Lu̱ka̱ 11 - Tennet

Edemez Ye̱su̱ nuyak gool ci lawinto

¹ Anyak da̱ i̱i̱te̱n imma ci alaye Ye̱su̱ ngamani. Baling edeca enne lawinet, izek zin nuyaiti cinne co̱de̱ nonno ne, “Manyi, demezet agit gool ci kar kalayya Ta̱mu̱ta̱dde̱n ki bali Jon Ba̱ti̱ti̱mo̱ ming edemez nuyak waginnek ke̱.”

² Izek zin enne nogo ne, “Ming alawinu niga, izet ne: “‘Baba, a̱li̱le̱ zara cigunnek, anyik ba̱a̱li̱ne̱t cunne aave ta̱mu̱-kenga ki̱ki̱ya̱k lo̱o̱c.

³ Inyet agit da̱i̱ne̱t odohize.

⁴ Laleit agit ba̱ci̱no̱we̱, eci naga bu̱k kalaleka e̱e̱t ci ogonikket agit mu̱nye̱n. Ma anyike mu̱nye̱n kitimanteta.’”

⁵ Kar zin enne kizek nogo ne, “Ming anyak e̱e̱ti̱ imma ngatinno̱ng gooni, kar enne kuk ngatinne ba̱a̱li̱n kenga kar kize ne, ‘Goona, inya umunet i̱i̱yo̱ kize nga̱bo̱lo̱,

⁶ eci goona imma ci erona i̱ki̱ya̱ annita, i̱llo̱i̱ zin annit gi̱i̱ imma ci kanyike nonno.’

⁷ “Abariz zin e̱e̱ti̱ neci aave ca̱a̱to̱ ko̱ zoz, ‘Ma acunanan. Unyuge tatug, kar dooli cigannik ka̱vvu̱to̱ imma annit kwe̱e̱na̱. Iróng anna kingazi je̱e̱na̱ kar kaanyi gi̱i̱ imma.’

⁸ Ka̱du̱wa̱kku̱ng anna i̱ge̱ta̱, ming iróng enne nu̱nu̱n ingazi kar kanyik nonno umune eci enne een gooni, eci e̱e̱ti̱ neci okkomi zinin okko atin enne ingazi je̱e̱na̱ kar kanyik nonno umunet cik meelek orong enne.

⁹ “Kar zin anna ka̱nne̱kku̱ng ne: I̱jji̱nne̱t kar atin kanyoziung; orongit, ovvo atin niga amudannu; oṯokṯowanit tatug, okko atin o̱o̱ye̱ ngatinno̱ng.

¹⁰ Eci ming a̱jji̱nne̱ e̱e̱ti̱ imma, anyonik nonno; okko e̱e̱ti̱ ci orongi, amuda; kar e̱e̱ti̱ ci oṯokṯowan tatug, okko tatug o̱o̱ye̱.

¹¹ “Ngene ngatinno̱ng be̱e̱ti̱k doolinnu, ming a̱jji̱nni̱ ngerunne orong u̱lu̱gi̱t, kar i̱nna̱ anyik uwat?

¹² Icima ming a̱jji̱n enne bbu̱ru̱, anyik wo̱ye̱ i̱nna̱ nonno ito?

¹³ Ming e̱e̱ggi̱nnu̱ niga olli mu̱nye̱nu̱ nu̱nu̱n, a̱gga̱yyu̱ niga muci cik abunna anyikku dooli ciggo̱k, anyike atin Be̱e̱ti̱nno̱ng wa aave ta̱mu̱-kenga ko̱ Vongiz ci A̱li̱le̱ ol wak a̱jji̱n nonno ko̱ ku̱?”

Ye̱su̱ ki Beelzebub

¹⁴ Ottok da̱ Ye̱su̱ kuuloc ci lo̱rye̱nto̱ ci iróng ozozi. Baling uk kuuloci neci, ozoz zin e̱e̱ti̱ bali iróng ozoz ke̱, kar zin ol ku̱ku̱lte̱k je̱e̱n.

¹⁵ Ma̱i̱je̱ ol uggak ngatinne̱ng izeto ne, “Ottok enne kuulo zare cik Beelzebub alaan ci kuulou.”

