Kolosiya 3 - Tennet

Baiz ci een jor tu̱we̱nto̱

¹ A̱gga̱yyu̱ itingtau niga ki Ki̱ri̱sto̱ daiza, abunna ming arikku zi̱nze̱tti̱ cuggo̱k kaal cik aavtte ta̱mu̱-kenga, ngati aave Ki̱ri̱sto̱ a̱tte̱ ci a̱zzo̱ Ta̱mu̱ta̱dde̱no̱ ngati doizo.

² Aartik zi̱nze̱tti̱ cuggo̱k kaal cik aavtte ta̱mu̱-kenga, iróng een kaal cik aavtte lo̱o̱ta̱ ngatu.

³ Eci a̱da̱kttu̱ niga ba̱li̱ye̱, imma i̱yo̱ko̱ a̱lu̱gnye̱ baizi cunno̱ng ki Ki̱ri̱sto̱ ngati Ta̱mu̱ta̱dde̱no̱.

⁴ Ming okko Ki̱ri̱sto̱ wa een baiz cunno̱ng ko̱ i̱ye̱la̱ ele cinne, ovvo niga bu̱k i̱ye̱la̱nu̱ e̱le̱tti̱ cuggo̱k ki nonno ngati di̱ngdi̱ngo̱n cinne.

⁵ Abunna ming aditannu kaal cik gerzek lo̱o̱tu̱ aavtte orong e̱le̱tti̱ cuggo̱k: rotinet ki ngaai ki ol cik macik, ki a̱li̱ya̱kze̱t, ki bo̱do̱k kaal cik gerzek obod ki a̱li̱ya̱kze̱t, zi̱nze̱tti̱ cik a̱ppi̱nte̱k kaale cik atubo ki ming a̱di̱ngdi̱nga̱n e̱e̱ti̱ to̱do̱yyo̱k cik lo̱o̱tu̱.

⁶ Imma zin kaale cik gerzek anyak ol ko̱, okko atin anyaha zoz ci okko Ta̱mu̱ta̱dde̱n aburne nong oroot.

⁷ Ogonnu niga ba̱li̱ye̱ kaal cik gerzek ko̱ baize bali reeni abakku niga ke̱.

⁸ Imma zin i̱yo̱ko̱, abunna ming odotekku kaal ne̱ko̱ do̱o̱k lo̱o̱c: burnenet nong, zi̱nze̱tti̱ cik mu̱hu̱ri̱k, baizzok cik a̱mu̱we̱, ki zoz ci volongo a̱mu̱we̱ iyowa u̱tu̱ge̱tti̱ne̱ cuggo̱k.

⁹ Ma ovolongnyu e̱le̱tti̱ ciggo̱k, eci utungttu niga baiz bali reeni ke̱ ki kaal ciginnek do̱o̱k.

¹⁰ Anyaktu zin i̱yo̱ko̱ niga baiz ci een jor, kar Manyi ka̱a̱nyu̱ng baiz ci abunna kar a̱gga̱c nonno ju̱rru̱m, kar bo̱do̱k ubunntta ki i̱yo̱ko̱ enne ko̱.

¹¹ Imma zin zo̱ze̱ cu, i̱llo̱i̱ e̱e̱t ci een Ya̱u̱do̱c icima ci een Gi̱ri̱k, icima e̱e̱t ci etted vi̱ca̱vi̱ca̱ icima iróng ettede, icima e̱e̱t ci een i̱do̱nge̱ni̱t icima ol cik abak lo̱o̱ce̱ ci een Scythian, ki e̱e̱t ci een du̱ca̱i̱t, icima iróng een e̱e̱t ci een du̱ca̱i̱t. Abarik zin olle ne̱ko̱ do̱o̱k, Ki̱ri̱sto̱ ci ommog kaal do̱o̱k, kar enne ka̱vvu̱ kaale do̱o̱k.

¹² I̱yo̱ko̱ zin, ki ming atahalaung Ta̱mu̱ta̱dde̱n kar izet ol ciginnek a̱li̱le̱ ko̱, irezung zin enne i̱ge̱ta̱. Abunna zin ming amanikku ol, anyait bunnat, izet ol cik gununik, kar inimet no̱ngi̱tto̱n.

