Lu̱ge̱z 8 - Tennet

Zeret ci Nyeelwanu

¹ A̱nne̱k zin bo̱do̱k Manyi Muses ne, “Bit ngati alaan ci Masiro, kar ize ne, ‘Icu zoz ci a̱du̱wa̱ Manyi: Anyik ol cigannik koot ku̱lu̱ge̱t lo̱o̱ce̱ cunne ko̱, kar atin nege kalayya annita.

² Ming a̱ju̱ra̱ne̱ i̱nna̱, kanyahak atin lo̱o̱c cunne ko̱ zeret, ci ovvo nyeelwana abbize lo̱o̱c ci Masiro do̱o̱k.

³ Okko moro ci a̱ddi̱ki̱re̱ Masire een zara Nail ko̱ abbize nyeelwana do̱ niko. A̱vvu̱ atin uggak rok ce̱e̱z cunne, rok kwe̱e̱n ci oonge i̱nna̱. Imma uggak ovvo rok ce̱e̱zi̱ cik lo̱ddi̱ki̱re̱ cigunnek, rok ce̱e̱zi̱ cik ol cigunnek do̱o̱k, ki ngintik aahe ol da̱i̱ne̱t.

⁴ Ottodung atin nyeelwana i̱nne̱t ki lo̱ddi̱ki̱re̱ ki ol do̱o̱k Masire.’”

⁵ A̱nne̱k zin Manyi Muses ne, “Du̱wa̱k Aaron, ‘Anyik kodong cool cinne ko̱ kar kuuv li̱i̱llo̱k, ca̱a̱ba̱ni̱ ki lu̱u̱la̱ni̱, kar anyik nyeelwa kiyota veelek ki̱vi̱ta̱k lo̱o̱c ci Masiro.’”

⁶ Idima zin Aaroni de̱de̱ keet neci kar kodong a̱zzi̱t kuuv li̱i̱llo̱k cik Masiro veelek, kar zin nyeelwana kiyokta re̱e̱nu̱n ku̱bu̱nge̱t lo̱o̱c veelek.

⁷ Ma̱i̱je̱ ngarreta cik Masiro, u̱tu̱gu̱zzo̱ bu̱k niko doize cinne̱ng, kar nyeelwana kiyokta morene do̱o̱k kibbitet lo̱o̱c ci Masiro do̱o̱k.

⁸ Utu zin alaani ci Masiro Muses ki Aaron kar kizek nogo ne, “Alac Manyi kar kenyek nyeelwa reena ngatinanni ki ol cigannik, kar atin anna kutunga ol cuggo̱k ku̱lu̱ge̱t koot abunna ovvo apahek Manyi wawa.”

⁹ O̱bo̱de̱k zin Musesi alaan ci Masiro a̱nne̱k ne, “Kungneki anna i̱nne̱t ddi̱ki̱ryo̱i̱t, du̱wa̱ i̱i̱te̱n ci kokko anna kalaweki Ta̱mu̱ta̱dde̱n ki lo̱ddi̱ki̱re̱ cigunnek ki zu̱we̱ bu̱k kar nyeelwana iróng ngen a̱gi̱ddu̱ng i̱ge̱t do̱o̱k, kar nyeelwana ka̱vvu̱to̱ more ci een Nail do̱ niko.”

¹⁰ Abariz zin alaani, a̱nne̱k nonno ne, “I̱jja̱ laweka Ta̱mu̱ta̱dde̱n loza.” O̱bo̱de̱k zin Musesi nonno, “Abunna, kogonni atin ki i̱yo̱ko̱ ming a̱du̱wa̱ ko̱, abunna wo̱ye̱ ming a̱gga̱ i̱llo̱i̱ e̱e̱t imma ci ogon ki Manyi Ta̱mu̱ta̱dde̱n cinna.

¹¹ Ungneki atin nyeelwana i̱nne̱t lo̱o̱c ki ce̱e̱zi̱ cuggo̱k, ki lo̱ddi̱ki̱re̱ ki ol cigunnek; kar atin koot ka̱vvu̱to̱ more ci een Nail.”

¹² Baling utungtek Musesi ki Aaron alaan ci Masiro lo̱o̱c, ala zin Musesi Manyi zo̱ze̱ ci nyeelwa balik i̱tto̱na̱k enne alaan ke̱.

¹³ Kar zin Manyi ku̱tu̱gu̱ zoz bali i̱jji̱n enne ke̱. A̱da̱i̱to̱ zin nyeelwana ce̱e̱zi̱nne̱ ki aluwanyai ki ma̱ne̱ne̱.

¹⁴ U̱lu̱tte̱k zin ol nyeelwa wak a̱da̱i̱to̱ ko̱ nginto̱de̱, kar zin looci do̱o̱k ku̱mu̱ Masire.

¹⁵ Baling icin alaani ci Masiro a̱da̱i̱to̱ nyeelwana balik a̱bu̱ng lo̱o̱c ci Masiro ko̱ do̱o̱k, oto bo̱do̱k kodok oo ne kak, iróng ngen orong kizik zoz ci Musesi ki Aaron ki bali ming u̱du̱wa̱ Manyi ke̱.

Zeret ci Viinyo

¹⁶ A̱nne̱k bo̱do̱k Manyi Muses ne, “Du̱wa̱k Aaron ‘Kidima cool wainne ko̱ kar ku̱ru̱we̱ tu̱du̱wa̱c ci lo̱o̱tu̱,’ kar tu̱du̱wa̱ci̱ lo̱o̱ce̱ ci Masiro do̱o̱k kutuhuye kizeto viiny.”

