Kananet 41 - Tennet

Onoze Alaani

¹ Baling e̱de̱cca̱ nege e̱rki̱nya̱ rama, onoze alaani ci Masiro: Abile da̱ enne ti̱ti̱me̱ ci liil ci een Nail,

² baling aave enne mora i̱vi̱ta̱ tiina cik een turgerem adiye a̱zi̱ze̱, kar kegec yaya moro ti̱ti̱ma̱.

³ Imma zin vu̱rrte̱ cinne̱ng, iyokta zin bo̱do̱k tiina uggak Naila cik e̱e̱ggi̱n turgerem, orobok gerzet, kar zin kibilet abanyce ci tiin cik aavtte ti̱ti̱ma̱ ko̱.

⁴ Kar tiina balik orobok een turgerem ko̱ kadait tiin cik een turgerem adiye a̱zi̱ze̱ ko̱ do̱o̱k. Itinga zin alaani ungnyahe.

⁵ A̱gga̱mi̱t zin ungnyaha nonno bo̱do̱k kar konoze lak rama: Acin o̱no̱zo̱we̱ ne̱ke̱ labitot ci ingazi kar kanyak o̱o̱tti̱ turgerem, alize ju̱rru̱m tabarece co̱de̱.

⁶ Imma vu̱rrte̱ cinne̱ng, iyowa bo̱do̱k labitot ci anyak o̱o̱tti̱ turgerem, iróng alize ju̱rru̱m, ovoc koor ci je̱e̱no̱.

⁷ Ovvo zin o̱o̱tti̱ cik labitot ci mordotik a̱ku̱k labitot ci anyak o̱o̱tti̱ turgerem alize ju̱rru̱m ko̱. Itinga zin bo̱do̱k alaani ungnyahe; kar zin enne ka̱gga̱ vu̱rrta̱ ming e̱e̱ggi̱n ne̱ko̱ o̱no̱zzo̱k.

⁸ Imma nge̱rre̱ti̱n ci reng, a̱ma̱li̱le̱ oo cinne o̱no̱zo̱we̱ ne̱ko̱, i̱tto̱n zin enne zoz kuk ngati ngaretu ki ol cik anyak arizet Masire do̱o̱k. U̱du̱wa̱k zin alaani nogo o̱no̱zzo̱k ciginnek, ma̱i̱je̱ ngatu i̱llo̱i̱ e̱e̱t imma ci a̱du̱wa̱k nonno u̱nge̱tti̱ cik o̱no̱zzo̱k ne̱ko̱.

⁹ Kar zin ddi̱ki̱ryo̱i̱ti̱ ci gon a̱gga̱m uduc ci alaano a̱nne̱k nonno ne, “I̱yo̱ko̱ ki̱no̱na̱ zo̱zzo̱k cik kabaca anna.

¹⁰ Abure bali i̱i̱te̱n imma alaani nong oroot ngati du̱cca̱k ciginnek, kar enne ku̱ju̱ke̱ya̱ annit lagam ki ddi̱ki̱ryo̱i̱t wagon aak da̱i̱ne̱t ce̱e̱ze̱ ci ddi̱ki̱ryo̱i̱t ci ol wak ebekce ko̱.

¹¹ Kanyakka ba̱li̱ye̱ ba̱a̱li̱n imma ngenngene o̱no̱zzo̱k cik aavtte do̱ do̱.

¹² Aave bali lo̱gu̱t imma cidici ci a̱kku̱ olle wak e̱e̱ggi̱n I̱bu̱ru̱ ko̱ ki agit lagama, een enne du̱ca̱i̱t ci a̱li̱ngli̱ngngo̱ni̱k ddi̱ki̱ryo̱i̱t ci lagamo. Ku̱du̱kta̱ zin naga nonno o̱no̱zzo̱k cigga̱k, kar zin enne ku̱du̱wa̱i̱t u̱nge̱tti̱ cik o̱no̱zzo̱k ne̱ke̱ ju̱rru̱m.

¹³ I̱vi̱ta̱ zin kaala ne̱ke̱ u̱tu̱gu̱zzo̱ ki baling a̱du̱wa̱kke̱t enne ke̱: Kobodoziya anna li̱ngli̱ngo̱n cinanni, okko du̱ca̱i̱ti̱ co̱de̱ ko̱ adal ol ka̱da̱k.”

¹⁴ I̱tto̱n zin alaani ol koot kanyakta Yosevo, anyaktta zin ol nonno lagama ataman. Baling odot enne oo kar zin kuburucek ru̱u̱ma̱ni̱ cik abunna, i̱ki̱ya̱k zin enne alaan.

