Lu̱ka̱ 18 - Tennet

Tubzenet ci ngaa ci boye anime zoz

¹ A̱du̱wa̱k zin Ye̱su̱ nuyak ciginnek tubzenet cu, kar ki̱ye̱le̱k nogo abunna ming alaye nege odohize, iróng ungnek zoz necu lo̱o̱c.

² Kar enne kize ne, “Anyak da̱ o̱rge̱ emani alaan ci iróng o̱ngo̱o̱le̱ Ta̱mu̱ta̱dde̱n icima azunne ol.

³ Kar anyak da̱ bo̱do̱k o̱rge̱ neci ngaa ci boye, ci a̱kku̱nna̱k nonno okko ilali, ‘Etted lo̱ki̱ko̱ cinanni zo̱ze̱ ci e̱e̱t ci adangnya annit ko̱.’

⁴ “Imma gwo̱o̱nya̱ u̱gge̱ utubur alaani. Ma̱i̱je̱ vu̱rrta̱ izek ele cinne ne, ‘Ming iróng nu̱nu̱n anna ko̱ngo̱o̱le̱ Ta̱mu̱ta̱dde̱n icima iróng kazunne ol,

⁵ eci ngen ngaa ci boye ko̱ acunanan, korongi zin atin anna kicin ming kettede lo̱ki̱ko̱ cinne ju̱rru̱m, abunna iróng enne acunana annit we̱e̱ta̱!’”

⁶ Kar zin Manyi kize ne, “Iziyyet zoz ci a̱du̱wa̱ alaani ci etted zoz gerzet.

⁷ Kar iróng atin Ta̱mu̱ta̱dde̱n etted lo̱ki̱ko̱ ju̱rru̱m cik ol cik atahalai, ol cik a̱lu̱we̱k nonno wazin ki ba̱a̱li̱n? Okko gon atin enne abure lo̱ki̱ko̱ cinne̱ng?

⁸ Ka̱du̱wa̱kku̱ng anna i̱ge̱ta̱, acin atin enne, orong lo̱ki̱ko̱ kettede ju̱rru̱m, kar bo̱do̱k ataman. Ma̱i̱je̱ ming okko Ngerrti E̱e̱to̱ a̱kku̱, okko atin enne amuda tu̱we̱ne̱t ming aave lo̱o̱ta̱ ngatu?”

Tubzenet ci Varacis ki e̱e̱t wa aluta mucuru

⁹ Anyak ol wak i̱no̱n a̱gga̱ nege e̱le̱tti̱ cigge̱k azi ne kabunanna kar zin ki̱bbe̱zi̱t ol do̱o̱k, u̱du̱wa̱k zin Ye̱su̱ nogo yabzinet cu:

¹⁰ “Ovvo ol cik e̱e̱ggi̱n rama lawinet Ce̱e̱ze̱ wa Ta̱mu̱ta̱dde̱no̱, een e̱e̱ti̱ co̱de̱ Varacisoc, okko co̱de̱ een e̱e̱t wagon aluta mucuru olle ko̱.

¹¹ Itinga zin Varacisi neci kar kala Ta̱mu̱ta̱dde̱n zo̱ze̱ ci ele cinne: ‘Ta̱mu̱ta̱dde̱n, kaanyi anna i̱nne̱t zany iróng kogonni kiwagon ol wak e̱e̱ggi̱n ogoryak, olli mu̱nye̱nu̱, ol wak owo ki ngaai cik ollu, icima ki i̱yo̱ko̱ e̱e̱ti̱ cu, gon aluta mucuru olle ko̱.

¹² Ki̱ya̱ye̱ anna lak rama biranoca, kaanyi anna i̱nne̱ta̱ Ta̱mu̱ta̱dde̱n gi̱i̱ co̱de̱ kaale cik e̱e̱ggi̱n omoto kanyai anna do̱o̱k.’

¹³ “Ma̱i̱je̱ e̱e̱ti̱ wa aluta mucuru olle ko̱, ibil reena. Iróng enne bu̱k acin ta̱mu̱-keng, abarik akati culum kar kize ne, ‘Ta̱mu̱ta̱dde̱n, inya annit deten, e̱e̱t ci mu̱nye̱nu̱.’

