Lu̱ge̱z 10 - Tennet

Zeret ci Giroco

¹ Iizek zin Manyi Muses ne, “Bit ngati alaan ci Masiro ki ol wak a̱li̱ngli̱ng ki nonno ko̱, eci kanyiya anna o̱o̱tti̱ cigge̱k kokkomit, kar atin anna ku̱tu̱gu̱ kaal cik a̱vu̱la̱ orgene cinne̱ng.

² Kar atin niga bu̱k u̱du̱kta̱k dooli ki dooli cigge̱k kimice anna olli Masiro go̱o̱le̱ ci kogonne anna kaal cik a̱vu̱la̱ orgene cinne̱ng, kar atin a̱gga̱c ke̱e̱ni̱ anna Manyi.”

³ Oot zin Musesi ki Aaron rok alaan kar kizettek ne, “Icu zoz ci a̱du̱wa̱ Manyi Ta̱mu̱ta̱dde̱n ci olli I̱bu̱ru̱, azi ne, ‘Rok atinga iróng i̱nna̱ aziyi zoz cinanni? Anyik ol cigannik ku̱lu̱ge̱t, abunna ovvo nege alayan.

⁴ Ming a̱ju̱ra̱ne̱ i̱nna̱ nogo ku̱lu̱ge̱t, kokko atin anna kotorak giroc lo̱o̱c cunno̱ng ko̱ loza.

⁵ A̱bu̱ng atin giroc lo̱o̱c veelek, iróng looci ngen i̱ye̱la̱i̱. Ovvo atin adita ma̱ne̱n cuggo̱k ne lai ki labi balik anyigzai ngati aṯilne ta̱mu̱ ko̱ ki teltelen, edeca atin giroc rok keen bu̱k.

⁶ Okko atin giroci abbize ce̱e̱zi̱ cigunnek ki ce̱e̱zi̱ cik ol wak a̱li̱ngli̱ng ki i̱nne̱t ko̱ do̱o̱k, ki bo̱do̱k ce̱e̱zi̱ cik olli Masiro veelek, okko giroci abbize lo̱o̱c oroot, gi̱i̱ ci ngen nege kicinnet lo̱o̱ce̱ necu udut baize cinne̱ng.’” A̱du̱wa̱ Musesi zoz necu niko kar koto kutungek alaan lo̱o̱c.

⁷ A̱nne̱k ol wak a̱li̱ngli̱ng ki alaan ko̱ nonno ne, “Alaan, a̱gi̱dde̱t atin e̱e̱ti̱ cu agit rok atinga? Anyik olli Israilo ku̱lu̱ge̱t, kar atin kinnatit kalac Manyi Ta̱mu̱ta̱dde̱n cinne̱ng. Iróng i̱nna̱ a̱gga̱ ming egerzanne looci ci Masiro?”

⁸ Oot zin bo̱do̱k nege obodai Muses ki Aaron anyakttak alaan, kar enne kizek nogo ne, “U̱lu̱ge̱t oot alac Manyi Ta̱mu̱ta̱dde̱n cunno̱ng. Arrak u̱du̱kta̱ng, ciko ngene cik ovvoyyu ki i̱ge̱ta̱?”

⁹ O̱bo̱de̱k zin Musesi alaan, “Ka̱lu̱gja̱ atin naga ki logoz ki ma̱ti̱yo̱, dooli cik macik ki cik nga̱a̱ye̱k, ki kaal cigga̱k, eci korongnya kadakta kwo̱o̱r ci Manyi.”

¹⁰ Abariz zin alaani zoz neci, “Anyik Manyi kuzutung goola ming ka̱a̱nyu̱ng anna i̱ge̱t oto, ngaai ki dooli bu̱k. Kacinni anyakku niga i̱no̱ni̱ ci gerze.

¹¹ Orongnyu alac Manyi? Abunna, o̱o̱tte̱ zin ol cik macik do̱.” Ottoit zin nege ciko Muses ki Aaron ce̱e̱ze̱ ci alaano.

¹² Kar Manyi kizek Muses ne, “Dong a̱zzi̱t cunne uuv lo̱o̱c ci Masiro kar torak giroc ki̱vi̱ta̱ kadait labi balik anyigza ta̱mu̱ ke̱.”

¹³ Uuv zin Musesi lo̱o̱c ci Masiro coole cinne, kar Manyi ki̱tto̱na̱ ngoot ci a̱kku̱ je̱e̱na̱ ku̱vu̱wa̱n lo̱o̱c ci Masiro wazin do̱o̱k ki ba̱a̱li̱n do̱o̱k. Imma bali nge̱rre̱t, anyaha zin ngooti giroc.

