Lu̱ge̱z 13 - Tennet

Aanycik ol A̱bu̱nya̱ Ta̱mu̱ta̱dde̱n

¹ A̱nne̱k Manyi Muses ne,

² “Anyaktang a̱bu̱nya̱ cik macik annita kizeto cigannik, eci a̱bu̱nya̱ cik olli Israilo cik diirik icima cik kaalu e̱e̱ggi̱n cigannik.”

³ A̱nne̱k zin Musesi ol ne, “Abunna gon ming adakku kwo̱o̱r i̱i̱te̱ne̱ necu e̱rki̱ta̱, eci een i̱i̱te̱ni̱ bali iyowanu niga Masire lo̱o̱ce̱ bali a̱gi̱ddu̱ng ol kar izet du̱cca̱k ke̱, eci Manyi anyahaung komize cinne. Ma adakku da̱i̱ne̱t cik anyak nyigit cik meertak gon amukcari ko̱.

⁴ Iyowanu niga Masire wazin necu nye̱lo̱we̱ ci een Abib.

⁵ Ming anyahaung Manyi lo̱o̱c ci een Kanaan, ki Hittites ki Amorites ki Hivites, ki Jebusites, lo̱o̱c bali u̱du̱wa̱ enne aanyik ji̱ji̱ti̱ggo̱k ke̱; abbize i̱rra̱na̱ ki lete. Abunna zin ming adakku kwo̱o̱r necu nye̱lo̱we̱ ci een Abib ko̱.

⁶ Adait umunet cik iróng amukcari gwo̱o̱nya̱ turgerem, anyak i̱i̱nya̱ cik e̱e̱ggi̱n turgerem; kar zin i̱i̱te̱n ci een turgerem ko̱ adait kwo̱o̱r ci Manyi.

⁷ Adait umune ci iróng amukcari i̱i̱nya̱ cik e̱e̱ggi̱n turgerem ko̱; ma anyakku gi̱i̱ imma ci amukcari udut orgene cunno̱ng, icima gi̱i̱ imma ci amukcari lo̱o̱ce̱ cunno̱ng.

⁸ Kar i̱i̱te̱ne̱ ci Kwo̱o̱ro̱ ko̱, u̱du̱kta̱k dooli cuggo̱k zoz cu, ‘Kadayi anna kwo̱o̱r cu ko̱ eci Manyi u̱tu̱gu̱ zoz ci iyowanna annit Masira.’

⁹ Een neci kwo̱o̱r ci kadak e̱rki̱ta̱ u̱tu̱gu̱ ki baayenti ci aave azzine cuggo̱k ki bo̱do̱k ci aave o̱o̱tti̱ne̱ kize ti̱lo̱wi̱ne̱t ci Manyi u̱tu̱ge̱tti̱ne̱ cuggo̱k. Eci Ta̱mu̱ta̱dde̱n komize cinne anyahaung i̱ge̱t Masire.

¹⁰ Abunna zin gon e̱rki̱ta̱ nye̱lo̱we̱ necu ming adakku kwo̱o̱r ci a̱ddi̱ki̱re̱.

¹¹ “A̱a̱nyu̱ng atin Manyi lo̱o̱c ci Kanaani i̱ge̱ta̱ ki bali a̱du̱wa̱ enne ngati ogone olom ki ji̱ji̱tu̱ggo̱k ke̱.

¹² I̱yo̱ko̱ zin abunna ming anyikku Manyi logoz cuggo̱k e̱e̱ggi̱n a̱bu̱nya̱ ki maala, ki eeza ki a̱zza̱ cik e̱e̱ggi̱n a̱bu̱nya̱ do̱o̱k eci kaala ne̱ko̱ do̱o̱k e̱e̱ggi̱n cik Ta̱mu̱ta̱dde̱no̱.

