Kolosiya 1 - Tennet

¹ Annita Pa̱u̱lo̱ ci keheri waraga cu, ki Ti̱mo̱te̱yo̱ wa een gotona tu̱we̱nta̱, atahala annit Ta̱mu̱ta̱dde̱n kar kize to̱na̱i̱t ci Ye̱su̱ Ki̱ri̱sto̱.

² Keherya waraga cu keherika ol wak a̱li̱le̱ Ta̱mu̱ta̱dde̱no̱ abak o̱rge̱ ci een Kolosiya, e̱e̱ggi̱n nege bo̱do̱k gotonogget wak a̱tu̱ Ki̱ri̱sto̱. Anyik deten ki gano ci Ta̱mu̱ta̱dde̱no̱ Be̱e̱ti̱nna̱ ka̱vvu̱ baize cunno̱ng.

Lawinet ci kanyikka Ta̱mu̱ta̱dde̱n zany

³ Kanyikka odohize Ta̱mu̱ta̱dde̱n Be̱e̱ti̱ Manyitinna Ye̱su̱ Ki̱ri̱sto̱ zany zo̱ze̱ cunno̱ng ming kalayya nonno,

⁴ eci kizikta naga tu̱we̱ne̱t ci anyakku ngati Ye̱su̱ Ki̱ri̱sto̱, ki rezinet ci irezzu niga ol cik Ta̱mu̱ta̱dde̱no̱ do̱o̱k.

⁵ Een tu̱we̱ne̱t necu ki rezinet ci a̱kku̱ zo̱ze̱ ci arikku niga zi̱nze̱tti̱ zoz ci e̱re̱yyu̱ niga aave ta̱mu̱-kenga, iziktu niga zoz neci zo̱ze̱ ci een de̱de̱, kaviyahe cik abunna

⁶ balik i̱vi̱tta̱u̱ng i̱ge̱ta̱ ke̱. Azawonik kaviyaha ne̱ke̱ lo̱o̱c do̱o̱k, kar kanyak o̱ya̱u̱ cik alize orgene cunno̱ng i̱i̱te̱ne̱ bali aziknnu niga ke̱ kar a̱gga̱c deten ci Ta̱mu̱ta̱dde̱no̱ zo̱ze̱ ci een de̱de̱.

⁷ Aziknnu niga zoz necu arrak oowa ngati e̱e̱t ci een zara Epaphras, e̱e̱t ci kireza naga ka̱li̱ngli̱ngnya̱ bu̱k ki nonno, een enne e̱e̱t ci a̱li̱ngli̱ng zoz ci Ki̱ri̱sto̱ ngatinna,

⁸ nonno bo̱do̱k ci a̱du̱wa̱kke̱t rezinet ci a̱a̱nyu̱ng Vongiz ci Ta̱mu̱ta̱dde̱no̱.

⁹ Imma zin zo̱ze̱ necu, baling kizikta zoz cunno̱ng, ngen naga kibilizta lawinet Ta̱mu̱ta̱dde̱n zo̱ze̱ cunno̱ng kar ka̱a̱nyu̱ng genyiz ci Vongizo ki gga̱wa̱ne̱t zoz.

¹⁰ Kalayya Ta̱mu̱ta̱dde̱n kar niga abait baiz ci abunna orong Manyi, kar enne katalo kaale cik ogonnu niga do̱o̱k: Anyak zoz ci a̱li̱ngli̱ngnyu̱ niga kaale cik abunna, amudannu zoz ci a̱gga̱yyu̱ Ta̱mu̱ta̱dde̱n ju̱rru̱m.

¹¹ Kalayya nonno bu̱k abunna ming a̱a̱nyu̱ng doiz ci a̱kku̱ di̱ngdi̱ngo̱nte̱ cinne kar atin niga anyait zi̱nze̱tti̱ cik alali animnyu no̱ngi̱tto̱n, kar bo̱do̱k abait baiz talninta.

¹² Kar aanycik Baba zany ci elemannu̱ng i̱ge̱t kar ozolit zoz ci u̱du̱wa̱k enne ol cik Ta̱mu̱ta̱dde̱no̱ ba̱a̱li̱ne̱t ci abahe ol vooritena.

¹³ Eci enne eelawet agit baize ci mu̱hu̱ri̱ kar kanyait ba̱a̱li̱ne̱t ci Ngerinne irez enne ko̱,

¹⁴ nonno ci a̱da̱i̱ zo̱ze̱ ci mu̱nye̱n cigga̱c kar kaanyyet kabait labak.

Alaanzet ci Ki̱ri̱sto̱

¹⁵ Een Ki̱ri̱sto̱ ri̱ri̱to̱n ci Ta̱mu̱ta̱dde̱n ci iróng naga kacin eberene, nonno bo̱do̱k ci een a̱bu̱ ci kaal cik eenyca Ta̱mu̱ta̱dde̱n do̱o̱k.

