Kananet 6 - Tennet

Tawan wa edeze Ta̱mu̱ta̱dde̱n ol cik mu̱nye̱nu̱

¹ Baling i̱ti̱rre̱t ol cik diirik lo̱o̱ta̱ izeto meele, i̱ti̱rrtta̱ da̱ ol dooli cik nga̱a̱ye̱k bu̱k.

² Ma̱i̱je̱ logoz cik Ta̱mu̱ta̱dde̱no̱, edenyca buuwecci ne̱k lo̱o̱ta̱ ke̱ ming a̱zi̱ze̱, i̱vi̱ta̱ zin nege i̱ti̱yye̱t buuwecci wak orong nege.

³ Ize zin Manyi ne, “Iróng Vongizi cinanne atin adang e̱e̱t ci diiri udut, eci enne een daizoit; abak atin enne e̱rki̱nya̱ o̱bo̱n co̱de̱ ki moten ram (120).”

⁴ Ming ovvo logoz cik Ta̱mu̱ta̱dde̱no̱ aruco ki dooli cik ol cik diirik, kar ki̱ti̱rrtta̱ dooli cik e̱e̱ggi̱n baraknyya. E̱e̱ggi̱n nege ol cik illau cik e̱rki̱to̱k ne̱ke̱, ikebje zoz cinne̱ng.

⁵ Baling icin Manyi ol lo̱o̱ta̱ izeto gerze, i̱no̱ni̱t nege odohize zi̱nze̱tti̱nne̱ do̱o̱k kaal cik gerzek.

⁶ U̱u̱c zin zinin ci Manyi, kar enne ki̱no̱n kize ne, iróng weda enne keenyca e̱e̱t ci diiri kar zin kanyik kabak lo̱o̱ta̱.

⁷ Kar zin Manyi kize ne, “Kadita atin anna e̱e̱t ci diiri, bali keenyca anna ke̱ ne lai, ki elegje ki iballi bu̱k, ka̱bu̱ri̱ nong ngati keenycane nogo.”

⁸ Abarik Manyi atali ba̱li̱ye̱ Nowa do̱ niko.

⁹ Een zin cu zoz ci a̱du̱wa̱ baiz ci obod ki Nowa. Een da̱ enne e̱e̱t ci abunna olle balik abak ki nonno e̱rki̱to̱we̱ ne̱ke̱. Owowo enne ba̱li̱ye̱ ki Ta̱mu̱ta̱dde̱n.

¹⁰ Anyak Nowa logoz i̱i̱yo̱ cik azi zara cigge̱k ne, Shem, ki Ham ki Japheth.

¹¹ Gerza da̱ looci do̱o̱k ngu̱me̱ ci Ta̱mu̱ta̱dde̱no̱ kar ol kanyait jo̱o̱re̱t oroot.

¹² Icin Ta̱mu̱ta̱dde̱n niko ming izeto ol gerze lo̱o̱ta̱ do̱o̱k.

¹³ Iizek zin Ta̱mu̱ta̱dde̱n Nowa ne, “Kokko anna kadita ol lo̱o̱ta̱ veelek, ma̱rri̱t looci abbize kaala cik gerzek zo̱ze̱ cinne̱ng. Kodola anna kokko la̱du̱n kadita ol ki kaal ne̱k lo̱o̱ta̱ ko̱ bu̱k.

¹⁴ Diman i̱bo̱ keene cik okkomi kak kar ke̱le̱zzo̱ ki i̱nne̱t ki dooli, kar zin nger kanyak ce̱e̱zi̱ do̱ do̱, kar zin di̱i̱l imaduwa ecito ki eci bo̱i̱co̱ bu̱k.

¹⁵ Icu gool ci okko i̱nna̱ adimane i̱bo̱ neci ke̱te̱: Diman u̱u̱nze̱t ci a̱li̱te̱ kize caazzok obet we̱c ki moten tu̱r (450), okko walwaliten een caazzok moten turgerem ki tu̱r, kar zin kengato ngati abilne kize caazzok moten we̱c ki tu̱r.

¹⁶ Ruvan i̱bo̱ ju̱rru̱m kar tungek bobor ci anyak cazzok rama ta̱dde̱na̱ ki di̱la̱t. Anyik i̱bo̱ kanyak leleti i̱i̱yo̱ ta̱dde̱na̱ kar arik tatug o̱to̱n co̱de̱.

¹⁷ Kokko atin anna kowak tawan lo̱o̱c kidita kaal ne̱k aruge todowai ko̱ do̱o̱k. Aditai atin kaala ne̱k aruge todowai ko̱ ne veelek.

¹⁸ Ma̱i̱je̱ atin anna kokko atin kadimani olom cinanni ki i̱nne̱ta̱, i̱i̱zo̱ atin i̱nna̱ ki ngaa cunne ki logoz cigunnek ki alawanet do̱o̱k i̱bo̱.

¹⁹ Okkoye atin i̱nna̱ i̱bo̱wa̱ ki elegje ne̱k aruge ko̱ do̱o̱k cik e̱e̱ggi̱n rama rama, ci maci ki ci nga̱a̱ye̱ kar nege bu̱k kuruget ki i̱nne̱ta̱.

²⁰ Bite iballi guulnya do̱o̱k rama rama, ki elegje ki kaal cik aruge abak lo̱o̱ta̱ ngatu ko̱ do̱o̱k kar nege bu̱k kuruget.

²¹ Dima da̱i̱ne̱t ne̱k adak ol ki elegje ko̱ do̱o̱k, i̱ta̱ng u̱gge̱ kize ja̱mi̱te̱n cik ovvo atin adakku.”

²² U̱tu̱gu̱ zin Nowa kaal ne̱ke̱ ki baling u̱du̱wa̱k Ta̱mu̱ta̱dde̱n nonno ke̱.