuulo cik lo̱rye̱nta̱k

³⁷ Imma i̱i̱te̱n ci reng, baling u̱lu̱ca̱i̱ nege biya, i̱vi̱ta̱ koole ci a̱ppwe̱ u̱ru̱mto̱ ki nonno.

³⁸ Utuwe zin e̱e̱ti̱ imma orgene ci ollu, “De̱me̱zo̱i̱t, ka̱jji̱nni̱ i̱nne̱ta̱ cin da̱ ngeranni, eci nonno ci een do̱le̱c ci o̱de̱ ṯok.

³⁹ A̱gga̱m nonno kuulo kar gon enne kegereny; a̱ju̱ke̱k nonno lo̱o̱c kataval kar kutura amut utuga. Iróng morizi necu ungna nonno kar kegerzan nonno.

⁴⁰ Kala nuyak cigunnek abunna ming ottok kuulo ne̱ko̱, iróng zin nege uule.”

⁴¹ O̱bo̱de̱k zin Ye̱su̱ nogo, “Eeh, iróng anna kelemi bu̱u̱l ci gerze ko̱, kabak atin anna ki i̱ge̱t rok atinga? Nyaha ngerunne ngintu.”

⁴² Imma baling ngen do̱le̱c neci a̱kku̱, u̱ju̱ktte̱k kuulo nonno lo̱o̱c kataval. Ma̱i̱je̱ Ye̱su̱ egerenyek kuulo cik lo̱rye̱nta̱k, angaru zin enne do̱le̱c kar kaanyik baatinne.

⁴³ Kar nege do̱o̱k ku̱ku̱lte̱k komiz ci Ta̱mu̱ta̱dde̱no̱. Baling a̱ma̱li̱ltte̱ ol o̱o̱tti̱ do̱o̱k zo̱ze̱ ci ogon Ye̱su̱ ko̱, izek zin enne nuyak ciginnek ne,

A̱du̱wa̱ Ye̱su̱ zoz ci daiz cinne

⁴⁴ “Izikto ju̱rru̱m zo̱ze̱ ci okko anna ka̱du̱wa̱kku̱ng ko̱: Okko atin e̱e̱ti̱ imma adawa Ngerrti E̱e̱to̱ ngati anyike nonno azzin cik ol cik meelek giir.”

⁴⁵ Iróng zin nege a̱gga̱ keng ci zoz ci a̱du̱wa̱ enne ko̱. A̱lu̱ngnye̱ zoz neci ngatinne̱ng, kar iróng nege amuda ungec, kar nege ko̱to̱ngo̱o̱ltte̱, iróng orong ki̱jji̱nne̱t nonno keng ci zozo.

Ngene ci A̱ddi̱ki̱re̱

⁴⁶ A̱ka̱tta̱i̱ zin nuyaha dango zo̱ze̱ ci anno ne, ngene ci a̱ddi̱ki̱re̱ ommog do̱o̱k.

⁴⁷ Imma Ye̱su̱ a̱gga̱ zoz ci i̱no̱n nege zi̱nze̱tti̱nne̱ ko̱, kar zin kidima do̱le̱c cidici kar kaanyik kibil ngatinne abanyca.

⁴⁸ Kar enne kizek nogo ne, “Ming elema e̱e̱ti̱ imma do̱le̱c cidici ko̱ zare cigannik, elemna enne annita; kar e̱e̱ti̱ ci elemanna annita ko̱, elemna enne e̱e̱t wa i̱tto̱na̱na̱ annita bu̱k. Eci e̱e̱ti̱ cidici orgene cunno̱ng, nonno ci a̱ddi̱ki̱re̱ kommog veelek.”

E̱e̱t ci iróng amarine Ye̱su̱

⁴⁹ A̱nne̱k Joni Ye̱su̱ ne, “Manyi, kicinnta e̱e̱t imma ci ottok kuulo zare cigunnek kar naga korongnya kibilizta nonno, eci enne iróng een e̱e̱t cinna.”

⁵⁰ Azi Ye̱su̱ ne, “Ma abilizzu nonno, eci e̱e̱ti̱ ci iróng amarinnung, een enne e̱e̱t cinna.”

Adang ol cik Samariya Ye̱su̱

⁵¹ Baling ize ojon i̱i̱ ci orong Ye̱su̱ ki̱mi̱re̱ kuk ta̱mu̱-kenga, adang zoz kar kuk rok Jerusalem.

⁵² I̱tto̱n zin enne to̱ni̱a̱k koot oowa, ovvo rok orog ci een Samariya koot kidimantek nonno kaal nginati;

⁵³ ma̱i̱je̱ ol nginati iróng a̱gga̱ma̱ nonno, eci enne ozoro okko Jerusalema.

⁵⁴ Baling icinnet nuyaha Je̱mi̱s ki Jon zoz necu, i̱jji̱nne̱t zin Ye̱su̱, “Manyi, orongi i̱nna̱ agit ku̱tu̱yya̱ gwo̱o̱ ta̱mu̱-kenga rok lo̱o̱c ki̱ki̱ya̱ kidita nogo?”

⁵⁵ Ma̱i̱je̱ Ye̱su̱ utuhuwe kar kegerenyek nogo,

⁵⁶ kar zin nege koot o̱rge̱ emani.

Pirnanet ci kanuwe Ye̱su̱

⁵⁷ Baling owo nege goola, a̱nne̱k e̱e̱ti̱ imma Ye̱su̱ ne, “Kanuyi anna i̱nne̱t rok nginti okkoye i̱nna̱.”

⁵⁸ O̱bo̱de̱k zin Ye̱su̱ nonno, “Anyak i̱re̱e̱rwa̱na̱ ngintik abahe, kar bo̱do̱k iballi wak a̱ku̱l ta̱dde̱na̱ ko̱ kanyait ce̱e̱zi̱, ma̱i̱je̱ Ngerrti E̱e̱to̱ i̱llo̱i̱ nginti arike enne oo cinne.”

⁵⁹ A̱nne̱k zin Ye̱su̱ e̱e̱t imma ne, “I̱jja̱ nuwan.” Ma̱i̱je̱ e̱e̱ti̱ neci abarizek nonno, “Manyi, inya arrak annit ki̱mi̱re̱ kuk ka̱da̱ baba.”

⁶⁰ A̱nne̱k Ye̱su̱ nonno ne, “Anyik ol wak e̱e̱ggi̱n daizzok ka̱da̱c e̱e̱t cinne̱ng, ma̱i̱je̱ i̱nna̱ bit uwahek ol ba̱a̱li̱ne̱t ci Ta̱mu̱ta̱dde̱no̱.”

⁶¹ Okko bo̱do̱k e̱e̱ti̱ imma azi ne, “Kanuyi atin anna i̱nne̱ta̱, Manyi; ma̱i̱je̱ arrak ja kuk ce̱e̱za̱ kuk ku̱du̱wa̱k ol cigannik.”

⁶² Abarizek zin Ye̱su̱, “I̱llo̱i̱ e̱e̱t co̱de̱ ci aarik a̱zzi̱t obok kar bo̱do̱k kicin vu̱rru̱t ci agano ki li̱ngli̱ngo̱n ci ba̱a̱li̱ne̱t ci Ta̱mu̱ta̱dde̱no̱.”