¹³ Abait ki ol do̱o̱k yahe. Alaltek e̱le̱tti̱ cuggo̱k, ming abac e̱e̱ti̱ zoz imma, ming omozinnu niga nu̱nu̱n zo̱ze̱ cinne, alaltek. Alaltek ol ki baling alaleung Manyi i̱ge̱ta̱ ke̱.

¹⁴ Imma zin kaale ne̱ko̱ do̱o̱k riil rezinet oroot, eci rezinet arum kaal ne̱ko̱ do̱o̱k kodowe.

¹⁵ Anyik gano ci Ki̱ri̱sto̱ kabal zi̱nze̱tti̱ cuggo̱k, eci Ta̱mu̱ta̱dde̱n a̱a̱nyu̱ng izet ol co̱de̱ kar anyait gano necu. Kar aanycik nonno zany.

¹⁶ Aanycik zoz ci Ki̱ri̱sto̱ kabak zi̱nze̱tti̱nne̱ cuggo̱k oroot ming i̱lo̱ttu̱ niga e̱le̱tti̱ do̱o̱k genyiza, ki be̱ni̱ne̱t be̱ni̱nno̱k cik a̱di̱ngdi̱nga̱nnu̱ Ta̱mu̱ta̱dde̱n, anyikku nonno zany be̱ni̱no̱we̱ zi̱nze̱tti̱nne̱ cuggo̱k do̱o̱k.

¹⁷ Kar ming ogonnu gi̱i̱ imma, ming ozozu u̱tu̱ge̱tti̱ne̱ icima ogonnu azzine, u̱tu̱gu̱z kaal ne̱ke̱ do̱o̱k zare cik Manyi Ye̱su̱. Kar bo̱do̱k go̱o̱le̱ cinne, aanycik Ta̱mu̱ta̱dde̱n Baba zany kaale do̱o̱k.

Ti̱lo̱wi̱ne̱t ci ol wak a̱tu̱ Ye̱su̱

¹⁸ Aanycik ngaai kiziyet zoz ci macwa cigge̱k, eci necu een gi̱i̱ ci abunna zo̱ze̱ ci a̱tu̱yyu̱ niga Manyi Ye̱su̱.

¹⁹ Aanycik ol cik macik kirezit ngaai cigge̱k. Ma odomnyu nogo.

²⁰ Aanycik dooli kiziyet ti̱lo̱wi̱ne̱t ci be̱e̱ti̱gge̱k ki e̱e̱ti̱gge̱k, eci Manyi atalne zo̱ze̱ necu.

²¹ Abunna be̱e̱ti̱k doolinnu ming ozozik dooli utuge ci alali, ming ozoz nege mootiza, ovvo dooli abure nong.

²² Imma niga ol cik e̱e̱ggi̱nnu̱ du̱cca̱k ko̱, abunna ming o̱ngo̱o̱li̱nnu̱ ma̱ci̱gi̱ ce̱e̱zi̱; kar u̱tu̱gu̱z li̱ngli̱ngo̱n ju̱rru̱m, ma ogonnu li̱ngli̱ngo̱n ming acinnu ebere cigge̱k do̱ kar nege katalttung, abarik i̱li̱ngli̱nge̱t zi̱nze̱tti̱nne̱ cik alali de̱de̱ ngati o̱ngo̱o̱li̱nnu̱ Manyi, iróng een e̱e̱t ci diiri.

²³ Abunna zin ming a̱gga̱yyu̱ kaale cik ogonnu niga ko̱, i̱li̱ngli̱nge̱t zi̱nze̱tti̱nne̱ cik abunna, ki ci a̱li̱ngli̱ngngo̱ni̱ku̱ niga Manyi Ye̱su̱ do̱ niko, amire ki ol cik diirik.

²⁴ Ki i̱yo̱ko̱ ming a̱gga̱yyu̱ niga ko̱ ovvo atin niga amudannu kaal cik aragizu ngati Manyi, a̱li̱ngli̱ngngo̱ni̱kku̱ zin niga Manyi Ki̱ri̱sto̱, abunna ming a̱gga̱yyu̱ okko atin enne amuccu̱ng.

²⁵ Imma ol wak ogon kaal cik gerzek olle, acaca atin Ta̱mu̱ta̱dde̱n kaal ne̱k gerzek ogon nege ke̱, eci enne iróng ahal ol.