Kananet 7 - Tennet

Tawan

¹ U̱du̱wa̱k zin Manyi Nowa, izek ne, “Oot i̱nna̱ ki ollunne do̱o̱k i̱ba̱ ecito, ma̱rri̱t kicina anna e̱e̱ni̱ i̱nna̱ e̱e̱t ci abunna bu̱u̱le̱ cu oroot.

² Dima elegje turgerem cik a̱zi̱ze̱ agano ming apahek Manyi, cik macik ki cik nga̱a̱ye̱k, ki elegje cik ngoronyik ko̱ rama rama cik nga̱a̱ye̱k ki cik macik.

³ Kar zin bo̱do̱k dima iballi rama lak turgerem, cik macik ki cik nga̱a̱ye̱k. Tu̱gu̱ niko kar atin iballi bu̱k kabaito todowai.

⁴ Izeto zar i̱i̱nya̱ cik anyigzai turgerem niko kar atin anna kanyik ta̱mu̱ kiṯil wazinnok ki ba̱a̱li̱nno̱k moten we̱c kar kiditai kaala ne̱k balik keenycak anna lo̱o̱c ko̱.”

⁵ Izik zin Nowa zoz ci Manyi, u̱tu̱gu̱ zin kaal balik i̱lo̱ti̱k enne nonno ke̱ do̱o̱k.

⁶ Izeto da̱ e̱rki̱to̱wa̱ cik Nowa obet torkonom (600) baling a̱bu̱ng tawani lo̱o̱c ke̱.

⁷ I̱tto̱zzo̱ Nowa ki ngaa wainne ki logoz waginnek ki ngaai wagge̱k i̱bo̱ kar ki̱vi̱re̱t tawan.

⁸ Anyaktta elegje cik nga̱a̱ye̱k ki cik macik rama rama wak a̱zi̱ze̱ ki cik ngoronyik, iballi ki ngazengaze bu̱k,

⁹ i̱vi̱tta̱k zin nege Nowa kar ki̱tto̱zo̱ i̱bo̱ ki bali ming a̱du̱wa̱k Ta̱mu̱ta̱dde̱n nonno ke̱.

¹⁰ Ma baling utubte i̱i̱nya̱ balik een turgerem a̱du̱wa̱ Manyi ke̱, i̱ri̱yya̱ zin tawani.

¹¹ Ma̱i̱je̱ i̱i̱te̱ne̱ wa een omoto ki turgerem nye̱lo̱we̱ wa een e̱rki̱ta̱ rama, izeto da̱ Nowa e̱rki̱to̱wa̱ obet torkonom (600), baling abbize tawani lo̱o̱c.

¹² Aṯile ta̱mu̱ a̱ddu̱ta̱i̱ maama wazinnok moten we̱c ki ba̱a̱li̱nno̱k moten we̱c.

¹³ Ma̱i̱je̱ i̱i̱te̱n neci i̱tto̱zzo̱ Nowa ki logoz waginnek Shem ki Ham ki Japheth ki ngaa wainne ki ngaai cik logoz ne̱k e̱e̱ggi̱n i̱i̱yo̱ ko̱ do̱o̱k i̱bo̱.

¹⁴ O̱o̱tte̱ i̱ba̱ bu̱k elegje cik zarak cik macik ki cik nga̱a̱ye̱k, ki cik o̱rgu̱, ngazengaze do̱o̱k ki iballi veelek, ki kaal wak a̱ku̱l bu̱k.

¹⁵ I̱vi̱tta̱k zin elegje ne̱k aruge lo̱o̱ta̱ do̱o̱k Nowa kar ki̱tto̱zzo̱ i̱bo̱ rama rama ci nga̱a̱ye̱ ki ci maci.

¹⁶ E̱e̱ggi̱n elegje cik i̱i̱zo̱ ko̱ cik macik ki cik nga̱a̱ye̱k kaale cik aruge ko̱ do̱o̱k, ki baling oobek Ta̱mu̱ta̱dde̱n Nowa ke̱. Unyugek zin Manyi nogo i̱bo̱ ecito.

¹⁷ Itil zin ta̱mu̱ i̱i̱nya̱ moten we̱c, ma̱i̱je̱ tawani otorye zee katakuza lo̱o̱c do̱o̱k, kodongek i̱bo̱ ta̱dde̱n.

¹⁸ Otorye maama bak odong i̱bo̱ katavane maame ta̱dde̱na̱.

¹⁹ A̱ri̱yo̱ni̱k maama lo̱o̱c zee ku̱bu̱ng biyen wak u̱u̱ntti̱k lo̱o̱ta̱ ko̱ do̱o̱k.

²⁰ Otorye maama ku̱bu̱nge̱t biyen kize ucca u̱u̱nze̱ta̱ do̱ caazzok moten ram ki u̱gge̱ bu̱k.

²¹ Iditai kaala wak da̱ aruge lo̱o̱ta̱ ne veelek, iballi, kaal wak kabal ki wak zarak, ngazengaze ki ol cik diirik bu̱k.

²² A̱da̱i̱to̱ kaala ne̱k aruge lo̱o̱ta̱ ko̱ do̱o̱k ne lai,

²³ e̱e̱t ci diiri ki elegje, ngazengaze ki iballi ne̱k a̱ku̱l ta̱mu̱-kenga ko̱ do̱o̱k. Ovvo cik anyigzai, Nowa ki ollinne ki kaal balik aavtte ki nonno i̱ba̱ ke̱ do̱.

²⁴ Atangwei tawani lo̱o̱c i̱i̱nya̱ cik een o̱bo̱n co̱de̱ ki moten tu̱r (150).