Kananet 37 - Tennet

O̱no̱zzo̱k cik Yosevo

¹ Abak Ya̱ko̱bo̱ lo̱o̱ce̱ ci een Kanaan bali abahe baatinne ke̱.

² Een necu zoz ci Ya̱ko̱bo̱. Baling izeto e̱rki̱nya̱ cik Yosevo omoto ki turgerem, uuwa kaal ki gotonoggi wak baatinne, e̱e̱ggi̱n ngaai cik baatinne a̱rri̱ta̱ logoz ciko ko̱ Bilhah ki Zilpah, kar enne Yosevo kanyahak baatinne kaal cik gerzek ogon gotonoggja.

³ Irez zin Israili ngerinne Yosevo oroot kommog logoz ciginnek veelek, eci Yosevo a̱rri̱ta̱i̱ ngati izewe enne ma̱ti̱yo̱c; kar enne kutuwak nonno ru̱u̱m ci a̱zi̱ze̱ adak o̱ro̱bi̱ya̱ cik meelek.

⁴ Baling icinnet gotonoggja irez be̱e̱ti̱nne̱ng Yosevo oroot kommog nogo do̱o̱k, amartoi zin nege nonno kar gon kozozek nonno gerzet.

⁵ Onoze da̱ Yosevo ba̱a̱li̱n imma, kar zin ku̱du̱wa̱k gotonoggi, abarik zin amartoi nonno oroot.

⁶ A̱nne̱k enne nogo ne, “Iziyyet da̱ o̱no̱zzo̱k ciko:

⁷ Keceb naga labi manatoto, ataman niko ibilet labina ne̱k kecebi anna ko̱, kar labina cuggo̱k kuburuwet labi cigannik kar ku̱lu̱tte̱ kuluccet o̱o̱tti̱!”

⁸ A̱nne̱k zin gotonoggja nonno ne, “Orongi i̱nna̱ ddi̱ki̱rze̱t ngatinna̱ng? Abalet atin i̱nna̱ agit de̱de̱?” Kar zin nege kamartoi zin nonno oroot zo̱ze̱ ci o̱no̱zzo̱k ciginnek ki zoz bali u̱du̱wa̱ enne ke̱.

⁹ Onoze Yosevo bo̱do̱k dee, kar enne ku̱du̱wa̱k gotonoggi. A̱nne̱k ne “Iziyyet, konoze anna bo̱do̱k, kacinni koor ki nye̱lo̱k ki munyuny omoto ki co̱de̱ ming akanneka annit u̱zu̱ngti̱nne̱.”

¹⁰ Baling u̱du̱wa̱k enne baatinne ki gotonoggi o̱no̱zzo̱k ne̱ke̱, egerenyek zin baatinne nonno kar kizek ne, “O̱no̱zzo̱k takazik ne̱ko̱? Kovvo atin naga, anna ki yaatunne ki gotonoggu kakaneki i̱nne̱t u̱zu̱ngti̱nne̱?”

¹¹ Anyait zin gotonoggja meder ngatinne, ma̱i̱je̱ baatinne anyak zoz neci zinine cinne.

Utuyyoi gotonoggi Yosevo nonno

¹² Imma i̱i̱te̱n imma u̱lu̱gte̱ gotonoggi Yosevo kaal ovvo egewe ngati ojono ki orog ci een Shechem,

¹³ kar Israili baatinne kizek Yosevo ne, “Ki i̱yo̱ko̱ ming a̱gga̱ i̱nna̱ ko̱, egewe gotonoggu kaal ngati ojono ki Shechem. I̱jja̱, kokko anna ki̱tto̱ni̱ kar bit rok nogo.” O̱bo̱de̱k zin Yosevo, a̱nne̱k ne, “Abunna baba.”

¹⁴ Izek zin baatinne nonno ne, “Bit kar cin gotonoggu ming abunna ki kaal bu̱k, kar nyaha zoz cinne̱ng.” I̱tto̱n zin enne nonno kuk o̱to̱ne̱ ci tolol ci Hebroni. Baling okko Yosevo arawa Shechem,

¹⁵ uruba zin e̱e̱ti̱ imma nonno ming orongnye zara kar ki̱jji̱n nonno, “Orongi nya?”

¹⁶ O̱bo̱de̱k zin Yosevo nonno, a̱nne̱k ne, “Korongi anna gotonogga. A̱du̱wa̱ka̱ wo̱ye̱ i̱nna̱ nginti egewe nege kaal?”

¹⁷ O̱bo̱de̱k zin e̱e̱ti̱ neci nonno, “U̱lu̱ge̱t nege ngatu, kiziya anna ba̱li̱ye̱ ming azi nege ne, ‘Ku̱lu̱ge̱t koo ngati een zara Dothan.’” Unu zin Yosevo gotonoggi kar kurubak nogo nginti aave ojonun ki Dothan.

¹⁸ Ma̱i̱je̱ gotonoggja icinnet nonno meer reena, baling ngen enne kuzuca nogo, ozozzit nege kar atin ku̱ru̱we̱t nonno.

