Kananet 40 - Tennet

E̱e̱t ci a̱gga̱m uduc ki du̱ca̱i̱t ci aak da̱i̱ne̱t cik alaano

¹ Imma da̱ i̱i̱te̱n imma, abac du̱ca̱i̱ti̱ ci a̱gga̱m uduc ci alaano ko̱ ki du̱ca̱i̱t ci aak da̱i̱ne̱t cik alaano ngati ddi̱ki̱ryo̱i̱t cinne̱ng, alaan ci Masiro.

² Omoze zin alaani ngati ol ne̱k a̱li̱ngli̱ng ki nonno ko̱ oroot, ddi̱ki̱ryo̱i̱t wa a̱gga̱m uduc ki ddi̱ki̱ryo̱i̱t wa aak da̱i̱ne̱t,

³ kar zin keceb nogo lagama ce̱e̱ze̱ ci ddi̱ki̱ryo̱i̱t ci ol wak ebekce ko̱, ngati e̱ce̱bi̱ne̱ Yosevo ko̱ bu̱k.

⁴ Aanyik zin ddi̱ki̱ryo̱i̱ti̱ ci ebek ol ko̱ Yosevo kize ci azunne enne nogo lagama. Baling a̱vvu̱to̱ nege lagama i̱i̱nya̱ u̱gge̱,

⁵ onozte zin ol ne̱k e̱e̱ggi̱n rama balik a̱li̱ngli̱ng ngati alaan ci Masiro ko̱ do̱o̱k ba̱a̱li̱n co̱de̱, kar u̱nge̱tti̱ cik o̱no̱zzo̱k cigge̱k ka̱vvu̱to̱ do̱ do̱.

⁶ Baling okko Yosevo a̱kku̱na̱k nogo nge̱rre̱ti̱n ci reng, amuda nogo do̱o̱k ming a̱ma̱li̱ltte̱ o̱o̱tti̱.

⁷ I̱jji̱n zin enne ddi̱ki̱ryyo̱k cik alaano balik aavtte lagama ki nonno, a̱nne̱k ne, “Nya ming angarunyanu ngu̱mti̱ ciggo̱k ko̱?”

⁸ Abariztek nege Yosevo, “Konoztewa naga do̱o̱k, i̱llo̱i̱ zin e̱e̱t imma ci kar ku̱du̱wa̱i̱t agit u̱nge̱tti̱ cik o̱no̱zzo̱k ne̱ko̱.” O̱bo̱de̱k zin Yosevo nogo, a̱nne̱k ne, “Iróng u̱nge̱tti̱ cik o̱no̱zzo̱k ne̱ke̱ a̱gga̱ Ta̱mu̱ta̱dde̱n? U̱du̱kta̱ng da̱ o̱no̱zzo̱k.”

⁹ U̱du̱wa̱k zin ddi̱ki̱ryo̱i̱ti̱ wa a̱gga̱m uduc ci alaano ko̱ o̱no̱zzo̱k ciginnek Yosevo. A̱nne̱k nonno ne, “Okko o̱no̱zo̱we̱ cigannik kacinni keet ci een vi̱no̱ ming aave ngu̱me̱ cinanni,

¹⁰ kar keet neci anyak alawo i̱i̱yo̱. Baling okko keet neci a̱bbu̱ru̱ti̱ abarik ataman niko i̱bbi̱re̱to̱ o̱ya̱u̱ ciginnek.

¹¹ Aave da̱ uduci ci alaano a̱tte̱ cinanni, kar anna kidiman o̱ya̱u̱ cik keet neci, kamacuwak maam cigge̱k uduc kar anna karik a̱zzi̱t cinne.”

¹² Izek zin Yosevo nonno ne, “Icu u̱nge̱tti̱ cik o̱no̱zzo̱k ne̱ke̱. E̱e̱ggi̱n alawo cik een i̱i̱yo̱ ko̱ gwo̱o̱nya̱ cik een i̱i̱yo̱.

¹³ Okko zin gwo̱o̱nya̱we̱ cik een i̱i̱yo̱ ko̱ alaani oogani lagama kar kobodei li̱ngli̱ngo̱n cunne, kar atin i̱nna̱ arik uduc a̱zzi̱t ci alaano, ki ba̱li̱ye̱ a̱li̱ngli̱ngo̱ni̱k i̱nna̱ nonno ke̱.

¹⁴ Ma̱i̱je̱ ming ovvo kaala do̱o̱k ju̱rru̱m ngatunne, abunna ming a̱a̱dda̱na̱ kar ye̱le̱ka̱ bunnat cunne; du̱wa̱k bai zoz cinanni alaan kar karawa annit lagama.

¹⁵ Eci odongana ol annit ba̱li̱ye̱ i̱ba̱ti̱ne̱ lo̱o̱ce̱ ci olli I̱bu̱ru̱, imma ngatu ngen anna ku̱tu̱gu̱ gi̱i̱ ci gerze kar wo̱ye̱ kecebe lagama.”

¹⁶ Baling icin e̱e̱ti̱ wa aahonik alaan ko̱ Yosevo ming oobek gooni u̱nge̱tti̱ cik o̱no̱zzo̱k ciginnek ko̱ ju̱rru̱m, u̱du̱wa̱k zin enne bo̱do̱k Yosevo o̱no̱zzo̱k ciginnek a̱nne̱k ne “Konoze ba̱li̱ye̱ anna bu̱k: Kanyai anna oowe cinanni dho̱ngkwe̱t i̱i̱yo̱ cik anyak umunet.

¹⁷ Imma dho̱ngku̱ ta̱dde̱na̱ anyak umunet cik abunna alaano, ma̱i̱je̱ iballi adak umunet ne̱ke̱ oowe cinanni.”

¹⁸ A̱nne̱k zin Yosevo nonno ne, “Icu u̱nge̱tti̱ cik o̱no̱zzo̱k cigunnek, e̱e̱ggi̱n dho̱ngkwe̱tta̱ cik een i̱i̱yo̱ ko̱ gwo̱o̱nya̱ cik een i̱i̱yo̱.

¹⁹ Imma gwo̱o̱nya̱we̱ cik een i̱i̱yo̱ oogani atin alaani i̱nne̱t lagama kar kadalin ki̱ri̱me̱ ele cunne keeta. Kar atin iballi kadait ele cunne.”

²⁰ I̱yo̱ko̱ een da̱ i̱i̱te̱ni̱ ci een i̱i̱yo̱ ko̱ i̱i̱te̱n ci adahe ol aadane i̱i̱te̱n bali a̱rri̱ta̱ne̱ alaani, kar enne kaanyik ol ciginnek do̱o̱k kadait kwo̱o̱r. Ooga zin enne lagama ddi̱ki̱ryo̱i̱t bali a̱gga̱m uduc cinne ki ddi̱ki̱ryo̱i̱t bali aahonik nonno ke̱:

²¹ o̱bo̱de̱k zin alaani ddi̱ki̱ryo̱i̱t bali gon a̱gga̱m uduc cinne ke̱ li̱ngli̱ngo̱n, kar gon enne bo̱do̱k kaarik uduc a̱zzi̱t ci alaano,

²² adal zin enne ddi̱ki̱ryo̱i̱t wa bali aahonik nonno ke̱ kar zin ki̱ri̱me̱k ele cinne keet, ki baling oobek Yosevo nonno o̱no̱zzo̱k ciginnek ke̱.

²³ Iróng zin ddi̱ki̱ryo̱i̱ti̱ wagon anyahak alaan uduc ko̱ a̱a̱da̱ Yosevo zo̱ze̱ bali a̱du̱wa̱k enne nonno ke̱.