¹⁶ Itimanit zin ol uggak nonno ngati a̱jji̱nne̱ zoz ci oronge nege kicinnet baayenit ci a̱kku̱ ta̱mu̱-kenga.

¹⁷ Ma̱i̱je̱ da̱ Ye̱su̱ a̱gga̱ kaal cik i̱no̱n nege ko̱ veelek, kar zin kize ne, “Ming oorto ol cik alaan co̱de̱ ize ditenet, kar zin bo̱do̱k ce̱e̱z neci engerone nege ke̱ aditai atin.

¹⁸ Ming enger Sitani ele cinne, abile wo̱ye̱ ba̱a̱li̱ne̱t cinne ko̱? Ka̱du̱wa̱ anna zoz eci niga annu ne kottoi anna kuulo katkatone ci Beelzebubi.

¹⁹ I̱yo̱ko̱, ming kottoi anna kuulo cik lo̱rye̱nta̱k katkatonte ci Beelzebubi, ottok nuyaha ciggo̱k kuulo katkatone ci ngene? I̱yo̱ko̱ zin, kar atin nege kizeto ol cik etted lo̱ki̱ko̱ cunno̱ng.

²⁰ Imma ming kottoi anna kuulo cik lo̱rye̱nta̱k komize ci Ta̱mu̱ta̱dde̱no̱, i̱yo̱ko̱ zin, i̱ki̱ya̱u̱ng zin ba̱a̱li̱ne̱t ci Ta̱mu̱ta̱dde̱no̱ i̱ge̱ta̱.

²¹ “Ming ebek e̱e̱ti̱ ci okkomi ce̱e̱z cinne, aavtte atin kaala ciginnek labak.

²² Ma̱i̱je̱ ming i̱ki̱ya̱ e̱e̱ti̱ ci een moldong ommog nonno jo̱o̱ra̱, okkoye enne i̱li̱b ci arike e̱e̱ti̱ neci zinin ke̱, kar enne kuuwe kaal cik ce̱e̱z ci e̱e̱t neci.

Gool ci obodane vongizi ci kuulou

²³ “Okko e̱e̱ti̱ ci iróng aziye zoz cinanni, een enne mo̱dde̱ni̱t cinanni, kar e̱e̱ti̱ ci iróng arume ki annita, azane atin baizi cinne.

²⁴ “Ming iyowa kuuloci ngati e̱e̱to̱, a̱vi̱r okko balala orong nginti aave kar iróng amuda. Kar zin kize ne, ‘Ka̱mi̱re̱ anna kokko ce̱e̱ze̱ bali kungnek lo̱o̱c ke̱.’

²⁵ Ming okko enne arawa, okko amuda ce̱e̱z i̱ti̱vi̱le̱ ju̱rru̱m kar kidimane ju̱rru̱m.

²⁶ Okko zin kuuloci neci okkoye kuulo u̱gge̱ turgerem kommog ele cinne, kar nege koot kabaito nginati. Kar baizi ci e̱e̱t neci vu̱rrto̱ kize gerza kommog bali oowu ke̱.”

²⁷ Baling ngen Ye̱su̱ ozoz kaal ne̱ko̱, utuwe zin ngaa imma orgene ci ollu, “U̱mu̱yu̱we̱ ngaa bali a̱rri̱ta̱ni̱ kar katami i̱nne̱ta̱.”

²⁸ O̱bo̱de̱k zin Ye̱su̱ nonno, “U̱mu̱yu̱kte̱ zin abarik ol wak aziye zoz ci Ta̱mu̱ta̱dde̱no̱ kar ko̱to̱ngo̱o̱ltte̱ zoz neci.”

Baayenit ci Jonah

²⁹ Baling ize koole a̱ppwa̱, ize Ye̱su̱ ne, “Een bu̱u̱l cu olli mu̱nye̱nu̱. A̱jji̱nna̱ annit zo̱ze̱ ci baayenit ci a̱vu̱la̱, i̱llo̱i̱ baayenit ci anyonik nogo, abarik ize baayenit ci Jonah do̱ niko.

³⁰ Eci ki bali Jonah ming een baayenit ngati olli Nineveh, kar bo̱do̱k atin Ngerrti E̱e̱to̱ kize baayenit ci bu̱u̱l cu.

