Kananet 24 - Tennet

I̱sa̱ko̱ ki Rebekah

¹ Ize Aburahami ma̱ti̱yo̱c anyak e̱rki̱nya̱ cik meelek, kar Manyi ku̱mu̱yu̱k nonno go̱o̱lo̱we̱ do̱o̱k.

² Izek enne ddi̱ki̱ryo̱i̱t ci du̱cca̱k cik ce̱e̱z cinne, e̱e̱t ci abal kaal ciginnek do̱o̱k ko̱ ne, “Du̱l da̱ keet.

³ Korongnyi anna i̱nne̱t ming i̱tto̱ni̱ zare cik Manyi, Ta̱mu̱ta̱dde̱n ci ta̱mu̱-kengo ki lo̱o̱c, iróng atin i̱nna̱ arucak ngeranni ngaa buweecinne cik Kanaani, ol ne̱k kabahe anna ko̱,

⁴ abarik bit o̱rge̱ cinanni rok boor cinanni kar anyik ngaa ngeranni I̱sa̱ko̱ nginati.”

⁵ I̱jji̱n zin du̱ca̱i̱ti̱ nonno izek ne, “Ming utubur ngaa cinne iróng orong ki̱ki̱ya̱ rok lo̱o̱c cu? Ki̱mi̱ro̱i̱ zin anna ngerunne rok orog bali a̱kku̱nne̱ i̱nna̱ ke̱?”

⁶ Azi zin Aburahami ne, “Abunna ming a̱gga̱ ju̱rru̱m, ma a̱mi̱re̱ne̱ ngeranni rok ngin neci.

⁷ Okko Manyi, Ta̱mu̱ta̱dde̱n ci ta̱mu̱-kengo, bali anyahana ce̱e̱ze̱ ci baba ki lo̱o̱c cinanni, u̱du̱wa̱ enne ba̱li̱ye̱ azi ngati ogone olom ne, ‘Kanyike atin anna lo̱o̱c necu biilet cunne’ I̱tto̱na̱ atin enne anjilo cinne kuk o̱o̱we̱ cunne kar i̱nna̱ tahalak ngeranni ngaa nginati.

⁸ Ming utubur ngaa neci bodanet ki i̱nne̱t, kar zin atin i̱nna̱ oogjai zo̱ze̱ ci olom cinanni ko̱. Ma a̱mi̱re̱ne̱ ngeranni kuk nginati.”

⁹ U̱du̱l zin du̱ca̱i̱ti̱ keet ngati Aburaham kar ki̱tto̱n ngati ogone olom zo̱ze̱ necu. U̱du̱l zin du̱ca̱i̱ti̱ neci keet kar ku̱tu̱gu̱ zoz bali orong Aburahami nonno ku̱tu̱gu̱ ke̱.

Okkoye Ta̱mu̱ta̱dde̱n du̱ca̱i̱t kuk katahala Rebekah

¹⁰ Atahala zin du̱ca̱i̱ti̱ naganaget omoto ngati kaal cik ddi̱ki̱ryo̱i̱t cinne kar zin kuk, uwe kaal wak abunna do̱o̱k gon ddi̱ki̱ryo̱i̱t cinne. Okko enne go̱o̱le̱ ci Aram Naharaim kar kuk o̱rge̱ wa a̱ddi̱ki̱re̱ aave Nahori.

¹¹ Aanyik zin enne naganaget kakatit u̱zu̱ngti̱nne̱ iit ojonun, orog abanyca; ize da̱ looci yo̱mo̱n, i̱i̱ ci ovvoye ngaai ṯu̱wa̱ ovvo aṯila maam.

¹² Alawo zin du̱ca̱i̱ti̱, “Oh Manyi, Ta̱mu̱ta̱dde̱n ci ddi̱ki̱ryo̱i̱t cinanni Aburaham, inya annit ku̱tu̱gu̱ ju̱rru̱m wazin necu, kar ye̱le̱k bunnat ddi̱ki̱ryo̱i̱t cinanni Aburaham.

¹³ Cinno, kabili anna ṯu̱we̱ cu abanyca, ovvo buuwecci cik o̱rgu̱ a̱vvu̱ ovvo aṯila maam.

