Lu̱ka̱ 5 - Tennet

Utu Ye̱su̱ nuyak wak o̱o̱tti̱nu̱

¹ Imma i̱i̱te̱n imma abile da̱ Ye̱su̱ nyatapare ci een Gennesareti abanyca, ki ol ming alutai aburuwek nonno orgen kar kiziyet zoz ci Ta̱mu̱ta̱dde̱no̱,

² icin zin Ye̱su̱ abanyce ci maamu i̱be̱t ram, uungnek ol wak a̱gga̱m u̱lu̱g, imma nege uuny imutuk wa a̱gga̱me̱ nege u̱lu̱g ko̱.

³ Uk zin Ye̱su̱ i̱tto̱ i̱bo̱ co̱de̱, een da̱ i̱bo̱ neci ci Si̱mo̱ne̱, kar ki̱jji̱n Si̱mo̱ne̱ kiyot i̱bo̱ kuk idic nyatapara, kar zin Ye̱su̱ ka̱vvu̱ lo̱o̱ta̱ i̱bo̱wa̱ kar kedemez ol.

⁴ Baling edeca enne zoz, izek zin enne Si̱mo̱ne̱ ne, “Iyot i̱bo̱ kuk ngati wu̱u̱ni̱ kar ju̱ke̱k imutuk ka̱gga̱m u̱lu̱g.”

⁵ O̱bo̱de̱k zin Si̱mo̱ne̱ nonno, “Ddi̱ki̱ryo̱i̱t, ki̱li̱ngli̱ngta̱ naga oroot kaal, ngen ka̱gga̱mta̱ gi̱i̱ imma. Abarik eci a̱du̱wa̱ i̱nna̱ ko̱, ka̱ju̱ke̱k atidic imutuk kuk maame lo̱o̱ta̱.”

⁶ Baling u̱tu̱gu̱zzo̱ nege niko, a̱gga̱mi̱t zin u̱lu̱g cik meelek, orong zin imutukwana cigge̱k ku̱du̱lte̱.

⁷ U̱tu̱ya̱ zin gonoggi i̱bo̱we̱ e̱co̱de̱ ke̱, ki̱vi̱ta̱ keeltta nogo, kar kibbizitanit u̱lu̱ga̱ i̱be̱t ne̱ke̱ do̱o̱k, orong abarik i̱be̱tta̱ addude.

⁸ Baling icin Si̱mo̱ne̱ Peturu zoz neci, akatek zin enne u̱zu̱ngti̱nne̱ ngati Ye̱su̱ kar kize ne, “Bit reena ngatinanni, Manyi; ke̱e̱ni̱ anna e̱e̱t ci mu̱nye̱nu̱!”

⁹ Eci enne ki gonoggi do̱o̱k u̱ku̱lte̱k gool ci a̱gga̱me̱ nege u̱lu̱g balik ovvoye nege ke̱,

¹⁰ e̱e̱ggi̱n nege ciko Je̱mi̱s ki Jon, logoz cik Zebedee, e̱e̱ggi̱n nege gonoggi Si̱mo̱ne̱. Izek zin Ye̱su̱ Si̱mo̱ne̱ ne, “Ma o̱ngo̱o̱li̱nnu̱; akane wazin necu kuk oowa, a̱gga̱mnyu̱ atin niga ol.”

¹¹ Kar ku̱tu̱gu̱rta̱k i̱be̱t cigge̱k ti̱ti̱m, utungtek kaal do̱o̱k lo̱o̱c kar kunuwet nonno.

Angaru Ye̱su̱ e̱e̱t ci anyak dhovo

¹² Baling ngen Ye̱su̱ aave o̱rge̱ co̱de̱ o̱ro̱gjo̱we̱ ne̱ke̱, i̱ki̱ya̱ e̱e̱ti̱ imma ci anyak ele cinne do̱o̱k dhovo. Baling icin enne Ye̱su̱, u̱ju̱ke̱k zin ele cinne lo̱o̱c kar kilalek nonno, “Manyi, ming orongi i̱nna̱, adimani atin i̱nna̱ ele cinanni ki̱zi̱zi̱.”

¹³ I̱tto̱n zin Ye̱su̱ a̱zzi̱t cinne kar ku̱u̱m e̱e̱t neci. Ize ne, “Kelemi anna, bunna!” Kar dhovo ki̱zzi̱ eliye cinne ne dakdak.

