Lu̱ka̱ 24 - Tennet

Ngazi ci Ye̱su̱ daiza

¹ Imma i̱i̱te̱ne̱ wa een Dominika, ingani ri̱ri̱wo̱na̱, idimtta ngaai maal bali ongooli adiman nege ke̱ kar ko̱o̱tte̱ iloma.

² Urubta bee bali a̱bu̱nge̱ ol ilomi utug ke̱ aryai,

³ ma̱i̱je̱ baling ovvo nege i̱i̱zo̱ ilomi ecito, iróng ngen amuda ele ci Manyi Ye̱su̱.

⁴ Baling a̱ma̱li̱ltte̱ o̱o̱tti̱ cigge̱k zo̱ze̱ necu, i̱vi̱ta̱ zin ol cik e̱e̱ggi̱n rama aim ru̱u̱ma̱ni̱ cik voorik per ibilet abanyce cinne̱ng.

⁵ Kar ngati o̱ngo̱o̱li̱nne̱ ngaai ne̱ke̱ u̱lu̱le̱t nege o̱o̱tti̱ icinnet lo̱o̱c, ma̱i̱je̱ ol ne̱k e̱e̱ggi̱n rama ko̱ izettek nogo ne, “Nya ming orongnyu e̱e̱t ci aruge orgene ci ol cik a̱da̱i̱to̱ ko̱?

⁶ Iróng enne aave ngatu; itinga enne daiza! A̱a̱dda̱ zoz bali a̱du̱wa̱kku̱ng enne i̱ge̱t ke̱, baling ngen aavtiyyu ki nonno Ga̱li̱li̱kte̱ ke̱, azi ne,

⁷ ‘Anyonik atin Ngerrti E̱e̱to̱ azzin cik olli mu̱nye̱nu̱, kar kotodowe ta̱la̱ke̱ca̱, kar i̱i̱nya̱we̱ cik een i̱i̱yo̱ ingazi atin enne bo̱do̱k daiza.’”

⁸ A̱a̱dda̱ zin ngaai ne̱ke̱ zoz cinne.

⁹ Baling o̱bo̱dda̱ nege iloma, kar ku̱du̱kta̱k zoz do̱o̱k to̱ni̱a̱k omoto ki co̱de̱ ki bo̱do̱k ol u̱gge̱.

¹⁰ Imma ngaane ne̱k a̱du̱wa̱k to̱ni̱a̱k zoz ko̱ ciko, Ma̱ri̱ya̱ Madalina, ki Joanna, ki Ma̱ri̱ya̱ wa een e̱e̱ti̱ Je̱mi̱si̱, ki ngaai u̱gge̱ cik aavtte ki nogo.

¹¹ Ma̱i̱je̱ nege iróng elemi zoz ci ngaai ne̱ke̱, eci zoz cinne̱ng ogon ki ci ozoz nege darace.

¹² Itinga zin abarik Peturu je̱e̱na̱ i̱vi̱r uk rok ilomi. U̱lu̱le̱ kar kicin ilomi ecito acin ru̱u̱ma̱ni̱ do̱ cik aavtte nginati, kar enne kuk, a̱ma̱li̱le̱ oo cinne gi̱i̱ye̱ ci ogone ko̱.

Go̱o̱le̱ ci Emmausi

¹³ I̱yo̱ko̱, okko i̱i̱te̱ne̱ neci ele, itingazzo ol cik een rama ngatinne̱ng ovvo o̱rge̱ ci een zara Emmaus, okkoye mailnya turgerem ming a̱kku̱ e̱e̱ti̱ Jerusalema.

¹⁴ Ozozit nege goola zoz ci obod ki kaal balik ogone Jerusalema ke̱.

¹⁵ Baling ngen nege ozoz niko, i̱ki̱ya̱ Ye̱su̱ eliya kar korkorrit ki nogo;

¹⁶ ma̱i̱je̱ nege iróng a̱gga̱ nonno.

¹⁷ I̱jji̱n zin enne nogo, “Nya ci ozozu niga ngati owoyyu goola ko̱?” Ibilet nege li̱i̱m, ngati angurunyane ngu̱mti̱.

¹⁸ I̱jji̱nno̱ zin e̱e̱ti̱ co̱de̱ ngatinne̱ng ci een zara Kiliyopaz, “E̱e̱ni̱ i̱nna̱ e̱re̱nno̱i̱t Jerusalema ngatu ci iróng a̱gga̱ kaal cik ogone i̱i̱nya̱we̱ ciko?”