¹⁴ Ming ka̱jji̱nni̱ atidic do̱le̱c imma, ‘Ti̱ye̱k da̱ i̱jjo̱ cunne maamu ko̱ lo̱o̱c kar anna kuuda maam u̱gge̱,’ kar enne kize ne, ‘Uude, ke̱e̱li̱k atidic anna naganaget cigunnek bu̱k.’ Anyik nonno kize do̱le̱c ci atahala i̱nna̱ kize ngaa ci I̱sa̱ko̱ du̱ca̱i̱t cunne. Kar zin go̱o̱le̱ necu, ka̱gga̱wa̱ wo̱ye̱ anna niko ming i̱ye̱le̱k i̱nna̱ bunnat ddi̱ki̱ryo̱i̱t cinanni.”

¹⁵ Baling ngen du̱ca̱i̱ti̱ kedeca lawinet, i̱ki̱ya̱ Rebekah anyaha ki í̱jjó̱ ci maamu i̱i̱nya̱wa̱. Een enne buweenyi e̱e̱t ci een zara Bethuwel bali a̱rri̱ta̱ Milcah, bali een ngaa ci gotoni Aburaham wa een zara Nahor.

¹⁶ A̱zi̱ze̱ da̱ buuwecci neci oroot, ngen e̱e̱ti̱ imma ka̱ta̱gu̱zzo̱ ki nonno udut. I̱tto̱ zin enne iit, kelezek maam í̱jjó̱ cinne kar kottoda ta̱dde̱n bo̱do̱k.

¹⁷ I̱vi̱r zin du̱ca̱i̱ti̱ kurumto ki nonno kar zin kizek ne, “Ti̱na̱t, inya maam u̱gge̱ í̱jjó̱wé̱ cunne ko̱.”

¹⁸ O̱bo̱de̱k zin enne du̱ca̱i̱t a̱nne̱k ne, “Uude, manyi cinanni,” kar zin kulucai í̱jjó̱ o̱o̱we̱ cinne ataman kar kaanyik nonno maam kuud.

¹⁹ Baling aanyik enne nonno maam cik uudentak, a̱nne̱k zin enne du̱ca̱i̱t ne, “Ke̱e̱li̱k atidic anna maam naganaget cigunnek ko̱, zee kalalit nege bu̱k.”

²⁰ U̱ddu̱te̱k zin enne maam ne̱k anyak enne i̱jja̱ ko̱ i̱bo̱ ci audene kaala, kar zin ki̱vi̱r ki̱mi̱re̱ kuluce kuk iitawa, kiṯila maam u̱gge̱, kar ke̱e̱li̱k maam cik eleno ki naganaget ciginnek do̱o̱k.

²¹ Atangamek du̱ca̱i̱ti̱ neci nonno li̱i̱m niko zee, kar zin ki̱no̱n ming aanyik Manyi eroni cinne kuk ju̱rru̱m.

²² Baling alallit naganaganya do̱o̱k, idima du̱ca̱i̱ti̱ zi̱i̱t cidici een dhahab ci aaymek buuwecci u̱nge̱tti̱, ki i̱mmo̱nga̱ni̱ rama cik een dhahab.

²³ I̱jji̱n zin du̱ca̱i̱ti̱ nonno izek ne, “Ti̱na̱t, e̱e̱ni̱ i̱nna̱ buweenyi ngene? Du̱wa̱ka̱ bai ke̱, anyak ucca ngin imma ci kadungne ce̱e̱ze̱ ci baatunne ba̱a̱li̱n cu?”

²⁴ O̱bo̱de̱k zin do̱le̱c du̱ca̱i̱t, a̱nne̱k ne, “Ke̱e̱ni̱ anna buweenyi Bethuweli wa een ngerrti Nahori, een ngaa cinne zara Milcah.”

²⁵ Kar enne kotorek zoz cu, “Kanyaka nginti ovvo niga oginnu ba̱a̱li̱n cu, kar bo̱do̱k kanyak tabara ki arte cik ege kaala.”

²⁶ U̱lu̱le̱ zin du̱ca̱i̱ti̱ neci, kar zin kala Manyi,

²⁷ ngati aziwe ne, “Kinnati Manyi, Ta̱mu̱ta̱dde̱n ci ddi̱ki̱ryo̱i̱t cinanni Aburaham, iróng enne ungnek bunnat cinne kar kuzute zoz cinne ngati ddi̱ki̱ryo̱i̱t cinanni. Imma ngatinanni, aanya Manyi keeron rok boor ci ddi̱ki̱ryo̱i̱t cinanni.”