¹³ A̱ti̱ri̱zi̱ wo̱ye̱ i̱nna̱ a̱bu̱ ci zi̱gi̱ro̱ ming apahek i̱nna̱ Manyi nyoon ci a̱zze̱to̱, ming iróng i̱nna̱ ogoni niko, du̱l abarik i̱i̱nya̱ ci zi̱gi̱ro̱ ka̱da̱k. Abunna la̱du̱n ming a̱ti̱ri̱zi̱ logoz cigunnek wak e̱e̱ggi̱n a̱bu̱nya̱.

¹⁴ “Kar ming okko ngerunne atin a̱jji̱ni̱n zoz cu azi ne, ‘Azi ungec ci zoz necu ne?’ Du̱wa̱k nonno zoz cu, ‘Anyahaet Manyi agit Masire komize cinne, ngati ke̱e̱ggi̱nna̱ ba̱li̱ye̱ du̱cca̱k lo̱o̱ce̱ neci.

¹⁵ Baling ujurait alaani agit we̱t i̱ba̱ti̱ne̱, u̱ru̱k zin Manyi a̱bu̱nya̱ cik olli Masiro, ol cik diirik ki elegje bu̱k. Zoz zin ci kapaheke anna Manyi wawac ko̱ a̱bu̱nya̱i̱ cik elegje cigannik ko̱ nenen necu kar keela ruget ci logoz cigannik een a̱bu̱nya̱ ko̱.’

¹⁶ Ogon atin zoz necu ki baayenti ci aave azzine cuggo̱k ki bo̱do̱k o̱o̱tti̱ne̱ cuggo̱k, iyowai Manyi olli Israilo Masire komize cinne.”

Ovvo olli Israilo ki Nyatapar ci Ma̱ri̱

¹⁷ Imma i̱i̱te̱ne̱ bali eleme alaani ci Masiro olli Israilo ku̱lu̱ge̱t, iróng Ta̱mu̱ta̱dde̱n okkoye nogo goola kettedit lo̱o̱c ci Philistino, ming nu̱nu̱n ojon go̱o̱le̱ neci. Eci Ta̱mu̱ta̱dde̱n i̱no̱n enne do̱ azi ne, “Ming oorit ol uggak nogo goola, ovvo atin nege uhu zi̱nze̱tti̱ bak a̱mi̱ro̱ni̱k Masir.”

¹⁸ Utung zin Ta̱mu̱ta̱dde̱n gool neci kar kulucoi nogo go̱o̱le̱ ci okko balala rok Nyatapar ci Ma̱ri̱. Baling u̱lu̱ge̱t olli Israilo Masira anyaha ki i̱jjo̱ cigge̱k oronto.

¹⁹ Aanyik zin Musesi nogo kodongta ki emme cik Yosevo eci enne aanyik ba̱li̱ye̱ olli Israilo ku̱tu̱gu̱zzo̱ olom zo̱ze̱ ci emme ciginnek. Ize enne ne, “De̱de̱ a̱kku̱ atin Ta̱mu̱ta̱dde̱n ki̱ki̱ya̱ keelaung, kar atin odongit emme cigannik bu̱k ngatu.”

²⁰ Baling itingazzo olli Israilo o̱rge̱ ci een Succoth kar zin koot ki̱ye̱be̱zi̱t o̱rge̱ ci een Etham lokore ci lo̱o̱c ci Masiro balala.

²¹ Imma gon waz owo Manyi oowe cinne̱ng ku̱tu̱gu̱ ki di̱i̱z ci i̱ye̱le̱k nogo gool, imma ba̱a̱l, i̱ye̱la̱i̱ gwa̱a̱ ci i̱ye̱le̱k nogo gool, kar nege kotozzo ba̱a̱l kaal ki tu̱p bu̱k.

²² Iróng zin di̱i̱z icima gwo̱o̱ ci i̱ye̱le̱k nogo gool ko̱ ungnek oo ci ollu we̱e̱ta̱.