¹⁹ Ozozzit zin nege do̱, anno ne, “I̱ki̱ya̱i̱t manyi o̱no̱zzo̱k.

²⁰ Ki̱vi̱ta̱ i̱yo̱ko̱ niko, ku̱ru̱we̱t nonno kar ku̱ju̱kte̱k iit cu co̱de̱ kar kizet ne adak nonno e̱le̱gi̱t ci mooti. Kar atin kicinnet gi̱i̱ ci a̱kku̱ o̱no̱zo̱we̱ ciginnek.”

²¹ Baling izik Reubeni zoz neci, i̱ki̱ya̱ orong keela nonno azzine cigge̱k. Ize enne ne, “Gerza ming ka̱ru̱k nonno ka̱da̱k.

²² Ma owanu bi̱ye̱ u̱gge̱. U̱ju̱ktte̱k nonno iit imma balala, abarik ma u̱u̱me̱ku̱ nonno a̱zzi̱t.” Ozoz zin Rubeni niko kar atidic keela nonno ngatinne̱ng kar kuwe nonno ngati baatinne.

²³ Baling arawa Yosevo gotonoggi, artta zin ru̱u̱m ci a̱zi̱ze̱ aim enne ko̱,

²⁴ kar ko̱o̱tte̱ nonno ku̱ju̱kte̱k iit. Odoi da̱ iiti neci; iróng anyak maam.

²⁵ Baling ngen nege aavtte lo̱o̱ta̱ adak da̱i̱ne̱t, edenyca ol cik boor ci een Ismail ming a̱ri̱ya̱ naganaganyai a̱vvu̱ o̱rge̱ ci een Gilead. Odong naganaganyai ne̱ke̱ keen cik ongooli laala ki lotagonget, alucene ovvo lo̱o̱ce̱ ci Masiro.

²⁶ Izek zin Ju̱da̱ gotonoggi ne, “Kamuda wo̱ye̱ naga nya ming ku̱ru̱we̱t gotonet kar bo̱do̱k ku̱lu̱gu̱nye̱t daiz cinne?

²⁷ Ki̱vi̱ta̱, ku̱tu̱yye̱k nonno ollik Ismaili wak utene kaal ko̱, abunna iróng ku̱u̱m nonno azzin cigga̱c; een abarik enne gotonet, ele ki bi̱ye̱ cigga̱c e̱le̱tti̱.” Elemtta zin gotonoggja.

²⁸ Baling ovvo olli Ismaili wa azi zar u̱gge̱ ne Midiani, wak gon utene kaal a̱vvu̱ ojonun, u̱tu̱gu̱rta̱ zin gotonoggja Yosevo lo̱o̱wa̱ kar ku̱tu̱yye̱k nonno o̱ro̱bi̱ya̱i̱ cik een ziik moten rama ol cik Ismaili kar ko̱o̱tte̱ nonno Masire.

²⁹ Baling i̱mi̱re̱ Reubeni uk lo̱o̱we̱ neci icin niko iróng Yosevo aave nginati, erec zin enne ru̱u̱ma̱ni̱ ciginnek.

³⁰ I̱mi̱re̱ uk rok gotonoggi kar kize ne, “Iróng do̱le̱c aave nginati! Kokko atidic anna nga i̱yo̱ko̱?”

³¹ Anyaktta zin nege ru̱u̱m ci Yosevo, otodongit zin eez kar kartik ru̱u̱m neci bi̱ye̱.

³² O̱o̱tte̱ zin ru̱u̱m neci rok be̱e̱ti̱nne̱ng kar kizeto ne, “Kurubta ru̱u̱m cu. Cin da̱ icima een ru̱u̱m cu ci ngerunne.”

³³ A̱gga̱ zin Ya̱ko̱bo̱ ru̱u̱m neci kar kize ne, “Een ru̱u̱m cu ci ngeranni! Adait elegje cik mootik nonno. Ereccit elegje ele ci Yosevo de̱de̱.”

³⁴ Erec zin Ya̱ko̱bo̱ ru̱u̱ma̱ni̱ ciginnek, kar ki̱ti̱m ru̱u̱ma̱ni̱ cik zorzorik kar ku̱tu̱lu̱ ngerinne i̱i̱nya̱ cik meelek.

³⁵ I̱vi̱ta̱ zin logoz ciginnek macik ki cik nga̱a̱ye̱k do̱o̱k ovvo a̱gga̱m nonno a̱zzi̱t u̱lu̱wa̱na̱, ma̱i̱je̱ enne utubur zoz cinne̱ng. Ize enne ne, “I̱llo̱i̱, kokko atin anna rok lo̱o̱k ngati ngeranni.” U̱tu̱lu̱ zin baatinne nonno.

³⁶ Imma Masire, u̱tu̱yye̱k olli Midiani wak utene kaal ko̱ Yosevo e̱e̱t ci een zara Potiphar, een enne ddi̱ki̱ryo̱i̱t ci aciir wak ebek alaan ci Masiro.