Kananet 30 - Tennet

¹ Baling icin Racheli iróng enne a̱rri̱ta̱k Ya̱ko̱bo̱ dooli niko, anyak zin enne meder ngati ngononi. Izek zin enne Ya̱ko̱bo̱ ne, “Inya annit dooli, icima ka̱da̱i̱ atin anna.”

² Omoze zin Ya̱ko̱bo̱ ngatinne kar kize ne, “Kaave anna ngati Ta̱mu̱ta̱dde̱no̱, ci iróng aanyi i̱nne̱t nyak dooli?”

³ Ize zin Racheli ne, “Icu Bilhah, du̱ca̱i̱t cinanni. A̱ta̱gu̱z ki nonno abunna a̱rri̱ta̱ka̱ annit dooli kar anna bu̱k kavade.”

⁴ Aanyik zin enne du̱ca̱i̱t cinne Bilhah ka̱vvu̱to̱ ki Ya̱ko̱bo̱ kize ngaa cinne. A̱ta̱gu̱zzo̱ zin enne ki Ya̱ko̱bo̱,

⁵ kar enne Bilhah kanyaho kar zin ki̱ti̱rra̱k nonno do̱le̱c ci maci.

⁶ Ize zin Racheli ne, “Eelawa Ta̱mu̱ta̱dde̱n annita; izik enne lawinet cinanni kar kaanya do̱le̱c ci maci.” Akatek zin enne nonno zar cik een Dan.

⁷ Anyaho zin bo̱do̱k Bilhah du̱ca̱i̱ti̱ ci Racheli kar ki̱ti̱rra̱k Ya̱ko̱bo̱ do̱le̱c ci maci annu a̱bu̱.

⁸ Ize zin Racheli ne, “Kadangtowa ba̱li̱ye̱ ki ngoona oroot, kar anna kommog nonno.” Kar kakatek do̱le̱c kize Naphtali.

⁹ Baling icin Le̱ya̱ ibil enne ti̱rra̱, idima zin enne bu̱k du̱ca̱i̱t cinne Zilpah kar kaanyik Ya̱ko̱bo̱ kize ngaa cinne.

¹⁰ I̱ti̱rra̱k zin du̱ca̱i̱ti̱ ci Le̱ya̱ een Zilpah ko̱ Ya̱ko̱bo̱ do̱le̱c ci maci.

¹¹ Ize zin Le̱ya̱ ne, “I̱ki̱ya̱ bunnati,” kar zin kakatek zar cik do̱le̱c neci kize Gad.

¹² I̱ti̱rra̱k zin bo̱do̱k du̱ca̱i̱ti̱ ci Le̱ya̱ een Zilpah ko̱ Ya̱ko̱bo̱ do̱le̱c imma ci maci.

¹³ Ize zin Le̱ya̱ ne, “Katalne anna oroot! Awuya atin ngaai kize talninet.” Kar kakatek zar ciginnek kize Asher.

¹⁴ Imma i̱i̱nya̱we̱ cik ettede ol labi, uk Reubeni ma̱ne̱ne̱, kar kuruba o̱ya̱u̱ cik keet ci azi zar ne mandrake kar kanyahak yaatinne Le̱ya̱. A̱nne̱k zin Racheli Le̱ya̱ ne, “Inya bai mandrakes ci anyaha ngerunne ko̱ u̱gge̱.”

¹⁵ Ma̱i̱je̱ Le̱ya̱ a̱nne̱k nonno ne, “Ngen elezo ki mac bali amanna ke̱? Okkoye atin i̱nna̱ mandrakes ci ngeranni bu̱k?” O̱bo̱de̱k zin Racheli, “Abunna oroot, anyik zin nonno ka̱ta̱ngu̱ ce̱e̱ze̱ cunne zo̱ze̱ ci mandrakes ci ngerunne ko̱.”

¹⁶ Baling zin oboda Ya̱ko̱bo̱ manatoto yo̱mo̱n neci, uk zin Le̱ya̱ u̱ru̱me̱k nonno gool. Kar kizek nonno ne, “Abunna la̱du̱n ming okko i̱nna̱ oongi ba̱a̱li̱n necu ce̱e̱ze̱ cinanni, eci anna katalani mandrakese ci ngeranni.” Atangu zin Ya̱ko̱bo̱ ce̱e̱ze̱ cinne.