¹⁴ Iddera zin giroci ci a̱ppwe̱ lo̱o̱c ci Masiro veelek kar ka̱vvu̱to̱ lo̱o̱c do̱o̱k. Ngen ol kicinnet zeret ci giroco ki i̱yo̱ko̱ baize cinne̱ng, iróng atin bo̱do̱k giroci imma a̱kku̱ ci ogon ki i̱yo̱ko̱.

¹⁵ A̱bu̱ng lo̱o̱c do̱o̱k kize gi̱da̱ng looci. Idita ma̱na̱ do̱o̱k ki keen balik anyigza ta̱mu̱ ke̱. I̱llo̱i̱ gi̱i̱ imma ci culai ci anyigzai keene lo̱o̱ce̱ ci Masiro veelek.

¹⁶ Utu zin alaani ci Masiro ciko Muses ki Aaron ataman kar kizek ne, “Ku̱tu̱gu̱ anna mu̱nye̱n ngati Manyi Ta̱mu̱ta̱dde̱n cunno̱ng, kabaca bo̱do̱k ngatinno̱ng.

¹⁷ I̱yo̱ko̱ zin, alaleyang mu̱nye̱n cik kabaca anna ko̱, kar alac Manyi Ta̱mu̱ta̱dde̱n cunno̱ng kar kaara zeret ci gerze een daiz ko̱ ngatinanni.”

¹⁸ Iyowa zin enne ce̱e̱ze̱ ci alaano kar kala Manyi.

¹⁹ Kar zin Manyi kalam ngoot bali a̱ppwe̱ a̱kku̱ o̱to̱ne̱ ci je̱e̱no̱ ke̱ kar kanyaha ngoot ci a̱kku̱ o̱to̱ne̱ ci nyigjo, kar kodong giroc ku̱u̱be̱k Nyatapar ci Ma̱ri̱. I̱llo̱i̱ giroc imma ci anyigzai lo̱o̱ce̱ ci Masiro.

²⁰ Ma̱i̱je̱ Manyi aanyik oo ci alaan ci Masiro kokkom kak, iróng aanyik olli Israilo ku̱lu̱ge̱t.

Zeret ci okko looci mu̱hu̱ra̱

²¹ A̱nne̱k zin Manyi Muses ne, “Dong keet waunne ko̱ kar uuvek ta̱mu̱-keng kar atin mu̱hu̱ri̱ kiddera lo̱o̱c ci Masiro do̱o̱k, a̱ri̱re̱ mu̱hu̱ri̱ neci oroot.”

²² Odong zin Musesi a̱zzi̱t kuuv ta̱mu̱-keng, u̱bu̱ng zin mu̱hu̱ri̱ lo̱o̱c ci Masiro do̱o̱k gwo̱o̱nya̱ i̱i̱yo̱.

²³ Iróng e̱e̱ti̱ imma ngen acin gi̱i̱ imma icima eroni okko ngamani gwo̱o̱nya̱ i̱i̱yo̱. Imma ngati abahe olli Israilo voor looci labak.

²⁴ Utu zin bo̱do̱k alaan ci Masiro Muses kar kizek ne, “U̱lu̱ge̱t oot alac Manyi. O̱o̱tte̱ ki dooli cuggo̱k bu̱k. Utungtek lo̱o̱c a̱zza̱ ki eeza ki tiin do̱ niko.”

²⁵ Ma̱i̱je̱ Musesi abarizek nonno a̱nne̱k ne, “Inyet la̱du̱n kanyakta a̱zza̱ ki eeza ki tiin kar kapakteya wawa Manyi Ta̱mu̱ta̱dde̱n cinna̱ng.

²⁶ Kovvoya la̱du̱n naga ki kaal cigga̱k; iróng kungneka rok mo̱o̱le̱t co̱de̱ ṯok lo̱o̱c. Korongnya kapaheka u̱gge̱ Manyi Ta̱mu̱ta̱dde̱n cinna̱ng, ming ngen naga kuzuca ngineci, iróng naga ka̱gga̱yya̱ e̱le̱gi̱t jang ci wo̱ye̱ kapaheka Manyi.”

²⁷ Ma̱i̱je̱ Manyi aanyik oo ci alaan ci Masiro kokkom, iróng enne orong kar ku̱lu̱ge̱t olli Israilo.

²⁸ A̱nne̱k alaani ci Masiro Muses ne, “Bit reena kar a̱vvu̱ nginati! Ming oboda bo̱do̱k iize i̱nna̱ daizoit.”

²⁹ Abarizek zin Musesi nonno a̱nne̱k ne, “Ki i̱yo̱ko̱ ming a̱du̱wa̱ i̱nna̱ ko̱, iróng atin anna kacinni ngintu udut.”