Kolosiya 2 - Tennet

¹ Korongi anna abunna ming a̱gga̱yyu̱ ka̱li̱ngli̱ngi̱ anna kipira zo̱ze̱ cunno̱ng ki ol wak a̱tu̱we̱ abak lo̱o̱ce̱ ci een Laodicea, ki ol cik ngen anna kicin bu̱k.

² Korongi anna ki̱ti̱lo̱ nogo kokkomit zi̱nze̱tti̱ kar urumte nga̱to̱de̱ rezinta, kar zin anyait genyiz ci a̱gga̱yyu̱ zoz ju̱rru̱m, kar a̱gga̱c zoz ci Ta̱mu̱ta̱dde̱no̱ a̱lu̱gnye̱ ci een Ki̱ri̱sto̱ ele.

³ A̱lu̱gnye̱ zoz ci genyizo ki arizet do̱o̱k ngatinne.

⁴ Ka̱du̱wa̱kku̱ng zoz neci abunna iróng e̱e̱ti̱ imma alabanung zo̱ze̱ ci a̱lu̱te̱ nege ol dangonte ci okkomi.

⁵ Ki i̱yo̱ko̱ ming iróng anna kaavtte imma i̱ge̱t nga̱to̱de̱ ko̱, kaavtte anna imma i̱ge̱t vongiza, katalne zin zo̱ze̱ ci adimannu niga kaal cuggo̱k baiza ju̱rru̱m, kar ibilet ṯop tu̱we̱nta̱ zo̱ze̱ ci Ki̱ri̱sto̱.

Anyaha Ki̱ri̱sto̱ baiz ci een de̱de̱

⁶ I̱yo̱ko̱ zin, ming elemttau niga Ye̱su̱ Ki̱ri̱sto̱ kize Manyi cunno̱ng, abunna zin ming abakku baize cinne.

⁷ U̱ru̱ktte̱k zo̱o̱ lo̱o̱c ngati Ki̱ri̱sto̱ kar enne kize e̱e̱t ci aanyik tu̱we̱ne̱t cunno̱ng kokkom ki ba̱li̱ye̱ edemezung ol ke̱, kar aanycik Ta̱mu̱ta̱dde̱n zany odohize oroot.

⁸ Ka̱du̱wa̱kku̱ng, ebeit e̱le̱tti̱ ju̱rru̱m, kar i̱llo̱i̱ e̱e̱t imma ci alabanung genyize ci anyak volong a̱kku̱ ngati ol cik diirik, de̱mzi̱ne̱t ci olli lo̱o̱tu̱, iróng ozoz zoz ci obod ki Ki̱ri̱sto̱.

⁹ Eci ngati Ki̱ri̱sto̱, abak Ta̱mu̱ta̱dde̱n eliye cinne do̱o̱k,

¹⁰ urubtau zin niga baiz ci abunna do̱o̱k go̱o̱le̱ ci urumteziu niga Ki̱ri̱sto̱, nonno ci anyak doiz ci ommog vongizzok do̱o̱k.

¹¹ Imma zin go̱o̱le̱ ci utungteu niga mu̱nye̱n lo̱o̱c ko̱, urumteziu niga Ki̱ri̱sto̱, u̱tu̱gu̱zzu̱ ki ol wak etted wucic vi̱ca̱vi̱cce̱t. Iróng zin te̱di̱ne̱t cunno̱ng ogon ol cik diirik azzine, abarik u̱tu̱gu̱ Ki̱ri̱sto̱ ngati elemannu niga nonno.

¹² Eci ogon ki ci a̱da̱yo̱zi̱u̱ng ol lo̱o̱k ki bali Ki̱ri̱sto̱ ngati a̱gga̱mnyu̱ niga ba̱ti̱ti̱mo̱, kar itingta ki nonno daiza tu̱we̱nta̱ doize ci Ta̱mu̱ta̱dde̱no̱ bali ingane nonno daiza ke̱.

¹³ U̱tu̱gu̱zzu̱ niga ba̱li̱ye̱ ki ol cik a̱da̱i̱to̱ mu̱nye̱ne̱ cuggo̱k, ogonnu niga ki ci ngen mu̱nye̱na̱ cuggo̱k kaartai, a̱a̱nyu̱ng zin Ta̱mu̱ta̱dde̱n ruget zo̱ze̱ ci Ki̱ri̱sto̱. Alalek enne mu̱nye̱n cigga̱c agit do̱o̱k.