¹⁵ A̱nne̱k zin alaani Yosevo ne, “Konoze anna ba̱li̱ye̱, kar i̱llo̱i̱ zin da̱ e̱e̱t imma ci a̱du̱wa̱ u̱nge̱tti̱ cik o̱no̱zzo̱k ne̱ke̱. Abarik kiziya zoz cunne azi ne ming iziyu i̱nna̱ o̱no̱zzo̱k a̱du̱wa̱ i̱nna̱ u̱nge̱tti̱ cik o̱no̱zzo̱k ne̱ke̱ do̱o̱k.”

¹⁶ O̱bo̱de̱k zin Yosevo alaan, “Iróng anna kogonni, abarik aanya atin Ta̱mu̱ta̱dde̱n u̱nge̱tti̱ cik orong alaani.”

¹⁷ Izek zin alaani Yosevo ne, “Konoze anna ba̱li̱ye̱ ming kabili liile ci een Nail ti̱ti̱ma̱,

¹⁸ iyokta zin liila tiina cik e̱e̱ggi̱n turgerem adiye ki̱zi̱ze̱c, kar zin ki̱vi̱ta̱ kegec yaya.

¹⁹ Imma vu̱rrte̱ cinne̱ng, iyokta zin bo̱do̱k liila tiina cik e̱e̱ggi̱n turgerem akaran oroot, tiin cik amati oroot. Ngen anna kumuda tiin cik atubo ki ne̱ko̱ lo̱o̱ce̱ ci Masiro.

²⁰ Adait zin tiina ne̱k orobok akaran ko̱ tiin ne̱k e̱e̱ggi̱n turgerem adiye balik iyowa oowa ke̱.

²¹ Ma̱i̱je̱ baling adait nege tiin ne̱ke̱, iróng wo̱ye̱ e̱e̱ti̱ imma a̱du̱wa̱ ming adait nege gonoggi; ngen nege akaran dee niko ki ba̱li̱ye̱. Kitinga zin anna ungnyahe niko.

²² “Anyak bo̱do̱k o̱no̱zzo̱k u̱gge̱ dee, kacinni labitot ci anyak o̱o̱tti̱ turgerem, a̱bbi̱rna̱ ju̱rru̱m tabarece co̱de̱.

²³ Imma vu̱rrte̱ cinne̱ng, i̱ti̱li̱zza̱ zin o̱o̱tti̱ cik labinu uggak cik e̱e̱ggi̱n turgerem, e̱e̱ggi̱n bo̱do̱k lodidi cik da̱ ogora koor ci je̱e̱ni̱.

²⁴ U̱ku̱we̱t zin labina ne̱k e̱e̱ggi̱n lodidi ko̱ labi cik anyak o̱o̱tti̱ ju̱rru̱m ko̱. Ku̱du̱wa̱ha̱ zin anna o̱no̱zzo̱k ne̱ke̱ ngarret, i̱llo̱i̱ zin bu̱k e̱e̱t imma ci a̱du̱wa̱ka̱ u̱nge̱tti̱ cik o̱no̱zzo̱k ne̱ke̱.”

²⁵ Izek zin Yosevo alaan ne, “O̱de̱ zoz ci o̱no̱zzo̱k cigunnek ko̱ veelek kar bo̱do̱k kutubto. I̱ye̱le̱k Ta̱mu̱ta̱dde̱n alaan gi̱i̱ ci atin okko enne ogoni.

²⁶ E̱e̱ggi̱n tiina cik adiye e̱e̱ggi̱n turgerem ko̱ e̱rki̱nya̱ turgerem, ovvo o̱o̱tti̱ cik labinu abunna ko̱ e̱e̱ggi̱n turgerem ko̱, e̱e̱ggi̱n e̱rki̱nya̱ turgerem bu̱k, een o̱no̱zi̱ co̱de̱ kar bo̱do̱k kutubto.

²⁷ Ovvo zin tiina cik akaran e̱e̱ggi̱n turgerem ko̱ cik ovvo a̱vvu̱ vu̱rrta̱ ko̱ e̱e̱ggi̱n e̱rki̱nya̱ turgerem, kar labitot ci anyak o̱o̱tti̱ turgerem een lodidi ko̱ ovoc koor ci je̱e̱ni̱ ko̱: E̱e̱ggi̱n ne̱ko̱ e̱rki̱nya̱ turgerem cik anyahe looci magiz.

²⁸ “Ogon ki ming ka̱du̱wa̱k anna alaan: I̱ye̱le̱k Ta̱mu̱ta̱dde̱n nonno gi̱i̱ ci okko atin enne ogonni.