¹⁷ Izik Ta̱mu̱ta̱dde̱n lawinet ci Le̱ya̱, kar enne kanyaho, i̱ti̱rra̱k zin Ya̱ko̱bo̱ do̱le̱c ci maci annu gotonoggi cik een we̱c ko̱.

¹⁸ Ize zin Le̱ya̱ ne, “Aanya Ta̱mu̱ta̱dde̱n eezet, eci kanyiya e̱e̱t cinanni kabahe du̱ca̱i̱t cinanni kize ngaa.” Akatek zin enne do̱le̱c zar cik een Issachar.

¹⁹ Anyaho zin bo̱do̱k Le̱ya̱ dee, kar ki̱ti̱rra̱k Ya̱ko̱bo̱ do̱le̱c ci maci annu dooli cik een tu̱r ko̱.

²⁰ Kar zin Le̱ya̱ kize ne, “Aanya Ta̱mu̱ta̱dde̱n muci ci abunna. Okko atin mac cinanne a̱ti̱ri̱za̱ ju̱rru̱m, eci anna ki̱ti̱rra̱ nonno logoz torkonom.” Akatek zin enne nonno zar cik een Zebulun.

²¹ Imma bali e̱rki̱t imma i̱ti̱rra̱ bo̱do̱k Le̱ya̱ do̱le̱c ci nga̱a̱ye̱ kar zin kakatek zar kize Di̱na̱.

²² A̱a̱da̱ zin Ta̱mu̱ta̱dde̱n Rachel; izik enne lawinet cinne kar kidiman mo̱mu̱ cinne.

²³ Anyaho zin enne kar ki̱ti̱rra̱ do̱le̱c ci maci kar kize ne, “Aara Ta̱mu̱ta̱dde̱n a̱li̱ya̱n cigannik.”

²⁴ Kar zin enne kakatek do̱le̱c zar cik een Yosevo, kar enne kize ne, “Anyik bai Manyi kaanya annit do̱le̱c imma dee.”

Otorte kaala cik Ya̱ko̱bo̱

²⁵ Baling i̱ti̱rra̱ Racheli ngerinne Yosevo, iizek zin Ya̱ko̱bo̱ Laban ne, “Inya gool kar ku̱lu̱k ki̱mi̱re̱ kuk lo̱o̱ce̱ cinna̱ng.

²⁶ Inya ngaai cigannik ki dooli balik ka̱li̱ngli̱ngngo̱ni̱ki̱ anna i̱nne̱t zo̱ze̱ cinne̱ng ko̱, korongi atin anna koto. A̱gga̱ i̱nna̱ li̱ngli̱ngo̱n bali ka̱li̱ngli̱ngngo̱ni̱ki̱ anna i̱nne̱t ke̱.”

²⁷ Ma̱i̱je̱ Labani a̱nne̱k nonno ne, “Ming kabunna anna ngatunne, bak bai ngatu labak. Ka̱gga̱wa̱ anna ngati ka̱ru̱we̱ biyen a̱mu̱yu̱ka̱ zin Manyi zo̱ze̱ cunne.”

²⁸ Otorek zin enne, “Du̱wa̱ka̱ kaal cik a̱li̱ngli̱ngngo̱ni̱ka̱ i̱nna̱ annita kar atin anna ku̱ru̱we̱i̱n.”

²⁹ O̱bo̱de̱k zin Ya̱ko̱bo̱ nonno, “A̱gga̱ i̱nna̱ li̱ngli̱ngo̱n ci ka̱li̱ngli̱ngngo̱ni̱ki̱ ko̱ kar kaala cigunnek kubunnta ngati kazunne anna.

³⁰ Ovvo eeza balik kidik anyai i̱nna̱ ke̱ otorte oroot, kar Manyi ka̱ma̱yu̱k kaal cik kabali anna. Ma̱i̱je̱ i̱yo̱ko̱, kogonik atin anna ce̱e̱z cinanni nya?”