I̱ti̱k I̱sa̱ko̱ Rebekah

²⁸ I̱vi̱r zin do̱le̱c rok ce̱e̱z kar koobek yaatinne ki ol cik ce̱e̱zu̱ zoz neci.

²⁹ Anyak da̱ Rebekah gotoni ci een zara Laban, kar kitinga ki̱vi̱r kuk rok du̱ca̱i̱t ci Aburahami iitawa.

³⁰ Baling icin enne zi̱i̱t ungece ci ngononi ki bo̱do̱k ziik cik a̱ru̱wo̱ni̱k i̱ba̱tti̱ ko̱, kar bo̱do̱k kizik zoz wa oobek Rebekah zoz ci u̱du̱wa̱k e̱e̱ti̱ neci nonno, uk zin Labani rok e̱e̱t neci kar kuruba nonno ming abile ki naganaganya iit abanyca.

³¹ A̱nne̱k zin nonno ne, “I̱jja̱, i̱nna̱ e̱e̱ti̱ ci u̱mu̱yu̱wi̱ Manyi ko̱. Nya ming abili i̱nna̱ reena ko̱? Kidimana anna nginti oginnu niga ki ci naganaganyau.”

³² I̱tto̱ zin du̱ca̱i̱ti̱ ci Aburahami ce̱e̱z, kar i̱jjo̱ kaartai naganaganyai. Anyaktai tabara ki arte kize cik naganaganyau. Anyakttak ol nonno maam ki ol ciginnek kutunyet zo̱o̱ cigge̱k.

³³ Anyakttak zin nonno da̱i̱ne̱t, ma̱i̱je̱ enne azi ne, “Iróng atidic anna kadakce ming ngen ku̱du̱wa̱u̱ng zoz ci korongi anna ku̱du̱wa̱ ko̱.” Ize zin Labani ne, “Du̱wa̱kke̱t zin.”

³⁴ Oobek zin enne nogo, “Ke̱e̱ni̱ anna du̱ca̱i̱t ci Aburahami.

³⁵ U̱mu̱yu̱k Manyi ddi̱ki̱ryo̱i̱t cinanni oroot, ize zin enne jaitot. Aanyik Ta̱mu̱ta̱dde̱n nonno a̱zza̱ ki tiin, ki ziik cik ataltali ki dhahab, du̱cca̱k cik macik ki cik nga̱a̱ye̱k, ki naganaganya ki zi̱gi̱re̱.

³⁶ Okko ngaa cinne Sarah a̱rri̱ta̱k ddi̱ki̱ryo̱i̱t cinanni lo̱gu̱t ci maci ngati izewe enne ma̱ti̱yo̱c, kar baatinne kaanyik nonno kaal cik anyak enne do̱o̱k.

³⁷ Kar ddi̱ki̱ryo̱i̱ti̱ cinanne aanya ku̱tu̱gu̱ olom, kar kize ne, ‘Iróng atin i̱nna̱ la̱du̱n anyike ngeranni ki̱ti̱k ngaa lo̱o̱ce̱ ci Kanaani, lo̱o̱ce̱ ci kabahe anna ko̱,

³⁸ abarik bit rok orog ci baba boore cinanni, kar nyahak ngeranni ngaa.’

³⁹ “Ki̱jji̱na̱ zin anna ddi̱ki̱ryo̱i̱t cinanni, ‘Ming iróng ngaa neci elemi kar koboda ki annita?’

⁴⁰ “Abariz zin enne, ‘I̱tto̱na̱ atin Manyi ci kowo anna zo̱ze̱ cinne ko̱ anjilo cinne ki i̱nne̱ta̱ kar kidiman eroni cunne kubunna, kar atin i̱nna̱ nyahak ngeranni ngaa boore cinanni ele, tatuge ci baba.

⁴¹ Ming okko i̱nna̱ ngati boor cinanni, oogjai atin i̱nna̱ ngati olom cinanni, ming a̱ju̱ra̱ne̱ nege iróng aanyi do̱le̱c cinne̱ng i̱nne̱ta̱, oogjai i̱nna̱ olome cinanni.’