²⁹ Anyari atin ol oroot lo̱o̱ce̱ ci Masiro do̱o̱k e̱rki̱to̱k turgerem,

³⁰ ma̱i̱je̱ ngatu ovvo e̱rki̱to̱wa̱ turgerem cik magizak annu ne̱ko̱. Kar atin ol cik lo̱o̱c ci Masiro do̱o̱k kerektek e̱rki̱nya̱ balik anyahe nege da̱i̱ne̱t oroot ke̱, kar atin magiz kegerzan lo̱o̱c.

³¹ Iróng atin ol a̱a̱da̱ e̱rki̱to̱k balik anyarne nege ke̱, eci magiz ci atin a̱kku̱ ko̱ gerza oroot.

³² Okko zoz ci anyonike alaan o̱no̱zzo̱wa̱ go̱o̱lo̱we̱ cik een rama eci Ta̱mu̱ta̱dde̱n odola zoz cinne, kar okko atin Ta̱mu̱ta̱dde̱n ogon kaal ne̱ke̱ ataman.

³³ “Kar i̱yo̱ko̱ anyik alaan kicin e̱e̱t ci egenyi kar kaanyik nonno kize ddi̱ki̱ryo̱i̱t ci a̱gga̱m kaal lo̱o̱ce̱ ci Masiro.

³⁴ Anyik alaan ka̱gga̱ma̱ lo̱ddi̱ki̱re̱ cik ovvo aluta labi u̱gge̱ cikidik Masira e̱rki̱nya̱i̱ cik een turgerem anyarne ol ko̱.

³⁵ Anyik nogo ku̱lu̱tta̱ labi cik e̱rki̱nya̱ cik anyarne looci ko̱ kar kaartik de̱he̱rwa̱ cik a̱ddi̱ki̱re̱, azunne ol o̱ro̱gjo̱we̱.

³⁶ Een atin da̱i̱ne̱t ne̱ko̱ cik arike ol kize ja̱mi̱te̱n cik ovvo atin ol adak e̱rki̱nya̱i̱ ne̱k een turgerem magizak atin i̱i̱na̱k Masir, kar atin iróng magiz egerzan lo̱o̱c ci Masiro.”

³⁷ Abunna zoz necu ngati alaano ki lo̱ddi̱ki̱re̱ wak a̱li̱ngli̱ng ki nonno.

³⁸ I̱jji̱n zin alaani nogo, “Karuba wo̱ye̱ naga e̱e̱t imma ci abunna anyak genyiz, e̱e̱t ci anyak vongiz ci Ta̱mu̱ta̱dde̱no̱?”

³⁹ Izek zin alaani Yosevo ne, “Eci Ta̱mu̱ta̱dde̱n i̱ye̱le̱i̱ i̱nne̱t kaal ne̱ko̱ do̱o̱k, i̱llo̱i̱ zin e̱e̱t imma ci abunna egenyi ki i̱yo̱ko̱ i̱nna̱ ko̱.

⁴⁰ Abunna i̱nna̱ ming e̱e̱ni̱ ddi̱ki̱ryo̱i̱t ci ce̱e̱z cinanni, anyik ol cigannik do̱o̱k ko̱to̱ngo̱o̱ltte̱ zoz cunne. Eci zo̱ze̱ ci ko̱ngo̱o̱li̱ne̱ naga lecer ci alaano, annit do̱ niko ci ke̱e̱ni̱ alaan ci a̱ddi̱ki̱re̱ ngatunne do̱ niko.”

Ize Yosevo ddi̱ki̱ryo̱i̱t Masire

⁴¹ Izek zin alaani Yosevo ne, “Kaanyi ize ddi̱ki̱ryo̱i̱t ci lo̱o̱c ci Masiro do̱o̱k.”

⁴² Idima zin alaani zi̱i̱t wainne ci da̱ aburuc enne vallakta eheronik zara ciginnek kar zin kuburucek Yosevo va̱lla̱i̱t. Uburucehe bo̱do̱k ru̱u̱ma̱ni̱ cik a̱zi̱ze̱ kar zin bo̱do̱k kaarik nonno zu̱rte̱ni̱t ci een dhahab elem cinne.

⁴³ Aanyik enne Yosevo kottod toromile wa annu cinne a̱gu̱ru̱t vartange ko̱, anyike kize ddi̱ki̱ryo̱i̱t ci anuwonik nonno, kar ol kegerenyit o̱o̱we̱ cinne, “Eenyekte goola!” Anyik zin alaani nonno kize ddi̱ki̱ryo̱i̱t lo̱o̱ce̱ ci Masiro do̱o̱k.

