Kananet 34 - Tennet

Di̱na̱ ki Shechem

¹ Itinga i̱i̱te̱n imma buweenyi Ya̱ko̱bo̱ ci a̱rri̱ta̱ Le̱ya̱ een zara Di̱na̱, okko enne acin ngaai cik lo̱o̱c ci Kanaani.

² Baling okko Shechemi ngerrti alaan Hamor, boore ci een Hivites acin Di̱na̱, a̱gga̱m nonno kar ki̱vi̱re̱.

³ I̱ta̱k da̱ zinin cinne Di̱na̱ buweenyi Ya̱ko̱bo̱, irez enne buuwec neci kar kozozek ju̱rru̱m.

⁴ A̱nne̱k zin Shechemi baatinne Hamor ne, “Inya do̱le̱c necu ki̱ti̱k anna kize ngaa cinanni.”

⁵ Baling izik Ya̱ko̱bo̱ zoz ci egerzanne e̱e̱ti̱ imma buweenyinne Di̱na̱ ko̱, aavtte da̱ logoz ciginnek ki kaal boora; ijahe zin enne li̱i̱m zee ki̱vi̱ta̱k logoz ciginnek ce̱e̱z.

⁶ Uk zin alaani Hamori be̱e̱ti̱ Shechemi okko ozozek Ya̱ko̱bo̱.

⁷ I̱yo̱ko̱ o̱bo̱dda̱ logoz cik Ya̱ko̱bo̱ boora, baling ovvo nege aziye zoz ci u̱tu̱gu̱ Shechemi, utuburet nong oroot, eci Shechemi u̱tu̱gu̱ gi̱i̱ ci gerze Israila ngati aminye buweenyi Ya̱ko̱bo̱, gi̱i̱ ci iróng wo̱ye̱ ogone.

⁸ Ma̱i̱je̱ Hamori a̱nne̱k nogo ne, “Aarik ngeranni Shechemi zinin cinne buweenyunne. Anycik bai nonno ki̱ti̱k kize ngaa cinne.

⁹ Kurucco labak ki agita; icetu ki̱ti̱kta̱ dooli cuggo̱k kar bo̱do̱k niga i̱ti̱yye̱t dooli cigga̱k.

¹⁰ Abakku wo̱ye̱ niga orgene cinna̱ng; een looci cunno̱ng labak. Abait lo̱o̱ce̱ necu, ataltoi kaal ngatu, kar u̱tu̱yya̱ lo̱o̱c bu̱k.”

¹¹ Izek zin Shechemi be̱e̱ti̱ Di̱na̱ ki gotonoggi ne, “Elemttang annit labak, ka̱ru̱we̱kku̱ng atin kaal cik a̱jji̱nnu̱ niga.

¹² U̱du̱kta̱ kaal cik rucentak ki muci ci a̱ddi̱ki̱re̱, kokko atin anna kanyaha ki ming orongnyu niga, kar atin anna ku̱ru̱k kaal cik a̱jji̱nnu̱ niga ngatinanni. Inycang do̱le̱c kize ngaa cinanni.”

¹³ Eci Shechemi egerzan ngooni cinne̱ng Di̱na̱, ozozit zin logoz cik Ya̱ko̱bo̱ volonga ngati Shechemi ki baatinne Hamor.

¹⁴ Izettek zin nogo ne, “Iróng naga kogon zoz ci ogon niko; iróng kanyikka ngoonet e̱e̱t ci ngen ketted vi̱ca̱vi̱ca̱. Anyahakket atin rucenet neci dominet.

¹⁵ Kelemnyya atin naga rucenet necu ming u̱tu̱gu̱zzu̱ niga zoz co̱de̱ ṯok: u̱tu̱gu̱z ki i̱yo̱ko̱ naga ko̱ ngati ettedu vi̱ca̱vi̱cce̱t cik logoz cigunnek veelek.

¹⁶ Kar atin naga kaanycung i̱ti̱yye̱t dooli cigga̱k, kar bo̱do̱k naga ki̱ti̱ktta̱ dooli cuggo̱k. Kar naga kabakta ki i̱ge̱t kar kizet ol co̱de̱.