¹⁹ I̱jji̱n zin Ye̱su̱ nogo iizek ne, “Kaal jang?” O̱bo̱dde̱k zin nege, “Kaal cik obod ki Ye̱su̱ wa Nazereti, een bali enne a̱ri̱to̱i̱t ci zoz ci Ta̱mu̱ta̱dde̱no̱, anyak komiz ci a̱ppwe̱ oroot zoza ki kaale wak u̱tu̱gu̱ enne ngati Ta̱mu̱ta̱dde̱no̱ ki olle do̱o̱k.

²⁰ A̱gga̱mi̱t zin alaata cik olli wawaco ko̱ nonno kar kaanycik kuk ku̱ru̱we̱ ka̱da̱k, kar kotodoyyek nonno keet ci een ta̱la̱ke̱c;

²¹ ma̱i̱je̱ naga la̱du̱n karikka zi̱nze̱tti̱ nonno ele ci okko a̱ti̱ri̱z olli Israilo. Kar nya ci a̱ppwe̱ atin wo̱ye̱ a̱kku̱, ize gwo̱o̱nya̱ i̱i̱yo̱ baling u̱tu̱gu̱we̱ zoz necu.

²² Kar bo̱do̱k ngaai uggak ngatinna̱ng aanyyet ku̱ku̱lte̱ya̱ je̱e̱n. Oot zin iloma nge̱rre̱ti̱n cu ele

²³ ma̱i̱je̱ ngatu ngen kurubta ele cinne. I̱vi̱ta̱ nege kar ku̱du̱kta̱i̱ta̱ azi ne kicinnta ri̱ri̱to̱n ci anjilonyau wak azi ne aruge enne.

²⁴ Oot zin ol uggak ngatinna̱ng rok ilomi, oot u̱mu̱dda̱ ming ogon zoz ki wanai ming a̱du̱wa̱kke̱t ngaai ke̱, ma̱i̱je̱ nonno ele ngen nege kicinnet.”

²⁵ Izek zin Ye̱su̱ nogo ne, “E̱e̱ggi̱nnu̱ niga tarbale de̱de̱, kar odoi i̱ge̱t zi̱nze̱tti̱ ngati a̱tu̱yyu̱ zo̱zzo̱k cik u̱du̱kta̱ a̱ri̱tto̱wa̱!

²⁶ Iróng een Ki̱ri̱sto̱ ci apirna zo̱ze̱ ci kaal ne̱ko̱ kar ki̱tto̱ di̱ngdi̱ngo̱n cinne?”

²⁷ Akane ngati Musesi ki a̱ri̱tto̱k do̱o̱k, oobek zin enne nogo zoz bali obod ki nonno u̱du̱ya̱i̱ e̱he̱rye̱ Waraganyai cik Ta̱mu̱ta̱dde̱no̱ ko̱ do̱o̱k.

²⁸ Baling ovvo nege ojongoz orog bali ovvoye nege ke̱, u̱tu̱gu̱ Ye̱su̱ ele ki e̱e̱ti̱ ci okko oowa.

²⁹ Ma̱i̱je̱ nege u̱du̱kta̱k nonno, “A̱vvu̱ ki agit ngatu, eci ize looci ba̱a̱li̱n.” Uk zin enne a̱vvu̱ ki nogo.

³⁰ Baling okko enne aave ki nogo ngati da̱i̱nto̱, idima enne umune, aanyik Ta̱mu̱ta̱dde̱n zany, engera kar kaanyik nogo.

³¹ O̱o̱ye̱ zin ebere cigge̱k kar ka̱gga̱c nonno, kar enne ki̱zzi̱ niko dakdak orgene cinne̱ng.

³² I̱jji̱nto̱ zin nege e̱le̱tti̱ne̱, “Atalne ba̱li̱ye̱ agit zi̱nze̱tti̱ baling ozoz enne ki agit goola kar koowet Waraganya cik zoz ci Ta̱mu̱ta̱dde̱no̱.”

³³ Itingazzo je̱e̱na̱ kar ki̱mi̱rte̱ koot Jerusalema lak co̱de̱. Urubta zin to̱ni̱a̱k wak e̱e̱ggi̱n omoto ki co̱de̱ ki ol wak aavtte ki nogo ko̱ ming arume nga̱to̱de̱

³⁴ kar kizeto ne, “Een de̱de̱! Itinga Manyi daiza kar ki̱ye̱le̱k ele Si̱mo̱ne̱.”