⁴² “Baling ka̱kku̱na̱k anna ṯu̱k wazin necu, kazi ne, ‘Oh Manyi, Ta̱mu̱ta̱dde̱n wa ddi̱ki̱ryo̱i̱t cinanni Aburaham, ming elemi i̱nna̱, anyik bai eroni ci ka̱kku̱ne̱ anna ko̱ kilemnyai.

⁴³ Cinno, kabili anna iit abanyca; ming okko do̱le̱c ci nga̱a̱ye̱ okko aṯila maam ko̱ a̱kku̱, kar anna ku̱du̱wa̱k nonno kize ne, “Ti̱na̱t, inya kuuda maam u̱gge̱ í̱jjó̱wé̱ cunne ko̱,”

⁴⁴ kar ming a̱nne̱ka̱ enne annit ne, “Uude, kar atidic kiṯilak naganaganya maam bu̱k,” anyik nonno kize ci ahala Manyi kize ngaa ci ngerrti ddi̱ki̱ryo̱i̱t cinanni.’

⁴⁵ “Baling ngen kedecca lawinet zinina, i̱ki̱ya̱ Rebekah odonga í̱jjó̱ i̱i̱nya̱wa̱. Uk zin enne mora kuk kiṯila maam, kar anna kizeya nonno ne, ‘Ti̱na̱t, inya maam u̱gge̱ kuudo.’

⁴⁶ “Kar zin kulucai í̱jjó̱ o̱o̱we̱ cinne ataman kar kize ne, ‘Uude, kar atidic anna bo̱do̱k ke̱e̱li̱k naganaganya cigunnek ko̱.’ Kuude zin anna kar zin enne ke̱e̱li̱k maam naganaganya bu̱k.

⁴⁷ “Ki̱jji̱na̱ anna nonno kizeya ne, ‘E̱e̱ni̱ dim i̱nna̱ buweenyi ngene?’ “O̱bo̱de̱ka̱ zin enne, ‘Ke̱e̱ni̱ anna buweenyi Bethuweli wa een ngerrti Nahori ngaawe wa een Milcah.’ “Kariya zin anna zi̱i̱t ungec cinne ki bo̱do̱k i̱mmo̱nga̱ni̱ ram azzin,

⁴⁸ kar anna kakatek u̱zu̱ngti̱nne̱ ku̱lu̱le̱ kala Manyi. Kinnati anna Manyi, Ta̱mu̱ta̱dde̱n wa ddi̱ki̱ryo̱i̱t cinanni Aburaham, nonno ci okkoyya annit go̱o̱le̱ ci een de̱de̱ kar kurubak alawan ngerinne ce̱e̱ze̱ ci gotoni ddi̱ki̱ryo̱i̱t cinanni.

⁴⁹ I̱yo̱ko̱ ming i̱ye̱le̱k atin i̱nna̱ bunnat kar azunne zoz cunne ngati ddi̱ki̱ryo̱i̱t cinanni, du̱wa̱ka̱n; ming iróng i̱nna̱ i̱ye̱le̱k, du̱wa̱ka̱n, kar wo̱ye̱ anna ka̱gga̱ gool ci kokkoye.”

⁵⁰ O̱bo̱dde̱k zin Labani ki baatinne Bethuwel du̱ca̱i̱t ci Aburahami izettek ne, “A̱kku̱ zoz necu ngati Manyi; i̱llo̱i̱ zoz imma ci ka̱du̱wa̱ki̱ naga zo̱ze̱ necu.

⁵¹ Icu Rebekah; bite nonno kar oto, anyik nonno kize ngaa ci ngerrti ddi̱ki̱ryo̱i̱t cunne ki i̱yo̱ko̱ ming anyahanni Manyi ko̱.”

⁵² Baling izik du̱ca̱i̱ti̱ ci Aburahami zoz ci a̱du̱wa̱ nege ko̱, akatek zin enne u̱zu̱ngtti̱ lo̱o̱c ngu̱me̱ ci Manyi.

