Kananet 32 - Tennet

Orong Ya̱ko̱bo̱ kurumto ki I̱sa̱u̱

¹ Uk zin Ya̱ko̱bo̱ gool cinne, kar zin anjilonya cik Ta̱mu̱ta̱dde̱no̱ kurumto ki nonno.

² Baling okko Ya̱ko̱bo̱ acin nogo, ize enne ne, “Een ngintu nyaperit ci Ta̱mu̱ta̱dde̱no̱.” Kar zin enne kakatek zar kize Mahanaim.

³ I̱tto̱ni̱k zin Ya̱ko̱bo̱ du̱cca̱k ciginnek koot oowa ngati gotononi I̱sa̱u̱ lo̱o̱ce̱ ci Seiri, nginti een zara Edom.

⁴ I̱lo̱t zin enne nogo a̱nne̱k ne, “Icu zoz ci ovvo niga a̱du̱wa̱kku̱ ddi̱ki̱ryo̱i̱t cinanni I̱sa̱u̱: ‘Azi du̱ca̱i̱ti̱ cunne Ya̱ko̱bo̱ ne, kabai anna ba̱li̱ye̱ ce̱e̱ze̱ ci Labani rok i̱yo̱ko̱.

⁵ Kanyai anna tiin ki zi̱gi̱re̱, a̱zza̱ ki eeza, du̱cca̱k cik macik ki cik nga̱a̱ye̱k. I̱yo̱ko̱ ki̱tto̱ni̱k anna zoz necu manyi cinanni, abunna ming elemanan.’”

⁶ Baling ovvo du̱cca̱ha̱ obodak Ya̱ko̱bo̱, izettek nonno ne, “Ko̱o̱tta̱ rok gotonnu I̱sa̱u̱, kar i̱yo̱ko̱ a̱kku̱ enne goola okko arumonu ki i̱nne̱ta̱, e̱e̱ggi̱n ol cik orkora ki nonno obet we̱c (400).”

⁷ Okko zin ngati o̱ngo̱o̱li̱nne̱ Ya̱ko̱bo̱ zoz ci I̱sa̱u̱ oroot, enger zin enne ol balik orkora ki nonno ke̱ lak rama, enger kaal do̱o̱k rok naganaganya.

⁸ I̱no̱n enne azi ne, “Ming a̱kku̱ I̱sa̱u̱ kar kakat koole co̱de̱, okko koole ci aave do̱ ko̱ iyok labak.”

⁹ Ala zin Ya̱ko̱bo̱ Manyi, “Ta̱mu̱ta̱dde̱n ci baba Aburaham ki ci baba I̱sa̱ko̱, Manyi bai, ngene ci bali a̱nne̱ka̱ annit ne, ‘Mi̱re̱ bit o̱rge̱ cunne ki boor cunne, kar atin kaanyi i̱nne̱t kaal cik meelek,’

¹⁰ Iróng wo̱ye̱ kaganona ki bunnat ki zoz ci azunne i̱nna̱ i̱ye̱le̱k du̱ca̱i̱t cunne. Kanyai ba̱li̱ye̱ ki̱ri̱ ci komtine baling ngen kettedi moro ci een zara Jordan. Imma i̱yo̱ko̱ kanyai koolen ram cik ollu ki kaal.

¹¹ Kalaye, eelawa annita Ta̱mu̱ta̱dde̱n a̱tte̱ ci gotononna I̱sa̱u̱, eci anna ko̱ngo̱o̱le̱ okko atin enne a̱ru̱ka̱ annita, ki e̱e̱ti̱k doolinnu ki dooli cigge̱k.

¹² Ma̱i̱je̱ i̱nna̱ ba̱li̱ye̱ a̱nne̱ka̱ ne, ‘Kaanyi atin de̱de̱ nyak kaal cik meelek kar atin dooli cigunnek ki̱ti̱rre̱t ku̱tu̱gu̱zzo̱ kiwagon azac ci li̱i̱lu̱, ci iróng ol uule kikebit.’”

¹³ Atangu zin Ya̱ko̱bo̱ nginati kaal, kar katahalak gotoni wa een I̱sa̱u̱ muci cik abunna kaale ne̱k anyak enne ke̱:

¹⁴ eeza cik nga̱a̱ye̱k obet rama (200) ki konyi moten rama, okko bo̱do̱k anyaha a̱zza̱ cik nga̱a̱ye̱k obet ram (200) ki mirkicce moten rama,

¹⁵ anyaha bo̱do̱k naganaganya cik nga̱a̱ye̱k ki maala cigge̱k moten i̱i̱yo̱, e̱e̱ggi̱n tiina cik nga̱a̱ye̱k moten we̱c ki o̱le̱nya̱ omoto, e̱e̱ggi̱n zi̱gi̱re̱ cik nga̱a̱ye̱k moten ram ki cik macik omoto.

¹⁶ Aanyik zin Ya̱ko̱bo̱ kaal ne̱ko̱ do̱o̱k du̱cca̱k ku̱zu̱tte̱, uuwa ngenngene kaal cigge̱k do̱, kar kize ne, “Oot oowe cinanni, ma ojongzonu, a̱vvu̱t reena idic.”