¹⁴ “Ka̱du̱wa̱kku̱ng anna i̱ge̱ta̱ okko e̱e̱ti̱ cu ce̱e̱za̱ labak, alalek Ta̱mu̱ta̱dde̱n ba̱ci̱nno̱k ciginnek. Eci ming odong e̱e̱ti̱ imma ele cinne, okko atin enne een gunun, kar e̱e̱ti̱ ci gununi, okko atin enne odongnye.”

Dooli cikidik ki Ye̱su̱

¹⁵ Anyaha zin da̱ ol dooli rok Ye̱su̱ kar enne kuum nogo. Baling icinnet nuyaha zoz necu, egerenycek zin nege nogo.

¹⁶ Ma̱i̱je̱ Ye̱su̱ awa dooli ki̱vi̱ta̱k nonno kar kize ne, “Aanycik dooli cikidik ki̱vi̱ta̱n, ma alamnyu nogo, eci ba̱a̱li̱ne̱t ci Ta̱mu̱ta̱dde̱no̱ een ci dooli cik ogon ki ne̱ko̱.

¹⁷ Ka̱du̱wa̱kku̱ng anna i̱ge̱t zoz wa een de̱de̱, ming iróng e̱e̱ti̱ imma a̱gga̱ma̱ ba̱a̱li̱ne̱t ci Ta̱mu̱ta̱dde̱no̱ tu̱we̱nta̱ ku̱tu̱gu̱ ki do̱le̱c cidici ko̱, iróng atin enne i̱i̱zo̱ ngin neci.”

Alaan ci een i̱to̱i̱t

¹⁸ I̱jji̱n zin alaani imma nonno, “De̱me̱zo̱i̱t ci abunna ko̱, ku̱tu̱gu̱ anna nya kar kumuda baiz wa aave udut?”

¹⁹ O̱bo̱de̱k zin Ye̱su̱, “Nya ming awuya azi ne, de̱me̱zo̱i̱t ci abunna ko̱? I̱llo̱i̱ e̱e̱t imma ci abunna, Ta̱mu̱ta̱dde̱n do̱ niko ci abunna.

²⁰ A̱gga̱ i̱nna̱ lo̱ti̱nno̱k ciko: ‘Ma orootonu ki ngaai cik ollu, ma amunyi e̱e̱t ci diiri, ma ogorze, ma a̱du̱wa̱ zoz ngati ovolonge e̱e̱t imma, to̱ngo̱o̱lle̱ yaatunne ki baatunne.’”

²¹ Kar zin e̱e̱ti̱ ci een i̱to̱i̱t kize ne, “Kazunne anna lo̱ti̱nno̱k ne̱ko̱ baling ngen anna ke̱e̱ni̱ idica rok i̱yo̱ko̱.”

²² Baling izik Ye̱su̱ zoz necu, izek enne nonno ne, “Ngen gi̱i̱ co̱de̱ akilane ngatunne. Tuwek kaal cik anyai i̱nna̱ do̱o̱k kar anyik o̱ro̱bi̱ya̱ ol cik amati, kar atin i̱nna̱ nyak de̱he̱r ta̱mu̱-kenga, kar zin i̱jja̱, nuwan.”

²³ Baling izik enne zoz necu, utubur enne nong oroot, eci enne een i̱to̱i̱t oroot.

²⁴ Egelem zin Ye̱su̱ nonno kar kize ne, “Okkomi kak ngati e̱e̱t ci een i̱to̱i̱t kar ki̱tto̱ ba̱a̱li̱ne̱t ci Ta̱mu̱ta̱dde̱no̱!

²⁵ De̱de̱, obokce abarik ngati naganaga kar ki̱tto̱ orotenit wa een volongnyoit eenycine ol ko̱, kommog i̱to̱i̱t, ngati kar ki̱tto̱ ba̱a̱li̱ne̱t ci Ta̱mu̱ta̱dde̱no̱.”

²⁶ Imma ol balik iziyyet zoz necu ko̱ i̱jji̱nto̱, “Ngene zin ci atin amuda ti̱ri̱ze̱ne̱t?”