⁴⁴ Izek zin alaani Yosevo ne, “Ke̱e̱ni̱ anna alaan, ma̱i̱je̱ ming ngen i̱nna̱ du̱wa̱ zoz cunne, i̱llo̱i̱ e̱e̱t imma ci odong a̱zzi̱t icima zoc Masire do̱o̱k.”

⁴⁵ Akatek zin alaani Yosevo zar cik een Zaphenath-Paneah kar kaanyik nonno bo̱do̱k ki̱ti̱k do̱le̱c ci azi zar ne Asenath, buweenyi e̱e̱t ci een Potiphera, e̱e̱t ci wawaco o̱rge̱ ci een On. Kar zin Yosevo ka̱lu̱c lo̱o̱c ci Masiro do̱o̱k.

⁴⁶ Anyak bali Yosevo e̱rki̱nya̱ moten i̱i̱yo̱ e̱rki̱te̱ bali i̱zo̱we̱ enne li̱ngli̱ngo̱n ci alaano Masire. Uk zin Yosevo otowe lo̱o̱c ci Masiro do̱o̱k.

⁴⁷ Imma e̱rki̱nya̱i̱ cik e̱e̱ggi̱n turgerem ko̱, i̱bbi̱r ma̱na̱ ju̱rru̱m.

⁴⁸ Uluta zin Yosevo labi cik a̱bbi̱re̱ e̱rki̱nya̱i̱ cik een turgerem anyarne ol Masire ko̱ kar kadazek de̱he̱rwa̱ o̱ro̱gjo̱we̱ wak a̱ddi̱ki̱re̱. Aluta labi cik eevyai ma̱ne̱ne̱ o̱ro̱gjo̱we̱ cik Masiro ojono ki ma̱ne̱n ke̱.

⁴⁹ Adaza Yosevo labi cik meelek giir, u̱tu̱gu̱zzo̱ kiwagon azac ci li̱i̱lu̱; meele da̱ labina ne̱ke̱ oroot iróng enne ngen uule kar keteherek lo̱o̱c.

⁵⁰ Baling ngen e̱rki̱nya̱ wak magizak ki̱vi̱ta̱, i̱ti̱rra̱ zin ngaa ci Yosevo ci een Asenath logoz ram, een enne buweenyi Potiphera e̱e̱t ci wawaco o̱rge̱ ci een On.

⁵¹ Akatek zin Yosevo zar cik ngerinne wa een a̱bu̱ ko̱ kize Manasseh eci azi ne, “Aanya Ta̱mu̱ta̱dde̱n kereheya matizi cinanni ki ol cik ce̱e̱z ci baba veelek.”

⁵² Akatek zin Yosevo ngerinne wa annu a̱bu̱ ko̱ kize Ephraim, eci azi ne, “Aanya meer bo̱do̱k Ta̱mu̱ta̱dde̱n ki̱ti̱rra̱ dooli lo̱o̱ce̱ ci kanyahe anna piryanzet ko̱.”

⁵³ Edeccai zin e̱rki̱to̱wa̱ balik e̱e̱ggi̱n turgerem anyarne ol Masire ke̱,

⁵⁴ kar zin e̱rki̱nya̱ cik bo̱do̱k e̱e̱ggi̱n turgerem magizak kakate ki baling a̱du̱wa̱ Yosevo ke̱. Anyak zin ba̱li̱ye̱ looci do̱o̱k magiz, ma̱i̱je̱ lo̱o̱ce̱ ci Masiro anyak da̱i̱ne̱t.

⁵⁵ Baling adak magiz lo̱o̱c ci Masiro do̱o̱k, u̱tu̱lu̱ze̱k ol alaan orongit da̱i̱ne̱t. U̱du̱wa̱k zin enne olli Masiro do̱o̱k zoz cu, “Oot ngati Yosevo kar u̱tu̱gu̱z gi̱i̱ ci a̱du̱wa̱kku̱ng enne.”

⁵⁶ Baling iddera magiz Masir do̱o̱k, oo zin Yosevo de̱he̱rwa̱ kar zin kutuwek ol cik Masiro labi, eci magiz ize bali gerza ngati olli Masiro.

⁵⁷ I̱vi̱tta̱k zin ol cik lo̱o̱cco̱k u̱gge̱ do̱o̱k Masire orongit ki̱vi̱ta̱ ku̱tu̱yya̱ labi ngati Yosevo, eci magiz ize gerza lo̱o̱c do̱o̱k.