⁵³ Uvuca zin du̱ca̱i̱ti̱ dhahab ki ziik cik ataltali gon aim ngaai ki ru̱u̱ma̱ni̱ kar kaanyik Rebekah; kar enne bo̱do̱k kaanyik kaal cik adak o̱ro̱bi̱ya̱ cik meelek amuce enne gotoni Rebekah ki yaatinne.

⁵⁴ Kar zin du̱ca̱i̱ti̱ ki gonoggi kadakto kar zin ka̱ta̱gu̱zzo̱ nginati kaal. Baling ovvo nege ingazi nge̱rre̱ti̱n ci reng, izek du̱ca̱i̱ti̱ olli Rebekah ne, “Anycang ki̱mi̱re̱ kuk ngati ddi̱ki̱ryo̱i̱t cinanni.”

⁵⁵ Ma̱i̱je̱ e̱e̱ti̱ Rebekah ki gotoni izeto ne, “Anyik arrak Rebekah komon ngatu i̱i̱nya̱ omoto kar zin atin oto.”

⁵⁶ O̱bo̱de̱k zin du̱ca̱i̱ti̱ nogo, “Ma bai alamnyettu ke̱, i̱yo̱ko̱ idiman Manyi we̱t cinanni kubunna. Anycang kuwo kar kuk ngati ddi̱ki̱ryo̱i̱t cinanni.”

⁵⁷ Izeto zin nege ne, “Ku̱tu̱yya̱ do̱le̱c kar ki̱jji̱nne̱t zoz cinne.”

⁵⁸ U̱tu̱yya̱ zin Rebekah kar zin ki̱jji̱nne̱t nonno, “Orkoryyu atidic i̱nna̱ ki e̱e̱t necu i̱yo̱ko̱ niko?” Edec zin Rebekah azi ne, “Kokko atidic anna.”

⁵⁹ I̱tto̱ni̱t zin ngooni cinne̱ng kuk maca, ki ngaa ci eela nonno ki du̱ca̱i̱t ci Aburahami ki ol ciginnek.

⁶⁰ Kar ku̱mu̱yu̱we̱t Rebekah kar kizettek ne, “Ngoonet, anyik ce̱e̱z cunne kotore kizeto i̱bbo̱nge̱t ki i̱bbo̱nge̱t; anyik bai dooli cigunnek kaamta tatuget cik mo̱ddo̱ cigge̱k.”

⁶¹ Kar zin Rebekah ki du̱cca̱k ciginnek nga̱a̱ye̱k kulutet i̱jjo̱ kar kodongtek naganaget, otodit nege bu̱k kar zin korkorrit ki du̱ca̱i̱t ci Aburahami.

U̱ru̱me̱k I̱sa̱ko̱ ngaa cinne Rebekah gool

⁶² Oboda da̱ I̱sa̱ko̱ ngati een zara Beer Lahai Roi, eci enne abak lo̱o̱ce̱ ci een Negev.

⁶³ Uk da̱ enne yo̱mo̱n imma manato, okko owoye zo̱o̱, i̱no̱n zoz cinne, kar kedev nginti reeni, acin naganaget ming a̱vvu̱.

⁶⁴ Edev Rebekah lo̱o̱c kar kicin I̱sa̱ko̱ bu̱k. Ulucai zin enne naganage cinne

⁶⁵ kar ki̱jji̱n du̱ca̱i̱t kizek ne, “Ngene e̱e̱ti̱ ci aave manato a̱kku̱ ki̱ki̱ya̱ ku̱ru̱me̱t gool ko̱?” Abarizek zin du̱ca̱i̱ti̱ nonno a̱nne̱k ne, “Een enne ddi̱ki̱ryo̱i̱t cinanni.” Idima zin Rebekah ru̱u̱m ci a̱bu̱nge̱ enne oo kar ku̱bu̱ng ele cinne.

⁶⁶ U̱du̱wa̱k zin du̱ca̱i̱ti̱ I̱sa̱ko̱ no̱ngi̱tto̱n balik u̱tu̱gu̱ enne ke̱ veelek.

⁶⁷ Uwe zin I̱sa̱ko̱ Rebekah ti̱te̱ bali abahe yaatinne Sarah ke̱, kar zin kabaito ki nonno. Ize zin enne ngaa cinne, irez enne nonno oroot; kar I̱sa̱ko̱ kobodai zinin daize bali yaatinne ke̱.