Lu̱ge̱z 1 - Tennet

Gi̱de̱ne̱t ci olli Israilo Masire

¹ E̱e̱ggi̱n ne̱ko̱ zar cik doolik Israilo balik ovvo lo̱o̱ce̱ ci Masiro orkor ki be̱e̱ti̱nne̱ng Ya̱ko̱bo̱ ki dooli cigge̱k nogo ciko:

² Reuben, Si̱mo̱ne̱, Le̱vi̱, Ju̱da̱,

³ Issachar, Zebulun ki Benjamin;

⁴ Dan ki Naphtali; Gad ki Asher.

⁵ E̱e̱ggi̱n dooli ki doolik cik Ya̱ko̱bo̱ do̱o̱k moten turgerem; imma Yosevo a̱vvu̱ ba̱li̱ye̱ la̱du̱n Masira.

⁶ A̱da̱i̱to̱ zin da̱ bu̱u̱l neci ki Yosevo ki gotonoggi do̱o̱k.

⁷ Imma olli Israilo i̱ti̱rre̱t da̱ Masire oroot kar zin kabaito lo̱o̱ce̱ neci do̱o̱k.

⁸ I̱ki̱ya̱ zin alaani ci een jor a̱gga̱m lo̱o̱c ci Masiro, iróng zin da̱ enne a̱gga̱ kaal cik u̱tu̱gu̱ Yosevo.

⁹ Kar zin kizek ollinne ne, “Icinte da̱, izeto olli Israilo meele oroot ci iróng naga katubo ki nogo.

¹⁰ I̱vi̱ta̱, abunna kamuda gool ci kacaze nogo, ming iróng kogon niko, ovvo atin nege a̱rri̱t kizeto meele oroot. Ming okko illa a̱kku̱, odong atin nege e̱le̱tti̱ ki mo̱ddo̱ cigga̱c, a̱ru̱kke̱t kar ki̱vi̱re̱t kutungttek orog cinna ko̱ lo̱o̱c.”

¹¹ I̱vi̱ta̱ zin lo̱ddi̱ki̱re̱ cik Masiro kar idimtta ol u̱gge̱ ngatinne̱ng kizeto lo̱ddi̱ki̱re̱ cik du̱cca̱k cik Israilo kar kadangtek nogo ki̱li̱ngli̱nge̱t oroot ngati eenyce nege orog ci een zara Pithom ki bo̱do̱k Rameses, kizeto de̱he̱rwa̱ cik alaan ci Masiro.

¹² Abarik ming a̱gi̱d olli Masiro nogo oroot, a̱rri̱t zin abarik nege oroot bak azanonnik lo̱o̱c; o̱to̱ngo̱o̱ltte̱ zin olli Masiro Israil,

¹³ kar zin kadangtek nogo li̱ngli̱ngo̱n ci a̱ppwe̱.

¹⁴ Aanyik baiz cinne̱ng kize gerza ngati aanyik ol nogo ki̱li̱ngli̱nge̱t oroot, a̱ru̱k tu̱u̱p kar kongotanit gi̱i̱ ci een zara moota ci a̱di̱le̱ nege ce̱e̱zi̱ kar bo̱do̱k kanycik li̱ngli̱ngo̱no̱k cik aavtte do̱ do̱ a̱ppi̱nte̱k ma̱ne̱ne̱.

¹⁵ A̱nne̱k zin alaani ci Masiro Shiphrah ki Puah, ngaai cik I̱bu̱ru̱ gon eela ngaai cik I̱bu̱ru̱ tuyanta ko̱ ne,

¹⁶ “Ming ovvo eelannu ngaai cik I̱bu̱ru̱ ti̱ra̱, icinnet ju̱rru̱m, ming een do̱le̱c ci maci, u̱ru̱we̱t ka̱da̱k; ma̱i̱je̱ ming een do̱le̱c ci nga̱a̱ye̱, aanycik kurug.”

¹⁷ O̱to̱ngo̱o̱ltte̱ zin ngaai wak eela ngaai ti̱ra̱ ko̱ Ta̱mu̱ta̱dde̱n, iróng zin ngen ogon zoz ci orong alaani ci Masiro nogo ku̱tu̱gu̱zzo̱ ko̱; abarik nege aanycik dooli wak macik kuruget.

¹⁸ Utu zin alaani ci Masiro ngaai wak eela ngaai ti̱ra̱ ko̱, kar enne ki̱jji̱n nogo, “Nya ming ogonnu niko ko̱? Nya ming ungneku dooli cik macik kuruget ko̱?”

¹⁹ O̱bo̱dde̱k zin ngaai ne̱ke̱ alaan ci Masiro, “Iróng ngaai cik I̱bu̱ru̱ ogon ki ngaai cik Masiro; anime tuyanet, ukcai ataman ming ngen naga kuzuca nogo.”

²⁰ A̱mu̱yu̱k zin Ta̱mu̱ta̱dde̱n ngaai wak eela ngaai ti̱ra̱ ko̱, otorte zin olli Israilo kizeto meele ne giir.

²¹ Eci ngaai wak eela ngaai ti̱ra̱ ko̱ o̱ngo̱o̱le̱ Ta̱mu̱ta̱dde̱n, aanyik zin Ta̱mu̱ta̱dde̱n nogo bu̱k dooli cigge̱k.

²² Aanyik alaani ci Masiro ol ciginnek zoz cu: “Ming a̱rri̱ta̱i̱ do̱le̱c ci maci, u̱ju̱ktte̱k liil ci een zara Nail, abarik aanycik dooli cik nga̱a̱ye̱k kuruget.”