Kolosiya 4 - Tennet

¹ Imma niga ma̱ci̱gi̱ du̱cca̱k, abunna ming a̱ti̱ri̱zu̱ du̱cca̱k cuggo̱k ju̱rru̱m, eci a̱gga̱yyu̱ anyakku niga bu̱k Manyi ta̱mu̱-kenga.

Alac Ta̱mu̱ta̱dde̱n odohize

² Aanycik e̱le̱tti̱ cuggo̱k ke̱me̱dda̱ lawinte ci Ta̱mu̱ta̱dde̱no̱, ming ovvo alawinu, u̱zu̱tte̱ e̱le̱tti̱ ju̱rru̱m kar aanycik nonno zany.

³ Kar alayettu agit bu̱k Ta̱mu̱ta̱dde̱n, kar enne koowet gool ci kuwaheka ol kaviyak cik abunna, kar ku̱du̱kta̱k ol zoz ci Ye̱su̱ Ki̱ri̱sto̱ bali a̱lu̱gnye̱ ke̱. Kecebje zin anna lagama zo̱ze̱ necu.

⁴ Alayeang Ta̱mu̱ta̱dde̱n kar anna kuwahek ol kaviyak ciginnek ju̱rru̱m ki ming ka̱du̱wa̱ anna de̱de̱.

⁵ Abait genyiza ki ol wak iróng a̱tu̱we̱; ming ovvo niga amudannu gool ci uwahekku nogo kaviyak, u̱du̱kta̱k ju̱rru̱m.

⁶ Ming ozozonnu ki ol, aanycik zo̱zzo̱k cuggo̱k kizeto zo̱zzo̱k cik abunna atalne ol, kar wo̱ye̱ niga a̱gga̱c gool ci abarizekku ol do̱o̱k.

Zawinet ci Pa̱u̱lo̱ vu̱rrto̱

⁷ A̱du̱wa̱kku̱ng atin e̱e̱ti̱ ci een zara Tychicos kaviyak cik obod ki annita. Een enne gotonet ci kirezi anna oroot, azunne zoz ci Manyi, ka̱li̱ngli̱ngnya̱ ki nonno zoz ci Manyi ju̱rru̱m.

⁸ Ki̱tto̱na̱kku̱ng anna nonno i̱ge̱ta̱ kar enne ku̱du̱wa̱u̱ng baiz cinna̱ng ngatu kar ka̱a̱nyu̱ng talninet zi̱nze̱tti̱nne̱.

⁹ Orkora enne ki Onesimos, een enne e̱e̱t ci abunna kar kize gotonet ci kireza, een enne e̱e̱t cunno̱ng. A̱du̱wa̱kku̱ng atin nege kaal do̱o̱k cik ogone ngatinna̱ng ngatu.

¹⁰ I̱tto̱na̱kku̱ng zin bo̱do̱k e̱e̱ti̱ ci een Aristarkas wa kecebina ki annit ko̱ bu̱k zawinet cinne, izayung e̱e̱ti̱ ci een Marko bu̱k, een enne ngerrti a̱zi̱ti̱ Barnabasi. Ki̱lo̱te̱u̱ng ba̱li̱ye̱ zoz cinne; ming i̱ki̱ya̱u̱ng, a̱gga̱mtta̱ nonno.

¹¹ I̱tto̱na̱ e̱e̱ti̱ ci een zara Ye̱su̱ wa azi zar u̱gge̱ bo̱do̱k ne Justus ko̱, zawinet cinne. E̱e̱ggi̱n ol ne̱k izayung ko̱ Ya̱u̱d wak a̱tu̱ zoz ci Ye̱su̱, ka̱li̱ngli̱ngnya̱ zin bu̱k zo̱ze̱ ci ba̱a̱li̱ne̱t ci Ta̱mu̱ta̱dde̱no̱, nogo do̱ cik eelanna annit oroot.

¹² I̱tto̱na̱kku̱ng zin bo̱do̱k e̱e̱ti̱ ci een zara Epaphras zawinet cinne i̱ge̱ta̱, een enne e̱e̱t ci orog cunno̱ng kar kize du̱ca̱i̱t ci a̱li̱ngli̱ng zoz ci Ye̱su̱ Ki̱ri̱sto̱. Alawekkung gon enne i̱ge̱t Ta̱mu̱ta̱dde̱n odohize kar ibilet ju̱rru̱m tu̱we̱nta̱ zo̱ze̱ ci Ta̱mu̱ta̱dde̱no̱, ngati ogonnu zoz ci orong enne i̱ge̱t u̱tu̱gu̱z do̱o̱k.

¹³ Ka̱gga̱ anna eliya nonno de̱de̱. A̱li̱ngli̱ng gon enne oroot ngatinno̱ng ki bo̱do̱k ol wak a̱tu̱we̱ abak o̱rge̱ ci Laodicea ki Hierapolis.

¹⁴ I̱tto̱na̱kku̱ng gotoneti Lu̱ka̱ wa kireza naga een di̱kto̱r ko̱, zawinet cinne, kar bo̱do̱k e̱e̱ti̱ ci een Demas ki̱tto̱na̱ zawinet cinne bu̱k.

¹⁵ Izayeang annit bu̱k gotonogget tu̱we̱nta̱ wak abak o̱rge̱ ci een Laodicea, ki ngoonet tu̱we̱nta̱ ci een zara Nympha ki olli ke̱le̱ci̱o̱ a̱tu̱we̱ alaye gon ce̱e̱ze̱ cinne ko̱.

¹⁶ Ming ikebtu niga do̱o̱k waraga necu, i̱tto̱nta̱k zin waraga necu bu̱k ol wak a̱tu̱we̱ abak o̱rge̱ ci een Laodicea kar kikebit nege bu̱k. Kar zin niga bu̱k ikebit waraga bali ki̱tto̱nna̱k anna ol wak a̱tu̱we̱ o̱rge̱ ci een Laodicea ke̱.

¹⁷ U̱du̱kta̱k Arkipas abunna ming edecak li̱ngli̱ngo̱n bali aanyik Manyi nonno ku̱tu̱gu̱ ke̱.

¹⁸ Annita Pa̱u̱lo̱ ci keherakkung i̱ge̱t zawinet cu a̱tte̱ cinanni. Abunna zin ming a̱a̱da̱nnu̱ ce̱bi̱ne̱t cinanni lagama. Anyik deten ci Ta̱mu̱ta̱dde̱no̱ ka̱vvu̱ ngatinno̱ng.