Lu̱ge̱z 17 - Tennet

Maam cik ibboryai biya

¹ U̱lu̱ge̱t zin olli Israilo do̱o̱k balale ci een Sin, aanyik Manyi nogo kajalit lo̱o̱co̱we̱ ne̱ke̱. I̱ye̱be̱zi̱t zin ngati een zara Rephidim, ma̱i̱je̱ nginati i̱llo̱i̱ maam cik aud ol.

² Egerenycek ol ne̱ke̱ Muses kar kizettek ne, “Inyet maam cik kauda.” O̱bo̱de̱k zin Musesi nogo, “Egerenyikang niga annit nya? Nya ming atimanu Manyi ko̱?”

³ Ma̱i̱je̱ ol a̱ru̱k koor oroot nginati, kar zin nege kegerenycek Muses, a̱nne̱k ne, “Nya ming anyahannet Masire kar anyik dooli cigga̱k ki kaal ka̱da̱i̱to̱ koor ko̱?”

⁴ Ilalek zin Musesi Manyi, “Ku̱tu̱gu̱ anna nya ki ol ciko? Orongit abarik kovocca annit biyene.”

⁵ Abarizek zin Manyi Muses zoz necu, “Too o̱o̱we̱ ci ollu. Orkorrit zin ki lo̱ddi̱ki̱re̱ cik olli Israilo u̱gge̱ kar nyak ki cool bali a̱ru̱we̱ i̱nna̱ liil ci een Nail ke̱, kar zin bito.

⁶ Kokko atin anna kabili o̱o̱we̱ cunne karubaki larab ci een zara Horeb. Ru̱k larab necu, kar atin maama kiyokta biye neci kar ol kuudet.” Kar zin Musesi ku̱tu̱gu̱ zoz necu kicinnet lo̱ddi̱ki̱re̱ cik Israilo bu̱k.

⁷ Akatek zin enne ngin neci zar cik een Massah ki Meribah eci olli Israilo egerenycek nonno, kar bo̱do̱k eci nege itimanit Ta̱mu̱ta̱dde̱n zo̱ze̱ ci azi ne, “Aave Manyi orgene cinna yo icima a̱zze̱to̱?”

Ommogit olli Israilo olli Amalek

⁸ I̱vi̱ta̱ olli Amalek oorit olli Israilo ngati een Rephidim.

⁹ A̱nne̱k Musesi Joshua ne, “Tahala ol cik macik u̱gge̱ ngatinna kar anyik koot koorit olli Amalek. Kokko anna loza kabili biya ta̱dde̱na̱ kodongi cool ci Manyi a̱tte̱ cinanni.”

¹⁰ Oor zin Joshua olli Amalek ki bali ming a̱du̱wa̱k Musesi nonno ke̱, kar Musesi ki Aaron ki Hur oot biya ta̱dde̱na̱.

¹¹ Ming okko Musesi odongek a̱zzi̱t Ta̱mu̱ta̱dde̱n, ommog olli Israilo ol ne̱ke̱ illawa, ma̱i̱je̱ ming okko Musesi alucane a̱zzi̱t cinne, ommogit zin olli Amalek olli Israilo illawa.

¹² Ming okko a̱zzi̱ti̱ ci Musesi apirna, adima Aaroni ki Hur be kar kaarttek lo̱o̱c kar Musesi ka̱vvu̱ biye neci. Kar Aaroni ki Hur keeltta a̱zzi̱t cinne ngati odongeke Ta̱mu̱ta̱dde̱n, aave co̱de̱ a̱tte̱ ci a̱zzo̱, okko co̱de̱ aave a̱tte̱ ci angeto, kar azzina ciginnek kibilet ṯop zee ki̱tto̱ koor.

¹³ Ommog zin Joshua olli Amalek nya̱tu̱ba̱ta̱.

¹⁴ A̱nne̱k zin Manyi Muses ne, “Teherik zoz necu waraga abunna ming ovvo ol a̱a̱da̱, ikebek Joshua bu̱k kizik zoz necu, eci kokko anna kadita zoz ci olli Amalek lo̱o̱ta̱ ngatu.”

¹⁵ Eteheeny zin Musesi i̱te̱le̱ kar kakatek zar cik azi ne aanya Manyi kommog mo̱ddo̱ cigannik.

¹⁶ Ize zin enne ne, “Eci odongte azzina rok lecer ci Manyi. Ooro atin Manyi ki olli Amalek bu̱u̱llo̱k ki bu̱u̱llo̱k.”