¹⁴ Aara zin enne mu̱nye̱n cik aavtte ngatinna zo̱ze̱ ci iróng naga ko̱ngo̱o̱li̱ne̱ Lo̱ti̱nno̱k cik Musesi. Idimak enne mu̱nye̱n tu̱ go̱o̱le̱ ci a̱da̱kne̱ Ye̱su̱ keete ci een ta̱la̱ke̱c.

¹⁵ Ommog zin Ye̱su̱ ddi̱ki̱ryyo̱k ki alaat cik lo̱o̱tu̱, kar kaara ngatinne̱ng doiz ki di̱ngdi̱ngo̱n go̱o̱le̱ ci a̱da̱kne̱ enne ta̱la̱ke̱ca̱. Adak zin a̱li̱ya̱ni̱ nogo orgene ci ollu.

¹⁶ I̱yo̱ko̱ zin, ma anyikku e̱e̱t imma kettedeung zoz zo̱ze̱ ci obod ki da̱i̱ne̱t cik adakku icima kaal cik auddu, icima zoz ci obod ki kwo̱o̱rnya̱ cik Ya̱u̱do̱, icima i̱i̱te̱n ci iyowane nyelowi jor icima I̱i̱te̱n wa Yu̱bze̱nto̱.

¹⁷ E̱e̱ggi̱n kaala ne̱ko̱ do̱o̱k ri̱ri̱to̱n ci kaal wak ovvo a̱vvu̱, abarik zoz ci een de̱de̱ amudai ngati Ki̱ri̱sto̱.

¹⁸ Ma anyikku e̱e̱t imma ci ozoz volonga a̱ru̱k talaben ngati alawe anjilonya kar ka̱a̱nyu̱ng i̱ge̱t imiret zo̱ze̱ ci Ki̱ri̱sto̱. Imma e̱e̱ti̱ ci ogon niko oob ke̱ngti̱ cik zo̱zzo̱k ne̱k icin enne ko̱ oroot, kar kodong ele, kar kozoz darace.

¹⁹ Okko e̱e̱ti̱ ci ogon niko ko̱, iróng enne ngen arume ki Ki̱ri̱sto̱ wa een oo ngati ol wak a̱tu̱ nonno ko̱ do̱o̱k. Kar ele do̱o̱k ka̱gga̱mo̱zi̱k oo, kaanyik ele kurumte nga̱to̱de̱, kar Ta̱mu̱ta̱dde̱n kaanyik kitilizet ki ci orong enne.

Baiz ci een jor ngati Ki̱ri̱sto̱

²⁰ Urumteziu niga Ki̱ri̱sto̱ daize cinne, kar aarta e̱le̱tti̱ baize ci lo̱o̱tu̱ ko̱. Nya bo̱do̱k ming abakku ki ci ngen o̱ngo̱o̱li̱nnu̱ kaal cik lo̱o̱tu̱ ogon ki ne̱ko̱ ko̱:

²¹ “Ma a̱gga̱mi̱ gi̱i̱ cu! Ma atari gi̱i̱ cu! Ma u̱u̱mi̱ gi̱i̱ cu!”

²² Ovvo kaala ne̱ko̱ do̱o̱k edeccai ngati a̱li̱ngli̱nge̱ ol, eci e̱e̱ggi̱n ne̱ko̱ do̱o̱k de̱mzi̱ne̱t ki lo̱ti̱nno̱k cik anyaha e̱e̱ti̱ ci diiri o̱o̱we̱ cinne.

²³ Ogon lo̱ti̱nno̱wa̱ ne̱ko̱ ki ci anyak genyiz, go̱o̱le̱ ci ommogek nege ol ki̱di̱ngdi̱nga̱ni̱t, ki ci a̱ru̱we̱ nege talaben azi ne ke̱e̱ggi̱nna̱ gunune, ki gool ci adimane nege e̱le̱tti̱ cigge̱k gerzet. Abarik i̱llo̱i̱ gi̱i̱ imma ci abunna kar kalamte zoz ci gerze amin zinin ci e̱e̱to̱.