²⁷ O̱bo̱de̱k zin Ye̱su̱ nogo, “Ovvo kaala cik ommog e̱e̱t ci diiri ko̱ iróng ommog Ta̱mu̱ta̱dde̱n.”

²⁸ Izek zin Peturu Ye̱su̱ ne, “Kutungteya naga kaal balik kanyaka ke̱ do̱o̱k, kar kunuya i̱nne̱ta̱!”

²⁹ A̱nne̱k Ye̱su̱ nogo ne, “Ka̱du̱wa̱kku̱ng anna i̱ge̱ta̱ zoz ci een de̱de̱, ming anyak e̱e̱t ci uungnek ce̱e̱z cinne, icima ngaa cinne, icima gotoni, icima baatinne ki yaatinne, icima dooli ciginnek, zo̱ze̱ ci ba̱a̱li̱ne̱t ci Ta̱mu̱ta̱dde̱no̱,

³⁰ amuda atin enne kaal lak cik meelek giir baize cu, ki baize ci atin a̱kku̱ ci atin aave udut ke̱.”

U̱du̱wa̱ Ye̱su̱ bo̱do̱k zoz ci daiz cinne

³¹ Uwe Ye̱su̱ nuyak omoto ki rama abanyca kar ku̱du̱wa̱k nogo, “Kovvo naga rok Jerusalem, kar kaala do̱o̱k balik eher a̱ri̱tto̱wa̱ obod ki zoz ci Ngerrti E̱e̱to̱ ke̱ atin kakatit mo̱o̱le̱t.

³² A̱gga̱me̱k atin ol nonno ol cik iróng e̱e̱ggi̱n Ya̱u̱d. Aminye atin nege nonno, odom nonno, uurtek nonno amut, kar ku̱ru̱we̱t nonno ka̱da̱k.

³³ Imma i̱i̱nya̱we̱ cik een i̱i̱yo̱ ingazi atin enne daiza bo̱do̱k.”

³⁴ Iróng zin nuyaha a̱gga̱ zoz cinne ko̱. A̱lu̱ngnye̱ keng ci zoz neci ngatinne̱ng, iróng zin nege a̱gga̱ ozoz enne nya.

Idiman Ye̱su̱ e̱e̱t wa ru̱be̱ni̱ kicine

³⁵ Baling ojongoz Ye̱su̱ orog ci een Je̱ri̱ko̱, anyak da̱ e̱e̱t ci ru̱be̱ni̱ aave gool abanyca ala ol o̱ro̱bi̱ya̱.

³⁶ Baling izik enne ol ming owo goola, i̱jji̱nno̱ zin ogon ol ne̱ko̱ nya.

³⁷ U̱du̱kta̱k zin ol nonno, “Owo Ye̱su̱ wa Nazereti ko̱ goola.”

³⁸ Kar zin enne kutuwe muluwe ci a̱ppwe̱, “Ye̱su̱ ye̱i̱, Ngerrti Da̱vi̱de̱, eelawan!”

³⁹ Imma ol balik ovvo oowa ke̱ egerenycek nonno kar ku̱du̱kta̱k nonno anyik kijahe, abarik zin enne egereny oroot, “Ngerrti Da̱vi̱de̱, eelawa bai annita ke̱!”

⁴⁰ Ibil zin Ye̱su̱ kar zin ku̱du̱wa̱k ol abunna ming anyahak nonno e̱e̱t neci ru̱be̱ni̱ ke̱. Baling okko enne aave ojonun, a̱nne̱k zin Ye̱su̱ nonno ne,

⁴¹ “Orongnya i̱nna̱ annita ku̱tu̱gu̱we̱i̱ i̱nne̱t nya?” O̱bo̱de̱k zin enne, “Manyi, korongi kicine.”

⁴² A̱nne̱k zin Ye̱su̱ nonno ne, “Abunna! Cine zin, idimani i̱nne̱t tu̱we̱ne̱t cunne.”

⁴³ Ataman niko, icinte zin ebere ciginnek lak co̱de̱ niko, kar zin enne kunu Ye̱su̱, innat Ta̱mu̱ta̱dde̱n. Baling icinnet ol do̱o̱k nonno, innatit zin nege bu̱k Ta̱mu̱ta̱dde̱n.