¹⁴ U̱du̱wa̱k zin Ye̱su̱ nonno zoz cu, “Ma a̱du̱wa̱k e̱e̱t imma, abarik bit ye̱le̱k ele cunne e̱e̱t ci wawaco Ce̱e̱ze̱ wa Ta̱mu̱ta̱dde̱no̱ kar pahek wawac ki bali ming a̱du̱wa̱ Musesi kize ci i̱ye̱la̱ i̱zi̱zi̱ ele cunne, kize gi̱i̱ ci acin nege bu̱k.”

¹⁵ Uzucca zin kaviyaha ciginnek ol do̱o̱k, i̱vi̱ta̱ zin ol cik meelek ovvo aziye nonno kar bo̱do̱k kangaruye mo̱ri̱zo̱we̱ cigge̱k.

¹⁶ Ma̱i̱je̱ gon Ye̱su̱ engera ele cinne okko ngati a̱zze̱ne̱ ol kar kalawo.

Angaru Ye̱su̱ e̱e̱t ci ngooli

¹⁷ Imma i̱i̱te̱n imma baling edemez enne ol cik een Varacis ki de̱me̱zzo̱k wak lo̱ti̱nno̱u̱, balik a̱vvu̱ o̱ro̱gjo̱we̱ Ga̱li̱li̱kte̱, Ju̱de̱ya̱, ki Jerusalema, aavtte nege ba̱li̱ye̱ nginati. Kar doizi ci Manyi ka̱vvu̱ ngatinne kar enne kangaru ol cik omori.

¹⁸ I̱vi̱ta̱ ol uggak odonga e̱e̱t ci ngooli keene, kar koronggit ki̱tto̱zze̱ nonno ce̱e̱z kar kaartik nginti aave Ye̱su̱.

¹⁹ Baling iróng nege ngen amuda gool kar ku̱tu̱gu̱zze̱ zoz neci eci meele ol. Oot zin otodit loruhun ta̱dde̱na̱, kar zin kazannit ce̱e̱z, etteddit loriri, kar zin kulucai morizoit ki keen ne̱ke̱ rok Ye̱su̱ ca̱a̱to̱.

²⁰ Baling icin Ye̱su̱ tu̱we̱ne̱t cinne̱ng, ize zin ne, “Goona, kalaleya anna i̱nne̱t mu̱nye̱n cigunnek.”

²¹ A̱ka̱tte̱ zin olli Varacisi ki de̱me̱zzo̱k wak lo̱ti̱nno̱u̱ i̱no̱ni̱t nege e̱le̱tti̱ne̱ do̱, “Ngene e̱e̱ti̱ cu ozoz zoz ci odome enne Ta̱mu̱ta̱dde̱n ko̱? Ngene wo̱ye̱ ci alalnek ol mu̱nye̱ne̱, iróng een Ta̱mu̱ta̱dde̱n do̱ niko?”

²² A̱gga̱ Ye̱su̱ zoz ci i̱no̱n nege kar ki̱jji̱n nogo, “Nya ming i̱no̱nnu̱ niga kaal ne̱ko̱ zi̱nze̱tti̱nne̱ ciggo̱k?

²³ Jang ci obokce: kize ne, ‘Alalei Ta̱mu̱ta̱dde̱n mu̱nye̱n cigunnek yo,’ icima kazi ne, ‘Tinga je̱e̱na̱ kar to’?

²⁴ Abarik abunna ming a̱gga̱yyu̱ anyak Ngerrti E̱e̱to̱ doiz lo̱o̱ta̱ ngatu kar kalalek ol mu̱nye̱n.” A̱nne̱k zin enne e̱e̱t ci ngooli ko̱ ne, “Ka̱du̱wa̱ki̱ anna i̱nne̱t, tinga je̱e̱na̱, dima kwe̱e̱n cunne kar bit ce̱e̱za̱.”

²⁵ Ataman niko itinga enne je̱e̱na̱ ngati acine nege do̱o̱k, idima kwe̱e̱n bali adungne enne ke̱ kar kuk ce̱e̱za̱ innat Ta̱mu̱ta̱dde̱n je̱e̱na̱.