¹⁷ I̱lo̱te̱k zin Ya̱ko̱bo̱ du̱ca̱i̱t wa okko oowa ke̱ zoz cu, “Ming okko i̱nna̱ arumonu ki gotona I̱sa̱u̱ kar ki̱jji̱ni̱n, ‘E̱e̱ni̱ i̱nna̱ e̱e̱t ci ngene, okko i̱nna̱ nga, ngene ci een manyi kaal ne̱ko̱ do̱o̱k?’

¹⁸ kar zin i̱nna̱ izek nonno ne, ‘E̱e̱ggi̱n kaala ne̱ko̱ cik du̱ca̱i̱t cunne Ya̱ko̱bo̱. E̱e̱ggi̱n kaala ne̱ko̱ cik amuce enne manyi I̱sa̱u̱, a̱kku̱ zin enne vu̱rrte̱ cinanni.’”

¹⁹ I̱lo̱t bo̱do̱k Ya̱ko̱bo̱ du̱cca̱k wak annu gonoggi wak o̱o̱tti̱nu̱ ko̱ ki wak annu nogo vu̱rrta̱ ko̱, ki ol cik angid kaal ki nogo ko̱, a̱nne̱k ne, “U̱du̱kta̱k zoz neci dee I̱sa̱u̱ ming ovvo niga arumonu ki nonno.

²⁰ Abunna ming a̱gga̱yyu̱ zoz ci a̱du̱wa̱kku̱ nonno, ‘A̱kku̱ du̱ca̱i̱ti̱ cunne Ya̱ko̱bo̱ vu̱rrte̱ cinna.’” Eci enne i̱no̱n azi ne, “Kalalizani atin anna zinin cinne zo̱ze̱ ci muci ci ki̱tto̱ni̱ anna arrak oowa ko̱; imma vu̱rrta̱ ming kokko anna kacinni nonno, elemanna atin wo̱ye̱ enne annita.”

²¹ Uk zin muci cik Ya̱ko̱bo̱ arrak oowe cinne, ma̱i̱je̱ enne a̱ta̱ngu̱ kaal nyaperita.

Ocodo Ya̱ko̱bo̱ ki Ta̱mu̱ta̱dde̱n

²² Imma ba̱a̱li̱n neci ele, itinga Ya̱ko̱bo̱ kar kuwe ki ngaai ciginnek rama, ki du̱cca̱k cik nga̱a̱ye̱k ki logoz ciginnek omoto ki co̱de̱ kar kettede nogo nginti dholoi more ci een zara Jabbok.

²³ Baling ettede enne nogo a̱vvu̱to̱ ti̱ti̱ma̱, i̱tto̱n zin enne kaal ciginnek do̱o̱k.

²⁴ Erahek zin Ya̱ko̱bo̱ do̱, ocodo zin e̱e̱ti̱ imma ki nonno kaal, kaala looci.

²⁵ Baling icin e̱e̱ti̱ neci iróng enne ngen uule Ya̱ko̱bo̱ codonta, alaca zin Ya̱ko̱bo̱ vanoc.

²⁶ Ize zin e̱e̱ti̱ neci ne, “Inya kuwo, aala looci.” O̱bo̱de̱k zin Ya̱ko̱bo̱ nonno a̱nne̱k ne, “Iróng atidic anna kaanyi bito ming ngen i̱nna̱ ma̱yu̱wa̱n.”

²⁷ I̱jji̱n zin e̱e̱ti̱ neci nonno, “Azi zar cigunnek ngene?” O̱bo̱de̱k zin enne a̱nne̱k ne, “Ya̱ko̱bo̱.”

²⁸ Ize zin e̱e̱ti̱ neci ne, “Iróng zara cigunnek bo̱do̱k ngen een Ya̱ko̱bo̱, abarik anyik zar cigunnek kizeto Israil, eci i̱nna̱ ocodou ki Ta̱mu̱ta̱dde̱n ki bo̱do̱k ol, ommogu zin i̱nna̱ nogo do̱o̱k.”

²⁹ Ize zin Ya̱ko̱bo̱ ne, “Du̱wa̱ka̱ bai zar cigunnek ke̱.” Ma̱i̱je̱ enne o̱bo̱de̱k azi ne, “Nya ming a̱jji̱nni̱ i̱nna̱ zar cigannik ko̱?” Kar zin enne ku̱mu̱yu̱k Ya̱ko̱bo̱.

³⁰ Akatek zin Ya̱ko̱bo̱ zar cik ngin neci kize ne, Peniel kar kize ne, “Eci anna kicinna ngu̱m ci Ta̱mu̱ta̱dde̱no̱, kar i̱yo̱ko̱ ngen anna karugi.”

³¹ Iyowa zin i̱i̱, baling okko enne ungnek Peniel lo̱o̱c, kar enne kocongod eci alacai vanoci cinne.

³² Okko zin rok i̱yo̱ko̱ iróng olli Israilo adak i̱di̱ng ci aave vanoca ci kaalu zo̱ze̱ bali i̱i̱na̱k Ya̱ko̱bo̱ ke̱.