Lu̱ge̱z 20 - Tennet

Lo̱ti̱nno̱k Omoto

¹ U̱du̱wa̱k zin Ta̱mu̱ta̱dde̱n lo̱ti̱nno̱k ciko zu̱we̱ do̱o̱k:

² “Ke̱e̱ni̱ anna Manyi Ta̱mu̱ta̱dde̱n cunno̱ng, wa bali ka̱lu̱ga̱nu̱ng Masire lo̱o̱ce̱ bali a̱gi̱ddu̱ng ol ngati e̱e̱ggi̱nnu̱ du̱cca̱k ke̱.

³ “I̱llo̱i̱ ngatinno̱ng ta̱mu̱ta̱dde̱ne̱t u̱gge̱, kize annit do̱ niko.

⁴ “Ma adimanekku e̱le̱tti̱ to̱do̱yo̱i̱t imma kudukto ki gi̱i̱ imma ta̱mu̱-kenga icima lo̱o̱ta̱ icima maame.

⁵ Ma a̱di̱ngdi̱nga̱nnu̱ kaal cik een to̱do̱yyo̱k ko̱; eci anna Manyi Ta̱mu̱ta̱dde̱n cunno̱ng, ke̱e̱ni̱ anna Ta̱mu̱ta̱dde̱n ci kanyai meder, ke̱de̱zi̱ dooli zo̱ze̱ ci mu̱nye̱n ci be̱e̱ti̱gge̱k zee kizeto bu̱u̱llo̱wa̱ i̱i̱yo̱ icima we̱c wak amarina annita,

⁶ ma̱i̱je̱ ngatu ki̱ye̱le̱ke̱ rezinet bu̱u̱llo̱k i̱bbo̱nge̱t cik meelek giir ireza annit kar ku̱zu̱tte̱ lo̱ti̱nno̱k cigannik.

⁷ “Ma aminye zar cik Manyi Ta̱mu̱ta̱dde̱n cunne volonga, eci Manyi edez atin e̱e̱t ci aminye zar ciginnek.

⁸ “Abunna ming a̱a̱da̱nnu̱ I̱i̱te̱n wa Yu̱bze̱nto̱ u̱zu̱tte̱ kize i̱i̱te̱n ci a̱li̱le̱.

⁹ Abunna ming a̱li̱ngli̱ngnyu̱ i̱i̱nya̱ torkonom, tu̱gu̱ kaal cigunnek do̱o̱k,

¹⁰ ma̱i̱je̱ i̱i̱te̱ne̱ ci een turgerem ko̱ anyik kize i̱i̱te̱n ci Manyi Ta̱mu̱ta̱dde̱n cunne. Okko i̱i̱te̱ne̱ necu, ma a̱li̱ngli̱ngnyu̱ gi̱i̱ imma, i̱nna̱ icima ngerunne, icima buweenyunne, du̱ca̱i̱t ci maci icima du̱ca̱i̱t ci nga̱a̱ye̱, icima elegje, icima i̱do̱ngi̱ cik abak orgene cunno̱ng.

¹¹ Eci Ta̱mu̱ta̱dde̱n adiman ta̱mu̱-keng ki lo̱o̱c, nyatapar ci a̱ddi̱ki̱re̱ ki kaal cik abak ecito bu̱k, kar abarik ki̱ye̱be̱z i̱i̱nya̱we̱ cik een turgerem. A̱mu̱yu̱k zin Manyi I̱i̱te̱n wa Yu̱bze̱nto̱ kar kaanyik kize i̱i̱te̱n ci a̱li̱le̱.

¹² “To̱ngo̱o̱lle̱ baatunne ki yaatunne, kar bak u̱u̱mu̱c lo̱o̱ce̱ ci aanyi Manyi Ta̱mu̱ta̱dde̱n cunne ko̱.

¹³ “Ma amunyi e̱e̱t ci diiri.

¹⁴ “Ma orootonu ki ngaai cik ollu.

¹⁵ “Ma ogorze.

¹⁶ “Ma a̱du̱wa̱ zoz ngati ovolonge e̱e̱t imma.

¹⁷ “Ma anyai zinin ci a̱ppwe̱ ce̱e̱ze̱ ci e̱e̱t imma. Ma amanik ngaa ci locari cunne, icima du̱ca̱i̱t ci nga̱a̱ye̱ icima ci maci cik a̱li̱ngli̱ng ce̱e̱ze̱ cinne, ma arik bo̱do̱k zinin tomot, icima zi̱gi̱r icima kaal cik anyak locari cunne.”

O̱to̱ngo̱o̱ltte̱ ol

¹⁸ Baling iziyyet ol ture ming abuwe ki ta̱mu̱ ming a̱ju̱li̱ kar kicinnet borowoc biya ta̱dde̱na̱ ming anyak bbu̱rre̱t, a̱bba̱ri̱te̱t zin nege oroot ngo̱li̱nta̱. A̱vvu̱to̱ zin reena

¹⁹ kar kizettek Muses ne, “Zozoket i̱nna̱ eliya, kazikna atidic zoz cunne. Abarik ma anyike Ta̱mu̱ta̱dde̱n kozozieta icima kovvo atin naga ka̱da̱kna̱.”

²⁰ A̱nne̱k Musesi ol ne, “Ma o̱ngo̱o̱li̱nnu̱ gi̱i̱ imma. A̱kku̱ Ta̱mu̱ta̱dde̱n okko atimannung, kar zin go̱o̱le̱ ci o̱ngo̱o̱li̱nnu̱ niga Ta̱mu̱ta̱dde̱n alamnyyung iróng ngen ogonnu mu̱nye̱n.”

²¹ Eraktek ol reena, imma Musesi i̱i̱zo̱ di̱i̱z ci gi̱da̱ngi̱ ngati aave Ta̱mu̱ta̱dde̱n.

To̱do̱yyo̱k ki i̱te̱le̱nya̱

²² U̱du̱wa̱k zin Manyi Muses zoz ci azi ne, “Ti̱lo̱we̱k olli Israilo zoz cu: ‘Icinntu niga e̱le̱tti̱ne̱ cuggo̱k ming kozozeung anna i̱ge̱t ta̱mu̱-kenga.

²³ Ma ngen adimannu to̱do̱yyo̱k u̱gge̱ kizeto ta̱mu̱ta̱dde̱ne̱t cuggo̱k ki annit bu̱k; ma adimanekku e̱le̱tti̱ ta̱mu̱ta̱dde̱ne̱t cik adimanai ziiye cik ataltali icima dhahab.

²⁴ “‘Eteheenyycang i̱te̱le̱ lo̱o̱ta̱ ngatu kar apaktek muci ci i̱va̱du̱ gi̱i̱ ci anyikku Ta̱mu̱ta̱dde̱n ki muci ci owowonu niga, apahekku a̱zza̱ ki eeza ki tiin. Ming katahala anna nginti alawe ol zar cigannik, kokko anna ka̱kku̱na̱ku̱ng kar atin ka̱mu̱yu̱ng.

²⁵ Ming adimani i̱te̱le̱ ci een biyen kize cinanni, ma adimani biyene cik aliba ol i̱bo̱le̱ne̱, eci a̱wu̱li̱ atin i̱nna̱ i̱te̱le̱ neci.

²⁶ Ma adimani i̱te̱le̱ ci anyak le̱ti̱ti̱nya̱, gerza ming i̱ye̱la̱ ele cunne ngati a̱zze̱ne̱ ru̱u̱m ming okko i̱nna̱ ottodi.’”