Kananet 39 - Tennet

Yosevo ki ngaa ci Potiphar

¹ O̱o̱tte̱ zin bali ol cik Ismaili Yosevo ki nogo rok Masir kar ku̱tu̱yye̱k nonno Potiphar, ddi̱ki̱ryo̱i̱t ci a̱li̱ngli̱ng ebek ce̱e̱z ci alaano.

² Aave da̱ Manyi ki Yosevo kar enne ku̱tu̱gu̱ kaal ju̱rru̱m, kar enne ka̱vvu̱ ce̱e̱ze̱ ci ddi̱ki̱ryo̱i̱t ci Masiro.

³ Baling icin Potiphari aave Manyi ki Yosevo kar gon keela kaale cik ogon enne do̱o̱k,

⁴ irez zin Potiphar Yosevo oroot kar zin ki̱li̱ngli̱nge̱k nonno. Aanyik Potiphar nonno ka̱gga̱m kaal cik ce̱e̱z cinne do̱o̱k.

⁵ Akane i̱i̱te̱ne̱ bali arike enne nonno ka̱gga̱m kaal ce̱e̱ze̱ cinne do̱o̱k, a̱mu̱yu̱k zin Manyi ce̱e̱z ci Potiphar ko̱ zo̱ze̱ ci Yosevo. Okko ma̱yu̱we̱ne̱t ci Manyi kaale cik anyak enne do̱o̱k, ce̱e̱za̱ kar bo̱do̱k ma̱ne̱ne̱.

⁶ Utungek zin kaal cik anyak enne ko̱ do̱o̱k kize cik azunne Yosevo; a̱gga̱m Yosevo kaal do̱o̱k iróng Potiphar ngen edeconike kaal ciginnek kize da̱i̱ne̱t cik adak enne do̱ niko. Een da̱ Yosevo lo̱gu̱t ci alina oroot,

⁷ imma baling edeca enne i̱i̱nya̱ u̱gge̱, i̱ta̱k zinin ci ngaa ci Potiphar Yosevo, kar kizek ne, “I̱jja̱ tangu ki annita!”

⁸ Ma̱i̱je̱ Yosevo abure. Izek zin enne nonno ne, “Ki i̱yo̱ko̱ ming ke̱e̱ni̱ anna ci kazunne ce̱e̱z ci manyi cinanni ko̱, aanya enne annit kicin kaal cik ce̱e̱z cinne do̱o̱k.

⁹ I̱llo̱i̱ e̱e̱t imma ci ommogja annit ce̱e̱ze̱ cu. Aanya ddi̱ki̱ryo̱i̱ti̱ cinanne ka̱gga̱m kaal do̱o̱k ce̱e̱ze̱ cinne, iróng zin anna ke̱e̱ni̱ ddi̱ki̱ryo̱i̱t cunne eci i̱nna̱ e̱e̱ni̱ ngaa cinne. Kogonni wo̱ye̱ anna gi̱i̱ ci gerze ko̱ kar ku̱tu̱gu̱ mu̱nye̱n ngu̱me̱ ci Ta̱mu̱ta̱dde̱no̱?”

¹⁰ Kar ming ozozik enne Yosevo odohize, utubur zin Yosevo zoz ci oronge enne ungnyak ki nonno icima aave ojonun ki nonno.

¹¹ Imma i̱i̱te̱n imma, i̱tto̱ Yosevo ce̱e̱z ci ddi̱ki̱ryo̱i̱t cinne okko a̱li̱ngli̱ng li̱ngli̱ngo̱n kiwagon odohize, i̱llo̱i̱ da̱ du̱cca̱k ca̱a̱to̱.

¹² A̱gga̱m zin ngaa ci ddi̱ki̱ryo̱kto̱ ru̱u̱m ci Yosevo kar kize ne, “Tanguyan!” Imma ngatu, utungek enne ru̱u̱m cinne a̱zzi̱t ci ngaa neci kar ki̱vi̱ra̱ re̱e̱nu̱n ce̱e̱ze̱ neci.

¹³ Baling icin enne utungek Yosevo ru̱u̱m cinne a̱zzi̱t cinne kar ki̱vi̱r uk reena ce̱e̱ze̱ neci,

¹⁴ utu zin enne du̱cca̱k cik ce̱e̱z cinne do̱o̱k kar kizek nogo ne, “Icinnet da̱! Anyakcai e̱e̱ti̱ ci I̱bu̱ru̱ ko̱ abunna okko aminyet agit ngatu. I̱i̱zo̱ ce̱e̱z orong ka̱ta̱ngu̱ya̱ i̱ba̱ti̱ne̱, ma̱i̱je̱ anna ku̱tu̱lu̱ muluwe ci a̱ppwe̱.

¹⁵ Baling icin enne ku̱tu̱lu̱ anna, utungeya zin annit ru̱u̱m cinne kar ki̱vi̱ra̱ re̱e̱nu̱n.”

¹⁶ A̱gga̱m zin ngaa ci ddi̱ki̱ryo̱kto̱ ru̱u̱m ci Yosevo zee koboda mac cinne ce̱e̱z.

¹⁷ U̱du̱wa̱k zin e̱e̱t cinne no̱ngi̱tto̱n ne̱ke̱ do̱o̱k, a̱nne̱k ne, “Cin da̱ du̱ca̱i̱t wa anyaha i̱nna̱ een I̱bu̱ru̱ ko̱, a̱kku̱nna̱ka̱ annit orong ka̱ta̱ngu̱ya̱n.

¹⁸ Ma̱i̱je̱ baling ku̱tu̱lu̱ anna oroot abunna ming okko e̱e̱ti̱ imma eelannan, utungeya ru̱u̱m cinne kar zin ki̱vi̱r kuk reena.”

U̱ju̱ke̱k ddi̱ki̱ryo̱i̱ti̱ Yosevo lagam

¹⁹ Baling izik ddi̱ki̱ryo̱i̱ti̱ cinne zoz ci a̱du̱wa̱ ngaa cinne ko̱, azi ne, “Een necu gool ci aminya annit du̱ca̱i̱ti̱ cunne,” omoze zin enne oroot.

²⁰ Uwe zin ddi̱ki̱ryo̱i̱ti̱ Yosevo kar kaarik lagam, nginti e̱ce̱bi̱ne̱ ol cik ce̱e̱z ci alaano. Baling ngen Yosevo aave lagama,

²¹ aave da̱ Manyi ki nonno; i̱ye̱le̱k zin enne nonno bunnat kar kanyik ddi̱ki̱ryo̱i̱t ci lagamo kirez Yosevo oroot.

²² Aanyik zin ddi̱ki̱ryo̱i̱ti̱ ci lagamo Yosevo kize ci azunne ol cik e̱ce̱bje̱ do̱o̱k ki kaal cik ogon ol nginati.

²³ Iróng ddi̱ki̱ryo̱i̱ti̱ ci lagamo ngen edeconik li̱ngli̱ngo̱n ci Yosevo, eci Manyi aave ki Yosevo kar kaanyik nonno ku̱tu̱gu̱ kaal ciginnek ju̱rru̱m.