²⁶ U̱ku̱lte̱k zin ol do̱o̱k je̱e̱n kar zin kinnatit Ta̱mu̱ta̱dde̱n. A̱bba̱ri̱te̱t da̱ nege oroot kar kizeto ne, “Kicinnta kaal cik i̱i̱na̱k zi̱nze̱tti̱ cigga̱c wazin necu.”

Awa Ye̱su̱ e̱e̱t ci azi zar ne Le̱vi̱

²⁷ Kar bali vu̱rrta̱, uk Ye̱su̱ reena kar kicin e̱e̱t wagon aluta mucuru olle ko̱, azi zar ne Le̱vi̱, ming aave arane ci ngin wa a̱gga̱ma̱ enne ol mucuru ko̱. A̱nne̱k zin Ye̱su̱ nonno ne, “Nuwan!”

²⁸ Itinga zin Le̱vi̱ je̱e̱na̱, utungek kaal do̱o̱k lo̱o̱c kar kunu nonno.

²⁹ Idimanek zin Le̱vi̱ Ye̱su̱ da̱i̱ne̱t ce̱e̱ze̱ cinne, kar koole ci a̱ddi̱ki̱re̱ olle wak a̱gga̱ma̱ ol mucuru ki ol u̱gge̱ kadakto ki nogo nga̱to̱de̱.

³⁰ Imma Varacisi ki de̱me̱zzo̱k wak lo̱ti̱nno̱u̱ balik arume ki nogo ko̱ ku̱du̱kta̱k demezyak ciginnek, “Nya ming ozolu niga da̱i̱ne̱t ki ol wak aluta mucuru ki ol cik mu̱nye̱nu̱ ko̱?”

³¹ O̱bo̱de̱k zin Ye̱su̱ nogo, “Iróng een e̱e̱t ci abunna ele ci orong di̱kto̱r, abarik e̱e̱t ci omori.

³² Iróng anna ka̱kku̱ni̱ kar ki̱ki̱ya̱ kutu ol wak abunna, abarik ka̱kku̱na̱k ol wak mu̱nye̱nu̱ kar ki̱vi̱ta̱ kuturta mu̱nye̱n cigge̱k.”

I̱jji̱nne̱t ol Ye̱su̱ zoz ci i̱ya̱wi̱nto̱

³³ Izettek zin nege nonno ne, “Wagon nuyaha cik Joni ala Ta̱mu̱ta̱dde̱n kar bo̱do̱k ki̱ya̱yo̱, ogon zin bo̱do̱k nuyaha cik Varacisi bu̱k niko, ma̱i̱je̱ nuyaha cigunnek adakce aude labak.”

³⁴ O̱bo̱de̱k zin Ye̱su̱ nogo, “Anyikku wo̱ye̱ niga e̱re̱nno̱k cik e̱e̱t ci aruce ki̱ya̱yo̱ ming aavtte nege ki nonno?

³⁵ Abarik a̱kku̱ atin i̱i̱te̱ni̱ ci okko e̱e̱ti̱ ci aruce odongnyai ngatinne̱ng; kar atin i̱i̱nya̱we̱ ne̱ke̱ ki̱ya̱yo̱ nege.”

³⁶ U̱du̱wa̱k zin enne nogo yabzinet cu: “I̱llo̱i̱ e̱e̱t imma ci etted ru̱u̱m ci een jor kar ku̱u̱be̱k ru̱u̱m ci erece unuwa. Ming u̱tu̱gu̱ enne ki i̱yo̱ko̱, erece atin ru̱u̱m wa een jor ko̱, kar ru̱u̱m ci u̱u̱be̱k enne iróng agano ki ru̱u̱m ci erece ko̱.

³⁷ Kar i̱llo̱i̱ e̱e̱t imma ci a̱ddu̱te̱k merte ci een jor í̱jjó̱ ci unuwa. Ming u̱tu̱gu̱ enne niko, a̱li̱b wo̱ye̱ merte ci een jor ko̱ í̱jjó̱ wa unuwa, a̱ddu̱te̱ merte kar í̱jjó̱ kegerezane.

³⁸ A̱zze̱to̱, anyik merte ci een jor ku̱du̱to̱zi̱k í̱jjó̱ ci een jor.

³⁹ I̱llo̱i̱ zin e̱e̱t imma ci uud merte ci unuwa, iróng ngen orong merte ci een jor, eci enne azi ne, ‘Maya merte ci unuwa.’”