¹⁷ U̱tu̱gu̱zzo̱ zin nege zoz neci, kar baling odong Aaroni a̱zzi̱t ki cool neci kar ku̱ru̱k todowa lo̱o̱ta̱, i̱vi̱tta̱k zin viinya ol cik diirik ki elegje do̱o̱k. Utuhuye todowa lo̱o̱ce̱ ci Masiro do̱o̱k kizeto viiny.

¹⁸ Ma̱i̱je̱ baling orongit ngarreta kutuhuwec tu̱du̱wa̱c bu̱k kizeto viiny doize cinne̱ng, iróng nege ngen uule. Adalta zin viinya olli Masiro ki elegje.

¹⁹ A̱nne̱k zin ngarreta alaan ci Masiro ne, “Ta̱mu̱ta̱dde̱n ci ogon zoz necu de̱de̱.” Imma zinin ci alaano ngen odoi niko, iróng enne azikne, ki ba̱li̱ye̱ u̱du̱wa̱ Manyi ke̱.

Zeret ci Irongu

²⁰ A̱nne̱k zin Manyi Muses ne, “Tinga je̱e̱na̱ loza nge̱rre̱t ingani kar oot u̱ru̱mto̱ ki alaan ci Masiro go̱o̱le̱ ci okkoye enne liila, kar du̱wa̱k nonno zoz cu, ‘Icu zoz ci a̱du̱wa̱ Manyi: Anyik ol cigannik koot, kar atin koot nege kalayya annita.

²¹ Ming iróng i̱nna̱ anyike ol cigannik ku̱lu̱ge̱t koot, ki̱tto̱na̱kku̱ng atin anna i̱ge̱t irong, i̱nne̱t ki ol cigunnek do̱o̱k. Abbize atin ce̱e̱zi̱ cik olli Masiro ironga do̱ niko rok lo̱o̱cco̱k do̱o̱k cik aavtte nege.

²² “‘Imma i̱i̱te̱ne̱ neci, kogonni atin anna zoz cinne̱ng ka̱vvu̱ do̱, kanyike atin lo̱o̱c ci abahe olli Gosheni ki̱zze̱c ironga to, lo̱o̱c ci abahe ol cigannik, kar atin abunna ming a̱gga̱ ke̱e̱ni̱ anna Manyi, kaave anna lo̱o̱ce̱ necu.

²³ Kogonni atin ngerow ngati ol cigannik ki ol cigunnek. Okko gi̱i̱ ci a̱vu̱la̱ i̱ye̱la̱i̱ loza.’”

²⁴ U̱tu̱gu̱ zin Manyi zoz necu. Kar kaanyik irong kibbitet ce̱e̱z ci alaan ci Masiro ki ce̱e̱zi̱ cik lo̱ddi̱ki̱re̱ ki ol cik Masiro veelek, egerzanit zin ironga lo̱o̱c ci Masiro do̱o̱k.

²⁵ I̱tto̱na̱k zin enne zoz Muses ki Aaron, a̱nne̱k ne, “Oot alac Ta̱mu̱ta̱dde̱n ngatu lo̱o̱ce̱ ci Masiro.”

²⁶ Ma̱i̱je̱ Musesi izek nonno ne, “Iróng zoz necu ilemi. Imma kaala cik kapahek naga Manyi Ta̱mu̱ta̱dde̱n cinna ko̱, aanyik olli Masiro kutuburret nong kaale ne̱ke̱. Kar ming kapak naga kaal cik aanyik nogo kutuburret nong ko̱, iróng wo̱ye̱ atin nege ovoccet biyene?

²⁷ Abunna ka̱lu̱gja̱ lo̱o̱ce̱ cu kar ko̱o̱tta̱ balala i̱i̱nya̱ i̱i̱yo̱ kar kapaktek Manyi Ta̱mu̱ta̱dde̱n cinna kaal ki bali u̱du̱wa̱ enne ke̱.”

²⁸ Izek zin alaani ci Masiro nonno ne, “Kelema, ka̱a̱nyu̱ng atin oot apaktek Manyi Ta̱mu̱ta̱dde̱n cunno̱ng kaal balala, ma zin ovvoyyu reena. I̱yo̱ko̱ alayeang Ta̱mu̱ta̱dde̱n.”

²⁹ Abarizek zin Musesi nonno, “Kalawek atin Manyi ming kovvo kovvoya, imma loza i̱zze̱c ironga ngatinno̱ng, lo̱ddi̱ki̱re̱ ki ol cik lo̱o̱c cunne veelek. Abunna ming a̱gga̱ a̱du̱wa̱ i̱nna̱ zoz ci een de̱de̱, odola i̱nna̱ zinina de̱de̱, anyik olli Israilo koot kapaktek Manyi Ta̱mu̱ta̱dde̱n wawa balala.”

³⁰ Baling utungek Musesi ce̱e̱z ci alaan ci Masiro lo̱o̱c, ala zin Manyi,

³¹ u̱tu̱gu̱ zin Manyi zoz bali i̱jji̱n Musesi ke̱: Utungtek zin ironga ce̱e̱z ci alaano ki lo̱ddi̱ki̱re̱ ciginnek ki olli Masiro do̱o̱k lo̱o̱c, i̱llo̱i̱ rok irongit co̱de̱ ci anyigzai.

³² Imma i̱i̱te̱n cu dee, odoi zinin cinne iróng ngen aanyik olli Israilo ku̱lu̱ge̱t koot balala ki baling elema enne ke̱.