³¹ Ingazi atin alaani ci nga̱a̱ye̱ a̱kku̱ I̱do̱li̱ya̱ ko̱ lo̱ki̱ka̱ ki ol cik bu̱u̱l cu kar kettedek nogo ba̱ci̱; eci bali enne a̱kku̱ ngati aṯurneke looci ki̱ki̱ya̱ kizik genyiz ci Solomoni, kar zin i̱yo̱ko̱ a̱vvu̱ e̱e̱ti̱ ci ommog Solomon ngatu.

³² Abile atin olli Nineveh je̱e̱na̱ ming okko Ta̱mu̱ta̱dde̱n ettedik bu̱u̱l cu lo̱ki̱ko̱ kar kegerenycek bu̱u̱l cu; eci nege utungtek ba̱ci̱nno̱k cigge̱k lo̱o̱c baling uwahek Jonah nogo kaviyak ke̱, kar i̱yo̱ko̱ a̱vvu̱ e̱e̱ti̱ ci ommog Jonah ngatu.

Urez ci eliyo

³³ “I̱llo̱i̱ e̱e̱t imma ci atukulek urez kar zin karik nginti a̱lu̱gnye̱, icima arik í̱jjó̱ ecito. Abarik arike enne nginti abilne, kar abunna ol cik i̱i̱zo̱ ce̱e̱z kicinnet tukulec.

³⁴ Een ebere cigunnek tukulec ci ele cunne. Ming abunna i̱nne̱t ebere, okko bo̱do̱k ele cunne do̱o̱k anyak tukulec. Ma̱i̱je̱ ming gerze i̱nne̱t ebere, okko ele cunne do̱o̱k anyak mu̱hu̱ri̱te̱n.

³⁵ Cin nonno, kar zin, iróng tukuleci eliye cunne ko̱ een mu̱hu̱ri̱te̱n.

³⁶ I̱yo̱ko̱ zin, ming abbize ele cunne do̱o̱k tukulec, kar i̱llo̱i̱ ngin imma ci anyak mu̱hu̱ri̱te̱n, okko ele do̱o̱k anyak tukulec, ki ming alanyit tukuleci ngatunne.”

Atizik Ye̱su̱ ol cik Varaciso

³⁷ Baling edeca Ye̱su̱ zoz, i̱ki̱ya̱ zin e̱e̱ti̱ ci een Varacis, utu Ye̱su̱ abunna ming ovvo adakce ki nonno ce̱e̱ze̱ cinne; kar zin enne kuk ka̱vvu̱to̱ ki nogo ngati da̱i̱nto̱.

³⁸ Ma̱i̱je̱ e̱e̱ti̱ ci een Varacis ko̱, icin ming ngen Ye̱su̱ kutuny azzin ming ngen kadaho, u̱ku̱le̱k zin enne je̱e̱n.

³⁹ Izek zin Manyi nonno ne, “I̱yo̱ko̱ zin, niga Varacisi u̱u̱nyyu̱ niga uduce cik maamu ki uduce cik adainu eci bo̱i̱co̱ do̱, imma ecito abbize zoz ci anyakku zi̱nze̱tti̱ cik a̱ppi̱nte̱k ki zoz ci a̱li̱ya̱kze̱ti̱nu̱.

⁴⁰ E̱e̱ggi̱nnu̱ niga ol cik alitannung zoz! Amire ki e̱e̱t ci adiman uduc eci bo̱i̱co̱ ko̱ ci adiman bo̱do̱k ecito ko̱?

⁴¹ Abarik anycik kaal ne̱k ecito ko̱ ol cik amati, ovvo atin kaala do̱o̱k a̱zi̱ze̱ ngatunne.

⁴² “O̱lle̱ bai ciggo̱k olli Varacisi ke̱, eci anyikku niga Ta̱mu̱ta̱dde̱n gi̱i̱ co̱de̱ kaale cik e̱e̱ggi̱n omoto kaale cikidik ma̱ne̱ne̱ ciggo̱k do̱o̱k, imma ngatu ibbezzu zoz ci etted ol lo̱ki̱ka̱ ju̱rru̱m ki rezinet ci Ta̱mu̱ta̱dde̱no̱. Abunna ming a̱li̱ngli̱ngnyu̱ zo̱zzo̱k ne̱ko̱, ma ungneku zoz ci anyikku Ta̱mu̱ta̱dde̱n kaal ko̱ lo̱o̱c.