³⁵ U̱du̱kta̱ zin ol ne̱k e̱e̱ggi̱n rama ko̱ zoz ci ogone goola, ki gool ci a̱gga̱we̱ nege Ye̱su̱ baling u̱bu̱nya̱n enne umune.

I̱ye̱le̱k Ye̱su̱ ele to̱ni̱a̱k

³⁶ Baling ngen nege ozoz zoz neci, ibil zin Ye̱su̱ enne eliya orgene cinne̱ng kar kizek nogo ne, “Kizzayung, abunnanu.”

³⁷ U̱ku̱lte̱k je̱e̱n kar ko̱to̱ngo̱o̱ltte̱ lo̱o̱c oroot, i̱no̱ni̱t azi ne kicinnta miningit.

³⁸ Izek enne nogo ne, “Nya ming o̱ngo̱o̱li̱nnu̱ lo̱o̱c ko̱, nya ming odoi i̱ge̱t zi̱nze̱tti̱ ko̱?

³⁹ Icinnet azzin cigannik ki zo̱o̱ cigannik. Annit ele icu. Umtang annit kar icinnet; iróng miningiti anyak ele ki emme, ki ming acinnu niga kanyai anna ko̱.”

⁴⁰ Baling u̱du̱wa̱ enne zoz necu, i̱ye̱le̱k zin enne nogo azzin ciginnek ki zo̱o̱.

⁴¹ Baling ngen odoi nogo zi̱nze̱tti̱ zo̱ze̱ ci talninto ki ngo̱o̱li̱ne̱t, i̱jji̱n enne nogo, “Anyakku niga ngatu gi̱i̱ imma ci een da̱i̱ne̱t?”

⁴² Aanycik zin nege nonno u̱lu̱gi̱t ci aahe,

⁴³ a̱gga̱ma̱ enne kar kadak, kicinnet nege do̱o̱k niko.

⁴⁴ Izek enne nogo ne, “Een necu zoz bali ku̱du̱wa̱u̱ng anna i̱ge̱ta̱ baling ngen kaavtte bu̱k ke̱: Akati atin kaala do̱o̱k mo̱o̱le̱t cik obod ki annit ki ming e̱he̱rye̱ lo̱ti̱nno̱we̱ cik Musesi, ki a̱ri̱tto̱k ki Caliwon.”

⁴⁵ Oo zin enne o̱o̱tti̱ cigge̱k kar ka̱gga̱c zo̱zzo̱k wak a̱du̱wa̱ Waraga ci Ta̱mu̱ta̱dde̱no̱.

⁴⁶ U̱du̱wa̱k enne nogo, “Icu zoz ci e̱he̱rye̱: Okko atin Ki̱ri̱sto̱ apirna kar kitinga daiza i̱i̱te̱ne̱ ci een i̱i̱yo̱,

⁴⁷ kar zoz ci uurtane ol mu̱nye̱n ki zoz ci alalneke Ta̱mu̱ta̱dde̱n nogo mu̱nye̱n kuwaktozik ol ciginnek lo̱o̱cco̱k do̱o̱k, akane Jerusalema.

⁴⁸ E̱e̱ggi̱nnu̱ niga bbacak cik kaal ne̱ko̱.

⁴⁹ Kokko atin anna ki̱tto̱na̱kku̱ng muci wa bali u̱du̱wa̱ Baba ke̱; abarik a̱vvu̱t Jerusalema zee ka̱a̱nyu̱ng Ta̱mu̱ta̱dde̱n komiz ci a̱kku̱ ta̱dde̱na̱.”

Odongnye Ye̱su̱ okko ta̱mu̱-kenga

⁵⁰ Baling i̱nya̱ma̱n enne nogo kize ojon orogi ci een Bethany, odong azzin ciginnek kar ka̱mu̱yu̱k nogo.

⁵¹ Baling ngen enne a̱mu̱yu̱k nogo niko, utungek nogo lo̱o̱c, odonge enne uk ta̱mu̱-kenga.

⁵² I̱di̱ngdi̱nga̱nni̱t zin nege nonno kar kobodda Jerusalem talninte ci a̱ppwe̱ oroot.

⁵³ Kar zin nege ka̱vvu̱to̱ odohize Ce̱e̱ze̱ wa Ta̱mu̱ta̱dde̱no̱, innat Ta̱mu̱ta̱dde̱n.