³¹ I̱jji̱n zin Laban nonno bo̱do̱k, “Orongi kar kaanyi nya?” O̱bo̱de̱k zin Ya̱ko̱bo̱ Laban, “Ma aanya gi̱i̱ imma, ma̱i̱je̱ ming u̱tu̱gu̱we̱ya̱ i̱nna̱ annit gi̱i̱ co̱de̱ ko̱, kokko atin anna kar kabal eeza cigunnek kicin ju̱rru̱m:

³² Inya wazin necu kuk kicin kaal cigunnek do̱o̱k kar kaara eezai icima a̱zza̱i̱, nyoo cik a̱zza̱nnu̱ cik o̱lle̱k, ki eeza ki a̱zza̱ cik regek ki cik bu̱ze̱ni̱k. Ovvo ne̱ko̱ e̱e̱ggi̱n kaal cik a̱ru̱we̱ka̱ i̱nna̱ annit kize cik li̱ngli̱ngo̱nta̱k.

³³ Kar zoz ci ka̱gga̱me̱ anna kaal zinine ci alali ko̱ okko atin i̱ye̱la̱i̱, ming okko i̱nna̱ acinni kaal cik a̱ru̱we̱ka̱ i̱nna̱ annit ko̱. Ming aave eez imma ngatinanni ci iróng een bu̱ze̱n icima rege, icima a̱zze̱t ci iróng o̱lla̱, ogorzai eez icima a̱zze̱t neci.”

³⁴ O̱bo̱de̱k Labani Ya̱ko̱bo̱ a̱nne̱k ne, “Abunna, anyik ku̱tu̱gu̱ ki i̱yo̱ko̱ ming a̱du̱wa̱ ko̱.”

³⁵ Imma i̱i̱te̱n neci ele, engera Labani eeza cik macik bu̱ze̱ni̱k icima cik regek, engera bo̱do̱k eeza cik nga̱a̱ye̱k bu̱ze̱ni̱k icima cik regek do̱o̱k, ki a̱zza̱ cik o̱lle̱k, kar kaanyi dooli ciginnek kutuwac nogo do̱.

³⁶ Kar ko̱o̱tte̱ ngati reeni owoye gwo̱o̱nya̱ i̱i̱yo̱ kar Ya̱ko̱bo̱ kutuwa eeza cik Labani anyigzai ko̱ do̱.

³⁷ Idima zin Ya̱ko̱bo̱ alawo cik keenu, cik ngen culai, etehed keet neci ngati ettede bo̱i̱c ci keeto ki̱ye̱lta̱i̱ ngintik voorik keeta.

³⁸ Akatek zin alawo ne̱ke̱ kibilet o̱to̱ne̱ ci eezau ki a̱zza̱ ngati a̱ri̱ye̱ maama kar ka̱vvu̱ ngu̱me̱ ci kaalu, ming ovvo aud maam. Ming ovvo kaala a̱vvu̱ orong ki̱ti̱da̱lto̱ ming ovvo aud maam,

³⁹ ovvo eezena ki a̱zza̱ i̱da̱lle̱ alawoi cik keen ne̱ke̱ ojonun, ovvo nege a̱rri̱ta̱ nyoo cik regek icima cik bu̱ze̱ni̱k icima cik o̱lle̱k.

⁴⁰ Enger zin Ya̱ko̱bo̱ nyoo cik kidik ko̱ ka̱vvu̱to̱ cinne̱ng do̱, ma̱i̱je̱ eezena ki a̱zza̱ uggak kedevit eeza ki a̱zza̱ cik regek ki cik o̱lle̱k Labani. Gool ci arubane enne kaal ciginnek ko̱ necu, kar kaanyik kaal ne̱ke̱ ka̱vvu̱to̱ do̱ kaale cik Labani.

⁴¹ Ming aavtte eezena cik nga̱a̱ye̱k adiye izeto ruutwa orongit ki̱ti̱da̱lto̱, arike gon Ya̱ko̱bo̱ alawo cik ehede ko̱ ngu̱me̱ ci kaal ne̱ke̱ adiye ke̱ ojonun,

⁴² ma̱i̱je̱ ming orobok kaala, iróng enne arike keet ngin neci. Ovvo zin eezena cik orobok e̱e̱ggi̱n cik Labani kar wak adiye ovvo e̱e̱ggi̱n cik Ya̱ko̱bo̱.

⁴³ Imma zin go̱o̱le̱ necu, ize Ya̱ko̱bo̱ jaitot ci ommog veelek, kanyak kaal cik meelek giir, ki du̱cca̱k cik nga̱a̱ye̱k ki cik macik, ki naganaganya ki zi̱gi̱re̱.