⁴³ “O̱lle̱ bai ciggo̱k olli Varacisi ke̱, eci niga irezzu leceret cik riilik Ce̱e̱zi̱nne̱ wak Lawinto ki zawinet ol cuwa.

⁴⁴ “O̱lle̱ bai ciggo̱k olli Varacisi ke̱, eci niga ogonnu kiwagon ilometa cik iróng ol arike gi̱i̱ imma, ilomet cik owoye ol iróng nege a̱gga̱.”

⁴⁵ O̱bo̱de̱k zin de̱me̱zo̱i̱ti̱ co̱de̱ ci anyak arizet cik lo̱ti̱nno̱u̱ nonno, “De̱me̱zo̱i̱t, ming a̱du̱wa̱ i̱nna̱ zoz necu ko̱ odomnyet i̱nna̱ agita bu̱k.”

⁴⁶ Abariz zin Ye̱su̱, “Niga ol cik anyakku arizet zo̱ze̱ ci lo̱ti̱nno̱u̱, o̱lle̱ bai ciggo̱k ke̱, eci amunyu niga ol kaale cik iróng wo̱ye̱ odongnyu, imma niga iróng arikku va̱lla̱i̱t co̱de̱ kar eelta nogo.

⁴⁷ “O̱lle̱ cuggo̱k bai ke̱, eci niga adimanekku ilomet a̱ri̱tto̱k, eci ji̱ji̱tu̱ggo̱k ba̱li̱ye̱ cik a̱ru̱k nogo ka̱da̱i̱to̱.

⁴⁸ Elemannu niga de̱de̱ zoz ci u̱tu̱gu̱zzo̱ ji̱ji̱ti̱ggo̱k; u̱ru̱we̱t nege a̱ri̱tto̱k, kar niga idimanit ilomet cigge̱k.

⁴⁹ Eci zo̱ze̱ necu, azi Ta̱mu̱ta̱dde̱n genyize cinne ne, ‘Ki̱tto̱nna̱k atin anna nogo a̱ri̱tto̱k ki to̱ni̱a̱k, ovvo atin uggak a̱ru̱we̱ ka̱da̱i̱to̱, kar atin uggak ki̱gi̱dde̱.’

⁵⁰ Kar zin, okko atin zoz cu a̱gi̱lo̱ni̱k bu̱u̱l cu, bi̱ye̱ cik a̱ri̱tto̱k cik a̱ddu̱ta̱i̱ kanante ci lo̱o̱tu̱,

⁵¹ akane bi̱ye̱te̱ cik Abeli ki̱ki̱ya̱ rok Zakaria, bali a̱ru̱we̱ orgene ci i̱te̱le̱ ki Ce̱e̱z wa Ta̱mu̱ta̱dde̱no̱ ke̱. De̱de̱, ka̱du̱wa̱kku̱ng anna i̱ge̱ta̱, a̱gi̱lo̱ni̱k atin zoz cu o̱o̱tti̱ cik bu̱u̱l cu do̱o̱k.

⁵² “O̱lle̱ bai ciggo̱k ol wak anyak arizet cik lo̱ti̱nno̱u̱, eci niga alamnyu ol ngati a̱gga̱we̱ zoz. Ngen niga e̱le̱tti̱ne̱ i̱tto̱z ngin neci, kar niga alammit ol cik orong ki̱tto̱zo̱.”

⁵³ Baling utungek Ye̱su̱ ngin neci lo̱o̱c, a̱ka̱tte̱ zin olli Varacisi ki de̱me̱zzo̱k wak lo̱ti̱nno̱u̱ adangit nonno oroot kar ki̱jji̱nne̱t nonno no̱ngi̱tto̱n cik meelek giir,

⁵⁴ orong kar ka̱gga̱mi̱t wo̱ye̱ nonno zo̱ze̱ ci a̱du̱wa̱ enne.