¹⁷ Ma̱i̱je̱ ming iróng niga elemnyyu zoz ci ettedu vi̱ca̱vi̱cce̱t, ka̱mi̱re̱na̱ atin ngoonet cinna̱ng.”

¹⁸ Ogon ki ci abunna zoz neci ngati Hamori ki ngerinne Shechem.

¹⁹ Okko lo̱gu̱t ci irez baatinne ce̱e̱ze̱ cinne oroot, uk zin ataman, okko ogon zoz bali u̱du̱kta̱ nege ke̱, eci enne atali buweenyi Ya̱ko̱bo̱ oroot.

²⁰ Oot zin Hamori ki ngerinne Shechem rok aran ci o̱rgu̱ kozozek olli o̱rgu̱.

²¹ Azi nege ne, “E̱e̱ggi̱n ol ne̱ke̱ gonogget cigga̱c, kanycik nogo kabaito lo̱o̱ce̱ cinna kar ku̱tu̱yyo̱i̱ kaal ngatu; anyak lo̱o̱c ci a̱ppwe̱ kize cinne̱ng. Ka̱ti̱k wo̱ye̱ naga buuwecci cigge̱k, ovvo bo̱do̱k nege a̱ti̱k cigga̱c.

²² Abarik atin ol ne̱ke̱ elemi a̱vvu̱ze̱t ki agit zo̱ze̱ co̱de̱, anyik ol cigga̱c macik do̱o̱k kettedit vi̱ca̱vi̱cce̱t ki i̱yo̱ko̱ nege ko̱.

²³ Iróng zin atin kaala cigge̱k do̱o̱k ki elegje ovvo e̱e̱ggi̱n cigga̱c? Korong naga ku̱du̱kta̱k zoz cinna nogo, kar atin nege kabaito orgene cinna.”

²⁴ Elemtta ol cik macik do̱o̱k balik ovvo arane ci o̱rgu̱ ko̱ zoz ci Hamori ki ngerinne Shechem, kar zin logoz cik macik do̱o̱k orgato kettedit vi̱ca̱vi̱cce̱t.

²⁵ Kar baling edeccai i̱i̱nya̱ cik een i̱i̱yo̱, baling ngen ngoddeceta balik ettede nege vi̱ca̱vi̱cce̱t ko̱ a̱u̱ce̱, idimtta dooli cik Ya̱ko̱bo̱, Si̱mo̱ne̱ ki Le̱vi̱ gotonoggi Di̱na̱ illanya cigge̱k kar zin ki̱tto̱zo̱ orog, kar ku̱ru̱we̱t ol cik macik do̱o̱k.

²⁶ U̱ru̱we̱t Hamor ki ngerinne Shechem, kar kiyoktai Di̱na̱ ce̱e̱ze̱ ci Shechemi kar koot.

²⁷ I̱tto̱zzo̱ zin dooli cik Ya̱ko̱bo̱ orog ka̱va̱rda̱ngi̱t ol cik a̱da̱i̱to̱ kogorozit orog ci ol balik egerzan ngooni ke̱.

²⁸ O̱o̱tte̱ zin nege kaal cik ol ne̱ke̱, a̱zza̱ ki eeza ki tiin ki zi̱gi̱re̱ ki kaal cik aavtte orgato icima ma̱ne̱ne̱.

²⁹ Aamtta zin nege kaal cik ol ne̱ke̱ do̱o̱k ki bo̱do̱k ngaai ki dooli, ki i̱jjo̱ cik aavtte ce̱e̱zi̱nne̱.

³⁰ Izek zin Ya̱ko̱bo̱ Si̱mo̱ne̱ ki Le̱vi̱ ne, “Amartang niga annita nong ngati ol cik abak lo̱o̱ce̱ ci Kanaani ki Perizzites. Ke̱e̱ggi̱n naga idice, ming ulutet nege e̱le̱tti̱ cigge̱k kar koorta annit, ovvo nege aditanna annit ki olli ce̱e̱z cinanni do̱o̱k.”

³¹ Ma̱i̱je̱ nege o̱bo̱dde̱k nonno, “Anyik weda da̱ Shechem kimice ngoonet ki a̱li̱ya̱i̱ti̱?”