¹⁶ Eci Ta̱mu̱ta̱dde̱n eenyca kaal do̱o̱k ngatinne, kaal cik aavtte ta̱mu̱-kenga ko̱ ki cik aavtte lo̱o̱ta̱, cik kacin naga eberene ki cik iróng kacin eberene, leceret cik alaatu icima doiz icima alaat icima alaanzet; eenycai kaala ne̱ko̱ do̱o̱k ngatinne kar bo̱do̱k kizeto ciginnek.

¹⁷ Aave Ngerrti Ta̱mu̱ta̱dde̱no̱ la̱du̱n to baling ngen kaala do̱o̱k keteehenycai, kar zin zo̱ze̱ cinne, a̱vvu̱to̱ kaala do̱o̱k nga̱to̱de̱.

¹⁸ Kar zin i̱yo̱ko̱, nonno ci een oo ci eliyo veelek ki ke̱le̱ci̱a̱; nonno ci akanane kaala kar kize a̱bu̱ ci ol cik a̱da̱i̱to̱, kar enne kanyak doiz ci abale kaal do̱o̱k.

¹⁹ Eci Ta̱mu̱ta̱dde̱n atalne ming aave enne do̱o̱k ngati Ki̱ri̱sto̱,

²⁰ kar zo̱ze̱ cinne aganto enne eliya ki kaal do̱o̱k, kaal lo̱o̱ta̱ ngatu icima ta̱mu̱-kenga, go̱o̱le̱ ci anyahe enne gano bi̱ye̱te̱ ciginnek a̱ddu̱te̱ ta̱la̱ke̱ca̱.

²¹ Edewannu niga ba̱li̱ye̱ e̱le̱tti̱ ngati Ta̱mu̱ta̱dde̱no̱ kar izet mo̱ddo̱ i̱no̱ni̱nte̱ cunno̱ng ma̱rri̱t niga ogonnu mu̱nye̱n.

²² Ma̱i̱je̱ i̱yo̱ko̱, aganizung enne i̱ge̱ta̱ eliye ci Ngerinne Ki̱ri̱sto̱ bali a̱da̱i̱ keete ci een ta̱la̱ke̱c, kar enne ka̱a̱nyu̱ng izet ol cik abunna a̱li̱le̱ ngu̱me̱ cinne, iróng anyakku aruwa.

²³ Abarik abunna ming aalnannu tu̱we̱nte̱ cunno̱ng, abilnnu ṯop, ma ungneku kaviyak cik abunna arikku niga zi̱nze̱tti̱ ko̱. E̱e̱ggi̱n ne̱ko̱ kaviyak cik abunna iziktu niga ba̱li̱ye̱, uwaktozik ol do̱o̱k lo̱o̱ta̱ ngatu. Ke̱e̱ni̱ zin anna Pa̱u̱lo̱ du̱ca̱i̱t ci ka̱li̱ngli̱ngi̱ li̱ngli̱ngo̱n ci kaviyak ne̱ke̱.

I̱li̱ngli̱nge̱k Pa̱u̱lo̱ Ke̱le̱ci̱a̱

²⁴ I̱yo̱ko̱ zin, katalne anna eci kipira zo̱ze̱ cunno̱ng, eci u̱ce̱zi̱ ci eliye cinanni ko̱, korongi anna kedecak piryanzet bali apirnane Ki̱ri̱sto̱ zo̱ze̱ ci ol wak a̱tu̱we̱.

²⁵ Kiize anna du̱ca̱i̱t ci ol wak a̱tu̱we̱ eci Ta̱mu̱ta̱dde̱n atahala annita, kar kaanya li̱ngli̱ngo̱n necu kar ku̱du̱wa̱u̱ng zoz cinne do̱o̱k.

²⁶ A̱lu̱ngnye̱ ba̱li̱ye̱ zoz ci Ta̱mu̱ta̱dde̱no̱ e̱rki̱nya̱ cik meelek giir bu̱u̱llo̱k ki bu̱u̱llo̱k, imma i̱yo̱ko̱ i̱ye̱lto̱zi̱k ol cik Ta̱mu̱ta̱dde̱no̱ wak a̱tu̱we̱.

²⁷ Ogon Ta̱mu̱ta̱dde̱n niko eci enne orong ki̱ye̱le̱k ol wak iróng een Ya̱u̱d zoz cinne a̱lu̱ngnye̱ ko̱, nonno ci een Ki̱ri̱sto̱ ci abak ngatinno̱ng, nonno ci karike naga zi̱nze̱tti̱ kar kurubta di̱ngdi̱ngo̱n ci Ta̱mu̱ta̱dde̱no̱.

²⁸ Kuwaheka zin naga ol zoz ci Ki̱ri̱sto̱, ki̱lo̱tta̱ ol kar bo̱do̱k kedemezta nogo kaal cik aanyik nogo genyiz, kar atin ol cik meelek ka̱gga̱c Ta̱mu̱ta̱dde̱n ju̱rru̱m zo̱ze̱ ci Ki̱ri̱sto̱.

²⁹ Kar atin zoz necu ku̱tu̱gu̱we̱, kokko anna kapirna, kar ki̱li̱ngli̱ng oroot doize ci aanya enne annita.